1. Anvwali afwilaña nawu anyanawu elidi?

 ENU anvwali, tweluka netu mwakeñaña kukwasha anyanenu amwiluki Yehova nikumukeña. Ilaña Nzambi hamwekanañaku. Munateli kukwasha ñahi anyanenu eluki nawu hiMuntu nawa aswini kwakwihi nayena?—Yak. 4:8.

2. Anvwali anateli kudizisha ñahi anyanawu kulonda eluki yilwilu yikwetiyi Yehova?

² Kudiza Bayibolu nawanyana diyi njila yimu yalema yakuyikwashilamu kuswina kwakwihi naYehova. (2 Tim. 3:14-17) Hela chochu, Bayibolu yashimuna njila yikwawu yakukwashilamu anyana kumwiluka Yehova. Mumukanda waYishimu, tata yawantu wamwanukishaña mwanindi hatooka nindi bayi adiwula yilwilu yaYehova yamwekenaña muyileñaleñaku. (Yish. 3:19-21) Tukuhanjeka hanjila munateli kuzatishilawu anvwali yileñaleña kulonda akwashi anyanawu eluki chekalayi Yehova.

3. Anvwali anateli kukwasha ñahi anyanawu?

³ Bayibolu yahosha nawu “yilwilu [yaNzambi] yabulaña kumwekana, yekala hatooka kufuma tuhu mpinji yaleñeliyi iseki kuya nikumbidi, muloña yamwekenaña muyuma yaleñayi.” (Rom. 1:20) Enu anvwali, chakadi nikujina mwekalaña nampinji yakwendujola nawanyanenu. Zatishenuña iyi mpinji kulonda mukwashi anyanenu amoni kunuñañana kwekala hakachi ‘kayuma yaleñawu’ nayilwilu yaYehova yayiwahi. Kutalisha haniyi nsañu, tutalenu anvwali chinateli kudizilawu kudi Yesu.

4. Yesu wazatishili ñahi yileñaleña kudizisha atumbanji twindi? (Luka 12:24, 27-30)

 ⁴ Talenu Yesu chazatishileñayi yileñaleña hakutañisha. Mpinji yimu, Yesu wayilejeli atumbanji twindi kushinshika makololu ninkenu. (Tañenu Luka 12:24, 27-30.) Yesu wadi kutena kanyama hela mutondu wudi wejima, ilaña wahosheli hadi kada ninkenu jelukishiliwu atumbanji twindi. Atumbanji atela amweneña makololu chatuukileñawu mwiwulu ninkenu chijakenukileña mwisaña. Munateli kufwikija Yesu nakwinyika iyi yuma hampinji yinakuhoshayi? Nawa chumanyi cheliliyi hanyima yakutena iyi yakutalilahu? Wadizishili atumbanji twindi chikuma chalema hachisambu niluwi lwamwekeshañayi Tata yawu wamwiwulu nindi Yehova wadiishaña nikuvwika ambuñindi ashinshika neyi chelañayi namakololu ninkenu jamwisaña.

5. Anvwali anateli kuzatisha ñahi yileñaleña kulonda adizishi mwanawu amwiluki Yehova?

⁵ Enu anvwali, komana mukwimbujola chatañishileñayi Yesu? Hadaha munateli kumuleja mwanenu hachileñaleña chimwatiyaña kuwaha, chidi neyi kanyama hela mutondu imwakeña nankashi. Chimukumulejaña, mulumbulwilenu ochu chuma chichamwekeshaña chekalayi Yehova. Kuhiñahu munateli kumwihula mwanenu kanyama hela mutondu wakeñayi. Neyi muzatisha chileñaleña chatiyañayi kuwaha, wukutiyilila nakanañachima hampinji yimukuhanjekaña hayilwilu yaYehova.

