1, 2. (a) Kukalanyi kwamonañawu anyana amavulu ashakamaña kumatuña acheñi? (b) Achinu chibaaba chikwakula malwihwinyi?

JOSHUA wahosheli nindi: “Kufuma tuhu kuwansi wami, nahosheleña hohu muchidi wawanvwali jami añiinza hetala nikuchipompelu. Ilaña chineñilili shikola, natachikili kuzatisha idimi damunodu iluña. Chimwahitili yaaka yantesha, nalekeli kuzatisha idimi dawanvwali. Kwosi jinatiyileña hakupompa nawa nenjilili wanyi chisemwa chawanvwali.” Bayi neyi antu ejima adizaña nyichidi swayi neyi chadiziliyi Joshua.

² Makonu, antu akubadika ha 240,000,000 ashakamaña wanyi mumatuña avwalikililiwu. Neyi mudi nvwali washakamaña mwituña dacheñi, munateli kukwasha ñahi anyanenu kuspiritu kulonda atwalekihu “kwenda muchalala”? (3 Yow. 4) Nawa antu amakwawu anateli kukwashana ñahi?

3, 4. (a) Anvwali anateli kukwasha ñahi anyanawu kulonda ayimbujoli? (b) Yumanyi yatela kubula kukuhwelelawu anvwali kudi anyanawu?

³ Yuma yimwelaña enu anvwali yikukwasha anyanenu kwikala  munjila yaya kuwumi wahaya nyaaka. Neyi anyanenu akumona munakusambila “kukeña Wanta,” niwena akushindamenaña hadi Yehova hayuma yakeñañawu muchihandilu. (Mat. 6:33, 34) Dichi shakamenuña chihandilu chakubula kufwila maheta. Keñenu yuma yakuspiritu bayi yakumujimbaku. Kudiñijaña munyikudi nehi. Keñenu “maheta amwiwulu” niwubwambu naYehova bayi “kulema kwafumaña kudi antuku.”—Tañenu Maku 10:21, 22; Yow. 12:43.

⁴ Ikalenuña nampinji yakuhanjeka nawanyanenu. Yilejenu nenu mwatiyaña kuwaha neyi atwamijaku Yehova chatela akeñi maheta kulonda aditiyisheña kuwaha aweni hela kuyitiyishenu kuwaha. Bayi mutoñojokaña neyi chatoñojokañawu antu abula kwitiya, ahoshaña nawu anyana atela kukwasha anvwali kulonda ashakameña chiwahi. Ilukenu nenu, ‘anyana hiyatela kukeñela anvwali jawu yumaku, chiña anvwali diwu atela kukeñela anyanawu yuma.’—2 Kor. 12:14.

5. Anvwali ateleladi kuhanjeka nawanyanawu hadi Yehova?

⁵ Antu “akunyuza yamadimi ejima” anakwinza mukuloñesha kwaYehova neyi chashimwineñahu dehi. (Zek. 8:23) Ilaña kubula kwiluka muchidi kunateli kuyikojeja mukañanyi kudizisha anyanenu chalala. Anyana diwu atudizi aBayibolu amamawahi imwatela kudizisha kulonda ‘amwiluki’ Yehova hakwila nawu akahandi haya nyaaka. (Yow. 17:3) Hakwila nawu anyanenu amwiluki Yehova, mwatela ‘kuhanjeka nawu’ mpinji yejima yayiwahi.—Tañenu Kuhituluka 6:6, 7.

6. Anyanenu anateli kuhetela ñahi mukudiza idimi denu? (Talenu mwevulu wakutachikilahu.)

⁶ Anyanenu anateli kudiza muchidi wahoshañawu munodu iluña kushikola hela muchituñilu, ilaña hakwila nawu eluki chikupu muchidi wenu mwatela kuhanjeka nawu. Kubombela hakuhanjeka nawu munjila yayiwahi, mwatela kuyidizisha idimi denu. Kuhosha madimi ayedi kwakwashaña anyanenu kutoñojoka nakashinshi nikwiluka chakwila yuma. Chikuyikwasha cheñi kushimwina mumadimi ayedi. Carolina wukweti avwali jindi añiinza wahosheli nindi: “Kupompa muchipompelu mwazatishañawu idimi dacheñi kwakala. Ilaña kukwasha chipompelu mudi kukankila kwaletaña muzañalu.”

