1, 2. Lwihwinyi lwamwihwiliwu Petulu hanyima yakuchisha nakukwata inshi?

ATUMBANJI twaYesu 7 achishili wufuku wejima nakukwata inshi muKaluñalwiji kaÑaliliya, ilaña akañenyi kukwata. Yesu asañwiliwu wayimweni iku wudi kuchikumu. Dichi wayilejeli nindi: “‘Lalumwinenu kaleñi kumbavu yawatu yakuchidiilu nawa mukukwata inshi.’ Dichi akilalumwini, ilaña akañenyi kukikokela muwatu muloña mwafwili inshi jajivulu nankashi.”—Yow. 21:1-6.

² Hanyima yakuyinka yakuda, Yesu wabulumukilili kudi Shimona Petulu nakumwihula nindi: “Shimona mwana kaYowanu, komana wankeña kubadika iyi tahindi?” Yesu wateneneñadi? Petulu wakeñeli nankashi mudimu wakukwata inshi. Dichi chidi neyi Yesu wamwihwileña yuma yakeñeliyi. Komana wakeñeli chikupu mudimu wakukwata nikulandisha inshi kubadika Yesu niyuma yadizishileñayi? Petulu wamwakwili nindi: “Eña Mwanta, weluka neyi nakukeña.” (Yow. 21:15) Chakadi nikujina  Petulu welili mwahosheliyi. Kufuma hayina mpinji, wamwekesheli nindi wamukeña Kristu kuhitila mukwilisha atumbanji nikwikala chishimi muchipompelu chawakwaKristu amumafuku awapostolu.

3. AkwaKristu atela kusoñama kuyumanyi?

³ Yumanyi yitukudizila kumazu amulejeliwu Petulu kudi Yesu? Bayi twiteja chuma chidi chejima chitukañeshi kumukeña Kristu nikutukañesha kubula kutwamijaku Wantaku. Yesu welukili chikupu nindi tukwakamenaña yuma yamukaayi. Muchishimu chindi chamukwakukuwa, Yesu wahosheli nindi antu amu akutambwila “mazu aWanta” nawa akuyilaku hambidi, ilaña “kwakama kwanshakaminu yamakonu niñovu yakudimbana kwamaheta jikukañesha mazu.” (Mat. 13:19-22; Maku 4:19) Neyi kubabala nehi, tunateli kusha muchima kuyuma yitwakamenaña muchihandilu nawa yinateli kutuzeyesha kuspiritu. Dichi Yesu wasoñamishili atumbanji twindi nindi: “Babalenu kulonda nyichima yenu yibuli kulema namuloña wakusweja kuda, kusweja kunwa nikwakama kwamuwumi.”—Luka 21:34.

4. Yumanyi yikutukwasha kwiluka nawu twamukeña Kristu? (Talenu mwevulu wakutachikilahu.)

⁴ Neyi chochatwalekeliyi Petulu kumukeña Yesu asañwiliwu, ninetu twatela kutwalekahu kumukeña Kristu kuhitila mukutwamijaku mudimu watwinkayi. Tunateli kutwalekahu ñahi kwila mwenimu? Twatela kudihula mpinji yejima netu yumanyi yinakeña nankashi? Komana muzañalu wunidi nawu chayinu mpinji wunakufuma munyidimu yakumujimba tahindi munyidimu yakuspiritu?’ Tuhanjekenu hayuma yisatu yinateli kutuleñela tubuli kumukeña Kristu niyuma yakuspiritu neyi tusweja kuyikeña—nyidimu yakumujimba, mpinji yakunooka nimaheta.

5. Nyitu yayisaka yikweti mudimwinyi kwesekeja naNsona?

⁵ Chihandilu chaPetulu chadiña chakukwata inshi. Makonu, nyitu yayisaka yeluka nawu Nsona yahosha nawu yikweti mudimu wakukeñela yisaka yawu yuma yakumujimba. (1 Tim. 5:8) Atela kuzata nañovu kulonda ashikiji chahosha nsona. Hela chochu, munanu mafuku akukuminina antu anakwakamena nankashi nyidimu yakumujimba.

