1, 2. (a) Mazu aYesu ekala haMatewu 24:12 ateneneñanyi? (b) Mukanda waYilwilu wamwekeshaña ñahi nawu akwaKristu amumafuku awapostolu amwekesheleña kukeña? (Talenu mwevulu wakutachikilahu.)

CHINJIKIJILU chimu chashimwiniyi Yesu kutalisha “kukuma kwanshakaminu yamakonu” chadiñi chakwila nawu “kukeña kwawantu amavulu kwakakeha.” (Mat. 24:3, 12) Mumafuku awapostolu, aYudeya aditeneneña nawu hiyantu aNzambi kukeña kwawu kwamukeñeliwu Nzambi kwakeheli.

² Kwambukaku, akwaKristu amavulu hayina mpinji adiña namudimu “wakushimwina nsañu yayiwahi hadi Kristu” nawa amwekesheleña nawu amukeña Nzambi, akwawu akwaKristu niantu abula kwitiya. (Yil. 2:44-47; 5:42) Hela chochu, kukeña kwawatumbanji amakwawu aYesu amumafuku awapostolu kwakeheli.

3. Yumanyi yatela yaletesheli kukeña kwawaKristu amakwawu kukehi?

³ Yesu Kristu asañwiliwu walejeli akwaKristu ashakamineña muEfwesesa mumafuku awapostolu nindi: “Nakuwani naniwu  muloña, muloña wunaleki kukeña kuwadiña naku hakusambila.” (Chim. 2:4) Chumanyi chaletesheli? Awa atumbanji twaKristu amumafuku awapostolu atela aluwankeni nayitoñojoka yamukaayi. (Efwes. 2:2, 3) Neyi chidi nyisumba yamakonu, Efwesesa yamumafuku awapostolu mwadiña yilwilu yatama. Wadiña musumba wamaheta chakwila antu ashili nyichima yawu hakudiluñisha, kuhema nikushakama chachiwahi. Chihandilu chakudiluñisha dichaletesheli abuli kwikala nakukeña. Kubombelahu, yilwilu yawukapwa nsonyi niyilwilu yatama yaswejeli nankashi.

4. (a) Antu anakubula ñahi kumwekesha kukeña makonu? (b) Yumanyi yisatu yitunateli kuleka kukeña?

⁴ Wuprofwetu waYesu kutalisha hakukeña kunakukeha wunakushikijewa nimakonu. Makonu antu amukeña wanyi Nzambi. Antu amavulu analeki kumukuhwelela nakutachika kukuhwelela nyitayi yawantu nawu yikumanisha kukala kwawu. Dichi, kukeña kwawantu amakwawu abulaña kudifukula kudi Yehova Nzambi kunakukeha. Hela chochu, neyi chochadiña yuma muchipompelu chamuEfwesesa chamumafuku awapostolu, akwaKristu alala makonu anateli kudishindamena nawa kukeña kwawu kunateli kukeha. Tukuhanjeka hayuma yisatu yitunateli kuleka kukeña: (1) Yehova, (2) chalala chamuBayibolu, (3) niamanakwetu.

5. Muloñadi chitwatelela kumukeña Nzambi?

⁵ Hefuku dodimu hahosheliyi nindi kukeña kwakakeha, Yesu wahosheli hadi muntu walema itwatela kukeña. Wahosheli nindi: “‘Keñaku Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima.’ Ilu dilu lushimbi lwabadika nawa lwakusambila.” (Mat. 22:37, 38) Mwamweni, neyi tumukeña Nzambi chikupu chikutukwasha kwovwahila nshimbi jaYehova, kuumika nikuhela yuma yatama. (Tañenu Masamu 97:10.) Hela chochu, Satana nikaayi kindi anakukeña nawu tubuli kumukeña Nzambi.