7. Mukwila ñahi neyi anyana anakuhosha idimi dacheñi?

⁷ Kubombelahu, neyi anyana enjilila chisemwa nimuchidi wakunodu iluña, amakwawu anateli kuleka kuhanjeka nawanvwali jawu mwidimi dawu. Anvwali neyi anyanenu anadizi, kwila ninenu mudiza idimi damunodu iluña nehi? Munateli kukwasha anyanenu kwikala akwaKristu neyi mwiluka idimi dazatishañawu neyi anakuhanjeka, anakuhema hela neyi adi kushikola nawa munateli kwihula antañisha jawu. Chakadi nikujina, kudiza muchidi kwasendaña mpinji nawa kwakeñekaña kudishaku nikudizoza. Neyi mwanenu hikamama, kwila mudiza idimi dawatumama kulonda muhanjekeña nindi nehi? Neyi mwanenu niyena wahoshaña chiwahi idimi dacheñi, mukudiza idimi dinakuhoshayi kulonda muhanjekeña nindi, indi nenu mwacheñi? *

8. Munateli kukwasha ñahi anyanenu neyi chakwila mwelukisha wanyi idimi?

⁸ Kuhosha hohu chalala, chinateli kuyikalila anvwali añiinza kwilukisha idimi dinadiziwu anyanawu. Kubula kwiluka idimi kukuletesha anvwali chiyikalileña kudizisha  anyanawu maana ekala ‘munsona jajila.’ (2 Tim. 3:15) Neyi mweluka wanyi idimi dahoshañawu anyanenu, chochimu munateli kuyikwasha kumwiluka nikumukeña Yehova. Eluda wejina daShan wahosheli nindi, “Amama akañenyeña kuhosha idimi ditwahosheleña nawa ami nimuhelami twelukili wanyi idimi dahosheleñawu. Ilaña twayimweneña anakudiza, anakulomba nikuzata nañovu kulonda alomboli kudifukula kwachisaka, twelukili netu kumwiluka Yehova dichuma chalema.”

9. Anvwali anateli kukwasha ñahi anyanawu anakukeña kudiza mumadimi ayedi?

⁹ Anyana amakwawu anateli kudiza hadi Yehova mumadimi ayedi, idimi dazatishañawu kushikola hela dazatishañawu kwitala. Dichaleteshaña anvwali amakwawu azatisheña nyikanda, mazu akwatawu dehi hela mavidiyo amunyichidi yejima yiyedi. Mwamweni, anvwali añiinza atela kwikala nampinji kulonda akwasheña anyanawu kwikala nawubwambu wakola naYehova.

10. (a) Hinyi watela kutonda chipompelu mwakuya? (b) Chumanyi chatela kwilawu henohu kanda afuukuli?

¹⁰ Neyi “enyi” ashakamaña hahalehi nawaYinsahu ahoshaña idimi dawu, atela kuyaña nakupompa muchipopelu chamunodu iluña. (Mas. 146:9) Ilaña neyi kudi chipompelu chidi mukamwihi chazatishaña idimi dimwahoshaña, chipompelu chamuchidinyi mumukuya kulonda anyanenu ahetelimu? Mutu wachisaka watela kutonda kwakuya neyi natoñojokihu chikupu, kulomba nikwihula mwinikwindi hela anyana. (1 Kor. 11:3) Yikumanyi yatela kutoñojokayi mutu wachisaka? Yumanyi yikumukwasha? Twayenu tuhanjeki hayikuma yimu.

11, 12. (a) Idimi dinateli kukwasha ñahi mwana hakupompa? (b) Muloñadi anyana amakwawu chiyakaaninañawu kudiza idimi dawanvwali jawu?

¹¹ Anvwali atela kwiluka yuma yinakukeñeka kudi anyanawu. Hela chochu, hichikweti muloña nedimiku, hakwila nawu mwana yeluki chalala, mwatela kumudizisha chalala mpinji yejima chatela mushindameni hakupompa hohu. Toñojokenu hachumichi: Anyana neyi anakupompa mwidimi datiyañawu chikupu anateli kudiza chalala hakupompa chakwila anvwali jawu anateli nikuhayama. Ilaña ichi chuma chinateli wanyi kuzatika neyi anyana atiyaña wanyi odu idimi. (Tañenu 1 Akorinda 14:9, 11.) Nawa mwana watwalekañahu wanyi kuzatisha idimi dawanvwali jindi. Anyana amakwawu anateli kwiluka chakwakula hakupompa nichakuhana jimpanji mwidimi dawanvwali jawu ilaña chakadi kufuma hamuchima.

