1. Kukalanyi kutwamonaña etu amavulu?

 KOMANA mwemikahu dehi chikonkwanyi chakuspiritu ilaña mukañanya kuchishikija? b Neyi dichuma chayimwekeneni, himudi nkawenuku. Chakutalilahu, manakwetu Philip wakeñeleña kuwahishaku kulomba kwindi nikulombaña mpinji yejima, ilaña chamukalilileña kwikala nampinji yakulomba. Muhela Erika wemikili chikonkwanyi chakubula kulaba kukubulakana kwakuya mumudimu wakushimwina; ilaña kakavulu, watwalekelihu kulaba. Manakwetu Tomáš wesekeli kakavulu nindi amanishi kutaña Bayibolu yejima. Wahosheli nindi: “Nadiluñishileña wanyi kutaña Bayibolu. Nesekeli kasatu kutaña Bayibolu yejima, ilaña nakuminineña hohu muALevi.”

2. Muloñadi chitwatela kubulila kuzeya neyi kudi chikonkwanyi chituchidi kanda tushikiji?

² Neyi kudi chikonkwanyi chimuchidi kanda mushikiji, mwani bayi muzeyaku. Muloña nikushikija tuhu chikonkwanyi chanyanya chakeñekaña kwikala nampinji nikuzata nañovu. Muchima wumukweti wakufwila kushikija chikonkwanyi chenu wamwekeshaña nawu mwalemesha wubwambu wenu naYehova nawa munakukeña kumukalakela kwesekeja nahanakumini ñovu jenu. Yehova walemesha chimwazataña nañovu. Kafwampi, hakeñaña nindi mumwilili yuma yimukubula kutweshaku. (Mas. 103:14; Mika 6:8) Dichi mwatela kwimika chikonkwanyi chimukutwesha, kwesekeja nachidi yuma muchihandilu chenu. Neyi munemiki chikonkwanyi, yumanyi yimwatela  kwila hakwila muchishikiji? Tuhanjekenu hanjila jimu jinateli kuyikwasha.

3. Muchima wakufwila kushikija chikonkwanyi walemenadi?

³ Hakwila mushikiji yikonkwanyi yakuspiritu mwatela kwikala namuchima wakufwila kwilamu. Neyi mudi namuchima wakufwila kushikija chikonkwanyi chenu mukuzataña nañovu kulonda muchishikiji. Muchima wakufwila kushikija chikonkwanyi tunateli kuwesekeja nampepela yashinjikaña watu kulonda wushiki kuwunakuya. Neyi mpepela yitwalekahu kukunka, mukakwendesha watu nateli kushika kunakuyayi. Nawa neyi kudi mpepela yeneni, nateli kushika swayi. Munjila yoyimu, neyi tukweti chikupu muchima wakufwila kwilamu, chikutupelela kushikija yikonkwanyi yetu. Manakwetu David wakuEl Salvador wahosheli nindi: “Neyi wukweti muchima wakufwila kwilamu, wukufwilaña kuzata nañovu. Hiwukwitejaña chuma chidi chejima chikukañeshi kushikija chikonkwanyi cheyiku.” Hanu dinu, yumanyi yimwatela kwila hakwila mwikaleña chikupu namuchima wakufwila kwilamu?

4. Yumanyi yitwatela kulomba? (AFwilipi 2:13) (Talenu cheñi mwevulu.)

⁴ Lombenu muchima wakufwila kwilamu chikupu. Yehova nateli kuzatisha spiritu yindi kulonda ayinki muchima wakufwila kushikija chikonkwanyi chenu. (Tañenu AFwilipi 2:13.) Mpinji jikwawu twemikaña chikonkwanyi muloña tweluka netu dichuma chitwatela kwila, nawa ichi hichuma chachiwahi. Ilaña hitunateli kwikala namuchima wakufwila kushikija ichi chikonkwanyiku. Chumichi dichamwekeni nikudi muhela Norina wakuUganda. Wemikili chikonkwanyi chakutachika kulombola kadizi waBayibolu hela chakwila hadiña namuchima wakufwila kwilamuku, muloña watoñojokeleña nindi heluka chakudizishaku. Chumanyi chamukwashili? Walumbulwili nindi: “Natachikili kumulomba Yehova ifuku niifuku nami ankwashi nisweji kwikala namuchima wakufwila kulombola kadizi waBayibolu. Nazatili nañovu kuwahishaku ntañishilu yami kwesekeja nachinalombeleña. Chimwahitili tukweji twantesha, nenjili nakwiluka nami mpwila yami yakulombola atudizi yaswejeleliku. Muchochina chaaka, natachikili kudizisha atudizi aBayibolu ayedi.”