6. Kukalanyi kunakumonawu antu kunyidimu makonu?

⁶ Chineli nyidimu yinakehi, antu azataña maora amavulu ilaña mpinji yikwawu ayinkaña wufwetu wantesha. Chineli azataña maora amavulu chumichi chaleteshaña kuzeya kumujimba nimuyitoñojoka. Antu abulaña kuzatila kampani maora amavulu ayihañaña nyidimu.

7, 8. (a) Twekala ashinshika kudinyinyi? (b) Yumanyi yadiziliyi manakwetu wakuThailand hamudimu windi?

⁷ Etu akwaKristu, twasambilaña kwikala ashinshika kudi Yehova Nzambi bayi kudi antu atwiñija nyidimuku. (Luka 10:27) Nyidimu yakumujimba yatukwashaña hohu kumujimba. Twazataña kulonda tudikwashi kumujimba nimumudimu wakushimwina. Neyi kubabala nehi, nyidimu yakumujimba yinateli kutukañesha kudifukula. Chakutalilahu, manakwetu wakuThailand wahosheli nindi: “Nakeñeli kuzata mudimu wakuloñesha makompyuta ilaña wadiña nakundila mpinji yeneni. Chafuminimu, nadiña wanyi nampinji yakwila yuma yakuspiritu. Namweni nami hakwila nisambileña kukeña  Wanta, natela kwiñila mudimu wacheñi.” Iwu manakwetu welilidi?

⁸ Walumbululwili nindi, “Hanyima yakutoñojokahu hadi chaaka chimu natachikili kulandisha ice cream. Hakusambila, nakañenyeña kuwana mali nawa natiyili kutama. Neyi nidiwana nawakwetu mutwadizatilileña, anseheleña nakuhosha nawu wunakulandisha ice cream henohu wadiña nakuloñesha makompyuta mwiluña mwadiña mpepela yituuta. Namulombeli Yehova kulonda yankwashi kuumika nawa nikaleña nampinji yakuzata nyidimu yakuspiritu. Nawa yuma yatachikili kuwaha. Antu akeñeli kulanda ice cream nawa nelukili nankashi chakuyipanga. Nalandishileña ice cream yejima hefuku. Nadiña namali amavulu kubadika inakwatileña kumakompyuta kunazatileña. Nidi namuzañalu muloña nidi nampinji yakwila yuma yakuspiritu. Chasweja kulema nakundami kwakwihi naYehova.”—Tañenu Matewu 5:3, 6.

9. Tunateli kwiluka ñahi neyi twakeñesha nyidimu yakumujimba?

⁹ Kuzata nañovu hichilwilu chakeñayi Nzambi nawa mwafumaña yuma yayiwahi. (Yish. 12:14) Hela chochu, kufwana makwetu itunateni, twatela kwiluka hakukumina neyi tunakuzata nyidimu yakumujimba. Yesu wahosheli nindi: “Twalekenuhu kusambila kukeña Wanta nikuloña kwindi, nawa yuma yejimiyi yikwawu [yuma yakumujimba] akayishilahu.” (Mat. 6:33) Hakwila nawu twiluki neyi chakwila twakeñesha nyidimu yakumujimba hela yakuspiritu, twatela kudihula netu: ‘Komana natiyaña kuwaha mudimu wunazataña kubadika nyidimu yakuspiritu?’ Kutoñojokahu chikupu chitwamonaña nyidimu yakumujimba niyuma yakuspiritu chikutukwasha kwiluka yuma yitwakeñesha.

10. Chikumanyi chitwadizilaña kudi Yesu kutalisha hakuzata nyidimu yakumujimba niyakuspiritu?

¹⁰ Twatela kwimbujola chakutalilahu chaYesu hakuzata nyidimu yakumujimba niyakuspiritu. Mpinji yimu, Yesu wayili kwitala daMariya nimuhelindi Mata. Mata washili maana hakuloñesha yakuda, ilaña Mariya washakamini kunyendu yaYesu nakutiyilila. Chelili Mata yahoshi nindi Mariya nakumukwasha wanyi, Yesu wamulejeli Mata nindi: “Mariya, yena natondihu chuma chachiwahi nawa kwosi wakamutambulachuku.” (Luka 10:38-42) Yesu wadiña nakumudizisha Mata yuma yalema. Hakwila nawu tubuleña kukeñesha nyidimu yakumujimba nikutwalekahu kumukeña Kristu, twatela kutwalekahu kutonda “chuma chachiwahi,” dikwila nawu kutwamijaku yuma yakuspiritu.

