1. Bayibolu yalumbulula ñahi mwatalisha kukeña kwalala?

 “NYIZUZU [yakukeña] hikesi kanakubidima, himuzuzu waYa. Menji ampupa hiyakutwesha kujima kukeñaku, hela tuloña hitukutwesha kukukumpulaku.” b (Kami. 8:6, 7) Kukeña kwalala anakulumbululi chiwahi chikupu! Awa mazu anakuyikolesha adisumbula: Munateli kudimwekeshela kukeña kwalala kudi wumu namukwawu.

2. Yumanyi yatela kwilawu adisumbula hakwila kukeña kwawu kubuli kukeha?

² Adisumbula atela kuzata nañovu hakwila adimwekesheleña wumu namukwawu kukeña kwalala hampinji yinakuhandawu. Chakutalilahu, kesi kanateli kutwalekahu kubidima, chiña hohu neyi anakukisonsela. Neyi anakukisonsela wanyi, mukuya kwampinji kakujima. Munjila yoyimu, kukeña kwekala hakachi keyala namumbanda kunateli kutwalekahu kwikala kwakola chiña hohu neyi elaña yuma yikukoleshaña wubwambu wawu. Mpinji jikwawu, adisumbula anateli kumona nawu kukeña kwawu kunakuya nakukeha, sweje-e neyi anakumona kukala kwamali, yikatu, indi kwiji kukala kwakukulisha anyana. Neyi mudi muwulu, munateli kwilisha ñahi ‘muzuzu waYa’ wutwalekihu kubidima muwulu wenu? Muchinu chibaaba, tukuhanjeka hanjila jisatu jikuyikwasha kutwalekahu kwikala nawubwambu wakola nikwikala namuzañalu muwulu. c

3. Kwikala nawubwambu wakola naYehova kwakwashaña ñahi adisumbula kutwalekahu kudikeña wumu namukwawu? (Mukwakutañisha 4:12) (Talenu cheñi mwevulu.)

³ Hakwila elishi ‘muzuzu waYa’ wutwalekihu kubidima, eyala namumbanda atela kuzata nañovu kukolesha wubwambu wawu naYehova. Iwu wubwambu wukukwasha ñahi wulu wawu? Neyi adisumbula alemeshaña wubwambu wawu naTata yawu wamwiwulu, chayipelelaña kulondela kufumba kwindi, nawa chumichi chinateli kuyikwasha kutondolwela nikumanisha kukala kunateli kuletesha kukeña kwawu kukehi. (Tañenu Mukwakutañisha 4:12.) Antu apama kuspiritu afwilaña cheñi kumwimbujola Yehova nikwikala nayilwilu yamwekeshañayi, chidi neyi luwi, kudiwunjika nikwanakena. (Efwe. 4:32–5:1) Adisumbula amwekeshaña yilwilu yamuchidiwu, kukeña kwawu kwaswejelañaku. Muhela Lena wunashakami muwulu hadi yaaka kubadika 25, wahosheli nindi, “Chekalaña chaswayi kukeña nikulemesha muntu wapama kuspiritu.”

4. Muloñadi Yehova chayitondeleliyi aYosefu naMariya kwikala anvwali jaMesiya?

⁴ Talenu ichi chakutalilahu chamuBayibolu. Yehova hatondeleñayi adisumbula akekala anvwali jaMesiya, watondeli aYosefu naMariya hakachi kawantu amavulu akumutaña waDavidi. Muloñadi? Wejima wawu adiña nawubwambu wakola naYehova, nawa Yehova welukili nindi akumutwamijañaku muwulu wawu. Enu adisumbula, yumanyi yimunateli kudizila kudi aYosefu naMariya?