5. Yumanyi yitwatela kutoñojokahu chikupu hakwila tusweji kwikala namuchima wakufwila kushikija chikonkwanyi chetu?

⁵ Toñojokenuña chikupu hayuma yayililayi Yehova. (Mas. 143:5) Kapostolu Pawulu watoñojokeli chikupu haluwi lwaYehova lwasweja lwamumwekesheleliyi, nawa chumichi chamusañumwini kumukalakela Yehova nañovu jindi jejima. (1 Kor. 15:9, 10; 1 Tim. 1:12-14) Ninenu neyi mutoñojokaña chikupu hayuma yayililayi Yehova, mukusweja kwikala namuchima wakufwila kushikija chikonkwanyi chenu. (Mas. 116:12) Talenu chuma chamukwashili muhela wumu kuHonduras hakwila ashikiji chikonkwanyi chindi chakwikala payiniya wampinji yejima. Wahosheli nindi: “Natoñojokeli hakukeña kwammwekeshelañayi Yehova. Wanleteli hadi antu jindi. Wañakamenaña nikunkiña. Kutoñojoka muniyi njila kwankwashili kumukeña chikupu nawa mpwila yami yakwikala payiniya yaswejeleliku.”

6. Yumanyi yikwawu yinateli kutukwasha kusweja kwikala namuchima wakufwila kushikija chikonkwanyi chetu?

 ⁶ Toñojokenuña hayuma yayiwahi yikufumamu neyi mushikija chikonkwanyi chenu. Talenu chuma chamukwashili muhela Erika itwashimuna hakusambila kushikija chikonkwanyi chindi chakubulaña kulaba. Wahosheli nindi: “Nenjili nakwiluka nami nashalileñahu yuma yayivulu muloña wakulaba kukubulakana kwakuya nakushimwina. Ilaña chinatachikili kushika nampinji, nekalileña nakukooleka kwakwimusha amanakwetu niahela nikwikala nampinji yakuhanjeka nawu. Nadiña cheñi nakukooleka kwakutiyilila kunjila jajiwahi jikunkwasha kwikala namuzañalu nikuwahishaku njila jakushimwinamu.” Muhela Erika watoñojokeleña hayuma yayiwahi yafumaña mukubula kulaba, nawa watwesheli kushikija chikonkwanyi chindi. Yumanyi yayiwahi yafumañamu yimwatela kutoñojokañahu? Neyi chikonkwanyi chenu chakufwila kutaña Bayibolu hela kulomba, toñojokenu hachichinateli kukolesha wubwambu wenu naYehova neyi muchishikija. (Mas. 145:18, 19) Neyi chikonkwanyi chenu chakufwila kwikala nachilwilu chimu chawakaKristu, toñojokenu hachichinateli kukolesha wubwambu wenu nawakwenu. (Kol. 3:14) Komana kwila musoneka yuma yejima yinakuletesha mufwileña kushikija ochu chikonkwanyi chenu nehi? Mpinji yejima talenuña hanoyu yuma yimwasonekeli. Manakwetu Tomáš, ashimunawu hakusambila, wahosheli nindi: “Neyi kudi yuma yayivulu yinakunletesha nifwileña kushikija ochu chikonkwanyi, nazataña nañovu kulonda nichishikiji.”

