1, 2. (a) Muloñadi chitwatelela kutwalekahu kushimwina mumaluña mwabulañawu antu kwiteja chalala? (Talenu mwevulu wakutachikilahu.) (b) Yesu wahosheli nindidi kutalisha hakushimwina “mwiluña damumukala wawu”? (Talenu tumazu twaheshina.)

SERGIO NAOLINDA hiyapayiniya adisumbula adi nayaaka yamuma 80 ashakamaña muUnited States. Chayinu mpinji anakukañanya kwenda chiwahi muloña nyendu yinakuyikata. Ilaña neyi chelileñawu mafuku akunyima, anatwalekihu kuya mutawuni yekala nawantu amavulu nawa ashikaña kuna na 07:00. Emanaña kwakwihi nasitesheni yabasi kulonda enkeña antu anakuhita nyikanda yetu yashindamena haBayibolu. Antu amavulu ayidiwulaña, ilaña awa adisumbula atwalekañahu nawa atumbaña chimwemweta neyi antu ayitala. Chiyashika 12:00, ayaña kwitala chovu-chovu. Chikwacha cheñi nantetemena, ayaña mutawuni nampinji yoyimu ya 07:00. Nawa awa adisumbula ashimwinaña nsañu yaWanta muyina tawuni mafuku 6 mumulungu, muchaaka chejima.

² Neyi chelañawu aSergio naOlinda, amanakwetu niahela ashinshika  mukaayi kejima anashimwini hadi yaaka yayivulu mumaluña mwabulañawu antu kwiteja chalala. Neyi mwashimwinaña mwiluña damuchidiwu, tunakuyisakilila hachimunakuumika. * Chimwashimwinaña nakuumika hakumukalakela Yehova mwakoleshaña amanakwenu amavulu, kubombelahu niamanakwenu anashimbuli muchalala. Talenu awa mazu ahosheliwu ankoñi añinza, wumu wahosheli nindi: “Neyi nizata nawamanakwetu niahela amuchidiwu mumudimu wakushimwina, nakolelañaku.” Mukwawu wahosheli nindi: “Kashinshi kawu kankwashaña kuumika nikuzata nañovu mudimu wakushimwina.” Mukwawu nindi: “Chakutalilahu chawu chantiyishaña kumuchima kuwaha.”

3. Tukuhanjeka hamalwihwinyi asatu, nawa muloñadi?

³ Hakwila nawu tutwalekihu kuzata namuchima wejima mudimu wakushimwina watwinkeliyi Yesu, tuhanjekenu hañakwilu yamalwihu asatu analondelihu: Muloñadi chitwaneñelaña mpinji yikwawu? Tunateli kusoña ñahi nyikabu? Tunateli kuumika ñahi hampinji yitunakusoña nyikabu?

4. (a) Pawulu watiyili ñahi nayilwilu yamwekesheliwu aYudeya amavulu? (b) Muloñadi Pawulu chatiyililiyi muniyi njila?

⁴ Neyi mwaneñahu dehi hampinji yimwashimwinineña mwiluña mwabulañawu antu kwiteja chalala, mukuhosha neyi chahosheliyi kapostolu Pawulu. Wakwashili antu amavulu kwikala atumbanji twaKristu mumudimu windi wakushimwina wazatiliyi yaaka kwakwihi na 30. (Yilw. 14:21; 2 Kor. 3:2, 3) Hela chochu, hatwesheli kukwasha aYudeya ejima kwikala akwakudifukula alalaku. Ilaña amavulu amukaanini Pawulu nawa amakwawu amukabishili. (Yilw. 14:19; 17:1, 4, 5, 13) Pawulu watiyili ñahi nayuma yeliliwu aYudeya? Wahosheli hatooka nindi: “Inakuhosha chalala mudi Kristu . . . [nami] nikweti chineñi cheneni nikukata kwabulaña kumana mumuchima wami.” (Rom. 9:1-3) Muloñadi Pawulu chatiyililiyi muniyi njila? Washili muchima hamudimu wakushimwina. Wayishimwinineña aYudeya muloña wayakameneni. Dichi Pawulu watiyili kutama hakumona anakukaana luwi lwaNzambi lwayimwekesheleliwu.

5. (a) Chumanyi chaleteshaña tuyishimweneña antu? (b) Muloñadi chitwaneñelaña mpinji yikwawu?

