1. Yehova wayikoleshaña akakudifukula indi kwiladi? (Talenu cheñi mwevulu.)

 TWATELA kulomba kudinyi neyi tunakukeña kutukundeja nikutulombola? Ñakwilu yanilu lwihu tunayiluki. Tunateli kulomba kudi Yehova Nzambi. Yehova watukoleshaña nindi tulombeña. Wakeñaña nindi tulombeña kakavulu, dikwila nawu “[kulomba] mpinji yejima.” (1 Tes. 5:17) Tunateli kulomba kudi yena mukukasunuka netu atulomboleña muyuma yejima yitwelaña muchihandilu chetu. (Yish. 3:5, 6) Chineli hiNzambi wachisambu, Yehova hashaku mapampa itwatela kulomba kudi yenaku.

2. Tukuhanjekadi muchinu chibaaba?

² Twalemesha chawaana chakulomba. Hela chochu, hela chakwila tukuzata nañovu chamuchidinyi, mpinji yikwawu chinateli kutukalila kwikala nampinji yakulomba. Hadaha tunateli cheñi kumona netu twatela kuwahishaku kulomba kwetu. Nsona jinateli kutukwasha nikutulombola. Muchinu chibaaba, tukuhanjeka chitunateli kudizila kudi Yesu kutalisha hakwikala nampinji yakulomba. Tukuhanjeka cheñi chitunateli kuwahishaku kulomba kwetu kuhitila mukubombelamu yuma yitanu yalema.

3. Yesu welukili chumanyi kutalisha hakulomba?

³ Yesu welukili nindi Yehova walemesha kulomba. Kunyima henohu Yesu kanda enzi hamaseki, wamweneña Tata yindi chakwileñayi kulomba kwawamayala niambanda ashinshika. Chakutalilahu, Yesu wadiña hamu naTata yindi hampinji yakwileñayi Nzambi kulomba kwakufuma hamuchima kwaHana, Davidi, Elija, kushilahu nikwawantu amakwawu ashinshika. (1 Sam. 1:10, 11, 20; 1 Anya. 19:4-6; Mas. 32:5) Dihafumini  Yesu adizishi atumbanji twindi nindi alombeña kakavulu nakukuhwelela nawu akuyakula!—Mat. 7:7-11.

4. Chumanyi chitunadizili kuchalombeleñayi Yesu?

⁴ Yesu wamwekesheli kudi atumbanji twindi chatela kulombawu kuhitila muchalombeleñayi yomweni kudi Yehova. Hampinji yakalakeleñayi mudimu windi, Yesu walombeleña kakavulu. Wafuukwilileña chadimu mpinji yakulomba chineli kakavulu wadiña nanyidimu yayivulu nawa antu amavulu enjileña kudi yena. (Maku 6:31, 45, 46) Wahindukileña nantetemena nankashi kulonda ekali nampinji yakulomba nkawindi. (Maku 1:35) Mpinji yimu, walombeli wufuku wejima henohu kanda afuukuli kwila chuma chalema. (Luka 6:12, 13) Nawa Yesu walombeli kakavulu hawufuku wakutwala kukufwa kwindi hampinji yatoñojokeleñayi hakumanisha chikunku chakala mumudimu windi wahanu hamaseki.—Mat. 26:39, 42, 44.

5. Tunateli kumwimbujola ñahi Yesu?

⁵ Chakutalilahu chaYesu chinakutudizisha nawu hela chakwila tudi nanyidimu yayivulu chamuchidinyi, twatela kwikalañaku nampinji yakulomba. Neyi chelileñayi Yesu, twatela kwikalañaku nampinji yakulomba, hadaha kuhinduka nantetemena nankashi, indi kwiji kulabañaku kukaama namelela. Neyi twilaña mwenimu, tukumwekesha kudi Yehova netu twasakililaña hanichi chawaana chalema. Muhela Lynne wanukaña chatiyiliyi kuwaha helukiliyi katachi kulema kwakulomba. Wahosheli nindi, “Chinelukili nami nateli kuhosha naYehova mpinji yidi yejima, chankwashili kumumona nami Hibwambu dami chikupu nawa nafwilileña kuwahishaku kulomba kwami.” Chakadi nikujina, etu amavulu dichitwatiyaña. Dichi tuhanjekenu hayuma yitanu yalema yitunateli kubombela mukulomba kwetu.

