1, 2. (a) Yumanyi yayikwashaña atwansi akwaKristu kushinda yileñaleña yatama yakuspiritu? (Talenu mwevulu wakutachikilahu.) (b) Yumanyi yitukuhanjeka muchinu chibaaba?

KAPOSTOLU PAWULU wesekejeli chihandilu chanetu akwaKristu namushidika wunadimanyeki chikupu kuzuña njita mukamwihi nayitwa yakumakasa. Hela chochu, njita yitwazuñaña yakuspiritu, bayi yakumujimbaku. Ilaña, ayilumbu jetu ekala kwoku. Satana niandemoni himashidika akuluka yitembi mukwasa njita. Hakusambila, tunateli kufwa mutentu. Sweje-e atwansi akwaKristu anateli kutiya woma. Anateli kukuhwelela ñahi nawu akushinda yileñaleña yatama yakuspiritu? Walala wudi wakwila nawu, atwansi anateli kushinda nawa anakushinda! Muloñadi? Muloña atambulaña “ñovu kufuma kudi Mwanta.” Hiyashindamenaña hohu hakutambula ñovu kudi Nzambiku, ilaña kudi yuma yikwawu yelañawu. Adiloñeshaña kwasa njita. Neyi chelañawu mashidika adiza chikupu, niwena adimanyekaña “yitwa yanjita yejima yafuma kudi Nzambi.”—Tañenu Aefwesesa 6:10-12.

² Hampinji yashimwineñayi ichi chakutalilahu, hadaha Pawulu watoñojokeleña chadimanyekeleñawu mashidika awaRoma.  (Yilw. 28:16) Tushinshikenu chazatishililiyi ichi chakutalilahu. Talenu yuma yimu yahoshañawu atwansi hakukala kwamonañawu nihakuwaha kwekala mukuvwala yitwa yejima yanjita yakuspiritu.

3, 4. Chalala chekala muBayibolu chinesekani ñahi namushipi wavwalileña mushidika wawaRoma?

³ Tañenu Aefwesesa 6:14. Mushipi wavwalileña mushidika wawaRoma wadiña nayikuñu yawubasa yakiñileña mbunda. Awituñili munjila yakwila wukwateña chakuvwala chachikuñu chakudikiña nachu. Nyishipi yikwawu yadiña cheñi namwakukobekela mpoku yakabali. Neyi nawukasi chikupu mumbunda, wamukwashileña mushidika kwimana chakola neyi anakwasa njita.

⁴ Munjila yoyimu, chalala chitwadizaña Mwizu daNzambi chatukiñaña kuwubanji wakuspiritu wunakutandishawu kudi nsakililu yakutwamba. (Yow. 8:31, 32; 1 Yow. 4:1) Neyi tukeña chalala chaNzambi, chikutukwasha kusenda “chuma chakujika hantulu,” dikwila nawu tukwovwahilaña nshimbi jaNzambi jaloña. (Mas. 111:7, 8; 1 Yow. 5:3) Kubombelahu, neyi twiluka chikupu chalala chaMwizu daNzambi, chikutukwasha kwimana chakola nikudikiña nachu kudi ayilumbu jetu.—1 Pet. 3:15.

5. Muloñadi chitwatelela kuhosha walala mpinji yejima?

⁵ Neyi chalala chamuBayibolu tunachikasi chikupu hamujimba, tukulondelaña yuma yidimu nawa tukuhoshaña walala mpinji yejima. Muloñadi chitwatela kutondolwela kutwamba? Muloña kutwamba dichitwa chaswejayi nankashi kuzatisha Satana. Kutwamba kwatamishaña muntu wunakutwamba niwunakulejayi. (Yow. 8:44) Twatela kuzata nañovu kulonda tubuleña kutwamba. (Efwe. 4:25) Ilaña chapela wanyi. Abigail wudi nayaaka 18 wahosheli nindi: “Chapela wanyi kuhosha walala mpinji yejima, sweje-e neyi wunamoni neyi chiwatwamba wukufuma mukukala.” Muloñadi chafwilañayi kuhosha walala mpinji yejima? Wahosheli nindi: “Neyi nihosha walala, nukwikala nachinleji chitooka kudi Yehova. Nawa anvwali niamabwambu jami akunkuhwelelaña.” Victoria wudi nayaaka 23, wahosheli nindi: “Neyi wuhosha walala nawa wuhakwilaku yuma yiwakuhwelela, akwenu anateli kukuhela. Ilaña mwafumaña yuma yayiwahi: Wukwikala nachikuhwelelu, wukuswina kwakwihi naYehova nawa akukulemeshaña kudi antu akukeña.” Mwamweni, chalema kutwalekahu ‘kukasa mushipi wachalala mumbunda’ mpinji yejima.

