1. Yumanyi yiyedi yitwatela kukuhwelela?

YEHOVA NZAMBI wakeña akwakudifukula indi. Wayikeña nawa wakatwalekahu kuyikeña. Wakeña cheñi niwuñanji. (Mas. 33:5) Dichi twatela kukuhwelela yuma yiyedi: (1) Chamukataña Yehova neyi ambuña indi anakuyikoña chatama. (2) Wakana nindi hiyakatwalekahu kuyikoña antu jindi chatamaku nawa wakababesha antu ayilaña chatama. Muchibaaba chakusambila chayinu yibaaba, * twadizili netu Lushimbi lwayinkeliwu aIsarela kudi Nzambi kuhitila mudi Mosi lwashindameneni hakukeña. Lwakolesheleña antu kwikala nawuñanji, wuñanji kudi antu ejima, sweje-e ana abulili wakuyikiña. (Kuhit. 10:18) Luna Lushimbi, lwamwekesheli Yehova chakamenañayi akwakudifukula indi.

2. Malwihwinyi itukwakula?

² Nshimbi jaMosi jamanini mu 33 C.E. hatachikiliwu chipompelu chawakaKristu. Komana akaKristu anateli kuhanda chakadi kukiñewa nanshimbi yashindamena hakukeña nikumwekesha wuñanji? Inehi. AkaKristu ekalili nalushimbi lwaluha. Muchinu chibaaba, tukuhanjeka mwatalisha ilu lushimbi. Kuhiñahu tukwakula awa malwihu: Tukuhosheladi netu ilu lushimbi lwashindamena hakukeña? Tukuhosheladi netu ilu lushimbi lwamwekeshaña wuñanji? Kwesekeja nanilu lushimbi, antu adi nawuswa anateli kwakamena ñahi amakwawu?

3. Yumanyi yabombela ‘mulushimbi lwaKristu’ yinashimuniwu haAñalija 6:2?

³ Tañenu Añalija 6:2. Akakristu alondelaña “lushimbi lwaKristu.” Yesu hayisonekeleli akwakumulondela nshimbiku, ilaña wayinkeli kuleja, nshimbi niyishina yatela kuyilombola. “Lushimbi lwaKristu” mwabombela yuma yejima yatañishileñayi Yesu. Hakwila tutiyishishi chiwahi iyi nshimbi, shinshikenu yuma yinalondelihu.

4-5. Munjilanyi mwatañishilileñayi Yesu, nawa watañishili mpinjinyi?

⁴ Munjilanyi mwatañishilileñayi Yesu? Chatachi, watañishileña antu hayuma yahosheleñayi. Mazu indi adiña nañovu muloña ahosheleña chalala hadi Nzambi, wadizishileña chalala kutalisha hankeñelu yachihandilu nawa wayilejeleña antu nindi Wanta waNzambi diwakamanisha yihuñu yejima yamonañawu antu. (Luka 24:19) Cheñi, Yesu wadizishileña antu nayuma yelileñayi. Mukuhanda kwindi, wadiña nakudizisha chatela kuhandawu akwakumulondela.—Yow. 13:15.

⁵ Yesu watañishili mpinjinyi? Watañishili mpinji yadiñayi nakushimwina hamaseki. (Mat. 4:23) Wadizishili cheñi antu amulondeleleña hanyima yakusañuka. Chakutalilahu, wamwekeni kudi atumbanji hadaha kubadika ha 500, nawa wayinkeli lushimbi ‘lwakwilisha atumbanji.’ (Mat. 28:19, 20; 1 Kor. 15:6) Chineli diyi mutu wachipompelu, Yesu watwalekelihu kudisha atumbanji twindi nihanyima yakufunta mwiwulu. Chakutalilahu, kwakwihi na 96 C.E., Kristu wamulombweli kapostolu Yowanu kukolesha nikufumba akaKristu awayishewa.—Kol. 1:18; Chim. 1:1.

6-7. (a) Yuma yatañishileña Yesu ayisoneka kudihi? (b) Twovwahilaña ñahi lushimbi lwaKristu?

⁶ Yuma yatañishileñayi Yesu ayisoneka kudihi? Nyikanda yaNsañu Yayiwahi yiwana asonekamu yuma yahosheliyi Yesu niyeliliyi hadiñayi hamaseki. Nyikanda yikwawu yaNsona jawakwaKristu jachiGriki yatukwashaña kwiluka cheñi chekala yitoñojoka yaYesu hayuma yikwawu, muloña antu ayisonekeli ayoneneni kudi spiritu yajila nawa adiña “nayitoñojoka yaKristu.”—1 Kor. 2:16.