5. Chumanyi chinateli kudizilawu amayala kudi Yosefu?

⁵ Yosefu wovwahilileña wunlomboli waYehova, nawa chumichi chamuletesheli ekali iyala wamuwahi. Hadaha hadi mpinji jisatu jashiyashana, watambwilili nshimbi kudi Nzambi jakundamini chisaka chindi. Haniji mpinji jejima, wanyakeleña kwovwahila, hela chakwila chadiña chakala kwila mwenimu. (Mat. 1:20, 24; 2:13-15, 19-21) Kuhitila mukulondela wunlomboli waNzambi, Yosefu wamukiñileña Mariya, kumukwasha nikumukeñela yuma yakumujimba. Toñojokenu hayuma yeliliyi Yosefu chiyaletesheli Mariya kusweja kumukeña nikumulemesha! Enu amayala, munateli kumwimbujola Yosefu kuhitila mukukeñakeña kufumba kwamuBayibolu hakwakamena yisaka yenu. d Neyi mwovwahila iku kufumba, hela chakwila chikukala kwila mwenimu, mukumwekesha nenu mwamukeña ñodenu nawa mukukolesha wulu wenu. Muhela wakuVanuatu, wunashakami muwulu hadi yaaka kubadika 20, wahosheli nindi: “Neyi nfumwami akeñakeña wunlomboli waYehova nikuwuzatisha, namulemeshaña chikupu. Natiyaña kwikala wakiñewa, nawa nakuhwelelaña yuma yinafuukuliyi.”

6. Chumanyi chinateli kudizilawu ambanda kudi Mariya?

⁶ Mariya wadiña nawubwambu naYehova halwindi; chikuhwelelu chindi hichashindameneni  hayuma yelileñayi Yosefuku. Welukili chiwahi Nsona. Wekalileña cheñi nampinji yakutoñojoka hayuma yadizileñayi. (Luka 2:19, 51) Chakadi nikujina, wubwambu waMariya naYehova wamuletesheli kwikala mumbanda wamuwahi nankashi. Makonu, ambanda amavulu afwilaña kwila neyi chelileñayi Mariya. Chakutalilahu, muhela Emiko wahosheli nindi: “Hinadiña mujiki nadiña nakwila yuma yakuspiritu mpinji yejima nkawami. Ilaña chinasumbukili, nenjili nakwiluka nami chineli nfumwami diyi wadiña nakutulombelaku nikulombola kudifukula, chikuhwelelu chami chatachikili kushindamena hohu hayuma yelileñayi. Nenjili nakwiluka nami nateleleli kudisendela chisenda chami ami aweni kutalisha hawubwambu wami naYehova. Ichi dinu nekalaña nampinji yakwikala nkawami naNzambi yami, kuhitila mukulomba, kutaña Nsona nikutoñojoka chikupu hayuma yakeñañayi.” (Ñal. 6:5) Enu ambanda, chimukutwalekañahu kukolesha wubwambu wenu naYehova, anfumu jenu akuswejelañaku kuyihameka nikuyikeña.—Yish. 31:30.

7. Yumanyi yinateli kudizilawu adisumbula kudi aYosefu naMariya kutalisha hakudifukwila hamu?

⁷ AYosefu naMariya cheñi azatilileña hamu hakukolesha wubwambu wawu naYehova. Elukili chichalemena kudifukula kudi Yehova hamu neyi chisaka. (Luka 2:22-24, 41; 4:16) Chatela chayikalilileña kwila mwenimu, sweje-e chelili chisaka chitoheliku, ilaña atwesheleña. Ichi hichakutalilahu chachiwahi chatela kwimbujolawu adisumbula makonu! Neyi mudi nawanyana, neyi chadiñawu aYosefu naMariya, hadaha chinateli kuyikalila kuya nakupompa hela kwikala nampinji yakudifukula kwachisaka. Chinateli nikukala nankashi kuwana mpinji yakudizila hamu neyi chisaka hela kulomba. Hela chochu, anukenu nenu neyi mukudifukwilaña hamu kudi Yehova, mukuswina kwakwihi nayena nikudi wumu namukwawu. Dichi twamijenuñaku kudifukula muchihandilu chenu.

8. Chumanyi chatela kwilawu adisumbula adi nakukala muwulu hakwila kudifukula kwachisaka kuyikwashi chikupu?

⁸ Indi neyi mudi nakukala muwulu? Munateli kutachika kutoñojoka nenu kudifukwila hamu neyi chisaka kwalema wanyi. Neyi dichidi yuma, tachikenu nansañu yantesha nawa yakuzañalesha, yimunaditeji wejima wenu ayedi kuhanjekahu. Chumichi chinateli kukolesha wubwambu wenu nawa chikuyikwasha mufwileña kwilila hamu yuma yakuspiritu hamu neyi adisumbula.