6. Chumanyi chitunateli kudizila kudi amama yaChristopher?

⁶ Komana anvwali atela kwikala nampinji yeneni yakusandujola wunsahu kutalisha hakanyama hela mutondu henohu kanda ahanjeki namwanawu hanochu chileñaleña chichamwekeshaña chekalayi Yehova? Chumichi chikukeñeka wanyi. Yesu halumbulwili yuma yayivulu kutalisha hachadaña makololu hela chatuñewaña nkenuku. Mwamweni, mpinji yikwawu mwanenu nateli kutiya kuwaha kumulumbulwila chekala ochu chileñaleña, ilaña kuhanjeka nindi mazu antesha hela kumwihula hohu lwihu chikumukwasha kutiyishisha chikuma. Talenu chuma chanukañayi manakwetu Christopher kufuma tuhu kuwansi windi nindi: “Amama ahosheleña hohu mazu antesha kulonda atukwashi kulemesha yileñaleña yitwamweneña. Chakutalilahu, neyi tudi kwakwihi namapidi, ahosheleña nawu: ‘Talenu okutoha nilubanji lukwetiwu awa mapidi! Komana chumichi chinakumwekesha wanyi nawu Yehova wabadika?’ Hela neyi tudi kwakwihi nakaluñalwiji ahosheleña nawu: ‘Talenu ana mankanda okutoha! Hiyanakumwekesha ñovu yikwetiyi Yehovaku?’” Christopher wahosheli nindi: “Ana mazu antesha ilaña alema aletesheleña tutoñojokihu chikupu.”

7. Munateli kuyidizisha ñahi anyanenu kulonda atoñojokeña hayileñaleña?

⁷ Hampinji yinakukulawu anyanenu, munateli kuyidizisha kulonda atoñojokeña nankashi hayileñaleña nikumwiluka Yehova chekalayi. Munateli kuhanjika hachileñaleña chaNzambi chimu nakuyihula anyanenu nenu, “Chumichi chinakuyidizishadi hadi Yehova.” Munateli kuhayama hakutiya yuma yikuhoshawu.—Mat. 21:16.

8. Anvwali aIsarela adiña nakukoolekanyi hampinji yendeleñawu “munjila”?

⁸ Anvwali aIsarela ayilejeli nawu adizisheña anyanawu mazu amunshimbi jaYehova hampinji yinakwendawu “munjila.” (Kuhit. 11:19) Njila jadiña jahita mumaluña amunyikala amuIsarela. Amweneña anyama ashiyashana, atuda ninkenu. Neyi yisaka yawaIsarela yinakuya munjila, anvwali adiña nakukooleka kwakuhanjeka nawanyanawu hayuma  yaleñayi Yehova. Enu anvwali ninenu mukweti kukooleka kwakuzatisha yileñaleña kulonda mudizishi anyanenu. Talenu anvwali amakwawu chelawu mwenimu.

9. Yumanyi yimunateli kudizila kudi aPunitha nawaKatya?

⁹ Mama yawantu wejina daPunitha, washakamaña mumusumba weneni wamuIndia, wahosheli nindi: “Neyi tunayi nakutala antaña jetu kumukala, twekalaña nakukooleka kwakukwasha anyanetu kulonda eluki yilwilu yaYehova yayiwahi. Nenzi nakwiluka nami anyanami elukaña chiwahi chekala yileñaleña neyi adi kwakulehi nanyikwakwa mwendaña antu amavulu nimumusumba mwenzala nyotoka.” Enu anvwali, anyanenu akavulamena wanyi mpinji yimwekalaña nawu kumaluña amawahi. Muhela Katya wakuMoldova, wahosheli nindi: “Yuma yinanukaña nankashi yitwelileña nawanvwali jami hinadiña kansi, himpinji yitwayileña kumukala. Nayisakililaña nankashi hakundizisha kufuma tuhu kuwansi wami hakwila nikaleña nampinji yakushinshika yuma yaleñayi Yehova kulonda niiluki chekalayi.”

10. Chumanyi chatela kwilawu anvwali neyi chayikalilaña kufuma mumusumba nakuya kumaluña acheñi? (Talenu chikasha chinakwila nawu “ Yuma Yinateli Kukwasha Anvwali.”)

¹⁰ Indi neyi chayikalilaña kuya kumaluña amunyikala? Amol, washakamaña niyena kuIndia, wahosheli nindi: “Kunashakamaña, anvwali amavulu azataña maora amavulu nawa hakwila wuyi kumaluña amunyikala chiña wikala namali amavulu. Hela chochu, munateli kushinshika nikuhanjeka hayileñaleña yaYehova neyi mudi mulubanza hela neyi mudi hetala dahewulu.” Neyi mutalatala chiwahi, munateli kumona yileñaleña yayivulu kwakwihi netala denu yimunateli kuleja anyanenu. (Mas. 104:24) Hadaha munateli kumona atuda, tububu, nyitondu niyuma yikwawu. Karina wakuGermanyi, wahosheli nindi: “Amama akeña nkenu, dichi hinachidiña kansi, adiña  nakunyinyikila nkenu jamwekeneña lubanji mpinji yejima yitwayileña nakwenda.” Enu anvwali, munateli kuzatisha mavidiyo ninyikanda yahosha hayileñaleña yedishawu kudi kuloñesha kwetu hakudizisha anyanenu. Mwamweni, hichikweti muloña nakumwashakamañaku, munateli kukwasha anyanenu ekaleña nampinji yakushinshika yuma yaleñayi Nzambi. Ichi dinu tuhanjekenu hayilwilu yikwawu yaYehova yimunateli kuleja anyanenu.

