GAYUSI niakwaKristu amakwawu amumafuku awapostolu amweni kukala. Antu adiña nakutandisha ntañishilu yakutwamba akeñeleña kuzeyesha nikwambula yipompelu. (1 Yow. 2:18, 19; 2 Yow. 7) Iyala wejina daDiyotefwesi wadiña nakushimuna “nsañu yamakudi” hadi kapostolu Yowanu niamakwawu, wakaanini kumwekeshela chisambu akwaKristu adiña nakwenda nawa walejeleña antu amakwawu kumwimbujola. (3 Yow. 9, 10) Dichadiña niyuma hampinji Yowanu yamusonekeleliyi Gayusi. Mukanda wasonekeliyi kapostolu Yowanu mu 98 C.E., wekala muNsona jawakwaKristu jachiGiriki nawa awutenaña nawu “Mukanda Wamuchisatu Wasonekeliyi Yowanu.”

Hela chakwila wamweneña kukala, Gayusi watwalekelihu kumukalakela Yehova nakashinshi. Wamwekesheli ñahi kashinshi kindi? Muloñadi chitwatelela kumwimbujola Gayusi? Mukanda waYowanu wunateli kutukwasha ñahi kwila mwenimu?

Nsoneki waYowanu wamuChisatu waditena yomweni nindi “mukulumpi.” Chumichi chamukwashili mwanindi wakuspiritu Gayusi kumwiluka nawu kapostolu Yowanu. Yowanu wamulejeli Gayusi nindi “wakeñewa, eyi inakeña chikupu.” Nawa Yowanu wamulejeli Gayusi nindi wakola kumujimba neyi chochakolayi kuspiritu. Wamuhamekeli nikumusakilila chikupu!—3 Yow. 1, 2, 4.

Gayusi watela wadiña mukulumpi muchipompelu, ilaña mukanda hiwashimuna jiika mwenimuku. Yowanu wahamakeli Gayusi hakutambwila amanakwetu hela chakwila adiña enyi. Yowanu wamumweni nindi Gayusi washinshika nachuma cheliliyi, muloña chisambu chayambulaña ambuña aNzambi.—Kutach. 18:1-8; 1 Tim. 3:2; 3 Yow. 5.

Mazu aYowanu akusakilila hachisambu chamwekesheliyi Gayusi kudi amanakwetu amwekeshaña nawu akwaKristu endeleña mpinji yejima kufuma kwadiñayi Yowanu nakuya kuyipompelu, awa akwakwenda atela amulejeleña Yowanu yuma yamweneñawu. Hekwawu diwu amulejeleña niyuma yamwekeneña muniyi yipompelu.

AkwaKristu endeleña atela akeñeleña kushakama nawakwawu akwakwitiya. Mahotelu adiña chiwahi wanyi, adiña nakulandishilamu nikwililamu yuma yatama. Awa akwaKristu akwakwenda atoñojokeli mwamaana hakuya nakukaama nawakwawu akwaKristu.

Yowanu wamukolesheli Gayusi kumwekesha chisambu cheñi, muloña kapostolu  wamulejeli nindi “wakayikwashi [akakwenda] kwesekeja nanomu mwatiyañayi Nzambi kuwaha.” Ichi chayili mukwila nawu ayinkeleña yuma yejima yakeñekeleña hefuku dalondeleleñahu hakwila ashiki kunakuyawu nawa endeleña hamaseki. Chamwekeni hatooka chikupu nawu Gayusi welileña mwenimu, chineli Yowanu amulejeleña nawu Gayusi wekala nakukeña nawa washinshika.—3 Yow. 3, 6.

Awa akwakwenda atela adiña amishonali, antemesha aYowanu hela ankoñi endaña. Adiña nakuya nakushimwina nsañu yayiwahi. Yowanu wahosheli nindi: “Ayili nakushimwina muloña wejina dindi.” (3 Yow. 7) Yowanu wadiña nakutena Nzambi (Talenu vasi 6), dichi nhoshelu yakwila nawu “muloña wejina dindi” wateneneña ijina daYehova. Dichi, amanakwetu adiña muchipompelu chawakwaKristu ateleli kuyitambwila nachisambu. Neyi chochasonekeliyi Yowanu nindi: “Tukweti mudimu wakumwekesha chisambu kudi antu amuchidiwu kulonda twikali akwakukalakala hamu nawu muchalala.”—3 Yow. 8.

Yowanu bayi neyi wamusonekeleleña Gayusi kulonda yamusakilili hohuku. Yowanu wakeñeleña cheñi nindi yamukwashiku nakukala kweneni. Muchipompelu chawakwaKristu mwadiña muntu wejina Diyotefwesi wabulili chisambu. Walejeleña antu amakwawu kubula kumwekesha chisambu.—3 Yow. 9, 10.

