1, 2. (a) Nsañwinyi yahanjekeliyi Yesu nawatumbanji twindi henohu kanda yafwi? (Talenu mwevulu wakutachikilahu.) (b) Muloñadi chitwatelela kwiluka chaleteshaña tushimwineña? (c) Tukuhanjekadi muchinu chibaaba?

HAWUFUKU wakwila henohu kanda yafwi, Yesu wahanjekeli nawapostolu indi mpinji yayilehi nawa wayilejeli nindi wayikeña chikupu. Cheñi, wayilejeli chishimu chamuvinyu, chitwahanjekelihu muchibaaba chinafumihu. Muchina chishimu, Yesu wayikolesheleña atumbanji twindi kutwalekahu “[kusoña] nyikabu yayivulu”—kuumika mumudimu wakushimwina nsañu yaWanta.—Yow. 15:8.

² Hela chochu, Yesu hakumuminini dakuyileja yuma yatela kwilawu hohuku, ilaña wayilejeli muloña wuyatela kwilila mwenomu. Wayilejeli chaletesheli yayinki mudimu wakushimwina. Muloñadi chitwatelela kushimwina? Neyi twiluka chitwatelela kutwalekahu kushimwina, tukuumikaña hampinji yitunakuhana “wunsahu kudi akwanyuza yejima.” (Mat. 24:13, 14) Dichi, tuhanjikenu hayuma yiwana yamuNsona yaleteshaña tushimwineña. Nawa  tukushinshika yawaana yiwana yatwinkayi Yehova yatukwashaña kuumika hampinji yitunakusoña nyikabu.

3. (a) Kwesekeja naYowanu 15:8, muloñadi chitwatelela kushimwina? (b) Nyivinyu yekala muchishimu chaYesu yemenañaku anyi nawa muloñadi chiyinateleli?

³ Chuma chacheni chaleteshaña tuzateña mudimu wakushimwina hikumulemesha Yehova nikujilika ijina dindi kudi antu. (Tañenu Yowanu 15:1, 8.) Neyi chitunamoni, Yesu wamwesekejeli Tata yindi Yehova namukwakudima, hela mukwakuzata mwitempa, watumbaña nyivinyu. Yesu wadesekejeli yomweni namuvinyu, hela mutondu waweni nawa atumbanji twindi wayesekejeli nanyitayi. (Yow. 15:5) Dichi, nyivinyu yinakwimenaku nyikabu yaWanta yasoñaña akwakumulondela Kristu. Yesu walejeli apostolu indi nindi: “Tata yami walemeshewaña nanochu chimwasoñaña nyikabu yayivulu.” Neyi muvinyu chiwasoñaña nyivinyu yayiwahi yaleteshaña kumulemesha mukwakudima, ninetu twaleteshaña antu kumulemesha hela kumujilika Yehova neyi tushimwina nsañu yaWanta kwesekeja nahanakumini ñovu jetu.—Mat. 25:20-23.

4. (a) Munjilanyi mutwajilikilaña ijina daNzambi? (b) Mwatiyaña ñahi hakukoleka kutukweti kwakujilika ijina daNzambi?

⁴ Mudimu wetu wakushimwina wajilikaña ñahi ijina daNzambi? Kwila tujilika ijina daNzambi chikupu nehi. Dekala dajila dehi chadimu. Ilaña talenu chahosheliyi kaprofwetu Isaya nindi: “Yehova wamazaza diyi mukujilikaña.” (Isa. 8:13) Njila yimu mutwajilikilaña ijina daNzambi kubadika majina ejima hikukwasha amakwawu kulonda adijilikeña. (Mat. 6:9, tth.) Chakutalilahu, twahakwilañaku ijina daNzambi kukutwamba kwaSatana neyi tushimwinaña hayilwilu yayiwahi yekala naYehova nihankeñelu yindi kutalisha kudi antu. (Kutach. 3:1-5) Cheñi, twajilikaña ijina daNzambi neyi tuyikwasha antu mwiluña detu kwiluka nawu Yehova diyi watelela “kutambwila kulema, kalemesha niñovu.” (Chim. 4:11) Rune, wunazati wupayiniya yaaka 16 wahosheli nindi: “Natiyaña kuwaha kwikala chinsahu waNleñi wayuma yejima. Chumichi chanleteshaña kutwalekahu kushimwina.”

5. (a) Kwesekeja naYowanu 15:9, 10, muloñadi chitwatelela kushimwina? (b) Yesu wakonkomweneni ñahi hakuumika?