6, 7. Kuloña akwesekejeladi nachuma chakujika hantulu?

⁶ Chuma chimu chakujika hantulu chavwalileña mashidika awaRoma mumafuku awapostolu chadiña chakuvwala chachikuñu chadinuñileña nayikuñu yahitili mwivumu. Iyi yikuñu yahitileña hevumu ayivuñileña kulonda yishiki chiwahi hamujimba nawa ayikasileña nanyiya yayitembi yahitishileñawu mwakukobekela hela mumapwata ayikuñu. Mujimba wamushidika awujikileña nayikuñu yakasileñawu nanyiya yayitembi kuketwishila mumbunda. Ichi chakuvwala chamukañesheleña mushidika kwenda chiwahi nawa mpinji yejima waditalileña neyi chakwila yikuñu yinakasunuki hela nehi. Ilaña ichi chakuvwala chakañesheleña mpoku hela iyoña kwiñila hamujimba nakushika kumuchima hela kuyiidi yikwawu hafwilañayi muntu swayi.

⁷ Ichi chakutalilahu chachiwahi chinakumwekesha nshimbi jaYehova jaloña chijinateli kukiña muchima wetu wachifwikija! (Yish. 4:23) Neyi chabulañayi mushidika kuhimpa chuma chakujika hantulu chakutuña nachikuñu nachakutuña nachifoyu, ninetu hitwatela kuhimpa nshimbi jaYehova jaloña nayuma  yitunamoni netu yayiwahiku. Chuma chikubula kutukiña. (Yish. 3:5, 6) Ilaña, twatela kudishinshikaña mpinji yejima nakumona netu ‘chikuñu chakujika hantulu’ chatwinkayi Yehova chakukasa chakola.

8. Kulondela nshimbi jaYehova kwalemenadi?

⁸ Komana mpinji yikwawu mwatoñojokaña nenu nshimbi jaYehova jaloña jakala kulondela hela jayikañeshaña kwikala asubuka? Daniel wudi nayaaka 21, wahosheli nindi: “Antañishi niakwetu akashikola ansehaña muloña wakulondela nshimbi jamuBayibolu. Mpinji yimu nazeyeli nawa naneñeli.” Chumanyi chamukwashili kwikala wakola? “Nkumininaku” wahosheli nindi, “Namweni chichawahila kulondela nshimbi jaYehova. ‘Amabwambu’ jami amakwawu atachikili kunwa yitumbu yashetana, amakwawu ayihañili mashikola. Chihandilu chawu chatamini nankashi. Mwamweni Yehova watukiñaña. Madison wudi nayaaka 15, wahosheli nindi: “Chankalilaña kulondela nshimbi jaYehova jaloña nikukaana yuma yatoñojokaña akwetu nawu yayiwahi nawa yakusehesha.” Womikaña nahi? “Nelukili nami nalejaña antu ijina daYehova nawa kweseka hichuma chazatishañayi Satana hakunsowa. Neyi nishinda kweseka natiyaña muzañalu chikupu.”

9-11. (a) Nkwabilu yamuchidinyi yachifwikija yavwalaña akwaKristu? (b) Chumanyi chikutukwasha kushimwina chiwahi nsañu yayiwahi?

⁹ Tañenu Aefwesesa 6:15. Neyi mushidika wawaRoma navwali nkwabilu wanyi, dikwila nawu hanadiloñeshi kwasa njitaku. Nkwabilu jindi ajituñili nanyidita yisatu yakukasa nanyiya yachitembi yamukiñileña kunyendu. Iji nkwabilu ajituñili chachiwahi nawa jadiña jakola.

¹⁰ Chineli nkwabilu javwalileñawu mashidika awaRoma jayikwashileña munjita, munjila yoyimu nkwabilu jachifwikija javwalaña akwaKristu jayikwashaña kushimwina nsañu yakuwunda. (Isa. 52:7; Rom. 10:15) Hela chochu, twatela kwikala ahamuka hakwila nawu tushimwini neyi tunawani antu. Bo wudi nayaaka 20, wahosheli nindi: “Natiyileña woma kuyishimwina akwetu akashikola”. Ilaña wahosheli cheñi nindi: “Natiyili nsonyi. Chinanuka, nakañanyaña kwiluka chuma chaletesheleña. Ichi natiyaña kuwaha kuyishimwina akwetu.”