6. Yumanyi yatama yafumaña mukubula kumukeña Nzambi?

⁶ Antu mukaayi adana kukeña. Chatela amukeñi Nleñi yawu, ‘anakudikeña awenawu.’ (2 Tim. 3:2) Kanu kaayi kanakuyuulawu kudi Satana kanakuletesha antu akeñi “yuma yafwilaña mujimba, yuma yafwilaña mesu nikudisamba nayuma yikwetiyi muntu.” (1 Yow. 2:16) Kapostolu wasoñamishili akwawu akwaKristu kutalisha hakuditiyisha kuwaha kumujimba nindi: “Kutoñojoka hayuma yakumujimba, kwatwalaña kukufwa . . . muloña kutoñojoka hayuma yakumujimba kwaletaña nkunyi naNzambi.” (Rom. 8:6, 7) Mwamweni, antu afwilaña maheta nielaña wuvumbi aditoñeshaña hayuma yeliliwu nawa chayikataña kumuchima.—1 Kor. 6:18; 1 Tim. 6:9, 10.

7. Kukalanyi kunakumonawu atumbanji twaKristu makonu?

⁷ Mumatuña amakwawu, ntañishilu yakwila nawu Nzambi wekalaku wanyi, ntañishilu yakwila nawu chakala kwiluka nawu Nzambi wekala kwoku niyakwila nawu yuma yadinjilili yayeni yekalaku kulonda antu abuli kumukeña Nzambi nikumukuhwelela. Analeteshi antu amavulu kukuhwelela nawu muntu wakuhwelela nawu kwekala Nleñi wudana maana. Nawa asayantisiti ayilemesha nankashi, dichinaleteshi antu amakwawu kubula kumukuhwelela Nleñi. (Rom. 1:25) Neyi tukutiyililaña kuntañishilu yamuchidiwu, tunateli kuleka kumukuhwelela Yehova nawa kukeña kwetu kukukeha.—Heb. 3:12.

8. (a) Yumanyi yayineñeshaña antu jaYehova? (b) Mazwinyi itwawanaña Mwisamu 136?

 ⁸ Kutoñojoka hayuma yinakutuneñesha kunateli kuzeyesha chikuhwelelu chetu nawa kukeña kutwamukeña Nzambi kunateli kukeha. Wejima wetu twaneñaña chineli tunakushakama mudinu ituña datama didi mumakasa aSatana. (1 Yow. 5:19) Hadaha tunakumona kukala kudi neyi wushinakaji, yikatu niwuzweñi. Indi kwiji tunakumona kukala kwakudimona neyi twashikilamu wanyi, yuma yitwakuhwelelaña yinazatiki wanyi niyiluwa yetu. Bayi twiteja yuma yamuchidiwu yituleteshi kumona netu Yehova natumbi chisayikila. Ilaña, twatela kutoñojokahu chikupu hamazu aYehova ashiikayi nindi watukeña. Twawanaña mazu amuchidiwu haMasamu 136:23, ahosha nawu: “Watwanukili hitwabulili kulema; luwi lwindi lwahaya nyaaka.” Mwamweni, kukeña kwakeñayi Yehova antu jindi kwahaya nyaaka. Dichi, tunateli kukuhwelela netu watiyaña “kulembelela kwetu” nawa wakulaña.—Mas. 116:1; 136:24-26.

9. Chumanyi chamukwashili Pawulu kutwalekahu kumukeña Nzambi?

⁹ Kufwana ñimbi yamasamu, Pawulu wakolesheweli chatoñojokeliyi hachakwashañayi Yehova. Pawulu wasonekeli nindi: “Yehova diyi nkwashi yami, hinukutiya womaku, antu akuñila chumanyi?” (Heb. 13:6) Chikuhwelelu chakola chadiñayi nachu Pawulu mudi Yehova chamukwashili kuumika kukala. Yuma yatama yamuneñesheleña wanyi. Hampinji yadiña mukaleya, Pawulu wasonekeli nyikanda yayivulu yakukolesha. (Efwes. 4:1; Fwi. 1:​7; Fwile. 1) Nihampinji yahitiliyi mukukala kweneni Pawulu watwalekelihu kumukeña Nzambi. Chumanyi chamukwashili kuumika? Watwalekelihu kushindamena “Nzambi wakukundeja kwejima, watukundejaña mulukadi lwetu lwejima.” (2 Kor. 1:​3, 4) Tunateli kumwimbujola ñahi Pawulu nikutwalekahu kumukeña Yehova?