7. Chumanyi chayikwashili aJulio nawamwinikwawu kushikija chikonkwanyi chawu?

⁷ Dikundenuña nawantu akuyikolesha kushikija chikonkwanyi chenu. (Yish. 13:20) Talenu chuma chayikwashili aJulio nawamwinikwawu hakwila ashikiji chikonkwanyi chawu chakuzata nankashi mumudimu wakushimwina. Iwu manakwetu wahosheli nindi: “Twatondeli amabwambu atukolesheleña kushikija chikonkwanyi chetu, nawa twahanjekeleña hanichi chikonkwanyi nawena. Amavulu hakachi kawu adiña ashikija dehi yikonkwanyi neyi yetu, dichi atulejeleña njila jajiwahi jatukwashileña. Awa amabwambu jetu atwihwileña cheñi chinakwenda yuma yitwafuukwili, nawa adiña nakutukolesha neyi chinatwesheki.”

8. Chumanyi chinateli kumwekana neyi tufwilaña kuzatila hachikonkwanyi hampinji yitunatiyi hohu netu tukweti muchima wakufwila kuchishikija? (Talenu cheñi mwevulu.)

⁸ Kuhosha hohu chalala, wejima wetu kudi mafuku amakwawu itwatiyaña wuudi. Komana chumichi chinatalishi mukwila nawu tukutwesha wanyi kuzatila hachikonkwanyi chetu? Inehi. Chakutalilahu: Mpepela yinateli kwikala nañovu nankashi yakushinjika watu kulonda wushiki kuwunakuya. Hela chochu, mafuku amakwawu mpepela yakehaña, nawa mpinji jikwawu, hikwekalaña mpepelaku. Komana chumichi chikuletesha mukakwendesha watu kuleka kuya kunakuyayi? Inehi. Chakutalilahu, matu amakwawu akweti injini; amakwawu akweti yilapu. Mukakwendesha watu nateli kuzatisha yumiyi kulonda atwalekihu kuya kunakuyayi. Muchima wetu wakufwila kwila chuma tunateli kuwesekeja napempela; mpinji  jikwawu iku kufwila kunateli kusweja, mpinji jikwawu nehi. Nawa hamafuku amakwawu, tunateli kutiya wuudi wakuzatila hachikonkwanyi chetu. Dichi neyi tufwilaña kuzatila hachikonkwanyi hampinji yitunatiyi hohu netu tukweti muchima wakwilamu, twakakañanya kuchishikija. Neyi chazatishañayi mukakwendesha watu njila jashiyashana hakwila ashiki kunakuyayi, ninetu tukufwilaña kushikija chikonkwanyi chetu hela chakwila hitukweti muchima wakufwila kwilamuku. Hela chakwila chumichi chikwikala chaswayi wanyi, ilaña mukufuma yuma yayiwahi. Henohu kanda tuhanjeki hayuma yitwatela kwila, tuhanjekenu ntahi hanilu lwihu.

9. Komana twatela kutwalekahu kufwila kushikija chikonkwanyi chetu hela chakwila hitukweti muchima wakufwila kwilamuku? Lumbululenu.

⁹ Yehova wakeñaña nindi tumukalakeleña namuzañalu nawa chakufuma hamuchima. (Mas. 100:2; 2 Kor. 9:7) Komana twatela kutwalekahu kufwila kushikija chikonkwanyi chetu chakuspiritu hela chakwila hitunakukeña kuzatilahuku? Talenu chuma chamwekeni kudi kapostolu Pawulu. Wahosheli nindi: “[Nafumbaña] chikupu mujimba wami nakuwutwala muwuduñu.” (1 Kor. 9:25-27, nsañu yakudiza havasi 27) Pawulu wadikanjikijileña kwila yuma yaloña hela chakwila dichafwilileñayi wanyi. Komana Yehova watiyili kuwaha hamudimu wamukalakeleliwu kudi Pawulu? Eña! Nawa Yehova wamufweteli hachazatiliyi nañovu.—2 Tim. 4:7, 8.

10. Yumanyi yayiwahi yafumaña mukufwila kushikija chikonkwanyi chetu hela chakwila hitukweti muchima wakufwila kwilamuku?