¹¹ Atwansi amavulu neyi anadiloñeshi chikupu kushimwina nsañu yayiwahi atiyaña kuwaha. Munateli kudiloñesha ñahi? Julia wudi nayaaka 16, wahosheli nindi: “Naloñaña nyikanda muchola chami chakushikola. Nawa natiyililaña kuyitoñojaka niyuma yakuhwelelawu akwetu akashikola. Kuhiñahu natoñojokaña yuma yinateli kuyikwasha. Neyi nadiloñeshi, nahanjekaña nawu yuma yinateli kuyikwasha.” Makenzie wudi nayaaka 23, wahosheli nindi: “Neyi wayimwekeshelaña luwi nikuyitiyilila, wukwiluka yuma yahitañamu akwenu. Natañaña nsanu yejima yahosha hadi atwansi. Chumichi chankwashaña kuyileja akwetu nsañu yamuBayibolu hela yidi ha jw.org/lun yikuyikwasha.” Iyi yakutalilahu yinakumwekesha nawu, neyi tudiloñesha kushimwina, dikwila nawu tunakuvwala “nkwabilu” jetu kunyendu.

12, 13. “Nyivu yakesi” yamuchidinyi yikwawu yazatishañayi Satana?

¹² Tañenu Aefwesesa 6:16. “Nkebu yeneni” yasendeleña mushidika wawaRoma yadiña yaya muwulehi nawa yamujikileña kufuma hamafwiji nakushika mumanuñu. Yamukiñileña kuyitwa yanjita nikunyivu.

¹³ “Nyivu yakesi” yikwawu yinateli kuyasayi Satana hinsañu yakutwamba yahoshañayi hadi Yehova, yakwila nawu hayakamenañaku nawa wayikeña wanyi. Ida wudi nayaaka 19  wadimweneña nindi washikilamu wanyi, wahosheli nindi: “Natoñojokeleña nami Yehova hekala kwakwihi nanamiku nawa hakeñaña kwikala Ibwambu damiku.” Wamanishili ñahi iku kukala? Ida wahosheli nindi: “Kupompa dikwankwashili kukolesha chikuhwelelu chami. Neyi tunakupompa nakwileñahu wanyi muloña natoñojokeleña nami kwosi wukutiya chinukuhosha. Ilaña chayinu mpinji nadiloñeshaña nawa nakulañahu kapampa kayedi hela kasatu hakupompa. Chankalilaña, ilaña natiyaña kuwaha neyi nakulahu. Amanakwetu niahela ankoleshaña chikupu. Mpinji yejima chinafuma kukupompa, natiyaña muzañalu hakwiluka nami Yehova wankeña.”

14. Kukala kwamweniyi Ida kunakumwekesha nsanwinyi yalema?

¹⁴ Kukala kwamweniyi Ida kunakumwekesha nsañu yalema: Nkebu yamwinkeleñawu mushidika yadiña yakupima chiwahi, ilaña chipimu chankebu yetu yachikuhwelelu chinateli kukeha hela kutoha. Hichuma chitwatela kuditondelahu etu aweni. (Mat. 14:31; 2 Tes. 1:3) Dichi chalema nankashi kukolesha chikuhwelelu chetu!

15, 16. Kuchiñeja kunesekani ñahi netepa?

¹⁵ Tañenu Aefwesesa 6:17. Itepa davwalileña mushidika wawaRoma kumutu adituñili munjila yakwila dimukiñeña kunyivu yenjilileña kumutu, kunshiñu nikumesu. Matepa amakwawu adiña namwakukwatila kulonda mushidika yasendeña itepa kumakasa.

¹⁶ Neyi chochakiñaña itepa woñu wamushidika, “itepa dakuchiñeja dawamwinu” dakiñaña  yitoñojoka yetu. (1 Tes. 5:8; Yish. 3:21) Kuchiñeja kwatukwashaña kukuhwelela muyikaninu yaNzambi nawa kwatukwashaña kumanisha kukala munjila yayiwahi. (Mas. 27:1, 14; Yilw. 24:15) Dichi neyi tunakukeña netu “itepa” detu ditukiñeña, twatela kudivwala mpinji yejima kumutu, chatela tudisendeña kumakasa.