10. Tunateli kutwalekahu ñahi kumukeña Yehova?

¹⁰ Chuma chasweja kulema chitwatela kwila hakwila nawu tutwalekihu kumukeña Yehova achishimwini kudi Pawulu. Wayisonekeleli akwawu akwakwitiya nindi: “Bayi muleka kulombaku.” Kuhiñahu wasonekeli nindi: “Lombenuña chakadi kuzeya.” (1 Tesa. 5:17; Rom. 12:12) Kuhanjeka naNzambi mukulomba dichuma chinateli kukolesha wubwambu wetu nayena. (Mas. 86:3) Neyi twikalaña nampinji yakumulejamu Yehova chitunakutoñojoka nichitunakutiya, chikutukwasha wanyi ilaña tukukundama kwakwihi naTata yetu wamwiwulu “watiyaña mwalombañawu antu.” (Mas. 65:2) Kubombelahu, neyi twiluka netu Yehova nakuli kulomba kwetu, kukeña kwetu kutwamukeña kukutwalekahu. Tukwiluka netu “Yehova wudi kwakwihi nawantu ejima akumutambika.” (Mas. 145:18) Neyi tumukuhwelela Yehova chikupu, chikatukwasha kuumika kukala kwasweja.

11, 12. Tunateli kusweja ñahi kukeña chalala chamuBayibolu?

¹¹ Etu akwaKristu twalemesha chalala. Mwizu daNzambi dimwekala chalala. Halombeleñayi kudi Tata yindi Yesu wahosheli nindi: “Izu deyi dichalala.” (Yow. 17:17) Dichi, hakwila nawu tukeñi chalala, chiña twiluka chikupu chalala chaMwizu daNzambi. (Kol. 1:10) Hela chochu, kwakeñekaña kwila yuma yayivulu kubadika hakwiluka hohu yuma. Ilukenu nenu nsoneki yaMasamu 119 watukwashili kwiluka mwatalisha kukeña chalala  chamuBayibolu. (Tañenu Masamu 119:97-100.) Komana twekala nampinji yakutaña nikutoñojoka hayibalu yamuNsona ifuku dejima? Tunateli kutwalekahu kukeña chalala chamuBayibolu neyi tutoñojokaña hachitunateli kuzatisha yuma yitwadizaña.

¹² Ñimbi yamasamu watwalekelihu kuhosha nindi: “Mazu eyi iwahoshaña nayitiyaña o kutowala! Kutowala kunayitiyaña mukanwa kami niwuchi hanyima!” (Mas. 119:103) Munjila yoyimu, twatiyaña kutowala kwayakuda yamuBayibolu yitwatambwilaña mukuloñesha kwaNzambi. Twatela kuyidaña mpinji yejima kulonda yitwanukisheña “mazu alala” achalala kulonda tuyizatisheña hakukwasha amakwawu.—Mukwa. 12:10.

13. Chumanyi chamukwashili Yeremiya kukeña chalala chamuBayibolu, nawa chamukwashili ñahi?

¹³ Kaprofwetu Yeremiya wakeñeli chalala chamuNsona. Talenu chamweneñayi mazu aNzambi. “Mazu eyi ayiweni, ninami nayidiili. Mazu eyi anluñishili, antiyishili kuwaha mumuchima wami. Muloña antenena dehi ijina deyi, eyi Yehova Nzambi wamazaza.” (Yere. 15:16) Yeremiya wadiili mazu aNzambi muchifwikija kuhitila mukuyitoñojokahu chikupu. Chumichi chamukwashali kwikala namuchima wakusakilila hakumutena nejina daNzambi. Komana kukeña chalala chamuBayibolu kunatukwashi kwiluka kukooleka kutukweti kwakwikala nejina daNzambi nikushimwina nsañu yaWanta munanu mafuku akukuminina?

