1. MuEdeni, Yehova wasolwelidi hadi chilumbu chetu?

ADAMA welukili chikupu nindi kapela kahoshaña wanyi. Dichi watela watoñojokeli nindi chileñaleña chakuspiritu dichahosheli naEva kuhitila mudi kapela. (Kutach. 3:1-6) Adama naEva hiyamwilukili iwu chileñaleña hela chanteshaku. Hela chakwila chadiña muniyi njila, Adama wafuukwilihu kumufutalela Tata yindi wamwiwulu wukweti kukeña nakulondela muntu wabuliliyi nikwiluka kulonda yadikañi nankeñelu yaNzambi. (1 Tim. 2:14) Kufuma hayoyina mpinji, Yehova watachikili kusolola chekala iwu chilumbu wayiluwañesheli aAdama naEva nawa washiikili nindi ona muntu watama akamujilumuna. Ilaña Yehova wasoñamishili cheñi nindi, iwu chileñaleña wakuspiritu wahosheleli mudi kapela wakazuñañeshaña antu amukeña Nzambi.—Kutach. 3:15.

2, 3. Muloñadi chiyabulili kumutena Satana kakavulu henohu Mesiya kanda yenzi?

² Hamuloña wamaana indi, Yehova hatuleja ijina dadeni danona kañelu wadikañili nindiku. * Nawa kufuma hampinji yakudikaña kwatachi, hahitili yaaka 2,500 hakwila nawu Nzambi yatachiki kutena  ijina dalumbulula chekalayi iwu chilumbu. (Yoba 1:6) Nawa nyikanda yiwana hohu yaNsona yachiHeberu, 1 Kushindulula, Yoba niZekariya, diyatena nawu Satana, chaya mukwila nawu “Mukwakudimbulula.” Muloñadi chiyabulili kumutena chilumbu chetu kakavulu henohu Mesiya kanda yenzi?

³ Chinamwekani neyi Yehova hakeñeleña kumutiyakesha nankashi Satana kuhitila mukumutena kakavulu muNsona yachiHeberu hakulumbulula chekalayi ninyidimu yindiku. Nkeñelu yaYehova yasonekeleliyi chibalu chayina Nsona yadiña yakuleja antu jaNzambi kulonda eluki kwinza kwaMesiya nawa amulondeleña. (Luka 24:44; Ñal. 3:24) Chelili nkeñelu yindi yishikijewi nawa Mesiya yenzi, Yehova wamuzatishili yena niatumbanji twindi kulonda asololi yuma yitweluka hadi Satana niañelu adibombeli nindi. * Chidi hohu chiwahi, muloña Yehova wakazatisha Yesu niawayishewa hakumuchika Satana niejima amulondelaña.—Rom. 16:20; Chim. 17:14; 20:10.

4. Muloñadi chitukubulila kumutiya Diyabolu woma chikupu?

⁴ Kapostolu Petulu wamulumbulwili Satana Diyabolu nindi “mutupa wunakubuluma” nawa Yowanu wamuteneni nindi “kapela” nawa “chanzañombi.” (1 Pet. 5:8; Chim. 12:9) Ilaña hitwatela kumutiya Diyabolu woma chikupuku muloña ñovu jindi jakehelamu. (Tañenu Yakoba 4:7.) Atukwashaña kudi Yehova, Yesu niañelu ashinshika. Tunateli kumushinda chilumbu chetu nawukwashu wawu. Hela chochu, twatela kwakula malwihu asatu: Satana wadimbanaña kushika hadihi? Wadimbaña ñahi antu? Ñovu jaSatana jakumina hadihi? Chitukuhanjekaña hanawa malwihu, tukushinshika hayuma yitunateli kudizilaku.

5, 6. Muloñadi nfulumendi yawantu chiyikubulila kwilila antu yuma yejima yafwilañawu?

⁵ Añelu amavulu adikañili nakudibomba naSatana. Henohu Dibaji kanda, Satana wadimbili amakwawu hakachi kawu kwila wuvumbi nawanyana kawantu awambanda. Bayibolu yamwekesha iyi nsañu kuhitila mukumumwekesha chanzañombi muchifwikija nakukoka chibalu chamuchisatu chatutumbwa twamwiwulu hampinji yaholokeleñayi. (Kutach. 6:1-4; Yuda 6; Chim. 12:3, 4) Chelili ana añelu ambuuki muchisaka chaNzambi, aditwalili aweni kudi Satana kulonda yayiyuuleña. Hela chochu, bayi neyi awa akwakudikaña akojejaña hohu kukalaku. Satana washaku wanta wadifwana naWanta waNzambi nawa wadilisha yomweni kwikala mwanta. Muchiyuulu chindi chabulaña kumwekana, Satana wayilisha andemoni kwikala mujinfulumendi, wayinka wuswa nikuyilisha kwikala anyuuli amukaayi.—Efwe. 6:12.