⁵ Tañenu Yowanu 15:9, 10. Chuma chalema chatuleteshaña tushimwineña nsañu yaWanta hikumukeña Yehova niYesu nankashi. (Maku 12:30; Yow. 14:15) Yesu wayilejeli apostolu kwikala mukukeña kwindi nikutwalekahu “kushakama mukukeña kwindi.” Muloñadi? Muloña twatela kuumika hakwila nawu tutwalekihu kwikala atumbanji twaKristu alala chaaka nichaaka. Yesu wakonkomweneni hakuumika chazatishiliyi izu dakwila nawu “kushakama” kapampa kakavulu mumazu antesha ekala haYowanu 15:4-10.

6. Twamwekeshaña ñahi netu tunakukeña kushakama mukukeña kwaKristu?

⁶ Twamwekeshaña ñahi netu tunakukeña kushakama mukukeña kwaKristu nikutwalekahu kwikala amabwambu jindi? Kuhitila mukulondela nshimbi jaYesu. Munjila yikwawu, Yesu nakuhosha nindi, ‘Ñovwahilenuña.’ Yesu watulejaña kwila yuma yelileñayi, muloña wabombelelihu nindi: “Neyi chochinovwahilaña nshimbi jaTata nawa natwalekahu kushakama mukukeña kwindi.” Twatela kumwimbujola Yesu.—Yow. 13:15.

7. Kunuñañananyi kwekala hakwovwahila nakukeña?

⁷ Yesu hahosheleñayi hakunuñañana kwekala hakwovwahila nikukeña, wasambilili kuyileja apostolu indi nindi: “Muntu wejima wukweti nshimbi jami nawa wajihembaña, yenowu  diyi wankeña.” (Yow. 14:21) Kubombelahu, neyi tulondela lushimbi lwaYesu lwakuya nakushimwina, dikwila nawu ninetu tunakumwekesha netu twamukeña Nzambi muloña nshimbi jaYesu jamwekeshaña chatoñojokañayi Tata yindi. (Mat. 17:5; Yow. 8:28) Neyi tumumwekeshelaña Yehova niYesu kukeña, niwena akutukeña.

8, 9. (a) Chumanyi chikwawu chaleteshaña tushimwineña? (b) Mazu aYehova ekala haEzekeli 3:18, 19 ni 18:23 atusañumunaña ñahi kutwalekahu kushimwina?

⁸ Kudi chuma chikwawu chaleteshaña tutwalekeñahu kushimwina. Twashimwinaña kulonda tusoñamishi antu. MuBayibolu, Nowa amutena nawu “mukwakushimwina.” (Tañenu 2 Petulu 2:5.) Chakadi nikujina, mudimu windi wakushimwina henohu Dibaji kanda mwabombeleli kusoñamisha antu hakujilumuka kwenjileña. Tunahoshelidi mwenimu? Talenu mazu ahosheliyi Yesu: “Muloña mumafuku wenowu chelili Dibaji kanda dinzi, antu adiileña nikunwa, amayala asumbwileña, ambanda asumbukileña kushika nihanodu ifuku deñililiyi Nowa muwatu, wena hiyashiliku maanaku, nichenjili Dibaji nakuyijilumuna wejima wawu. Nimpinji yakwikalahu kwaMwana kamuntu dichiyikekala.” (Mat. 24:38, 39) Hela chakwila antu adiwili, Nowa watwalekelihu kuyileja nsañu yakusoñamisha yamulejeliwu.

⁹ Makonu, twashimwinaña nsañu yaWanta kulonda antu eluki nkeñelu yaNzambi kutalisha kudi antu. Kufwana Yehova, twafwilaña netu antu ejima atiyi iyi nsañu nawa ‘akatwalekihu kuhanda.’ (Ezek. 18:23) Hampinji yoyimu, neyi tushimwina kwitala nikwitala nikumaluña kwekala antu amavulu, twayisoñamishaña antu amavulu netu Wanta waNzambi wukenza nakujilumuna kanu kaayi katama.—Ezek. 3:18, 19; Dan. 2:44; Chim. 14:6, 7.

10. (a) Kwesekeja naMatewu 22:39, muloñadi chitwatelela kushimwina? (b) Shimunenu Pawulu naSilasi chakwashiliwu mukwakuhemba kaleya muFwilipi.

¹⁰ Chuma chikwawu chalema chaleteshaña tutwalekihu kuzata mudimu wakushimwina: Twashimwinaña muloña twakeña akwetu antu. (Mat. 22:39) Iku kukeña dikwaleteshaña tuumikeña muniwu mudimu, tweluka netu antu anateli kuhimpa neyi chihandilu chawu chihimpa. Talenu yuma yamweniyi Pawulu nimulunda nindi Silasi. Akwankunyi nawu ayishili mukaleya mumusumba waFwilipi. Dichi, mukachi kawufuku kwenjili mutentashi wanyinkesheli kaleya nawa yenzelu yenzunukili. Mukwakuhemba kaleya watiyili woma nindi atuyili anatemuki, dichi wakeñeleña kudijaha yomweni. Ilaña Pawulu wamubidikili nindi: “Bayi wudijahaku!” Mukwakuhemba kaleya watiyili woma wamwihwili nindi: “Yumanyi yinatela kwila kulonda akañamwini?” Amulejeli nawu: “Kuhwelelaku mudi Mwanta Yesu nawa akakwamwina eyi hamu niamwitala deyi.”—Yilw. 16:25-34.