14. Tunateli kukeña ñahi chalala chamuBayibolu?

¹⁴ Yumanyi yikwawu yinateli kutukwasha kukeña chalala chamuBayibolu kubombela hakutaña Bayibolu ninyikanda yashindamena haBayibolu? Kuyaña nakupompaña mpinji yejima kunateli kutukwasha kukeña chalala chamuBayibolu. Kudiza Bayibolu mumulungu kuzatisha Kaposhi Kakutalila diyi njila mutwadizilaña chalala. Hakwila nawu twiluki munatalishi nsañu yitunakudiza, twatela kuloñeshelaña chadimu Kaposhi Kakutalila Kakudizamu. Tunateli kwila mwenimu kuhitila mukutaña nsona jamuBayibolu jejima jidimu. Makonu, antu anateli kuloñolola Kaposhi  Kakutalila hawebusayiti ya jw.org/lun hela ha JW Library app yidi mumadimi ashiyashana. Yozelu yikwawu yazatikaña namalayiti yekala yaswayi kuzatisha hakuwana nsona jinateniwu muchibaaba chitunakudiza. Hela chakwila tukweti wanyi iyi yozelu, kutaña iji nsona nakanañachima nikutoñojokahu chikupu chikutukwasha kukeña chalala chamuBayibolu.—Tañenu Masamu 1:2.

15, 16. (a) Kwesekeja naYowanu 13:34, 35, lushimbinyi lutwatela kulondela? (b) Muloñadi chitukuhoshela netu kwila tukeña amanakwetu chakadi kukeña Nzambi nichalala chamuBayibolu nehi?

¹⁵ Hawufuku wakukumishaku hamaseki, Yesu walenjeli atumbanji twindi nindi: “Inakuyinka lushimbi lwaluha lwakwila nawu, mukeñañani; neyi chinayikeña ami, ninenu nawa keñañanenu. Neyi mukeñañana, dihu hakuyilukilawu kudi antu ejima nawu mudi atumbanji twami.”—Yow. 13:34, 35.

¹⁶ Twatela kukeña amanakwetu niahela hakwila nawu tumukeñi Yehova. Twatela kuyikeña wejima wawu. Kapostolu Yowanu wasonekeli nindi: “Muntu wabula kukeña manakwindi amonañayi namesu, hakutwesha kukeña Nzambi abula kumonayiku.” (1 Yow. 4:20) Cheñi, kwila tukeña Yehova niamanakwetu chakadi kukeña chalala chamuBayibolu nehi. Muloñadi? Muloña kukeña chalala chamuBayibolu chikutukwasha kwovwahila nshimbi jamuNsona jahosha hakukeña Nzambi niamanakwetu.—1 Pet. 1:22; 1 Yow. 4:21.

17. Tunateli kumwekesha ñahi kukeña?

¹⁷ Tañenu 1 Atesalonika 4:9, 10. Tunateli kumwekesha ñahi netu twakeña antu amuchipompelu chetu? Manakwetu hela muhela wakashinakaji chinateli kumukalila kuya kukupompa kwawaKristu. Ntuluwa nateli kukeña wukwashu wakumuloñeshela itala dindi. (Yak. 1:27) Amanakwetu niahela ejima chili atwansi hela akulumpi anateli kuneña hela kumona kukala kudi kwejima, dichi wejima wawu akeñekaña kuyikundeja nikuyikolesha. (Yish. 12:25; Kol. 4:11) Twamwekeshaña chikupu netu twakeña amanakwetu munhoshelu nimuyilwilu kuhitila mukwakamena “akwetu akwakwitiya.”—Ñal. 6:10.

18. Chumanyi chikutukwasha kumanisha kukala nawakwetu akwakwitiya?

¹⁸ Bayibolu yashimwineñahu dehi nawu “mafuku akukuminina” akanu kaayi katama antu akadikeñaña aweni nawa akekala nalwisu. (2 Tim. 3:1, 2) Etu akwaKristu, twatela kuzata nañovu kulonda tutwalekihu kumukeña Nzambi, kukeña chalala chamuBayibolu niakwetu antu. Mpinji yikwawu tunateli kubula kutiyañana nawakwetu akwakwitiya. Hela chochu, neyi tumanisha kukala munjila yakukeña nawa mukuwunda, chipompelu chikwikala mukuwunda! (Efwes. 4:32; Kol. 3:14) Dichi kukeña kwetu bayi kukehaku! Tutwalekenuhu kumukeña Yehova, Izu dindi niamanakwetu.