9. Muloñadi eyala namumbanda chatela kwikalilawu nampinji yakwikala hamu?

⁹ Enu adisumbula, munateli cheñi kusweja kudikeña neyi mwikalaña nampinji yakwikala hamu. Neyi mwilaña mwenimu, chikuyikwasha kwiluka yitoñojoka yamwinikwenu nichinakutiyayi. (Kutach. 2:24) Talenu chuma chenjili nakwilukawu aLilia naRuslan hanyima tuhu yakudisumbula, yaaka kubadika ha 15 yinahitihu. Muhela Lilia wahosheli nindi: “Twenjili nakwiluka netu hitukwikalaña nampinji yeneni yakwikala hamu neyi chitwatoñojokeleñaku. Mpinji yejima twadiña twakasika nanyidimu yakumujimba, yahetala, nawa mukuhita kwampinji kwakamena anyana. Twenjili nakwiluka netu neyi tubulaña kwikala nampinji yakwikala hamu neyi adisumbula, tukutwalekahu kudikunda wanyi.”

10. Adisumbula anateli kuzatisha ñahi chishina chekala haAEfwesesa 5:15, 16?

¹⁰ Chumanyi chatela kwilawu adisumbula hakwila ekaleña nampinji yakwikala hamu? Munateli kutanjikila chadimu mpinji yakwikala hamu. (Tañenu AEfwesesa 5:15, 16.) Manakwetu Uzondu wakuNigeria wahosheli nindi: “Neyi inakutanjika yuma yinatela kwila, nashañahu nimpinji yitwatela kwikala hamu namwinikwami nawa nalemeshaña iyi mpinji.” (Fwili. 1:10) Talenu muhela Anastasia, ñoda nkoñi wañinza kuMoldova, chazatishañayi chiwahi mpinji yindi. Wahosheli nindi: “Nesekaña nañovu  kuzata nyidimu yami hampinji yinakwakamenayi nfumwami nyidimu yindi. Muniyi njila, chatukwashaña kwikala nampinji yakwikala hamu neyi tunamanishi nyidimu yetu.” Indi neyi nyidimu yimwazataña yayikañeshaña kwikala nampinji yakwikala hamu?

11. Nyidimwinyi yazatilileñawu hamu aAkwila naPrisila?

¹¹ Adisumbula anateli kudizila kudi aAkwila naPrisila, eyala namumbanda alemesheliwu kudi akaKristu akusambila amavulu. (Rom. 16:3, 4) Hela chakwila Bayibolu hiyashimunahu nsañu yayivulu kutalisha hawulu wawuku, ilaña yamwekeshaña nawu azatilileña hamu, kushimwina nikukwasha akwawu. (Yilw. 18:2, 3, 24-26) Kafwampi, Bayibolu neyi yinakutena aAkwila naPrisila, mpinji yejima yayitenenaña hamu.

12. Yumanyi yatela kwilawu eyala namumbanda hakwila ekaleña nampinji yeneni yakwikala hamu? (Talenu cheñi mwevulu.)

¹² Adisumbula anateli kuyimbujola ñahi aAkwila naPrisila? Toñojokenu yuma yimunateli kwilila hamu namwinikwenu. Chatela muzateña iyi nyidimu iwu nkawindi-iwu nkawindi, kwila muyizatila hamu neyi adisumbula nehi? Chakutalilahu, aAkwila naPrisila adiña nakushimwina hamu. Komana ninenu mwatanjikaña kuzatila hamu mpinji yejima? Akwila naPrisila azatilileña cheñi hamu. Hadaha enu nimwinikwenu himwazataña mudimu wowumuku, ilaña kwila muzatila hamu nyidimu yahetala nehi? (Mukwa. 4:9) Neyi mudikwashaña munyidimu, mukudikundaña nankashi nawa mukwikalaña nampinji yakuhanjeka. Manakwetu Robert nawaLinda anashakami muwulu hadi yaaka kubadika 50. Manakwetu Robert wahosheli nindi: “Kuhosha hohu chalala, hitwekalaña nampinji yeneni yakuya nakuhemena hamuku. Ilaña neyi inakukosa yeña nawa mwinikwami enza nakuyikombola, neyi inakuseya hanji nawa enza nakunkwashaku, nazañalalaña nankashi. Kwilila hamu yuma kwatunuñañeshaña. Kukeña kwetu kwaswejelañaku.”