6. Kwesekeja naChimwekeshu 4:10, 11, yumanyi yatelela kutambwilayi Yehova?

⁶ Mushimekenuña Yehova. Muchimwenu chakutiyisha woma, kapostolu Yowanu wamweni akulumpi 24 mumawulu anakudifukula kudi Yehova. Amushimekeli Nzambi nakuhosha nawu watelela kutambwila “kulema, kalemesha niñovu.” (Tañenu Chimwekeshu 4:10, 11.) Kudi yuma yayivulu  yaleteshaña añelu ashinshika niwena amushimekeña Yehova nikumulemesha. Ekala hamu nindi mwiwulu nawa amwilukisha chikupu. Amonaña yilwilu yindi chiyamwekenaña muyuma yelañayi. Chamonañawu yuma yinakwilayi Yehova, chayileteshaña amushimekeña.—Yoba 38:4-7.

7. Yumanyi yitwatela kumushimekelahu Yehova?

⁷ Ninetu twatela kumushimeka Yehova mukulomba kwetu, nakumuleja yuma yitwakeña hadi yena nichaleteshaña tumulemesheña. Hampinji yimunakutaña nikudiza Bayibolu, fwilenuña kwiluka yilwilu yamwekeshañayi Yehova yayitiyishaña kuwaha nankashi. (Yoba 37:23; Rom. 11:33) Kuhiñahu mulejenu Yehova chimwatiyaña hanoyu yilwilu. Tunateli cheñi kumushimeka Yehova hayuma yatwililañayi niyelilañayi chisaka chetu chejima chakuspiritu. Watwakamenaña mpinji yejima nikutukiña.—1 Sam. 1:27; 2:1, 2.

8. Yumanyi yimu yatuleteshaña tumusakilileña Yehova? (1 ATesalonika 5:18)

⁸ Musakililenuña Yehova. Kudi yuma yayivulu yikuletesha tumusakilileña Yehova mukulomba. (Tañenu 1 ATesalonika 5:18.) Tunateli kumusakilila hachuma chejima chachiwahi chitukweti; muloña chawaana chejima chachiwahi chafumaña kudi yena. (Yak. 1:17) Chakutalilahu, tunateli kumusakilila halubanji lweseki niyuma yayiwahi yaleñayi. Tunateli cheñi kumusakilila hawumi wutukweti, chisaka, amabwambu nihayuma yitwachiñejaña. Nawa twatela kumusakilila Yehova hakutwiteja kwikala nawubwambu wawuwahi nayena.

9. Muloñadi wutwatela kumusakilila Yehova?

⁹ Twatela kuzata nañovu chikupu hakwila tutoñojokeña hayuma yikutuletesha tumusakilili Yehova halwetu. Tunakushakama mukaayi mudi antu abulaña kusakilila. Kakavulu antu atoñojokaña hohu hayuma yinakukeñawu chatela atoñojokeña hachinateli kumwekeshawu kusakilila hayuma yikwetiwu. Neyi tutachika kwikala nayitoñojoka yamuchidiwu, kulomba kwetu kukwikala hohu kwakulomba yuma yitunakukeña. Hakwila tukañeshi iyi yitoñojoka, twatela kutwalekahu kumwekesha kusakilila hayuma yejima yatwililañayi Yehova.—Luka 6:45.

10. Muchima wakusakilila wamukwashili ñahi muhela wumu kuumika? (Talenu cheñi mwevulu.)

¹⁰ Muchima wakusakilila wunateli kutukwasha kuumika kukala. Talenu chuma chamumwekeneni muhela Kyung-sook, chashimunawu muKaposhi Kakutalila kaJanuary 15, 2015. Amuwanini nakansa yakumapwapwa yinasweji dehi kutaanda. Wahosheli nindi, “Ichi chikatu channeñesheleña nankashi. Natiyileña nami najimbeshi yuma yejima nawa natiyileña woma nankashi.” Chumanyi chamukwashili kuumika? Wahosheli nindi mafuku ejima nawufuku henohu kanda akaami, wayileña hewulu detala dindi nakulomba nezu datiyakana hayuma yitanu yaletesheli asakilileña hanodu ifuku. Chumichi chamuletesheleña  kukeheshaku kwakama nawa chamukwashileña kushimuna chamukeñayi Yehova. Wamweni Yehova chakwashañayi ambuñindi ashinshika neyi anakumona kukala nawa wenjili nakwiluka nindi kudi nkisu jajivulu jitwatambwilaña muchihandilu chetu kubadika kukala kutwamonaña. Kufwana muhela Kyung-sook, tukweti yuma yayivulu yitwatela kumusakililahu Yehova, hela chakwila tunakumona kukala. Neyi tumusakililaña mukulomba, chumichi chikutukwasha kuumika nikutwalekahu kwikala namuzañalu.