⁷ Yuma yitunateli kudizilaku: Ntañishilu yaYesu yatukwashaña muchihandilu chetu chejima. Dichi lushimbi lwaKristu lwakundama  kuyuma yejima yitwelaña, kumatala, kumudimu hela kushikola nimuchipompelu. Twadizaña lwenilu lushimbi neyi tutañaña Nsona jawakwaKristu jachiGriki nikutoñojokahu chikupu. Twovwahilaña ilu lushimbi neyi tunakwovwahila kufumba, nshimbi niyishina yekala muniyi nsañu yonenawu. Neyi twovwahila lushimbi lwaKristu, tunakumwovwahila Nzambi yetu wukweti kukeña Yehova, mwini yuma yejima yatañishileñayi Yesu.—Yow. 8:28.

8. Lushimbi lwaKristu lwashindamena hachikukwinyi?

⁸ Itala datuñilawu hachikuku chakola daleñelaña antu ashakamañamu kubula kwakama. Munjila yoyimu, lushimbi lwaluwahi lwashindamena hachikuku chakola lwakwashaña antu ovwahilaña kwikala akiñewa. Lushimbi lwaKristu lwashindamena hakukeña. Tukuhosheladi mwenimu?

9-10. Yakutalilahwinyi yinakumwekesha nawu Yesu welileña yuma yejima muloña wakukeña?

⁹ Chatachi, Yesu welileña yuma yejima muloña wakukeña. Luwi hela wushona hinjila yimu yakumwekeshelamu kukeña. Muloña wawushona, Yesu watañishili izaza, kuuka akata, kudiisha adiña nanzala nikusañula afu. (Mat. 14:14; 15:32-38; Maku 6:34; Luka 7:11-15) Hela chakwila iyi yuma yamudiilileña mpinji yeneni niñovu, Yesu washili maana hakuyilila antu yuma yakeñeleñawu chatela eli yakeñeleñayi. Chuma chasweja kulema, wamwekesheli kukeña hakuhana wumi windi kukoola etu.—Yow. 15:13.

¹⁰ Yuma yitunateli kudizilaku: Twatela kumwimbujola Yesu kuhitila mukutwamijaku yuma yinakukeñawu antu amakwawu kubadika yetu. Twatela cheñi kumwimbujola kuhitila mukutiyila antu itwawanaña mwiluña detu wushona. Wushona weniwu wunateli kutuleñela kushimwina nikutañisha nsañu yayiwahi, dikwila nawu tunakwovwahila lushimbi lwaKristu.

11-12. (a) Yumanyi chamwekeshaña nawu Yehova watwakamenaña? (b) Tunateli kwimbujola ñahi kukeña kwaYehova?

¹¹ Chamuchiyedi, Yesu wamwekesheli kukeña kwaTata yindi. Mpinji yashimwinineñayi, Yesu wamwekesheli chakamenañayi Yehova akwakudifukula indi. Hakachi kayuma yikwawu, Yesu watañishili nindi: Wejima wetu twalema kudi Tata yetu wamwiwulu. (Mat. 10:31) Yehova wudi nampwila yakutambwila mukoku wajimbala wabalumukaña mumuchima nakufunta muchipompelu. (Luka 15:7, 10) Yehova watumwekesheleli kukeña hakuhana Mwanindi kwikala ifutu danyiloña hanyijimba yetu.—Yow. 3:16.

¹² Yuma yitunateli kudizilaku: Tunateli kwimbujola ñahi kukeña kwaYehova? (Efwes. 5:1, 2) Twamonaña amanakwetu niahela netu alema nawa twatiyaña kuwaha kutambwila “mukoku wajimbala” wunafunti kudi Yehova. (Mas. 119:176) Twamwekeshaña netu twayikeña amanakwetu niahela kuhitila mukudihana, chidi neyi kuyikwasha hampinji yinakukeñawu wukwashu. (1 Yow. 3:17) Neyi tuyimwekeshelaña akwetu kukeña, dikwila nawu tunakulondela lushimbi lwaKristu.

13-14. (a) Neyi chasonekawu ha Yowanu 13:34, 35, Yesu wayilejeli akwakumulondela kwiladi, nawa muloñadi chumichi chichinekalili lushimbi lwaluha? (b) Twovwahilaña ñahi lushimbi lwaluha?

¹³ Chamuchisatu, Yesu walejeli akwakumulondela kumwekesha kukeña kwakudihana. (Tañenu Yowanu 13:34, 35.) Lushimbi lwaYesu lwekala lwaluha, muloña lwakeñekaña etu kumwekesha kukeña kwakudihana kwabulili muNshimbi yahaniniyi Nzambi kudi aIsarela: Twatela kukeña amanakwetu neyi chatukeñeliyi Yesu. Chumichi chakeñekaña kukeña kwakudihana. * Twatela kukeña amanakwetu niahela  kubadika chitwadikeña etu aweni. Twatela kuyikeña chakwila tunateli kuhana wumi wetu kukoola wena, neyi cheliliyi Yesu hadi etu.