13. Hakwila eyala namumbanda ekali anuñañana chikupu, chumanyi chatela kwilawu?

¹³ Hela chochu, anukenu nenu, kushakama hohu hamu hikunateli kuyinuñañeshaku. Muhela wumu wasumbuka wakuBrazil wahosheli nindi: “Munanu mafuku, chineli kunasweji kwikala yuma yayivulu yaluwañeshaña, nenzi nakuwana nami tunateli kufwa mumuhetu wakutoñojoka netu twekalaña nampinji yakwikala hamu chineli twashakamaña mwitala dodimu. Nenzi nakwiluka nami kudi chuma chikwawu chinatela kwila kubadika hohu kushakama hamu namwinikwami. Natela cheñi kwila yuma yinakumwekesha nawu nashi maana kuyuma yinakukeñayi.” Talenu manakwetu Bruno niñodindi Tays chelañawu hakwila amwekeshi nawu anashi maana kuyuma yinakukeñayi mukwawu. Wahosheli nindi: “Hampinji yitudi hamu nakunooka, twatentekaña mafoni etu kwakulehi kulonda twiikali nampinji yakudiluñishila hamu.”

14. Indi neyi adisumbula atiyaña wuudi wakwilila yuma hamu, chumanyi chatela kwilawu?

¹⁴ Hela chochu, indi neyi enu nimwinikwenu  mwatiyaña wuudi wakwilila hamu yuma? Hadaha yuma yakeñayi mukwenu enu himwayikeñaku, indi kwiji mwadihilishaña. Chumanyi chimwatela kwila? Toñojokenu hakesi kashimunawu hakusambila. Hikatachikaña kubidima hohenohuku. Kakeñekaña kutwalekahu kusonselaku chovu-chovu nansonsu jamaneni. Munjila yoyimu, kwila mutachika kwilila hamu yuma kuhitila mukwikala nakapinji kantesha ifuku niifuku nehi? Ililenuña hamu yuma yimwakeña wejima wenu, bayi yikumuhilisha mwinikwenuku. (Yak. 3:18) Neyi mutachika kwilila hamu itu tuyuma twanyanya, mukutachika cheñi kusweja kudikeña namwinikwenu.

15. Muloñadi kudilemesha chikwalemena hakwila adisumbula atwalekihu kudikeña?

¹⁵ Kalemesha kalema muwulu. Kadi neyi mpepela yaleteshaña kesi kubidima nankashi. Chakadi iyi mpepela, kesi kajimaña swayi. Munjila yoyimu, neyi adisumbula kudilemeshaña nehi, kukeña kwawu kunateli kushikena dakukeha. Ilaña neyi eyala namumbanda azataña nañovu kulonda adilemesheña, dikwila nawu anakufwila kukeña kwawu kutwalekihu. Anukenuña nenu chuma chalema hikutoñojoka neyi chakwila mwinikwenu wamonaña nindi mwamulemesha, bayi chimwatoñojokaña enu aweni nenu mwamulemeshaku. Muhela Penny nanfumwindi Aret anashakami muwulu kubadika hadi yaaka 25. Wahosheli nindi: “Muloña wakudilemesha mwitala detu mwekala kukeña chikupu. Twekalaña akasunuka kushimuna yitoñojoka yetu muloña tweluka netu twalemeshaña yitoñojoka yamukwetu.” Hanu dinu, yumanyi yimwatela kwila hakwila mwinikwenu amoni nindi chalala mwamulemesha? Talenu yuma yeliliwu aAbarahama naSara.