⁵ Kufwana Pawulu, ninetu twayishimwinaña antu muloña twayakamenaña. (Mat. 22:39; 1 Kor. 11:1) Muloñadi? Tweluka chikupu nkisu jikatambwilawu antu amukalakelaña Yehova. Neyi tutoñojoka hadi antu adi mwiluña detu dakushimwina, twadihosheshaña mumuchima netu, ‘Twatela kuyikwasha kulonda eluki yuma yayiwahi yinabuli kwilukawu!’ Dichi, twatwalekañahu kuyikolesha kumwiluka Yehova ninkeñelu yindi hadi antu. Munjila yikwawu, twayilejaña antu itwashimwinaña netu: ‘Tunayileteli chawaana chachiwahi. Tambulenu mwani.’ Dichi neyi antu akaana kutambula ichi chawaana, chinateli ‘kutukata kumuchima.’ Chumichi hichamwekeshaña nawu tudana chikuhweleluku, ilaña chamwekeshaña nawu twasha muchima hamudimu wakushimwina. Hela chakwila kudi yuma yatuneñeshaña, twatwalekañahu kuumika. Elena, payiniya wunazati yaaka kubadika ha 25, wahosheli neyi chitunateli kuhosha wejima wetu nindi: “Chankalilaña kuzata mudimu wakushimwina. Ilaña kwosi mudimu wukwawu wunatela kuzata kubadika iwu.”

6. Tukuhanjeka halwihwinyi, nawa tukwila ñahi mwenimu?

⁶ Tuneluki ñahi netu tunateli kusoña nyikabu mumudimu wakushimwina hichikweti muloña neluña mutunakushimwinaku? Hakwila twakuli  ilu lwihu lwalema, tuhanjekenu hayishimu yiyedi yaYesu yahosheleña ‘hakusoña nyikabu.’ (Mat. 13:23) Chishimu chatachi chahosha hamuvinyu.

7. (a) “Mukwakudima,” “muvinyu walala” ‘ninyitayi’ yemenañaku anyi? (b) Lwihwinyi lutukwakula?

⁷ Tañenu Yowanu 15:1-5, 8. Yesu wayilejeli atumbanji twindi nindi: “Tata yami walemeshewaña nanochu chimwasoñaña nyikabu yayivulu nakudimwekesha nenu mudi atumbanji twami.” Yesu wamuteneni Yehova nindi “mukwakudima,” yomweni waditeneni nindi “muvinyu walala” nawa atumbanji twindi nindi “nyitayi.” * Hanu dinu, nyikabwinyi yatela kusoñawu akwakumulondela Kristu? Munichi chishimu, Yesu hateneni nyikabu yatela kusoñawuku, ilaña wahosheli yuma yimu yalema yinateli kutukwasha kwiluka yuma yateneneñayi.

8. (a) Muchinu chishimu, muloñadi nyikabu chiyabulila kutalisha kukwilisha atumbanji amaha? (b) Komana yuma yatulejañayi Yehova yakala kulondela?

⁸ Hahosheleñayi hadi Tata yindi, Yesu wahosheli nindi: “Wakunkulaña mudi ami mutayi wejima wabulaña kusoña nyikabu.” Munjila yikwawu, Yehova watumonaña nindi tudi ambuña indi chiña hohu neyi tunakusoña nyikabu. (Mat. 13:23; 21:43) Dichi, munichi chishimu, nyikabu yatela kusoñayi mukwaKristu wejima hiyatalisha kudi atumbanji amaha itwelishañaku. (Mat. 28:19) Neyi nehi, chikumwekana neyi aYinsahu ashinshika ashimwinaña mumaluña mwabulañawu antu kwiteja chalala akwikala neyi nyitayi yabulaña kusoña yidi muchishimu chaYesu. Hela chochu, chaluwa kutoñojoka muniyi njila! Muloñadi? Muloña hitwatela kukanjikija antu netu ekali atumbanjiku. Yehova yomweni hakanjikijaña ambuña indi kwila yuma yikubula kutwesha kwilawuku, dichi bayi tuyikanjikijaku. Yuma yejima yatulejañayi Yehova yapela kwila.—Kuhit. 30:11-14.

9. (a) Mudimwinyi watukwashaña kusoña nyikabu? (b) Tukuhanjeka hachishimwinyi, nawa muloñadi?

⁹ Hanu dinu nyikabu yamuchidinyi yitwatela kusoña? Nyikabu yatela kutalisha kumudimu wutunateli kutwesha kuzata wejima wetu. Mudimwinyi watukwashaña “kusoña nyikabu”? Mudimu wakushimwina nsañu yayiwahi yaWanta waNzambi. * (Mat. 24:14) Chishimu chaYesu chamukwakukuwa chalumbulula chumichi. Tuhanjekenu hachishimu chamuchiyedi.

10. (a) Munichi chishimu, mbutu nimaseki yatalisha kuyumanyi? (b) Kunsachi yatidiku kwasoñañadi?