⁶ Satana wazatishaña spiritu yindi kulonda yilomboleña nfulumendi yawantu yejima. Chumichi chamwekeni hatooka hampinji Satana yamumwekesheleliyi Yesu “mawanta ejima ahamaseki” nakuhosha nindi: “Nukukwinka wuswa hamawanta ejima awa nikulema kwawu, muloña anayinyinkiwu ami nawa nenkaña muntu wejima inakeñi.” (Luka 4: 5, 6) Hela chakwila Satana diyi wayiyuulaña, nfulumendi yayivulu yelilañaku antu jawu yuma yayiwahi. Nawa anyuuli amakwawu akeñaña kuyilila antu yuma yayiwahi. Ilaña kwosi nfulumendi hela nyuuli wunateli kwilila antu yuma yejima yafwilañawuku.—Mas. 146:3, 4; Chim. 12:12.

7. Satana wazatishaña ñahi nfulumendi, nsakililu yakutwamba ninyitayi yakulanda nakulandulula? (Talenu mwevulu wakutachikilahu.)

⁷ Satana niandemoni hiyazatishaña hohu nfulumendiku, ilaña azatishaña cheñi nsakililu  yakutwamba ninyitayi yakulanda nakulandulula kulonda adimbeña “antu ashakama hamaseki hejima.” (Chim. 12:9) Satana nakuzatisha nsakililu yakutwamba kulonda yatandisheña makudi hadi Yehova. Kubombelahu, Diyabolu nakuzata nañovu kulonda yayiluwañeshi antu amavulu aleki kuzatisha ijina daNzambi. (Yere. 23:26, 27) Chinakufumamu, antu amakwawu atoñojokaña nawu anakudifukula kudi Nzambi komana anakudifukula kudi andemoni. (1 Kor. 10:20; 2 Kor. 11:13-15) Satana cheñi nakutandisha makudi kuzatisha nyitayi yakulanda nakulandulula. Chakutalilahu, iyi nyitayi yadizishaña antu nawu hakwila ekali namuzañalu chiña ekala namali amavulu nimaheta. (Yish. 18:11) Antu akuhwelelaña munawa makudi atachikaña kukalakela “Maheta” chatela akalakeleña Nzambi. (Mat. 6:24) Nkumininaku, kusweja kukeña maheta kukuyiletesha aleki chikupu kumukeña Nzambi.—Mat. 13:22; 1 Yow. 2:15, 16.

8, 9. (a) Chakutalilahu chaAdama, Eva niañelu adikañili chatudizishaña yikumanyi yiyedi yalema? (b) Chatukwashaña ñahi neyi twiluka hakumina kutwamba kwaSatana?

⁸ Chakutalilahu chaAdama, Eva niañelu adikañili chatudizishaña yikuma yiyedi yalema. Chatachi, kwekala hohu tubadi tuyedi nawa twatela kwikala kukabadi kamu hohu. Kutwalekahu kwikala ashinshika kudi Yehova hela kuditwala etu aweni kukabadi kaSatana. (Mat. 7:13) Chamuchiyedi, antu adibombaña naSatana atambwilaña hohu yuma yakapinji kantesha. Adama naEva adituñilili nshimbi yakwiluka yuma yayiwahi niyatama nawa andemoni adinkeli wuswa wakuyuula nfulumendi yawantu. (Kutach. 3:22) Hela chochu, kwikala kukabadi kaSatana mwafumaña yuma yatama mpinji yejima. Kwosi yuma yayiwahi yafumañamu.—Yoba 21:7-17; Ñal. 6:7, 8.