11, 12. (a) Nsañu yamukwakuhemba kaleya yinakutudizishadi kutalisha hamudimu wakushimwina? (b) Chumanyi chitwatela kwilaña?

¹¹ Nsañu yamukwakuhemba kaleya yinakutudizishadi hamudimu wakushimwina? Talenu chumichi: Mukwakuhemba  kaleya wabalumukili mumuchima nikulomba wukwashu hanyima yamutentashi. Munjila yoyimu, antu amakwawu akaanaña nsañu yamuBayibolu makonu anateli kubalumuka mumuchima nikulomba wukwashu neyi kwiluña dawu kunaholokeli mutentanshi. Chakutalilahu, hadaha antu amakwawu mwiluña detu dakushimwina anayihañi mudimu chakubula kwiluka nawa ananeñi. Hadaha amakwawu ananeñi muloña wulu wawu wunamani. Amakwawu niwena anateli kuneña muloña wayikatu hela hamuloña wakufwisha muntu iyakeña nankashi. Neyi yuma yamuchidiwu yinamwekani, antu adi muniku kukala anateli kwihula malwihu kutalisha hawumi, nsañu yabuliliwu kushaku maana hakusambila. Hadaha anateli nikutoñojoka nawu: ‘Yumanyi yinatela kwila hakwila akañamwini?’ Neyi tuyiwana, anateli kwikala nampwila yakutiyilila katachi muchihandilu chawu kunsañu yetu yakuchiñeja.

¹² Dichi, neyi tutwalekahu kushimwina nakashinshi, tunateli kuyikundeja antu hampinji yakakeñawu kwiteja nsañu yetu. (Isa. 61:1) Charlotte wunazati mudimu wampinji yejima yaaka 38, wahosheli nindi: “Antu makonu anajimbali. Anakukeñeka kuyishimwina nsañu yayiwahi.” Ejvor wunazati wupayiniya yaaka 34, wahosheli nindi: “Makonu antu amavulu anakuneña nankashi. Inakufwila kuyikwasha hama. Chumichi chansañumunaña kuyishimwina.” Kukeña akwetu antu—dichuma chacheni chaleteshaña tutwalekeñahu kushimwina!

13, 14. (a) Chawaananyi chinashimuniwu haYowanu 15:11? (b) Twekalaña ñahi namuzañalu waYesu? (c) Muzañalu watukwashaña ñahi kuzata mudimu wakushimwina?

¹³ Namelela henohu kanda yafwi, Yesu walejeli cheñi apostolu indi yawaana yayivulu yikuyikwasha kuumika hampinji yinakusoñawu nyikabu. Yawaananyi yeniyi, nawa yinateli kutukwasha ñahi?

¹⁴ Chawaana chamuzañalu. Komana kwovwahila lushimbi lwaYesu lwakushimwina hichisenda? Inehi mwani. Hanyima yakushimuna chishimu chamuvinyu, Yesu wahosheli nindi akwakushimwina aWanta ejima akekala namuzañalu. (Tañenu Yowanu 15:11.) Nawa watulejeli nindi muzañalu windi wakekala wetu. Munjilanyi? Neyi chitwashimuna hakusambila, Yesu wadesekejeli yomweni namuvinyu nawa atumbanji twindi wayesekejeli nanyitayi. Nyitayi yasapukaña kumuvinyu. Chineli nyitayi yafumaña kumuvinyu, yatambwilaña menji niyakuda yafumaña kumuvinyu. Munjila yoyimu, neyi tutwalekahu kudikunda naKristu kuhitila mukumulondela, tukwikala namuzañalu wadiñayi nawu hampinji yelileñayi nkeñelu yaTata yindi hamaseki. (Yow. 4:34; 17:13; 1 Pet. 2:21) Hanne, wunazati wupayiniya yaaka kubadika ha 40 wahosheli nindi: “Muzañalu wunatiyaña neyi nafumi mumudimu wakushimwina wankwashaña kutwalekahu kukalakala mudimu waYehova.” Mwamweni, muzañalu watukwashaña kutwalekahu kushimwina mumaluña mwabulañawu kwiteja chalala.—Mat. 5:10-12

15. (a) Chawaananyi chinashimuniwu haYowanu 14:27? (b) Kuwunda kwatukwashaña ñahi kutwalekahu kusoña nyikabu?

