ANVWALI jami abuukilili kuCanada mu 1910 kufuma kuTbilisi muGeorgia, nakushakama muchana kwakwihi naPelly, Saskatchewan, kuCanada. Navwalikili mu 1928, nawa twadiña anyana 6, yami kabinda. Atata afwili henohu kunashali tukweji 6 hakwila nisemuki nawa aMama afwili nichidi kansi. Kuhiñahu, Lucy, muheletu wawedi, niyena wafwili nayaaka 17. Dichi, amandumi aNick atusendeli nakutuhemba.

Ifuku dimu hinatachikili kwimena, antaña jami ammweni inakukoka mukila wakawalu weyala. Achinineña nawu kawalu wukundata, dichi abidikili nawu nimulekiku, ilaña kwosi jinelili. Nayifutaleleli nawa natiyili wanyi chabidikileñawu. Kukooleka kawalu wankatishili wanyi, ilaña dihelukiliwu nawu nidi kamama.

Muntu wadikundili nachisaka chetu wahosheli nindi antwali kushikola, dichi amandumi aNick anyiñijili kushikola yawatumama yadiña kuSaskatoon, Saskatchewan. Antwalili kwiluña dakwakulehi hitwendeli maora amavulu, nawa chineli nadiña nayaaka yitanu, natiyili woma. Nayileña nakutala antaña jami neyi tunashinki mashikola nihamafuku akunooka. Dichi, nadizili idimi dawatumama nawa natiyileña kuwaha kuhema nawakwetu atwansi.

Mu 1939, ayaya aMarion, achilondela wedi, asumbukili kudi aBill Danylchuck, nawa atusendeli ami niayaya aFrances. Diwu adiña atachi kudiza nawaYinsahu jaYehova. Neyi tunashinki mashikola, adiña nakunlejaku nsañu yadiziliwu muBayibolu. Kuhosha hohu walala, chakalileña kuhanjeka nawu muloña wena elukili wanyi idimi dawatumama. Ilaña ammweni nawu inakukeña kudiza chalala. Namweneña yuma yelileñawu yesekeneña  nachahosha Bayibolu, dichi nayileña nawu nakushimwina. Nakeñeleña kupapatishewa nawa haSeptember 5, 1941, eshaku Bill ampapatishili mudiramu mwashiliwu menji amunjilayi. Menji adiña atuta nankashi!

Chinelili nifunti kumukala mu 1946, twayili nakupompa kupompa kweneni kwadiñaku muCleveland, Ohio, U.S.A. Ifuku datachi dakupompa, muhelami wansonekeleleña yikuma kulonda nilondelaña progilamu. Hela chochu, hefuku damuchiyedi, natiyili kuwaha hakwiluka nami kwadiña izanvu dawatumama nimuntu wadiña nakuyibalumwina. Dichi, nadiluñishili progilamu nawa natiyili kuwaha kutiyishisha chiwahi chalala chamuBayibolu!

Hayoyina mpinji, Njita Yakaayi Yamuchiyedi dihu yamanini nawa antu aswejeleliku kwikala nachaambu chanyuza. Chinafuntili kufuma kukupompa nadikanini chikupu kuzatisha yuma yinadizili neyi nafunti kushikola. Dichi nalekeli kubuzwila mpandela nikwimba kamina ketuña mwidimi dawatumama. Nawa nalekeli kwananakana mafuku akunooka nikuya kuchechi. Antañishi ami atiyili kutama nawa esekeli kuntiyisha woma nikundimba kulonda nihimpi yitoñojoka yami. Yuma yejimiyi yatiyishili akwetu akashikola woma, ilaña chaletesheli nikali nakukooleka kwakushimwina. Akwetu akashikola adi neyi Larry Androsoff, Norman Dittrick niEmil Schneider adizili chalala nawa anakumukalakela Yehova nakashinshi nichayinu mpinji.

Neyi inakuya kunyisumba yacheñi, nafwilaña chikupu kushimwina atumama. Chakutalilahu, kwiluña kwabulakenañawu atumama muMontreal, namushimwinini Eddie Taeger wadiña mbanji. Kushika nimpinji yafwiliyi ichi chaaka chinamani, wadiña muchipompelu chazatishaña idimi dawatumama muLaval, Quebec. Nadibulakeni cheñi naJuan Ardanez wadiña neyi aBereya afwilileña kukeña chalala chamuBayibolu. (Yil. 17:10, 11) Niyena wekalili Chinsahu nawa wadiña eluda muOttawa, Ontario, kushika tuhu nimpinji yafwiliyi.

Mu 1950, nabuukilili kuVancouver. Hela chakwila nakeña kushimwina atumama, nakajimbala wanyi mpinji yinamushimwinini mubanda wejina daChris Spicer wunashimwinini hanjila. Wahanini mali kulonda nimwinkeña magazini nawa wakeñeleña nindi nakahanjeki nanfumwindi, Gary. Dichi nayili kwitala dawu nawa twahanjekeli hadi mpinji yayilehi kuhitila mukusoneka. Iyi diyi mpinji yitwahanjekeli hohu sampu nichimwahitili yaaka yantesha  hitwadimweni hakupompa kwañinza muToronto, Ontario. Gary wapapatisheweli hanidi ifuku. Ichi chakutalilahu chankojejaña kushimwina mpinji yejima muloña twelukaña wanyi neyi antu itwashimwinaña akekala muchalala.

