DANIEL NAWA MIRIAM adisumbwili muSeptember 2000 nawa ayili nakushakama mumusumba waBarcelona, kuSpain. Daniel wahosheli nindi, “Twahandileña chiwahi. Nyidimu yitwazatileña yaletesheli tudiileña mumarestilanti, kuya kumatuña acheñi nikuvwala yakuvwala yawuseya. Twadiña nakushimwina mpinji yejima.” Ilaña yuma yahimpikili.

Mu 2006 hakupompa kweluña, mpanji yamushikili Daniel hamuchima yadiña namutu wakwila nawu: “Munakuzata hakumina ñovu jenu kulonda mukwashi antu ‘akukeña kutapewa’ kulonda ekali munjila yaya kuwumi wahaya nyaaka?” (Yish. 24:11) Yahosheli nankashi hakushimwina nsañu yakupulwisha yekala muBayibolu. (Yil. 20:26, 27) Daniel wahosheli nindi, “Namweneña neyi Yehova wadiña nakuhosha nanami.” Mpanji yahosheli cheñi nawu kuzata chikupu mumudimu wakushimwina kwazañaleshaña. Daniel welukili nindi dimu. Miriam wadiña watachika dehi wupayiniya nawa wadiña nakudiluñisha nkisu jajivulu.

Daniel wahosheli nindi, “Nelukili nami ayinu diyi mpinji yinatela kutachika wupayiniya.” Nawa mwalala watachikili. Wakehesheliku maora akumudimu, watachikili wupayiniya nawa watoñojokeli hamuzañalu wadi kudiluñishañawu naMiriam neyi aya nakuzatila kudi kukankila kwawakwakushimwina aWanta.

Mu May 2007, Daniel naMiriam alekeli nyidimu yazatileñawu nawa ayili kuPanama, adiña elukaku dehi kunidi ituña. Dekala nayitutu yayivulu muBocas del Toro Archipelago kuKaluñalwiji kaCaribbean, nawa antu amavulu ekalamu ayitenaña nawu Guaymi. Daniel naMiriam atoñojokeleña nawu akushakama tukweji 8 namali ahembeliwu.

Endeleña haniyi yitutu namaatu hela namakinga nawa anukaña ifuku datachi dendeliwu namakinga makilomita 32 kukanduka kumpidi iku kudi nkanza. Daniel wakeñeleña kuhwidila. Hela chochu, chineli adizili idimi damuna mwiluña, ayitambwilili namuzañalu kudi chisaka chimu chedimi daGuaymi chadiña kunjila. Atachikili kudizisha atudizi aBayibolu 23.

Chelili mali ayimani, atachikili kukabakana. Daniel wahosheli nindi: “Twatachikili kutoñojoka jakufunta kuSpain iku tunakudila. Twatiyili kutama kushiya atudizi etu aBayibolu.” Ilaña chimwahitili tukweji tusata, atambwilili nsañu yayitiyishili kuwaha. Miriam wahosheli nindi: “Atwitambikili kuya nakuzata wupayiniya wadimena. Twatiyaña kuwaha kuzata iwu mudimu mpinji yejima!”

Hamuloña wakuhimpika kwadiñaku mukuloñesha, mu 2015 aDaniel naMiriam ayilejeli nawu ayi nakuzata neyi apayiniya ampinji yejima. Elilidi? Akuhweleleli chikaninu chekala haMasamu 37:5: “Kunjikaku njila yeyi kudi Yehova, Mukuhweleli, yena wakachimwekesha.” Awanini mudimu wayikwashaña kuzata wupayiniya wampinji yejima nawa adi muchipompelu chekala kuVeraguas, Panama.

Daniel wahosheli nindi: “Henohu kanda tufumi kuSpain, twelukili wanyi neyi tukashakamaña chihandilu chapela. Tunakushakama chihandilu chapela nawa twakabakanaña wanyi.” Chumanyi chayiletelaña muzañalu wabadika? Ahoshaña nawu, “Kukwasha antu etejaña nsañu kulonda amwiluki Yehova chatuletelaña muzañalu wabadika chikupu!”