¹² Kubombelahu, atwansi adizaña yuma yayivulu bayi neyi muchidi hohuku. Dicheliliyi Joshua itwatena hakusambila. Muhelindi Esther, wahosheli nindi, “anyana adizaña muchidi wawanvwali jawu, chisemwa ninsakililu hampinji yoyimu.” Neyi anyana akwiluka wanyi chisemwa chawavwali jawu, anateli kukaana kudiza idimi dawavwali jawu nikubula kwikala nachikuhwelelu. Anvwali añiinza atela kwiladi?

13, 14. (a) Chisaka chimu chawañiinza chayilileñadi nakupompa muchipompelu chazatishaña idimi damunodu iluña? (b) Anvwali atwalekelihu ñahi kwikala akola kuspiritu?

¹³ Anvwali akwaKristu akeñaña anyanawu kwikala anha kuspiritu chatela wena aheteleñamu hohu. (1 Kor. 10:24) A Samuel atata yaJoshua naEsther, ahosheli nawu: “Ami nañodami twelukili muchidi wutwateleleli kudizishilamu anyanetu chalala nawa twalombeli maana. Ilaña ñakwilu yadiña wanyi  neyi chitwakuhweleleli. Chitwamweni netu anakutiya yuma yantesha hakupompa mwidimi detu, twabuukilili muchipompelu chazatishileña idimi damunodu iluña. Wejima wetu twayaña nakupompa nimumudimu wakushimwina. Twatambikaña cheñi amabwambu jetu kwinza nakuda nanetu nikuhema. Yuma yejimiyi yakwashili anyanetu kwiluka amanakwetu nikumwiluka Yehova kwikala Nzambi yawu, Tata yawu nawa Ibwambu dawu. Yumiyi yadiña yalema kubadika kwiluka hohu idimi ditwahoshaña.”

¹⁴ A Samuel abombelelihu nawu: “Hakwila nawu tutwalekihu kwikala akola kuspiritu, ami niñodami twayileña nakupompa mwidimi detu. Twadiña nanyidimu yayivulu nawa twazeyeleña. Twamuhamekaña Yehova hakutukiswila chitwazatili nañovu nikudihana. Anyanetu ejima asatu anakumukalakela Yehova neyi apayiniya ampinji yejima.”

15. Chumanyi chaletesheli muhela wejina daKristina kutachika kuya muchipompelu chazatishañawu dimi damunodu iluña?

¹⁵ Anyana akula dehi elukaña nawu anateli kumukalakela chiwahi Yehova muchipompelu chazatishaña idimi datiyishishañawu. Neyi dichanakukeñawu, anvwali atela kumona wanyi nawu anyana anakuyovwahila wanyi. Kristina wahosheli nindi: “Nelukili chantesha idimi dahosheleñawu anvwali ilaña nelukili chikupu idimi ditwazatishileña kuchipompelu. Hinadiña nayaaka 12, nayili kukupompa kweluña kwazatishileñawu idimi ditwazatishileña kushikola. Hakusambila, nelukili nami yuma yatañishileñawu yadiña yalala. Natachikili cheñi kuhimpa idimi hampinji yinatachikili kulomba mwidimi dinazatishileña kushikola. Nalombeleña kudi Yehova chakufuma hamuchima!” (Yil. 2:11, 41) Chakuliliyi, Kristina wayilejeli anvwali jindi kulonda yayeña kuchipompelu chazatishileña idimi damunodu iluña. Wahosheli nindi: “Kudiza hadi Yehova mwidimi dinazatishileña kushikola kwankwashili kutiyishisha yikuma yejima.” Chimwahitili kapinji kantesha, Kristina wekalili payiniya wampinji yejima.

