Sara * wahosheli nindi: “Nekala nansonyi niwoma. Dichi chankalilaña kudikunda nawantu abula woma nawa adikuhwelela. Ilaña champelelaña kudikunda nawantu amwovu nawa adizoza. Nawa champelelaña kuyileja chinakutiya nikuhanjeka nawu hakukala kunikweti. Dichekalawu amabwambu jami.”

Mazu aSara anakumwekesha nawu neyi twikala amwovu antu amavulu akwikala amabwambu jetu. Cheñi Yehova wazañalalaña nawantu amwovu. Izu dindi datukonkomwenaña nawu: “Vwalenu . . . kwovwaha.” (Kol. 3:12) Kwovwaha hichumanyi? Yesu wamwekesheli ñahi nindi wadiña wamwovu? Nawa ichi chilwilu chinateli kutuletela ñahi muzañalu muchihandilu?

Kwovwaha hikuwunda kwamukachi. Muntu wamwovu wekala wadiwunjika nawa wamwekeshaña wushona kudi akwawu. Neyi anamuvuloki wekala wawunda nawa wadihembaña.

Kwovwaha hichinjikijilu chakuhamuka. Izu dachiGiriki ‘dakwovwaha’ adizatishili hakulumbulula kawalu kamwisaña kafwomonawu. Kawalu kekala nañovu chikupu, ilaña akadizishaña kuyuula ñovu jaku. Munjila yoyimu, neyi twikala amwovu, twadiyuulaña nawa twekalaña mukuwunda nawakwetu.

Tunateli kutoñojoka netu, ‘hinekala wamwovuku.’ Tunakushakama mukaayi mudi antu asweja kuzuwa nawa abulaña kudiwunjika, dichi chinateli kutukalila mpinji yikwawu kwikala amwovu. (Rom. 7:19) Dichi, chakeñekaña kuzata nañovu hakwila twikali amwovu, ilaña spiritu yajila yaYehova yikutukwasha kwikala amwovu. (Ñal. 5:22, 23) Muloñadi chitwatela kuzatila nañovu kulonda twikali amwovu?

Neyi twikala amwovu antu amavulu akwikala amabwambu jetu. Neyi chahoshayi Sara itwatena hakusambila, twekalaña akasunuka kudikunda nawantu amwovu. Yesu wekala wovwaha nawa wukweti luwi. (2 Kor. 10:1) Nianyana abulili kumwiluka enjileña kudi yena.—Maku 10:13-16.

Kwovwaha kwatukiñaña kushilahu niakwetu. Neyi tudi amwovu, hitukushikenaña kuzuwa hela kuhilaku. (Yish. 16:32) Tukutondolwelaña kudinka  nyiloña yenzaña hamuloña wakuneñesha akwetu, sweje-e antu itwakeña. Nawa kwovwaha kwakiñaña akwetu kubula kukabakana muloña wakubula kudiyuula kwetu.

Hela chakwila Yesu wadiña nanyidimu yayivulu, wadiña wamwovu kudi antu ejima. Mumafuku aYesu antu amavulu adiña nakukabakana nawa asendeli yiteli yalema dichi akeñekeleña kuyihizumwisha. Akundejeweli chikupu chayilejeliwu kudi Yesu nindi: “Twayenu kudi ami, . . . muloña ami nadikehesha nikudizoza mumuchima”!—Mat. 11:28, 29.

Tunateli kwikala ñahi amwovu neyi chadiña Yesu? Neyi tudizaña Izu daNzambi, tukwiluka chelileñayi Yesu nawantu nichamanishileñayi kukala. Neyi tuhita mukweseka kukutuletesha kubula kwikala amwovu, tunateli kuzata nañovu neyi chelileñayi Yesu. (1 Pet. 2:21) Shinshikenu yuma yisatu yamukwashili Yesu kwikala wamwovu.

Yesu wadiña wadizoza mumuchima. Yesu wahosheli nindi “nadikehesha nikudizoza.” (Mat. 11:29) Bayibolu yatena iyi yilwilu yiyedi hamu muloña kwovwaha kwesekana nakudizoza. (Efwe. 4:1-3) Muloñadi?

Kudizoza kwatukwashaña kubula kwikala wakalisha hela kunyakala kuhila. Yesu welili ñahi nawantu amwilileña nawu “wafwa hakuda” nawa nawu “wanwaña vinyu”? Wamwekesheli muyilwilu yindi nindi awa adiña himakudi nawa wahosheli munjila yayiwahi nindi “yuma yaloña yelañayi muntu, diyamwekeshaña nawu wukweti maana.”—Mat. 11:19.

Neyi muntu yahosha chatama hamuza wenu, chimwekala, hela hankulilu yenu, mwatela kuzata nañovu kulonda mumwakuli chachiwahi. Peter, Mukulumpi wakuSouth Africa wahosheli nindi: “Neyi muntu yanneñesha namazu, nadihulaña nami, ‘Neyi wadiña Yesu wadi kwila ñahi?’” Watwalekelihu nindi: “Nadizi kubula kwikala wakalisha.”

Yesu welukili nindi antu awanina wanyi. Atumbanji twaYesu afwilileña kwila yuma yayiwahi, ilaña mpinji yikwawu kubula kuwanina kwawu kwayikañesheleña kwilamu. Chakutalilahu, hawufuku wakwila Yesu kanda yafwi, Petulu, Yakoba niYowanu akañenyi kutwalekahu kutonena hamu nindi. Yesu welukili nindi “spiritu yinakukeña, ilaña mujimba wunazeyi.” (Mat. 26:40, 41) Muloña wakwila welukili nindi awanina wanyi, Yesu hayihililili apostolu indiku.