¹⁰ Tañenu Luka 8:5-8, 11-15. Muchishimu chamukwakukuwa, mbutu yemenañaku “izu daNzambi,” hela nsañu yaWanta. Maseki emenañaku muchima wamuntu wachifwikija. Mbutu yaholokeleli hamaseki amawahi yelili nyiji, yatutukili (yabalukili) nawa yakulili, muchinu chibaaba tuhoshi netu yakulili nakwikala nsachi yatidiku. Kuhiñahu “jasoñeli nyikabu 100.” Hanu dinu nyikabwinyi yasoñaña kunsachi yatidiku? Komana yasoñaña nsachi yatidiku yayiha? Inehi, yasoñaña mbutu yayiha, yakulaña nakwikala nsachi yatidiku. Munichi chishimu, katidiku kamu kasoñeli tidiku 100. Ichi chishimu chinakundami ñahi kumudimu wetu wakushimwina?

11. (a) Chishimu chamukwakukuwa chakundama ñahi kumudimu wetu wakushimwina? (b) Twasoñaña ñahi mbutu yayiha yaWanta?

¹¹ Hakwila tutiyishishi, twili netu hadi yaaka yayivulu yinahitihu aYinsahu hela anvwali jetu akwaKristu atudizishili nsañu yaWanta. Chamweniwu nawu tuneteji nsañu yaWanta yidi neyi mbutu, atiyili kuwaha. Maseki amawahi ashimunawu muchishimu chaYesu akwashili kwidisha mbutu yacheñi, ninetu twetejeli nsañu  nawa twayihembeli. Chafuminimu, nsañu yaWanta yidi neyi mbutu yelili nyiji nawa yakulili, nakwikala neyi nsachi yatidiku yasoñeli nyikabu mukuhita kwampinji. Nawa neyi chasoñaña nsachi yatidiku nyikabu, bayi nsachi yayihaku ilaña mbutu yayiha, munjila yoyimu ninetu twasoñaña nyikabu yayiha, bayi atumbanji amahaku, ilaña mbutu yayiha yaWanta. * Twasoñaña ñahi mbutu yayiha yaWanta? Mpinji yejima yitwashimwinaña nsañu yaWanta, twelishaña nikuvulisha mbutu yatumbiliwu munyichima yetu. (Luka 6:45; 8:1) Dichi, ichi chishimu chatudizishaña nawu neyi tutwalekahu kushimwina nsañu yaWanta, dikwila nawu “[tunakusoña] nyikabu nakuumika.”

12. (a) Chikumanyi chitunateli kudizila kuchishimu chaYesu chamuvinyu nimukwakukuwa mbutu? (b) Chumanyi chitukudizila kunichi chikuma?

¹² Chikumanyi chitunateli kudizila kuchishimu chaYesu chamuvinyu nimukwakukuwa mbutu? Iyi yishimu yatudizishaña nawu mudimu wetu wakushimwina hiwashindamena hachetejañawu antu mwiluña detuku. Ilaña, washindamena chitwazataña nakashinshi. Pawulu washimwini chumichi hahosheliyi nindi: “Muntu-himuntu wakatambwila wufwetu windi kwesekeja namudimu windi.” (1 Kor. 3:8) Wufwetu wakekala kwesekeja namudimu, bayi neyi kwesekeja nayuma yafumini mumudimuku. Matilda, wunazati wupayiniya yaaka 20, wahosheli nindi: “Natiyaña kuwaha hakwiluka nami Yehova wakiswilaña chitwadihanaña.”

13, 14. Kwesekeja naAroma 10:1, 2, chumanyi chaletesheli Pawulu yabuli kuleka kuyishimwina antu abulileña kwiteja nsañu yaWanta?

¹³ Chumanyi chikutukwasha kusoña nyikabu nakuumika? Neyi chitunahanjekihu dehi, Pawulu waneñeli nayilwilu yawaYudeya yakukaana nsañu yaWanta. Hela chochu, halekeli kuyishimwinaku. Talenu mazu ayisonekeleliyi akwaKristu amuRoma hachatiyili nayilwilu yawaYudeya, wahosheli nindi: “Chuma chinafwilaña mumuchima wami nikulembelela kunayilembelelañaku aIsarela kudi Nzambi, kudi kwakwila nami  ayamwini. Muloña nidi chinsahu chawu nami akweti iyena dakumuzatila Nzambi, ilaña bayi neyi kwesekeja namwaya kwiluka kwalalaku.” (Rom. 10:1, 2) Chumanyi chashimwiniyi Pawulu chaletesheli yatwalekihu kushimwina?