11. Anvwali anateli kukwasha ñahi anyanawu kulonda eluki chatukeñayi Yehova?

¹¹ Hakwila mukwashi anyanenu eluki kukeña kukwetiyi Yehova, yilejenuku njila mwamwekeshelaña anyama amavulu chakamenañawu chiwahi anyanawu. (Mat. 23:37) Munateli cheñi kuyileja yuma yayiwahi yashiyashana yitwatiyaña kuwaha muyileñaleña. Karina itwashimu hakusambila, wahosheli nindi: “Neyi tunayi nakwenda, amama anlejeleña kwimana nakutala chaambu chidi hankenu-hinkenu nilubanji lwachu chilwamwekeshaña kukeña kukwetiyi Yehova. Munahiti yaaka, ilaña nichidi kushinshika chikupu nkenu chijambuka, chajileñawu niwulombu waju. Jinatwalekihu kuñanukisha chatukeñayi Yehova.”

12. Anvwali anateli kukwashaña ñahi anyanawu kulonda eluki maana akwetiyi Nzambi? (Isamu 139:14) (Talenu cheñi mwevulu.)

¹² Kwashenu anyanenu kulonda eluki maana akwetiyi Nzambi. Yehova wukweti maana chikupu kubadika etu antu. (Rom. 11:33) Chakutalilahu, munateli kuhosha hamenji atuñikaña mavu chafumañawu kwiluña dimu nakuya kudikwawu chakadi kukala kudi kwejima. (Yoba 38:36, 37) Munateli cheñi kuhosha hamujimba wamuntu chawutuñawu munjila yakuhayamisha. (Tañenu Isamu 139:14.) Talenu tata yawantu wejina daVladimir cheliliyi mwenimu. Wahosheli nindi: “Ifuku dimu, mwanetu weyala wadimbukili nankinga nawa wadikatishili. Chimwahitili mafuku antesha, chilonda chakusukili. Ami nañodami twamulumbulwilili netu Yehova waleña nyijimba yetu munjila yakwila yiduukeña yayeni neyi tunadikatishi. Twamulejeli netu hitwamonaña yuma yamuchidiwu muyuma yatuñañawu antuku. Chakutalilahu, motoka neyi yinakisiki mumaposu hiyadiloñeshaña yayeniku. Ichi chuma chamwekeni chamukwashili mwanetu kwiluka maana akwetiyi Yehova.”

13. Anvwali anateli kukwasha ñahi anyanawu kwiluka ñovu yikwetiyi Nzambi? (Isaya 40:26)

 ¹³ Yehova watulejaña nindi tufumbuli mesu etu mumawulu nakutoñojoka hañovu yindi yakuhayamisha chiyalombolaña yuma yamumawulu. (Tañenu Isaya 40:26.) Munateli kuyileja anyanenu nenu atali mwiwulu nakutoñojoka hayuma yinamoniwu. Muhela Tingting wakuTaiwan wanukaña chuma chamwekeni hachidiñayi kansi nindi: “Ifuku dimu, ami nawamama twayili mumasaña nakwendujola nawa twamweneña hohu tutumbwa twatuvulu mwiwulu muloña hitwadiña mumusumba mwekala manoñuku. Chumichi chamwekeni hampinji yinakameneneña hekakeja dafumineña kudi akwetu atwansi nawa najinokeleña neyi chakwila nukutwesha kumukalakela Yehova nakashinshi. Amama ankwashili kutoñojoka hañovu yazatishiliyi Yehova hakuleña atuna tutumbwa twejima nikwanuka nami nateli kuzatisha ñovu yoyimu kunkwasha kuumika kweseka kudi kwejima. Hanyima yakushinshika yileñaleña haluna lwendu, nafwilileña kumwiluka Yehova chiwahi nawa nafuukwilihu kutwalekahu kumukalakela.”