11. Muloñadi atumbanji twaYesu chakeñekeleleñawu kwikala ahamuka chelili Yesu afunti mwiwulu?

¹¹ Mulombenuña Yehova ayikwashi mwiikali ahamuka hakushimwina. Chikwashalili kapinji kantesha henohu kanda afunti mwiwulu, Yesu wayanukishili atumbanji twindi mudimu wayinkeliyi wakushimuna wunsahu hadi yena “muYerusalema, muYudeya nimuSamariya mwejima nikwakumina iseki dejima.” (Yilw. 1:8; Luka 24:46-48) Chimwahitili kapinji kantesha, anlomboli jawaYudeya ayikwatili aPetulu naYowanu nakuyitwala kudi akaSanihedirini, nakuyikonkomwena nawu awa amayala ashinshika aleki kushimwina, nawa ayichiinishili. (Yilw. 4:18, 21) Indi aPetulu naYowanu elili ñahi?

12. Kwesekeja naYilwilu 4:29, 31, chumanyi cheliliwu atumbanji?

¹² Hakuyakula anlomboli jakudifukula kwawaYudeya ayichiinishileña, aPetulu naYowanu ahosheli nawu: “Sompenu enu aweni neyi chachiwahi kumesu aNzambi kutiyilila enu chatela tutiyilili Nzambi. Ilaña etu kwetu, hitukutwesha kuleka kuhosha yuma yitunamoni nikutiyaku.” (Yilw. 4:19, 20) Chelili aPetulu naYowanu ayuumbiku, atumbanji alombeli kudi Yehova nawu ayikwashi kwila nkeñelu yindi. Alombeli nawu: “Yikwashi anduñu jeyi kulonda atwalekihu kuhosha izu deyi nakuhamuka.” Yehova waakwili iku kulomba kwakufuma hamuchima.—Tañenu Yilwilu 4:29, 31.

13. Chumanyi chitunateli kudizila kudi manakwetu Jin-hyuk?

¹³ Ninetu tunateli kwila neyi cheliliwu atumbanji kuhitila mukutwalekahu kushimwina hela chakwila akawuswa atuleja nawu tuleki. Talenu chuma chamwekeni kudi manakwetu Jin-hyuk, akasiliwu mukaleya muloña wakubula kudiñija munsañu jamatuña nachiyuulu. Amuna mukaleya, amwinkeli mudimu wakwakamena atuyili amakwawu, ilaña hiyamwitejeli kuhanjeka nawu nsañu yacheñi yabulili kuyikundamaku, kushilahu ninsañu yamuBayibolu. Walombeli nindi ekali wahamuka nawa wababala kulonda atwesheña kushimwina mpinji yejima yinakoolekeliyi. (Yilw. 5:29) Wahosheli nindi: “Yehova waakwili kulomba kwami kwejima kuhitila mukunkwasha kwikala wahamuka nikunyinka maana akutachika kudizisha atudizi aBayibolu amavulu hayiisu yakaleya hadi maminetisi atanu. Nawufuku, nasonekeleña nyikanda yakwinka akwetu atuyili hefuku dalondeleleñahu.” Ninetu tunateli kukuhwelela netu Yehova wukutukwasha kuzata chiwahi mudimu wetu wakushimwina. Neyi cheliliyi manakwetu Jin-hyuk, tunateli kulomba netu twiikali ahamuka nikwikala namaana.

14. Chumanyi chinateli kutukwasha neyi tunakumona kukala? (Isamu 37:3, 5)

¹⁴ Mulombenuña Yehova ayikwashi muumiki kukala. Etu amavulu tunakuumika kukala kwakumujimba hela kwamuyitoñojoka, chidi neyi kufwisha antu itwakeña, kukala kwamuchisaka, ikabisha, indi kwiji kukala kukwawu. Nawa yuma yidi neyi yipupu nimajita yinakojeji antu chiyikalileña kuumika kukala kwakuvulu kudi neyi iku. Mulejenu  Yehova mukulomba chimunakutiya. Mulejenu kukala kumukweti neyi chimunateli kuleja ibwambu denu imwadikunda nindi. Kuhwelelenu nenu Yehova ‘wukuyikwasha.’—Tañenu Isamu 37:3, 5.