¹⁵ Chawaana chakuwunda. (Tañenu Yowanu 14:27.) Hefuku dakwila henohu kanda yafwi, Yesu walejeli apostolu indi nindi: “Nayinki kuwunda kwami.” Ichi chawaana chakuwunda kwindi chatukwashaña ñahi kusoña nyikabu? Chitukuumikaña, tukumonaña kuwunda kwenzaña hakwikala amabwambu jaYehova niYesu. (Mas. 149:4; Rom. 5:3, 4; Kol. 3:15) Ulf wunazati yaaka 45 mumudimu wampinji yejima wahosheli nindi: “Mudimu wakushimwina wanzeyeshaña, ilaña wanletelaña muzañalu walala  muchihandilu chami.” Twakoleka chikupu hakwikala nakuwunda kwamuyitoñojoka!

16. (a) Chawaananyi chinashimuniwu haYowanu 15:15? (b) Apostolu adi kutwalekahu ñahi kwikala amabwambu jaYesu?

¹⁶ Chawaana chawubwambu. Hanyima yakwila Yesu nayileji apostolu indi nindi akekala namuzañalu “chikupu,” wayilumbulwililili chichawahila kumwekesha kukeña kwakudihana. (Yow. 15:11-13) Kuhiñahu wayilejeli nindi: “Nayiteni nami amabwambu jami.” Kwikala ibwambu daYesu hichaawana chabadika! Apostolu ateleleli kwiladi hakwila atwalekihu kwikala amabwambu jindi? Ateleleli ‘kuya nakusoña nyikabu.’ (Tañenu Yowanu 15:14-16.) Henohu kunashali yaaka yiyedi, Yesu walejeli apostolu indi nindi: “Dichi chimukuyaña, shimwinenuña nenu: ‘Wanta wamwiwulu wunaswini dehi kwakwihi.’” (Mat. 10:7) Dichi hawuna wufuku wakukumishaku, wayilejeli nindi omikeña mumudimu wuyatachikili kuzatawu. (Mat. 24:13; Maku 3:14) Chadiña chapela wanyi kwila mwayilejeliwu kudi Yesu, ilaña ateleleli kwilamu kulonda atwalekihu kwikala amabwambu jindi. Adi kuumika ñahi? Adi kuumika nachawaana chikwawu.

17, 18. (a) Chawaananyi chinashimuniwu haYowanu 15:16? (b) Ichi chawaana chadi kuyikwasha ñahi atumbanji twaYesu? (c) Yawaananyi yatukwashaña makonu?

¹⁷ Chawaana chakwakula kulomba. Yesu wahosheli nindi: “Chuma chejima chimwakamulomba Tata kuhitila mwijina dami, [wakayinkachu].” (Yow. 15:16) Awa mazu atela ayikolesheli nankashi apostolu! * Hela chakwila atiyishishili wanyi mwatalishiliyi, Mwanta wawu wadiña kwakwihi nakufwa, dichi hadi kuyishiya chakubula wukwashuku. Yehova wadiña wadiloñesha kwakula kulomba kwawu nikuyikwasha hampinji yinakushimwinawu nsañu yaWanta. Mwamweni, hashimbwili wanyi, amweni Yehova chakwiliyi kulomba kwawu.—Yilw. 4:29, 31.

¹⁸ Niyinu mpinji wuchidi kutwakula. Neyi tutwalekahu kuumika hampinji yitunakusoña nyikabu, tukutwalekahu kwikala amabwambu jaYesu. Kubombelahu, twatela kukuhwelela netu Yehova wadiloñesha kwakula kulomba kwetu kwakushinda kukala kutunateli kuwana hampinji yitunakushimwina nsañu yayiwahi yaWanta. (Fwi. 4:13) Twatiyaña kuwaha muloña Nzambi wakulaña kulomba kwetu nawa Yesu hibwambu detu! Iyi yawaana yatwinkañayi Yehova yatukwashaña kutwalekahu kusoña nyikabu.—Yak. 1:17.

19. (a) Muloñadi chitwatwalekelañahu kuzata mudimu wakushimwina? (b) Yumanyi yatukwashaña kuzata mudimu waNzambi?

¹⁹ Neyi chitunadizi muchinu chibaaba, twatwalekañahu kushimwina kulonda tumulemeshi Yehova nikujilika ijina dindi, twamwekeshaña netu twamukeña Yehova niYesu, twasoñamishaña antu nikumwekesha netu twakeña akwetu antu. Kubombelahu, chawaana chamuzañalu, chakuwunda, chawubwambu nichakwakula kulomba kwetu, yatukwashaña kuzata mudimu waNzambi. Yehova watiyaña kuwaha hakumona tunakutwalekahu “[kusoña] nyikabu yayivulu.”