¹⁴ Yuma yitunateli kudizilaku: Twovwahilaña ñahi lushimbi lwaluha? Kuhitila mukudihana kukoola amanakwetu niahela. Bayi neyi twafwilaña kuhana hohu wumi wetuku, ilaña nikudihana mutuyuma twanyanya. Chakutalilahu, neyi tuyaña mpinji yejima nakusenda manakwetu hela muhela wakula dehi nakumutwala nakupompa, hela kufwila kuhana yuma yitwakeñesha kulonda kuzañalesha muntu itwakeña, hela tuzatisha mpinji yetu yakumudimu kulonda kukwasha kunamwekani wubanji, dikwila nawu tunakwovwahila lushimbi lwaKristu. Tunakufwila cheñi kwilisha chipompelu kwikala iluña datela kuleñela muntu kutiya nindi wakiñewa.

15-17. (a) Yilwilu yaYesu yamwekesheleña ñahi nawu wadiña nawuñanji? (b) Tunateli kumwimbujola ñahi Yesu?

¹⁵ Neyi chadizatishawu muBayibolu, izu dakwila nawu “Wuñaji,” datalisha mukwila yuma yahoshayi Nzambi nindi yalala nikuyila chakadi kumwekesha chaambu. Muloñadi chitukuhoshela netu lushimbi lwaKristu lwamwekeshaña wuñanji?

¹⁶ Chatachi, toñojokenu yilwilu yaYesu chiyamwekesheleña wuñanji. Mumafuku indi, akulumpi jansakililu yawaYudeya aheleli antu abulili kwikala aYudeya nawa elileña nawu abadika aYudeya abula kutaña nikumona ambanda nawu amukunkulwayi. Hela chochu, Yesu wadiña nachaambu wanyi kudi antu ejima. Wayitejeli antu abulili kwikala aYudeya amukuhweleleli. (Mat. 8:5-10, 13) Watañishileña chakadi chaambu kudi antu ejima, aheta niatuzweñi. (Mat. 11:5; Luka 19:2, 9) Hayihosholeleña hela kuyitukola ambandaku. Wayilemesheli nawa wayitiyilileña ambanda luwi, kushilahu tuhu ninana amweneñawu nawu amukunkulwayi.—Luka 7:37-39, 44-50.

¹⁷ Yuma yitunateli kudizilaku: Tunateli kumwimbujola Yesu neyi tubula kumwekesha chaambu hakushimwina kudi antu ejima anakukeña kudiza, hichikweti muloña nachisemwa, wuzweñi, hela maheta akwetiwu hela kwitiya kwawuku. Amayala akaKristu alemeshaña ambanda nikuyila chiwahi neyi chelileña Yesu. Neyi twilaña yumiyi, dikwila nawu tunakwovwahila lushimbi lwaKristu.

18-19. Yumanyi yatañishiliyi Yesu kutalisha hawuñanji, nawa yumanyi yitwadizilañaku kuntañishilu yindi?

¹⁸ Chamuchiyedi, talenu yuma yadizishileñayi Yesu hawuñanji. Wadizishileña yishina yadi kukwasha atumbanji twindi kwakamena antu chakadi chaambu. Toñojokenu, chakutalilahu, haLushimbi Lwalema. (Mat. 7:12) Wejima wetu twakeñaña kutwila chachiwahi. Dichi, twatela kuyila akwetu chiwahi. Neyi tuyilaña chiwahi, niwena akutwilaña chiwahi. Indi neyi atwilaña chatama? Yesu wayilejeli cheñi akwakumulondela kukuhwelela nawu Yehova “[wakayiñisha] namuloña antu jindi atondewa amudililaña mwaana niwufuku.” (Luka 18:6, 7) Awa mazu hichikaninu, dichi Nzambi yetu wabula chaambu weluka yihuñu yitunakuhitamu munanu mafuku akukuminina nawa wakaleta wuñaji mumpinji yindi yatelela.—2 Tesa. 1:6.

¹⁹ Yuma yitukudizilaku: Neyi tulondela yishina yashimwiniyi Yesu, tukuyilaña akwetu chiwahi. Neyi atwilaña chatama mukanu kaayi kaSatana, twakundejewaña hakwiluka netu Yehova wakawahisha yuma.

20-21. (a) Antu akweti wuswa anateli kwakamena ñahi akwawu? (b) Iyala nateli kumwekesha ñahi kukeña kwakudihana, nawa watela kuyakamena ñahi anyanindi?

²⁰ Kwesekeja nalushimbi lwaKristu, antu akweti wuswa anateli kwakamena ñahi  akwawu? Chineli kukeña dihashindamena nshimbi, antu akweti wuswa atela kulemesha antu anakwakamenawu nikuyimwekeshela kukeña. Atela kwanukaña nawu Kristu wakeñaña nindi tumwekesheña kukeña muyuma yejima yitwelaña.