Kuhiñahu, nafuntili kuSaskatoon. Kwenakuna nadibulakeni namama yawantu wumu wanlejeli nindi nidizisheña anyanindi ampasa awambanda, aJean naJoan Rothenberger, adiña nakutañila hashikola yawatumama hinadiña nakutañila. Chihashimbwili chanti, awa atwansi alejeliku akwawu akashikola yuma yadizileñawu. Dichi, antu atanu mushikola yawu ekalili aYinsahu jaYehova. Nawa wumu hakachi kawu wadiña Eunice Colin. Chaaka chinamanishileña shikola nadimweni naEunice hashikola yawatumama. Hayina mpinji, wanyinkeli mabisiketi nawa wanyilili nindi twakekali mabwambu.

Amama yaEunice chamweniwu nawu mwanawu nakudiza Bayibolu, alejeli ntañishi yindi kulonda yamukaanishi kudiza. Dichi ntañishi wamutambwili ninyikanda yadizileñamu chalala. Ilaña, Eunice washindameneni hadi Yehova. Chelili nindi yapapatishewi, anvwali jindi amulejeli nawu, “Neyi wukwikala Chinsahu chaYehova, wukufuma hanu hetala!” Eunice wafumini hetala iku wudi nayaaka 17, nawa chisaka chimu chawaYinsahu chamusendeli nakumuhemba. Watwalekelihu kudiza nawa wapapatisheweli. Diyi wadi kwikala muntu walema chikupu muchihandilu chami, wekalili ñodami! Chitwadisumbwili mu 1960, anvwali jindi enjili wanyi kuchidika chetu. Ilaña, chimwahitili yaaka, atachikili kutulemesha muloña wayuma yitwakuhwelela nichitwakulishileña anyanetu.

Etu anvwali twadiña atumama, ilaña twavwalili anyana awamayala 7 atiyaña nikuhosha. Chadiña  chakala, ilaña twazatili nañovu kuyidizisha idimi dawatumama kulonda atiyañaneña nikuyidizisha chalala. Amanakwetu niahela muchipompelu atukwashili nankashi. Chakutalilahu, nvwali wumu watusonekeleli nindi mwanetu wumu watukeneña Mwitala daWanta. Twamukwashili hohenohu. Anyanetu awana, James, Jerry, Nicholas, niSteven, anakumukalakela Yehova nakashinshi hamu nawañodijawu nianyanawu. Anyanetu awaana chayinu mpinji hiyaeluda. Kubombelahu, Nicholas niñodindi Deborah, akwashaña mudimu wakubalumuna mwidimi dawatumama kukasanji kamutayi kakuBritain nawa Steven nañodindi, Shannan, hiyakwakubalumuna mwidimi dawatumama kukasanji kamutayi kakuUnited States.

Iku kunashali kakweji kamu nakushikija yaaka 40 muwulu, Eunice wafwili namusoñu wakansa. Wadiña wahamuka haniyi mpinji yakala. Kukuhwelela nawu kwakekala kusañuka kwakolesheli chikuhwelelu chindi. Inakutalila ifuku dinakamumona cheñi.

MuFebruary 2012, nadimbukili nawa nachiñumukili lukuma, dichi nakeñekeleña wukwashu. Dichi nayili nakushakama namwanami wumu weyala niñodindi. Chayinu mpinji tudi muChipompelu chaCalgary chazatishaña Idimi dawaTumama nawa nidi eluda. Aka dikatachi kwikala muchipompelu chazatishaña idimi dawatumama. Toñojokenu hachumichi! Kushakama muchipompelu chazatishaña Chizungu hadi yaaka yayivulu kufuma mu 1946, nakulili ñahi kuspiritu? Yehova nankwaashi neyi chochahoshayi nindi wakwashaña anyana abula atata jawu. (Mas. 10:14) Nasakililaña antu ejima ankwashishili kuhitila mukunsonekela, kudiza idimi dawatumama niakwakumbalumwina.

Kuhosha hohu walala, kwadiña mpinji yinatiyileña kutama nawa nakeñeleña kuleka muloña natiyileña wanyi yuma yahosheleñawu nawa chamwekeni neyi kwiji atumama ayishileña maana wanyi. Hela chochu, neyi natiyi kutama, nanukileña mazu aPetulu amulejeliyi Yesu nindi: “Mwanta, tukuya kudinyi? Eyi yeyi wukweti mazu awumi wahaya nyaaka.” (Yow. 6:66-68) Neyi chocheliliwu amanakwetu niahela atumama itwadiña nawu, nadiña wadizoza. Nadizi kumuhembelela Yehova nikuloñesha kwindi nawa nahetelimu hakwila mwenimu! Ichi nidi namaheta amavulu mwidimi dami nawa natiyaña kuwaha kuhanjeka nawakwetu hakupompa kwachipompelu nikweneni mwidimi dawatumama. Namukalakeli Yehova, Nzambi yetu muneni namuzañalu.