Chakadi nikujina, akwaKristu ashinshika akeñeleña wanyi kushakama naDiyotefwesi. Wakeñeleña kwikala nachifulu cheneni muchipompelu nawa washimwineña nsañu yamakudi hadi kapostolu niantu amakwawu, ilaña Yowanu kwosi chifulu chamwinkeliyi. Hela chakwila Yowanu wamuteneni wanyi nindi ntañishi wakutwamba, Diyotefwesi wadiña nakukaana wunlomboli wakapostolu. Diyotefwesi chakeñeleñayi chifulu nichabuliliyi kumwekesha yilwilu yawakwaKristu chaletesheli yafumpi kashinshi kindi. Yilwilu yaDiyotefwesi yamwekeshaña antu adivwimba chiyanateli kuleta kukala muchipompelu. Dichi Yowanu wamulejeli Gayusi, ninetu makonu nindi: ‘Bayi mwimbujola yuma yatamaku.’—3 Yow. 11.

Kwambukaku naDiyotefwesi, mukwaKristu wejina daDemeterusa amutena kudi Yowanu nawu twatela kumwimbujola. Yowanu wasonekeli nindi: “Anakwetu ejima anamushimuni chiwahi Demeterusa . . . Kafwampi, ninetu tunakushimuna wunsahu hadi yena, nawa nineyi weluka neyi wunsahu wutwashimunaña walala.” (3 Yow. 12) Chidi neyi Demeterusa wakeñeleña wukwashu kudi Gayusi, nawa mukanda wamuChisatu waYowanu wadiña wawapostolu wakuyisakilila. Demeterusa diyi wamwinkeli Gayusi iwu mukanda. Hekwawu Demeterusa wadiña ntemesha waYowanu indi kwiji nkoñi wendaña, watela washimwini yuma yasonekeliyi Yowanu.

Muloñadi Yowanu chamukolesheleliyi Gayusi nindi yatwalekihu kumwekesha chisambu henohu dichadiña nakwilayi? Chumanyi chaletesheli Yowanu yamuleji Gayusi kutwalekahu? Tahindi kapostolu wakameneni nindi Gayusi nateli kuleka muloña waDiyotefwesi wabulileña kukwasha akwaKristu muchipompelu? Hichikweti muloña nachaletesheli yasonekiku, Yowanu wamulejeli Gayusi nindi: “Muntu wakoñaña yuma yayiwahi wekala kukabadi kaNzambi.” (3 Yow. 11) Dimuloña waweni wutwatelela kwililaña yuma yayiwahi nikutwalekahu kwila mwenimu.

Komana mukanda waYowanu wamuletesheli Gayusi kutwalekahu kwikala nachisambu? Chineli mukanda waYowanu wamuChisatu wekala muBayibolu nawa wakoleshaña antu amakwawu ‘kwimbujola yuma yayiwahi,’ dikwila nawu mwalala watwalekelihu kwikala nachisambu.

Tweluka wanyi nsañu jajivulu hadi manakwetu wakushankulu, Gayusi. Hela chochu, iyi nsañu yantesha yatudizishaña yuma yayivulu.

Chatachi, mpinji yikwawu etu amakwawu twalejañaku antu ashinshika neyi chochatwikwashiliwu kudi antu endeli maluña amalehi. Hela chochu, bayi neyi antu ejima amuchipompelu chawakwaKristu makonu endaña maluña amalehi nakushimwina nsañu yayiwahiku. Ilaña kufwana Gayusi, tunateli kukwasha nikukolesha antu endaña adi neyi ankoñi añiinza niañodi jawu. Hela tunateli kukwasha amanakwetu niahela ayaña nakukalakela kwiluña kwabula akwakushimwina aWanta mumaluña amwituña detu hela kwituña dacheñi. Dichi “ikalenu nachisambu mpinji yejima.”—Rom. 12:13; 1 Tim. 5:9, 10.

Chamuchiyedi, twatela kuhayama wanyi neyi tumona antu anakutiyañana wanyi nawakulumpi muchipompelu makonu. Dichamwekeni kudi Yowanu nikapostolu Pawulu. (2 Kor. 10:7-12; 12:11-13) Hanu dinu tunateli kwila ñahi neyi tumona kukala kwamuchidiwu muchipompelu? Pawulu wamukolesheli Timotewu nindi: “Nduñu yaMwanta hatela kuzuñaku, ilaña watela kwikala wamwovu kudi antu ejima, washikilamu kutañisha akwawu, wadiwunjikaña neyi anamuvulumuni, yadizisheña namuchima wamwovu antu adikañaña.” Neyi tuwunda hela chakwila anatuvulumuni, antu anatuvulumuni ayaña nakwikala awunda chovu-chovu nkuminaku akuleka. Nawa Yehova “wukuyileñela kubalumuka munyichima kulonda ekali nakwiluka kwalala kwakwiluka chalala.”—2 Tim. 2:24, 25.

Chamuchisatu, akwetu akwaKristu amukalakelaña Yehova iku anakumona makabi twatela kuyisakilila hakukalakala nakashinshi. Kapostolu Yowanu wamuhamekeli Gayusi nawa wamulejeli nindi wadiña nakwila yuma yaloña. Munjila yoyimu, aeluda makonu niwena atela kulondela cheliliyi Yowanu kuhitila mukukolesha amanakwetu niahela kulonda ‘abuli kuzeya.’—Isa. 40:31; 1 Tesa. 5:11.

Mukanda wasonekeliyi kapostolu Yowanu kudi Gayusi, wekala namazu akushika ku 219 muchiGiriki nawa diwu mukanda wekala namazu antesha muBayibolu. Ilaña, wakwashaña akwaKristu makonu.