11. Nsona yahosha nawudi kutalisha hakunooka?

¹¹ Twatela kwikala nampinji yakunooka niyakudiluñisha hanyima yakuzata nyidimu. Izu daNzambi dahosha nawu: “Hikudi chuma chacheñi chakuwahisha muntuku, chiña yowu kudya nakunwa nakuluñisha muchima windi nanyidimu yindi yikukabakanayi.” (Mukwa. 2:24) Yesu welukili nindi twatela kwikala nampinji yakunooka. Hanyima yakwila anazeyi kufuma mukampeni yakushimwina wayilejeli atumbanji twindi nindi: “Tuyenu kwakankawetu kulonda tunookihu chanti.”—Maku 6:31, 32.

12. Kusoñamishanyi kutwatela kulondela kutalisha hansañu yakunooka nikuhema? Shimunenu chakutalilahu.

¹² Mwamweni, kunooka nikuhema kwalema nankashi. Hela chochu, kukala kudi kwakwila  nawu tunateli kutachika kusha maana hakunooka. Mumafuku awapostolu, antu adiña nachaaku chakwila nawu “Tudenu nikunwa, muloña kumadiki twakafwa.” (1 Kor. 15:32) Dichaaku chidi nawantu mukaayi kejima makonu. Chakutalilahu, mukwenzi wumu kuWestern Europe watachikili kuya kukupompa kwawakwaKristu. Ilaña kuhema kwamuletesheli yaleki kudikunda nawantu jaYehova. Hela chochu, chimwahitili mpinji, welukili nindi mukuhema mwafumineña yuma yatama. Dichi watachikili cheñi kudiza Bayibolu nawa wapapatisheweli nakwikala mukwakushimwina wansañu yayiwahi. Hanyima yakupapatishewa wahosheli nindi: “Nelukili wanyi nami kumukalakela Yehova kwaletaña muzañalu kubadika yisela yakuhema yekala munu mukaayi, dichi naditoñeshaña muloña nakisili mpinji yami.”

13. (a) Shimunenu kutama kwekala mukunooka nikuhema. (b) Tunateli kwiluka ñahi netu twakisilaña mpinji yeneni wanyi kukunooka nikuhema?

¹³ Kuhema kwatukwashaña, kwatuzañaleshaña nawa kwatukoleshaña kumujimba. Hakwila twili mwenimu, twatela kukisila mpinji yiñahi kukuhema? Toñojokenu hachumichi: Etu amavulu twavula wanyi kuda tuyinwisha menji, ilaña tweluka netu neyi tukudaña makeki nimabisiketi mpinji yejima jinateli kutuletela yikatu kumujimba. Dichi twadaña hohu yakuda yatukwashaña kumujimba. Munjila yoyimu, kuhema mpinji yejima kunateli kutuzeyesha kuspiritu. Dichi, twatela kuzataña nyidimu yaWanta mpinji yejima kulonda tubuleña kuzeya kuspiritu. Tunateli kwiluka ñahi netu twakisilaña mpinji yeneni wanyi kukuhema? Tunateli kuchinda maora itwazatishaña mumulungu kuyuma yakuspiritu, chidi neyi kuya nakupompa, kuya nakushimwina, kudiza Bayibolu nkawenu hela nachisaka. Kuhiñahu tukwesekeja maora itunazatishi kukuhema chidi neyi kuhema ngunja, kutamba TV niyisela yahavidiyo. Mwakisilaña mpinji yeneni kuyumanyi? Komana mwavula kuda “tuyinwisha menji.”?—Tañenu Aefwesesa 5:15, 16.

14. Yumanyi yikutukwasha kutonda yisela yakuhema?

¹⁴ Antu ninyitu yayisaka akweti wuswa wakufuukulahu yisela yinakukeña kuhemawu, chakala yinesakani nayishina yaYehova yekala muBayibolu. * Yisela yayiwahi “hichamukunkulu chakudi Nzambi.” (Mukwa. 3:12, 13) Hela chochu, tuneluki netu yisela yitwahemaña yambuka nayahemañawu akwetu. (Ñal. 6:4, 5) Ilaña, yisela yejima yitukuhema bayi twiñijamu mutuku. Yesu wahosheli nindi: “Kudi maheta eyi, dikukwikala nimuchima weyi nawa.” (Mat. 6:21) Dichi, kukeña kwetu kutwamukeña Yesu kukutuletesha tushi yitoñojoka, nhoshelu niyilwilu yetu hanyidimu yaWanta kubadika yuma yakumujimba yitwelaña muchihandilu.—Fwi. 1:9, 10.