14. Anvwali anateli kuzatisha ñahi yileñaleña kulonda akwashi anyanawu eluki nawu Yehova hiNzambi wamuzañalu?

¹⁴ Yuma yaleñayi Yehova yamwekeshaña nawu wekala namuzañalu nawa nakukeña nindi twiikali namuzañalu. Asayantisiti awana nawu atunyama amavulu ahemaña, kushilahu atuda ninshi. (Yoba 40:20) Kanda mumoneñahu dehi anyanenu anakuseha hampinji yinakutalawu kanyama wunakuhema? Hadaha amweni mwana kampembi wunakukiloka indi kwiji anyana katuwa anakuhema mulwawu. Ifuku dimwakamona anyanenu anakuseha hampinji yinakutalawu anyama anakuhema, mwakayanukishi nenu twakalakelaña Nzambi wamuzañalu.—1 Tim. 1:11.

15. Chumanyi chinateli kuyikwasha anvwali kwiluka chinakutoñojokawu anyanawu? (Yishimu 20:5) (Talenu cheñi mwevulu.)

¹⁵ Mpinji jikwawu, anvwali chinateli kuyikalila kuyihula anyanawu kulonda ahoshi hakukala kunakumonawu. Neyi dikukala kumukweti, munateli kuhanjeka nawanyanenu mukubabala  kulonda mwiluki yitoñojoka yawu. (Tañenu Yishimu 20:5.) Anvwali amakwawu chayipelelaña kwila mwenimu hampinji yinakushinshikawu yileñaleña nawanyanawu. Muloñadi? Muloña haniyi mpinji kwosi yuma yinateli kuyiluwañesha anyana nianvwaliku. Masahiko tata yawantu wakuTaiwan washimwini chuma chikwawu nindi: “Neyi tuya nakwendujola nawanyanetu, chidi neyi kuya kumapidi hela kwendujola kuchikumu, kakavulu ekalaña akasunuka. Muloña wachumichi, chatupelelaña kuhanjeka nawu nawa twelukaña yuma yinakutoñojokawu.” Katya ashimunawu hakusambila, wahosheli nindi: “Chinakomboka kushikola, amama antwalileña kwiluña dadiwahi dikweti nyitondu. Haniyi mpinji yayiwahi, champeleleleña kuyileja yuma yammwekeneneña kushikola hela yañakamishileña.”

16. Yisaka yinateli kwikala ñahi nampinji yakunooka nikuzañalala hampinji yinakudiluñishawu yuma yaleñayi Yehova?

¹⁶ Yuma yaleñayi Yehova yinateli cheñi kuletesha yisaka kwikala nampinji yakunooka nikuzañalala, nawa chumichi chikuletesha chisaka kudikeña chikupu. Bayibolu yahosha nawu kwekala ‘mpinji yakuseha’ ‘nimpinji yakukiloka.’ (Mukwa. 3:1, 4, tth.) Yehova waleña maluña amawahi heseki kutunateli kudiluñishila yuma yitwakeña. Yisaka yayivulu yakeña kuya kumaluña kwahembelañawu anyama, kunyikala, kumapidi hela kuyikumu. Anyana amakwawu akeña kutemoka, kuhemena munyitondu, kutala atunyama hela kusala mukaloña, mwijiya indi kwiji mukaluñalwiji. Tukweti njila jajivulu jakudiluñishilamu yuma yaleñayi Yehova!

17. Muloñadi anvwali chatela kukwashilawu anyanawu adiluñisheña kutala yileñaleña yaNzambi?

¹⁷ Mukaayi kaNzambi kakaha, anvwali nianyana akadiluñishaña chikupu yileñaleña yaYehova. Hanoyu mpinji, hitwakachiinaña anyama hela wena kutuchiinaku. (Isa. 11:6-9) Twakadiluñishaña haya nyaaka yuma yaleñayi Yehova. (Mas. 22:26) Ilaña enu anvwali, bayi muhembelela sampu iyi mpinji yinashiki hakwila dinu mwakakwashi anyanenu akatachiki kudiluñisha kutala yileñaleñaku. Hampinji yimunakuzatisha yileñaleña kudizisha anyanenu kulonda amwiluki Yehova, chakadi nikujina aketeja mazu aMwanta Davidi wahosheli nindi: “Eyi Yehova, kwosi nyidimu yidi neyi yeyiku.”—Mas. 86:8.