Muhela Mandy wadiña wakalisha, ilaña chayinu mpinji wesekaña nankashi kwimbujola chakutalilahu chaYesu chakwovwaha. Wahosheli nindi: “Nanukaña nami kwosi muntu wawanina nawa nafwilaña kumona yuma yayiwahi mudi akwetu neyi chelañayi Yehova.” Neyi muyitiyilaña antu wushona nikwiluka kuzeyazeya kwawu neyi cheliliyi Yesu chikuyikwasha kwikala amwovu kudi antu.

Yesu wamukuhweleli Nzambi nindi wukamanisha kukala. Yesu hadiñayi heseki womikili kutama kwamwililiwu. Amutwambilili, amudiwili nikumuyandisha. Hela chochu, watwalekelihu kwikala wamwovu, muloña “wadikunjikili yomweni kudi Owu wasompaña mwaloña.” (1 Pet. 2:23) Yesu welukili nindi Tata yindi wamwiwulu wukumwakamena nawa nindi wukamanisha kutama kwejima hampinji yatelela.

Neyi atwila chatama nawa tushikena kuhila nakufwila kumanisha kutama kunatwiliwu, tukukojeja yuma kutaminaku. Dichaletesha Nsona kutuleja nawu: “Kuzuwa kwamuntu, hikwaletaña kuloña kwaNzambiku.” (Yak. 1:20) Hela chakwila kudi chuma chikukojeja tuhili, chineli twawanina wanyi tunateli kuluwañesha.

Muhela Cathy wakuGermany watoñojokeleña nindi, ‘Neyi wubula kudamwina eyi aweni, kwosi wukukwamwina.’ Ilaña chamwilukiliyi Yehova, wahimpili yilwilu yindi. Wahosheli nindi: “Ichi hinafwilaña kudamwina ami aweniku. Nekalaña wamwovu mpinji yejima muloña neluka nami Yehova wakamanisha kukala kwejima munjila yayiwahi.” Neyi ayilahu dehi chatama, kwimbujola chakutalilahu chaYesu chakumukuhwelela Nzambi chikayikwasha kutwalekahu kwikala awunda.

Yesu walumbulwili nindi neyi tunakukeña kwikala namuzañalu twatela kwikala amwovu. Wahosheli nindi: “Adi namuzañalu wowu antu adizoza.” (Mat. 5:5) Talenu kwovwaha chikunateli kutukwasha muniyi yuma yinalondelihu.

Kwovwaha kwamanishaña kukala mumaluwi. Manakwetu Robert wakuAustralia wahosheli nindi: “Namuhosheleña ñodami mazu atama. Ilaña mazu atama inahosheleña mukuhila hinatwesheleña kuyihimpaku. Dichi, natiyileña kutama chinamuneñesheleña ñodami.”

“Wejima wetu twahukanaña kakavulu” munhoshelu yetu nawa nhoshelu yatama yinateli kuleta wufwinda muwulu. (Yak. 3:2) Hampinji yamuchidiwu, kwovwaha kunateli kutukwasha kwikala awunda nikuyuula idimi detu.—Yish. 17:27.

Robert wazatili nañovu kulonda yekali wawunda nawa wadihemba. Chumanyi chinafumimu? Wahosheli nindi: “Chayinu mpinji neyi twambokelamu mumazu, nadiwunjikaña nakumutiyilila, nahoshaña mumesu awunda nikubula kuhila swayi. Ichi twatiyañanaña kubadika chichadiña kunyima.”

Kwovwaha kwatukwashaña kwikala mukuwunda nawakwetu. Antu anyakalaña kuhila hiyekalaña nawamabwambu amavuluku. Hela chochu, kwovwaha kwatukwashaña “kuhemba kunuñañana.” (Efwe. 4:2, 3) Cathy, itwatena hakusambila wahosheli nindi, “Kwovwaha kunankwashi kudikunda nawantu, hela chakwila antu amakwawu akalisha.”

Kwovwaha kwaletaña kuwunda kwamuyitoñojoka. Bayibolu yashimu nawu “maana afumaña mwiwulu” endelaña hamu nakwovwaha nikuwunda. (Yak. 3:13, 17) Muntu wamwovu wukweti “muchima wadiwunjika.” (Yish. 14:30) Martin, wunazati nañovu kwikala nachilwilu chakwovwaha, wahosheli nindi, “Chayinu mpinji nidi wamwovu chikupu nawa hinekala wakalishaku, ichi nidi nakuwunda kwamuyitoñojoka nimuzañalu.”

Dichi twatela kuzata nañovu hakwila twikali amwovu. Manakwetu wumu wahosheli nindi “kuhosha hohu walala, mpinji yikwawu nahilaña.” Ilaña Yehova, watukonkomwenaña kwikala amwovu, wakatukwasha kulonda twikali amwovu. (Isa. 41:10; 1 Tim. 6:11) Nateli ‘kumanisha kutudizisha’; nawa nateli ‘kutukolesha.’ (1 Pet. 5:10) Kufwana kapostolu Pawulu, mukuhita kwampinji tunateli kumwimbujola “Kristu wekala wovwaha nawa wukweti luwi.”—2 Kor. 10:1.