15. Kulomba kunateli kutukwasha ñahi ‘kuumika hitunakumona lukadi’? Shimunenu chakutalilahu.

¹⁵ Kulomba chakadi kuzeya kukutukwasha ‘kuumika hitunakumona lukadi.’ (Rom. 12:12) Yehova weluka kukala kunakumonawu akakudifukula indi, “watiyaña kudila kwawu kwakulomba wukwashu.” (Mas. 145:18, 19) Muhela payiniya wejina daKristie wudi nayaaka 29 wetejeli nindi awa mazu alala. Watachikili kuhita muyikatu yamaneni yabulili kukuhwelelayi. Chuma chafuminimu, wekalili nachineñi chasweja. Mukuhita kwampinji, welukili nindi amama yindi anayiwani nachikatu chafwana. Muhela Kristie wahosheli nindi: “Namulombeli Yehova chikupu nami anyinki ñovu yakuumika hefuku-hefuku. Natwalekelihu kwila yuma yakuspiritu kuhitila mukuya nakupompa mpinji yejima nikudiza nkawami.” Wabombelelihu nindi: “Kulomba kwankwashili kuumika muniyi mpinji yakala. Nelukili nami Yehova wankwashileña mpinji yejima, nawa chumichi chankundejeleña nankashi. Hela chakwila kukala kunamweneña hikwashikeneni kumanaku, Yehova waakwili kulomba kwami kuhitila mukunyinka kuwunda kwamuyitoñojoka nimuchima wawunda.” Bayi tuvulamena chumichiku, netu “Yehova weluka chakupulwisha antu amwakamaña adi mukweseka.”—2 Pet. 2:9.

16. Muloñadi chitwakeñekelaña wukwashu waYehova hakwila tukaani kweseka?

¹⁶ Mulombenuña Yehova ayikwashi mukaani kweseka. Chineli tudi antu abula kuwanina, twalwishaña nakweseka kwakukeña kwila yuma yatama. Satana nakuzata nañovu kulonda atuleteshi tufwileña chikupu kwila yuma yatama. Njila yimu mwafwilañayi kuluwañeshela yitoñojoka yetu hikuhitila muyisela  yatama. Iyi yisela yinateli kutukojeja kutachika kutoñojoka hayuma yatama, yuma yatamishaña wuntu wetu wamukachi nawa yikutuletesha tukoñi nshidi yasweja.—Maku 7:21-23; Yak. 1:14, 15.

17. Neyi tunalombi dehi netu atukwashi, yumanyi yitwatela kwila hakwila tukaani kweseka? (Talenu cheñi mwevulu.)

¹⁷ Hakwila tukaani kweseka kwakwila yuma yatama, twakeñekaña wukwashu waYehova. Mukulomba kwachitalilu, Yesu wabombelelimu iyi yuma nindi: “Bayi wututwala mukwesekaku, ilaña twamwini kudi watama.” (Mat. 6:13) Yehova wakeñaña kutukwasha, ilaña twatela kumulomba hakwila atukwashi. Twatela cheñi kwila yuma kwesekeja nachitunalombi. Twatela kuzata nañovu kulonda tutondolweli yuma yinateli kuletesha tutachiki kutoñojoka hayuma yatama yinasweji mukaayi kaSatana. (Mas. 97:10) Chuma chikutukwasha tutoñojokeña hayuma yayiwahi hikutaña nikudiza Bayibolu nkawetu. Chuma chikwawu chikutukwasha kuhemba chiwahi yitoñojoka yetu hikuya nakupompa nikushimwina. Yehova niyena watukana nindi hakwiteja atweseki kubadika muñovu jetuku.—1 Kor. 10:12, 13.

18. Yumanyi yitwatela kwila wejima wetu kutalisha hakulomba?

¹⁸ Wejima wetu twatela kulombaña chikupu hakwila tutwalekihu kwikala ashinshika kudi Yehova munanu mafuku akukuminina akala. Ikalenuña nampinji yakulomba chakufuma hamuchima ifuku niifuku. Yehova wakeñaña nindi ‘tuhuñunwineña nyichima yetu kudi yena’ mukulomba. (Mas. 62:8) Mushimekenuña Yehova nikumusakilila hayuma yejima yelañayi. Mulombenu ayikwasheña kwikala ahamuka mumudimu wakushimwina. Mulembelelenu ayikwasheña kuumika kukala kudi kwejima nikukaana kweseka kwejima kumunakulwisha naku. Bayi mwiteja chuma chidi chejima hela muntu ayikañeshi kulomba kudi Yehova mpinji yejimaku. Hanu dinu, Yehova waakulaña ñahi kulomba kwetu? Twakahanjeka hanilu lwihu lwalema muchibaaba chinalondelihu.