16. Yumanyi yatela kudizilawu amayala kudi Abarahama? (1 Petulu 3:7) (Talenu cheñi mwevulu.)

¹⁶ Abarahama wamulemesheleña Sara. Watiyilileña kuyitoñojoka yaSara nikulemesha chatiyileñayi. Mpinji yimu, Sara watiyili kutama, wamulejeli Abarahama chatiyileñayi nawa wamwinkelimu ninyiloña. Komana Abarahama washikeneni kwakula? Inehi. Welukili nindi Sara wadiña mumbanda wovwahila nawa wamukwashileña. Abarahama wamutiyilili nawa wafwilileña kumanisha iku kukala. (Kutach. 16:5, 6) Chumanyi chitukudizilaku? Enu amayala, mukweti wuswa wakufuukwilaku chisaka chenu. (1 Kor. 11:3) Hela chochu, chuma chachiwahi chimwatela kwila hikutiya chinakutoñojokayi mwinikwenu henohu kanda mufuukuli, sweje-e neyi ochu chuma chimunakufuukula chinamukundami niyena. (1 Kor. 13:4, 5) Mpinji jikwawu, ñodenu nateli kutiya kutama nawa hadaha wukukeña kuhosha chinakutiyayi. Komana mwalemeshaña chinakutiyayi kuhitila mukumutiyilila nakanañachima? (Tañenu 1 Petulu 3:7.) Muhela Angela nawaDmitry anashakami muwulu kwakwihi nayaaka 30. Walumbulwili nfumwindi chamwekeshañayi nindi wamulemesha, wahosheli nindi: “Mpinji yejima aDmitry antiyililaña neyi nahili hela neyi iyami inakukeña kuhosha hohu.  Adiwunjikaña nanami, hela chakwila nazuwi nankashi.”

17. Chumanyi chinateli kudizilawu ambanda kudi Sara? (1 Petulu 3:5, 6)

¹⁷ Sara wamwekesheli kalemesha kudi Abarahama kuhitila mukwovwahila mwafuukwileñayi. (Kutach. 12:5) Mpinji yimu, Abarahama wafuukwilihu kumwekeshela enyi chisambu abulili kukuhwelelawu nawu akwinza. Wamulejeli Sara kuleka mudimu wazatileñayi kulonda ochi mankendi amavulu. (Kutach. 18:6) Sara wanyakeli kwila mwamulejeliwu kudi Abarahama. Enu ambanda, munateli kumwimbujola Sara kuhitila mukwovwahila munafuukuliwu anfumu jenu. Neyi mwilaña mwenimu, mukukoleshaña wulu wenu. (Tañenu 1 Petulu 3:5, 6.) Manakwetu Dmitry, ashimunawu muparagilafu yinafumihu, walumbulwili ñodindi chamuleteshañayi kutiya nindi wamulemesha. Wahosheli nindi: “Namusakililaña mwinikwami Angela chazatañayi nañovu kulemesha mwinafuukuli, hela chakwila yitoñojoka yetu yinambokelimu. Neyi yuma yibula kuzatika chiwahi, wanyinkaña nyiloña wanyi.” Chekalaña chaswayi nankashi kukeña muntu wakulemesha!

18. Yumanyi yayiwahi yafumañamu neyi adisumbula azataña nañovu kulonda atwalekihu kudikeña?

¹⁸ Makonu, Satana nakufwila akaKristu adisumbula aleki kudikeña wumu namukwawu. Weluka nindi neyi adisumbula aleka kudikeña, anateli kutachika kufuma kudi Yehova. Hela chochu, kukeña kwalala hiyanateli kukukañeshaku! Dichi kukeña kudi muwulu wenu kwiikali neyi kukeña kwashimunawu muKamina kaSolomoni. Fwilenuña kumutwamijaku Yehova muwulu wenu, ikalenuña nampinji yakwikala hamu, nawa lemeshenuña chinakutiyayi mwinikwenu niyuma yinakukeñayi. Chimukwilaña mwenimu, wulu wenu wukuletaña kalemesha kudi Nsulu yakukeña kwalala, Yehova, nawa kufwana kesi kanatwalekiwu kusonselawu, kukeña kwenu kukutwalekañahu kubidima.