²¹ Muchisaka. Iyala watela kukeña ñodindi “neyi chakeñayi Kristu chipompelu.” (Efwes. 5:25, 28, 29) Iyala watela kwimbujola kukeña kwaKristu kwakufuma hamuchima kuhitila mukutwamijaku yuma yinakukaankila ñodindi niyinakukeñayi kubadika yindi. Chinateli kuyikalila amayala amakwawu kumwekesha kukeña kwamuchidiwu, hadaha hiyayikulishili munjila yakwakamena chiwahi antu amakwawu nikuyimwekeshela kukeñaku. Chinateli kuyikalila kuhimpa yilwilu yawu yatama, ilaña atela kuhimpa kulonda ovwahileña lushimbi lwaKristu. Iyala wamwekeshaña kukeña kwakudihana amulemeshaña kudi ñodindi. Tata yawantu wakeña nankashi anyanindi hayilaña chatama nayuma yahoshañayi hela yelañayiku. (Efwes. 4:31) Ilaña, wayimwekeshelaña anyanindi kukeña nawa wayileñelaña kuditiya nawu akiñewa. Nvwali wamuchidiwu amukeñaña nikumukuhwelela chikupu kudi anyanindi.

22. Kwesekeja na 1 Petulu 5:1-3, “nyikoku” yekala yanyi, nawa ayakamenaña ñahi?

²² Muchipompelu. Akulumpi atela kwanukaña nawu “nyikoku” hiyekala yawuku. (Yow. 10:16; tañenu 1 Petulu 5:1-3.) Mazu akwila nawu “nyikoku yaNzambi” niakwila nawu “answana jaNzambi” ayanukishaña akulumpi nawu nyikoku yekala yambala yaYehova. Wakeñaña nindi nyikoku yindi ayakameneña nakukeña nikwikala abula kukalisha. (1 Tesa. 2:7, 8) Akulumpi amwekeshaña kukeña hakuzata mudimu wawu wakwakamena nyikoku, atambwilaña nkisu jaYehova. Akulumpi wenawa ayikeñaña nikuyilemesha kudi amanakwawu niahela.

23-24. (a) Mudimwinyi wukwetiwu akulumpi hakukwasha muntu wunavulumuni muchipompelu? (b) Yumanyi yatela kwanukawu akulumpi neyi anakusompa nyiloña yamuchidiwu?

 ²³ Mudimwinyi wukwetiwu akulumpi hakusompa nyiloña yinakundami kukuvulumuna? Mudimu wawu wambukaku namudimu wazatileñawu ansompeshi niakulumpi kuhitila muNshimbi yayinkeliwu aIsarela kudi Nzambi. Munshimbi jaMosi, akulumpi atondeliwu asompeleña nyiloña yakundama kukudifukula niyabulili kukundama kukudifukula. Ilaña mulushimbi lwaKristu, akulumpi akweti mudimu wakusompa nyiloña yakuspiritu yakuvulumuna muchipompelu. Eluka nawu akwanshimbi diwu akweti mudimu wakusompa nyiloña yanyanya yakumujimba niyawubanji. Nyiloña yamuchidiwu munabombeli akwanshimbi kubabesha hela kukasa muntu wunaluwañeshi.—Rom. 13:1-4.

²⁴ Akulumpi elaña ñahi neyi muntu muchipompelu nakoñi nshidi yeneni? Azatishaña jiNsona nakutala hansañu nikufuukulahu. Anukaña nawu kukeña dihashindamena lushimbi lwaKristu. Kukeña kukuyileñela akulumpi kutoñojoka nawu: Chumanyi chatela kwilawu hakukwasha muntu wejima muchipompelu wunaluwañeshi? Neyi muntu wunaluwañeshi, kukeña kukuyileñela akulumpi kudihula nawu: Komana nabalumuki mumuchima? Tunateli kumukwasha ñahi kulonda yawahishi wubwambu windi naYehova?

25. Yumanyi yitukahanjeka muchibaaba chinalondelihu?

²⁵ Twasakililaña nankashi hakwikala mulushimbi lwaKristu. Neyi wejima wetu tuzata nañovu kwovwahila lushimbi lwaKristu, tukuleñela chipompelu kwikala iluña kunateli kutiyawu antu ejima nawu ayikeña, ayilemesha nawa nawu akiñewa. Hela chochu, tunakushakama mukaayi mudi “antu atama” nawa anatwalekihu “nakutaminaku.” (2 Tim. 3:13) Twatelela kutwalekahu kwikala asoñama. Chipompelu chawakaKristu chinateli kumwekesha ñahi wuñanji waNzambi neyi anakushinshika hansañu yakukaama anyana anyanya chakukanjikija? Chibaaba chinalondelihu chikakula ilu lwihu.