16. Muloñadi muhela Nadia chayilileñayi muchipompelu chazatishileña idimi damunodu iluña?

¹⁶ Enu atwansi, mwakeñaña kwikala muchipompelu chazatishaña idimi damunodu iluña? Neyi mwakeñaña, dihulenu nenu muloñadi. Neyi muya kuchipompelu chamuchidiwu chikuyikwasha kuswina kwakwihi naYehova? (Yak. 4:8) Tahindi munakukeña kuya muloña munakutoñojoka nenu mukwikala nanyidimu yantesha? Nadia wunakukalakela haBeteli wahosheli nindi: “Ami nianyiki jami chitwashikijili yaaka yawukampululu, twakeñeli kuya kuchipompelu kwazatishileña idimi damunodu iluña.” Ilaña anvwali jindi elukili nawu neyi akuyaña muchipompelu chacheñi akwilaña chiwahi wanyi kuspiritu. “Twasakililaña muloña anvwali jetu azatili nañovu hakutudizisha idimi dahoshañawu nikutwalekahu kwikala muchipompelu chazatishaña idimi dacheñi. Chumichi chinatukwashi muchihandilu nikutwikwasha kulonda tukwashi amakwawu kumwiluka Yehova.”

17. (a) Yehova wenka anyi mudimu wakukulisha anyama? (b) Anvwali anateli kulomba ñahi wukwashu hakudizisha anyanawu chalala?

¹⁷ Yehova wenka anvwali mudimu wakukulisha anyana muchalala, bayi ankaka jawu hela muntu wacheñiku. (Tañenu Yishimu 1:8; 31:10, 27, 28.) Hela chochu, anvwali abula kwiluka idimi dahoshañawu  munodu iluña akeñekaña wukwashu kulonda adizisheña anyanawu yuma yikuyishika hamuchima. Iyi ntanjikililu bayi neyi yatalisha mukwila nawu anvwali akuyitambula mudimu wawu wakukulisha anyanaku, ilaña hinjila yimu yakuyifumbilamu “nikuyikonkomwena kwesekeja nachakeñañayi Yehova.” (Efwes. 6:4) Chakutalilahu, anvwali anateli kwihula aeluda muchipompelu chakulombola kudifukula kwachisaka nikuyikwasha kulonda anyanawu ekali namabwambu amawahi.

18, 19. (a) Amanakwetu niahela apama kuspiritu anateli kukwasha ñahi atwansi? (b) Anvwali atela kutwalekahu kwiladi?

¹⁸ Chakutalilahu, anvwali anateli kutambika yisaka yikwawu kulonda adibombi nawu hakudifukula kwachisaka. Cheñi, atwansi amavulu akulilañaku kuspiritu, chakutalilahu, neyi adi nawakwawu atwansi mumudimu wakushimwina nikuhema nawu. (Yish. 27:17) Shan itwatena hakusambila wahosheli nindi: “Inakwanuka amanakwetu anhembeli chiwahi. Neyi ankwasha kuloñesha mpanji mushikola, nadizilileñaku jajivulu. Nawa nadiluñishileña neyi tunakuhema nawakwetu.”

¹⁹ Hela chochu, antu akutondawu kudi anvwali kukwasha anyanawu atela kuyidizisha anyana kwikala nakavumbi kudi anvwali jawu nikubula kusupisha anvwali, ilaña bayi azata mudimu wejima watela kuzatawu anvwaliku. Kubombelahu, ana anakukwasha atela kwikala nayilwilu yayiwahi, bayi yikuletesha antu muchipompelu hela akunji atachiki kujinoka. (1 Pet. 2:12) Anvwali bayi alekela antu acheñi kuyidizishila anyanawu chalalaku. Atela kwiluka yuma yinakuyidizishilawu kudi amakwawu nawa atela kutwalekahu kuyidizisha anyanawu awenawu.

20. Anvwali anateli kukwasha ñahi anyanawu kwikala ambuña aYehova ashinshika?

²⁰ Enu anvwali, lombenu kudi Yehova kulonda yayikwashi nawa zatenu hakumina ñovu jenu. (Tañenu 2 Kushindulula 15:7.) Kwashenu mwanenu kwikala nawubwambu wawuwahi naYehova kubadika yuma yidi yejima. Zatenu nañovu kulonda Izu daNzambi dimushiki mwanenu hamuchima. Kuhwelelenu nenu mwanenu nateli kwikala kambuña aYehova wamuwahi. Neyi anyanenu azatisha yuma yinakudizawu Mwizu daNzambi nikwimbujola yuma yimunakwila, mukutiya neyi chatiyiliyi kapostolu Yowanu wahosheli kutalisha hadi anyanindi akuspiritu nindi: “Kwosi chuma chikwawu chanzañaleshaña chikupu kubadika ichi chakutiya nawu: anyanami anatwalekihu kwenda muchalala.”—3 Yow. 4.