15, 16. (a) MukwaKristu nateli kufwa ñahi mumuhetu wakufwila maheta? (b) Yesu wafumbili nindidi kutalisha hakufwila maheta?

¹⁵ Antu amavulu makonu anakufwila kwikala nayakuvwala yayiha, yozelu yakuzatisha namalayiti niyuma yikwawu yayivulu. Dichi, mukwaKristu wejima watela kudishinshika yomweni hayuma yafwilañayi kuhitila mukudihula nindi: ‘Komana nalemesha  yuma yakumujimba nankashi chakwila nakisaña mpinji yeneni kusandujola nikutoñojoka nyotoka yayiha hela yuma yayiha kubadika kuloñesha kupompa? Komana nakisilaña mpinji yeneni kuyuma yakumujimba kubadika kulomba nikutaña Bayibolu?’ Neyi tumona netu tunasweji kukeña maheta kubadika Kristu, twatela kutoñojoka hamazu aYesu akwila nawu: “Tondolwelenuña lwisu lwejima.” (Luka 12:15) Muloñadi Yesu chatusoñamishililiyi?

¹⁶ Yesu wahosheli nindi kwosi “muntu wunateli kukalakela anyanta ayediku.” Wabombelelihu nindi: “Himunateli kukalakela Nzambi hampinji yoyimu niMahetaku.” Muloña “anyanta” ejima ayedi akukeñaña kuyovwahila. Yesu wahosheli nindi, tunateli “kuhelahu wumu nakukeñahu mukwawu” hela “kukakelahu wumu nakusekeshahu mukwawu.” (Mat. 6:24) Chineli twawanina wanyi, wejima wetu twatela kuzata nañovu kulonda tubuli kwila mwaya “kufwila kwamujimba wetu,” chidi neyi kufwila maheta.—Efwe. 2:3.

17. (a) Muloñadi antu atoñojokaña yuma yakumujimba chiyakañenyañawu kuleka kutoñojoka hamaheta? (b) Chumanyi chinateli kutukwasha kuleka kufwila maheta?

¹⁷ Antu atoñojokaña yuma yakumujimba akañanyaña kuleka kutoñojoka hamaheta. Muloñadi? Muloña akweti wanyi maana akuspiritu. (Tañenu 1 Akorinda 2:14.) Neyi yitoñojoka yawu yiluwankana akañanyaña kwaambula yatama nayayiwahi. (Heb. 5:11-14) Chafumañamu, antu amakwawu aswejaña kukeña maheta chakwila akutwalekañahu hohu kuyikeña. (Mukwa. 5:10) Hela chochu, kudi chuma chinateli kutukwasha kuleka kutoñojoka hamaheta: kudizaña Izu daNzambi Bayibolu mpinji yejima. (1 Pet. 2:2) Kutoñojoka hadi Nzambi kwamukwashili Yesu kushinda kweseka, ninetu neyi tutoñojokaña hayishina yamuBayibolu chikutukwasha kuleka kufwila maheta. (Mat. 4:8-10) Neyi tukwila mwenimu, tukumwekesha netu twamukeña Yesu kubadika maheta.

18. Yumanyi yitunakufwila kwila?

¹⁸ Yesu chamwihwiliyi Petulu nindi: “Wankeña kubadika iyi tahindi?” wamwanukisheleña Petulu kutwamijaku yuma yakuspiritu muchihandilu chindi. Petulu, wadiña nejina daya mukwila nawu “Chibalu Chelola,” wamwekesheli yilwilu yakola neyi ilola. (Yil. 4:5-20) Ninetu makonu twatela kumwekesha netu twamukeña Kristu kuhitila mukubula kusweja kukeña nyidimu yakumujimba nimaheta. Dichi yuma yitwafwilaña kwila muchihandilu yatela kumwekesha yilwilu yidi neyi yaPetulu wamulejeli Yesu nindi: “Mwanta, weluka neyi nakukeña.”