¹⁰ Ninetu Yehova watutiyaña kuwaha neyi amona tunakufwila kushikija chikonkwanyi chetu hela chakwila hitukweti muchima wakufwila kwilamuku. Watiyaña kuwaha muloña weluka nindi hela chakwila mpinji yejima hitwatiyaña kuwaha namudimu wutunakuzataku, ilaña twawuzataña muloña wakumukeña. Yehova wakatukiswila hanyidimu yitwazataña neyi chamukiswililiyi Pawulu. (Mas. 126:5) Nawa hampinji yitunakumona Yehova chinakutukiswilayi, tunateli nikutachika kwikala namuchima wakwilamu. Muhela Lucyna wakuPoland wahosheli nindi: “Mpinji jikwawu, nakeñaña kuya nakushimwina wanyi, sweje-e neyi nazeyi. Hela chochu, nazañalalaña chikupu chinafuma nakushimwina.” Dichi tutalenu yuma yitwatela kwila neyi hitukweti muchima wakufwila kwilamuku.

11. Yehova nateli kutukwasha ñahi kulonda tusweji kwikala nachilwilu chakudiyuula?

¹¹ Lombenu chilwilu chakudiyuula. Idi izu kakavulu datalisha mukudiyuula etu aweni kulonda tubuleña kwila yuma yatama. Hela chochu, chilwilu chakudiyuula chakeñekaña cheñi hakwila twili chuma chachiwahi, sweje-e neyi owu mudimu wakola hela hitukweti muchima wakuwuzataku. Anukenu nenu, chilwilu chakudiyuula chidi hakachi kanyikaabu yaspiritu, dichi mulombenu Yehova ayinki spiritu yajila kulonda yiyikwashi mwiikali nanichi chilwilu chalema. (Luka 11:13; Ñal. 5:22, 23) Manakwetu David, itwashimuna hakusambila, washimwini kulomba chikwamukwashili. Wakeñeleña nindi ekaleña nakudiza kwankawindi mpinji yejima. Wahosheli nindi: “Namulombeleña Yehova kulonda ankwashi niikali nachilwilu chakudiyuula. Wankwashili, dichi nekalili naprogilamu yayiwahi yakudiza nkawami mpinji yejima.”

12. Chishina chekala haMukwakutañisha 11:4, chatukwashaña ñahi kushikija yikonkwanyi yakuspiritu?

¹² Bayi tuhembelela netu yuma chiña yakawahi chikupuku. Mukanu kaayi, yuma hiyakawahahu chikupuku. Neyi tuhembelelaña netu yuma yakawahi chikupu, hitwakashikija chikonkwanyi chetuku. (Tañenu Mukwakutañisha 11:4.) Manakwetu Dayniel wahosheli nindi: “Hikwekalañahu mpinji yawahaña yuma chikupuku. Dichi hitwatela kuhembelelaku, twatela hohu kutachikaku.” Manakwetu Paul wakuUganda niyena washimwini chuma chikwawu chinateli kuletesha tubuli kwikala nakaneñawudi, nindi: “Neyi tutachikaku hela chakwila tunakumona kukala, Yehova wukutukiswila.”—Mal. 3:10.

13. Kuwahanyi kwekala mukutachika nayikonkwanyi yanyanya?

¹³ Tachikenu nayikonkwanyi yanyanya. Tunateli  kutiya wuudi muloña chikonkwanyi chetu chinakumwekana neyi chakala nankashi kushikija. Neyi dikukala kumukweti, kwila mutachika kuzatila hanochu chikonkwanyi chenu chovu-chovu nehi? Neyi munakufwila kwikalahu nachilwilu chimu, kwila mutachika kuchimwekesha chovu-chovu nehi? Neyi munemiki chikonkwanyi chakutaña Bayibolu yejima, kwila mufuukulahu kutachika kutaña hadi kapinji kantesha hohu nehi? Manakwetu Tomáš ashimunawu kumatachikilu, chamukalilileña kushikija chikonkwanyi chindi chakumanisha kutaña Bayibolu muchaaka. Wahosheli nindi: “Nenjili nakwiluka nami nsañu yinafuukwilihu kutaña yaswejeleña kuvula. Dichi nafuukwilihu kutachika cheñi, ilaña haniyi mpinji nafuukwilihu kutañaña nsañu yantesha mukapetulu hefuku-hefuku nikutoñojokahu hanoyu nsañu. Chafuminimu, natachikili kudiluñisha nsañu yinatañileña.” Manakwetu Tomáš chatachikiliyi kudiluñisha kutaña Bayibolu, watachikili kuyitaña hadi mpinji yayilehi. Nkumininaku, wamanishili kutaña Bayibolu yejima. c