¹⁴ Chatachi, Pawulu washimwini chuma chaletesheli yatwalekihu kuyishimwina aYudeya. Kudi chuma ‘chafwilileñayi mumuchima windi.’ Wakeñeleña kukwasha aYudeya akapuluki. (Rom. 11:13, 14) Chamuchiyedi, Pawulu ‘wayilembeleliku aIsarela kudi Nzambi.’ Wamulembeleli Nzambi nindi yayikwashi aYudeya eteji nsañu yaWanta. Chamuchisatu, Pawulu wabombelelihu nindi: “Akweti iyena dakumuzatila Nzambi.” Wamweni nindi antu anateli kubalumuka. Neyi tumwekesha iyena munjila yayiwahi, tunateli kukwasha antu kwikala neyena dakwikala atumbanji twaKristu, neyi chelukiliyi Pawulu.

15. Tunateli kumwimbujola ñahi Pawulu? Shimunenu yakutalilahu.

¹⁵ Tunateli kumwimbujola ñahi Pawulu? Chatachi, twatela kuzata nañovu kulonda tuwani antu atelela adi “nanyichima yashinshika yakukeña kwikala nawumi wahaya nyaaka.” Chamuchiyedi, twatela kumulembelelaña Yehova mukulomba netu yenzununi nyichima yawantu itukuwana. (Yilw. 13:48; 16:14) Silvana, wunazati wupayiniya yaaka kwakwihi na 30, wahosheli nindi: “Henonu kanda niyi nakushimwina kwitala didi mwiluña dami dakushimwina, nalombaña kudi Yehova kulonda yankwashi kumona yilwilu yayiwahi mudi antu.” Ninetu twamulombaña Nzambi kulonda yatemeshi añelu atukwashi kuwana antu anakukeña kudiza chalala. (Mat. 10:11-13; Chim. 14:6) Robert wunazati wupayiniya yaaka kubadika ha 30, wahosheli nindi: “Chatuzañaleshaña kuzatila hamu nawañelu eluka chinakuhandawu eni matala.” Chamuchisatu, twatela kwiluka netu antu anateli kubalumuka. Carl eluda wapapatisheweli yaaka 50 yinahitihu, wahosheli nindi, “Namonaña tuyuma twanyanya mudi muntu twamwekeshaña nawu nakukeña kudiza, chidi neyi kutumba chimwemweta, chinakuntalayi hela neyi yehula lwihu lunakukeñeshayi kwiluka ñakwilu.” Mwamweni, kufwana Pawulu, twatela kuumika hampinji yitunakusoña nyikabu.

16, 17. (a) Chumanyi chitukudizila kumazu ekala haMukwakutañisha 11:6? (b) Shimunenu mudimu wetu wakushimwina chiwunateli kukwasha antu atumonaña.

¹⁶ Hela chakwila tunakumona netu nsañu yaWanta hiyinakushika antu hanyichimaku, bayi tudiwula yuma yafumaña mumudimu wetu wakukuwaku. (Tañenu Mukwakutañisha 11:6.) Kuhosha hohu walala, antu amavulu hiyatutiyililañaku ilaña atumonaña. Atumonaña chitwavwalaña chiwahi, chitwamwekeshaña kalemesha nichitwatumbaña chimwemweta. Mukuhita kwampinji, yilwilu yetu yayiwahi yinateli kuyikwasha kwiluka nawu atumweneña munjila yatama nawa anateli kuhimpa. A Sergio naOlinda itwatena hakusambila, amweni chumichi.

¹⁷ Sergio wahosheli nindi: “Chinakatili, twalekeli kuya kusitesheni nakushimwina. Chitwatachikili, antu ahitileña atwihwileña nawu, ‘Twayimonañahu wanyi. Mwayili kudihi?’” Olinda wabombelelihu namuzañalu nindi: “Añendeshi amabasi atubayibishileña nawa amakwawu atubidikileña nawu ‘Munakwila chiwahi!’ Alombeleña nimagazini etu.” Nawa ifuku dimu awa adisumbula ahayamini, iyala wumu wenjili hamesa yakushimwina, wayinkeli nkenu nawa wayisakilili hamudimu wazatañawu.

18. Muloñadi chimwatela kufwila “[kusoña] nyikabu nakuumika”?

¹⁸ Mwamweni, neyi tubula ‘kulekesha chikasa chetu’ kukuwa mbutu yaWanta, tukutwalekahu kushimwina “wunsahu kudi akwanyuza yejima.” (Mat. 24:14) Chasweja kulema, tukwikala namuzañalu hakwiluka netu Yehova diyi watwinka iwu mudimu, muloña wakeña antu ejima “asoñaña nyikabu nakuumika”!