⁹ Yumanyi yayiwahi yafumañamu neyi twiluka hakumina kutwamba kwaSatana? Chatukwashaña kwiluka hakukumina neyi tunakwovwahila nfunlumendi yawantu nawa chatusañumuna kuzata mudimu wetu wakushimwina. Tweluka netu Yehova wakeñaña nindi tulemesheña akulumpi janfulumendi. (1 Pet. 2:17) Nawa wakeñaña nindi twovwahileña nshimbi janfulumendi jawantu chakala hohu jinambuki wanyi nachakeñañayi. (Rom. 13:1-4) Ilaña twatela kwiluka netu hitwatela kudiñija munsañu jamapolitikisi hela kuhakwilaku nlomboli wumu hela chiyuulu chimuku. (Yow. 17:15, 16; 18:36) Muloña tweluka netu Satana wakeñaña kusweka nikutamisha ijina daYehova, dichaleteshaña tushimwineña antu kulonda amwiluki Nzambi. Twatiyaña kuwaha kututena nejina dindi nikudizatisha nawa tweluka netu kumukeña yena kwabadika kukeña mali hela yuma yikwawu.—Isa. 43:10; 1 Tim. 6:6-10.

10-12. (a) Satana watela wazatishili ñahi ndisha kulonda yalawuli akwawu añelu? (b) Yumanyi yitukudizila kudi añelu adimbiliwu?

¹⁰ Satana wazatishaña njila jajivulu hakudimba antu. Chakutalilahu, wazatishaña ndisha kulonda yaluwañeshi antu eleña yuma yinakukeñayi. Cheñi, wayichinishaña kulonda eleña yuma yinakukeñayi.

¹¹ Shinshikenu Satana chazatishiliyi ndisha kulonda yalawuli akwawu añelu amavulu. Watela wayishinshikili hadi mpinji yayilehi henohu kanda yayiluwañeshi nakwikala kukabadi kindi. Chelili añelu amakwawu adii ndisha kuhitila mukwila wuvumbi nawambanda, avwalili anyana ataluka achinishileña antu. (Kutach. 6:1-4) Hadaha Satana wayidimbili hohu añelu kwila wuvumbi wanyi, ilaña wayidimbili cheñi nindi ekali nañovu hadi antu. Nkeñelu yindi yadiña yakukañesha ‘mwana kamumbanda’ wakaniniwu. (Kutach. 3:15) Hela chochu, Yehova wakañesheli kana kafuta kuhitila mukuleta Dibaji—dakañesheli ñovu jaSatana niañelu adikañili hayina mpinji.

¹² Yumanyi yitukudizila kuniyi nsañu? Bayi mutoñojoka nenu himunateli kufwa mumuhetu wakwila wuvumbi hela kudivwimbaku. Añelu enjili nakudibomba naSatana, amukalakeleli Nzambi hadi yaaka yayivulu henohu kanda adikañi. Ilaña, hela chakwila adiña mwiwulu mwamuwahi, amavulu etejeli yitoñojoka yatama kumena nikukula mudi wena. Munjila yoyimu, hadaha tunakalakali yaaka yayivulu mukuloñesha kwaNzambi kwahamaseki. Ilaña, hela chakwila tudi mwiluña dakuspiritu dawunyonji, yitoñojoka yatama yinateli kutachika mudetu. (1 Kor. 10:12) Dichi twatela kudishinshikaña mumuchima wetu mpinji yejima kulonda tukañesheña yitoñojoka yatama yakwila wuvumbi nikudivwimba kwawusupi.—Ñal. 5:26; tañenu Akolosi 3:5.

13. Ndishanyi yikwawu yazatishañayi Satana, nawa tunateli kuyitondolwela ñahi?

¹³ Ndisha yikwawu yazatishañayi Satana hikukeña kwiluka nsañu yakupanda. Makonu, hazatishaña hohu andemoni munsakililu yakutwambaku, ilaña nimumakampani ayisela. Mafilimu, yisela yahavidiyo nimaTV amwekeshaña neyi kupanda kwakuwahi. Twatela kwiladi hakwila tubuli kufwa muniwu muhetu? Bayi tutoñojoka netu kuloñesha kwaNzambi kukutusonekela ndandanda yayisela yayiwahi niyatamaku. Wejima wetu twatela kudizisha chinleji chetu kulonda chitukwasheña kwila yuma kwesekeja nanshimbi jaNzambi. (Heb. 5:14) Hela chochu, tunateli kufuukula chiwahi neyi tulondela kufumba kwonenawu kwakapostolu Pawulu kwakukeña Nzambi ‘chakadi wunfwikiji.’ (Rom. 12:9) Tunateli kudihula etu aweni netu: ‘Komana yisela  yinatondaña yanleteshaña nimwekaneña neyi nidi nfwikiji? Neyi atudizi ami aBayibolu hela antu inafuntilaña amona yisela yinakeña, komana akumona nawu nelaña yuma yinatañishaña?’ Neyi yuma yitwahoshaña yesekanaña nayuma yitwelaña, hitukufwa munyihetu yaSatanaku.—1 Yow. 3:18.