17, 18. (a) Satana nateli kutukojeja ñahi kusubula itepa detu? (b) Tunateli kumwekesha ñahi netu hiyanakutudimba kudi Satanaku?

¹⁷ Satana nateli kutukojeja ñahi kusubula itepa detu? Talenu chamwililiyi Yesu. Satana welukili nindi Yesu wachiñejeleña kuyuula muchidi wamuntu kumbidi. Ilaña Yesu wateleleli kuhembelela sampu mpinji yatoñweliyi Yehova yinashiki. Nawa henohu kanda, wateleleli kukabakana nikufwa. Ilaña Satana wamulejeli Yesu kwikala mwanta henohu mpinji yamutoñweleliwu kanda yishiki. Satana wahosheli nindi neyi Yesu yadifukula kamu hohu, wukumwinka mawanta ejima hayoyenoyu mpinji chakadi kuhembelela. (Luka 4:5-7) Munjila yoyimu, Satana weluka nindi Yehova wakatwinka maheta mwituña dadiha dinakwinza. Ilaña chayinu mpinji twatela kuhembelela nawa twatela kukabakana. Dichi Satana watwesekaña kulonda tudiluñisheña makonu. Wakeñaña nindi tutwamijiku maheta nawa tudiluñisheña yinu mpinji. Satana watukakejaña nindi tubuleña kusambila kukeña Wanta.—Mat. 6:31-33.

¹⁸ Neyi chiyabulaña kuyidimba atwansi akwaKristu amavulu, Kiana wudi nayaaka 20 niyena hiyamudimbaña kudi Satanaku. Wahosheli nindi: “Neluki nami Wanta waNzambi hohu diwu wukamanisha kukala kwejima kutwamonaña.” Iku kuchiñeja kwamuletesha kwila yumanyi? “Kuchiñeja Paradisa kwankwashaña kufwila kwila yuma yayiwahi. Hinakeñaña kwikala namali munjila yabula kutelela hela kufwila yifulu yahewuluku. Ilaña inakuzatisha mpinji niñovu yami kuyuma yakuspiritu.”

19, 20. Munateli kuzatisha ñahi chiwahi Izu daNzambi?

¹⁹ Mpoku yakabali yazatishileña mashidika awaRoma hampinji yasonekeleñayi Pawulu, yadiña yayilehi masentimita 50 nawa yadiña yakuzuña nachu njita mukamwihi nayitwa yakumakasa. Chuma chayikwashileña mashidika awaRoma kuzuña chiwahi, adiña nakuzatisha yitwa yawu ifuku dejima.

²⁰ Pawulu wesekejeli mpoku yakabali Nezu daNzambi datwinkayi Yehova. Twatela kwiluka chakudizatisha chiwahi hakuhakwilaku yuma yitwakuhwelela hela neyi tunakukeña kuhimpa yilwilu yetu. (2 Kor. 10:4, 5; 2 Tim. 2:15) Munateli kuzatisha ñahi chiwahi Izu daNzambi? Sebastian wudi nayaaka 21 wahosheli nindi: “Nasonekaña vasi yimu mukapetulu kinnatañi muBayibolu. Mavasi ejima inakeña nayibombaña nakuyisha mumukanda wumu. Kwila mwenimu kwankwashaña kwiluka yitoñojoka yaYehova.” Daniel itwatena hakusambila wahosheli nindi: “Neyi inakutaña Bayibolu, nasonekaña mavasi innamoni nami anateli kukwasha antu mumudimu wakushimwina. Antu atiyaña kuwaha neyi akumona nawu walemesha Bayibolu nawa wunakufwila kuyikwasha.”

21. Muloñadi chitukubulila kumuchina Satana niandemoni?

²¹ Neyi chinahoshiwu atwansi adi muchinu chibaaba, hitwatela kumuchina Satana niandemoniku. Anateli kututiyisha woma ilaña hiyanateli kutwetaku. Nawa hiyakatwalekahu kuhandaku. Kumatachikilu aKuyuula kwaYaaka Ikombakaji daKristu, akayikasa hiyakekala nañovuku, nkumininaku akayijilumuna haya nyaaka. (Chim. 20:1-3, 7-10) Twamwiluka chilumbu chetu, tufuta twindi niyuma yafwilañayi. Nawukwashu waYehova, tunateli kumushinda!