14. Munjilanyi munateli kutuchinishilayi Satana, nawa tunateli kushinda ñahi?

¹⁴ Kubombela hakuzatisha ndisha, Satana watuchinishaña kulonda tubuleña kumwovwahila Yehova. Chakutalilahu, nateli kuzatisha nfulumendi kulonda yalekeshi mudimu wetu wakushimwina. Hadaha nateli kuzatisha akwetu itwazataña nawu hela akwetu akashikola kulonda atuchinisheña tubuli kulondela nshimbi jamuBayibolu. (1 Pet. 4:4) Nateli nikuzatisha muntu itwalemesha muchisaka hakwila nawu yatukañesheña kuya nakupompa. (Mat. 10:36) Tunateli kushinda ñahi iku kukala? Chatachi, twatela kwiluka netu yumiyi yatela kumwekana, Satana nakuzuña njita nanetu. (Chim. 2:10; 12:17) Dichi, twatela kwiluka chuma chacheni chaleteshaña yatuzuñisheña—Satana wahoshaña nindi tunateli hohu kumukalakela Yehova neyi yuma yidi chachiwahi. Wahoshaña nindi neyi tudi mukukala, tukuleka kumukalakela Nzambi. (Yoba 1:9-11; 2:4, 5) Dichi, twatela kumulomba Yehova kulonda yatwinki ñovu yakushinda iku kukala. Anukenu nenu, hamba katushiya nkawetuku.—Heb. 13:5.

15. Komana Satana nateli kutukanjikija kwila yuma yitunakubula kukeña? Lumbululenu.

¹⁵ Satana hakanjikijaña antu kwila yuma yinakubula kukeñawuku. (Yak. 1:14) Antu amavulu elaña nkeñelu yaSatana chakubula kwiluka. Ilaña neyi anadizi dehi chalala, afuukulañahu awenawu muntu iyatela kukalakelawu. (Yilw. 3:17; 17:30) Neyi tunafuukulihu kwila nkeñelu yaNzambi, kwosi chuma chinateli kwilayi Satana chikuletesha tufumpi kashinshi ketuku.—Yoba 2:3; 27:5

16, 17. (a) Ñovu jaSatana niandemoni jakumina hadihi? (b) Muloñadi chitukubulila kutiya woma kulomba kudi Yehova nezu datiyakana?

¹⁶ Satana niandemoni ekala namwakukumina. Chakutalilahu, hosi hashimunawu muNsona nawu anateli kwiluka yitoñojoka yamuntu hela yuma yidi mumuchima wamuntuku. Ilaña yamwekeshaña nawu Yehova niYesu hohu diwu ekala naniwu wuswa. (1 Sam. 16:7; Maku 2:8) Indi neyi munakuhosha hela kulomba nezu datiyakana? Komana twatela kuchina netu Diyabolu niandemoni anateli kutiya yuma yitunakulomba nikutuluwañesha? Ñakwilu yidi nawu, Inehi. Muloñadi? Hitwachinaña kumukalakela Yehova muloña wakwila netu Diyabolu nateli kutumonaku. Munjila yoyimu, hitwatela kuchina kulomba nezu datiyakana muloña wakwila netu Diyabolu wukututiyaku. MuBayibolu mwekala yakutalilahu yayivulu yawambuña aNzambi alombeli nezu datiyakana nawa hosi nihamu hamwekeshaña nawu achinini Diyabolu kuyitiyaku. (1 Anya. 8:22, 23; Yow. 11:41, 42; Yilw. 4:23, 24) Neyi tuzata nañovu kuhosha nikwila yuma kwesekeja nankeñelu yaNzambi, twatela kukuhwelela chikupu netu Yehova hakwiteja Diyabolu kutukatisha haya nyaakaku.—Tañenu Masamu 34:7.

¹⁷ Twatela kwiluka chilumbu chetu, ilaña hitwatela kumuchinaku. Nawukwashu waYehova, tunateli kumushinda Satana hela chakwila hitwawaninaku. (1 Yow. 2:14) Neyi tudikaña nindi, niyena wukututemuka. (Yak. 4:7; 1 Pet. 5:9) Chinamwekani neyi Satana nakukeñesha nankashi kuluwañesha atwansi. Yumanyi yatela kwilawu hakwila adikañi naDiyabolu? Chibaaba chinalondelihu chikakula ilu lwihu.