14. Kukalanyi kunateli kuletesha tukañanyi kushikija chikonkwanyi chetu?

¹⁴ Chawushona, hela chakwila tudi namuchima wakufwila kwilamu, indi kwiji tukweti chilwilu chakudiyuula, mpinji yikwawu tunateli kumona kukala kunateli kutukañesha. Chakutalilahu, “[yuma] yamwekanaña chakubula kukuhwelela” yinateli kuletesha tubuli kwikala nampinji yakuzatila hachikonkwanyi chetu. (Mukwa. 9:11) Hadaha tunateli kumona kukala kunateli kutuzeyesha nikutumanisha ñovu. (Yish. 24:10) Muloña wakubula kuwanina tunateli kwila yuma yikutukañesha kushikija chikonkwanyi chetu. (Rom. 7:23) Indi kwiji tunateli hohu kuzeya. (Mat. 26:43) Yumanyi yinateli kutukwasha kumanisha kukala kunakutukañesha?

15. Neyi kudi chuma chinakutukañesha, komana chumichi chinatalishi mukwila nawu tunakañanyi? Lumbululenu. (Isamu 145:14)

¹⁵ Anukenuña nenu neyi kudi chuma chinakuyikañesha hichinatalishi mukwila nawu munakañanyiku. Bayibolu yashimunaña nawu mpinji jikwawu  tunateli kutwalekahu kumona kukala kwashiyashana. Hela chochu, yahoshaña cheñi hatooka nawu tunateli kunyamuka cheñi, sweje-e nawukwashu waYehova. (Tañenu Isamu 145:14.) Manakwetu Philip ashimunawu hakusambila wahosheli nindi: “Hinashaña muchima hamapampa innakañanyi kushikija chikonkwanyi chamiku. Ilaña nashaña muchima hampinji jinnatachiki cheñi kuzatila hakushikija ochu chikonkwanyi.” Manakwetu David ashimunawu hakusambila wahosheli nindi: “Hinetejaña kukala kwinnakuhitamu kunzeyeshiku, ilaña namona nami hinjila yakumwekeshelamu chinamukeña Yehova.” Mwamweni, neyi mufwilaña kushikija chikonkwanyi chenu hela chakwila munakumona kukala, mukumwekesha kudi Yehova nenu munakukeña kumuzañalesha. Yehova wukuzañalala chikupu neyi ayimona munakutwalekahu kufwila kushikija chikonkwanyi chenu!

16. Chumanyi chitunateli kudizila kukukala kunakutukañesha kushikija chikonkwanyi chetu?

¹⁶ Dizilenuña kukukala kunakuyikañesha kushikija chikonkwanyi chenu. Toñojokenu chuma chaletesheli iku kukala kumwekani, nawa dihulenu nenu, ‘Kudihu chuma chinatela kwila hakwila iku kukala kwakabuli kumwekana cheñi?’ (Yish. 27:12) Ilaña mpinji jikwawu, neyi chikonkwanyi chenu chinakuyikalila kushikija, chumichi chinateli kumwekesha nawu ochu chikonkwanyi chinayiteleli wanyi. Neyi munamoni nenu iku dikukala kumukweti, shinshikenu cheñi hachikonkwanyi chenu kulonda mumoni neyi chinayiteleli hela nehi. d Yehova wukuyimona wanyi nindi munakañanyi muloña wakubula kushikija chikonkwanyi chayikalila.—2 Kor. 8:12.

17. Muloñadi wutwatela kwanukilaña yuma yitwazatilahu dehi?

¹⁷ Anukenuña yuma yimwazatilahu dehi. Bayibolu yahosha nawu “Nzambi waloña nawa hakavulamena mudimu [wenuku].” (Heb. 6:10) Dichi ninenu himwatela kuvulamena yuma yimwelaku. Anukenuña yuma yimwazatilahu dehi, chidi neyi kwikala nawubwambu naYehova, kulejaku antu chekalayi, hela kupapatishewa. Neyi chochimunazati nañovu kupama nikushikija yikonkwanyi yakuspiritu yimwemikili kunyima, munateli kutwalekahu kuzata nañovu kushikija chikonkwanyi chimunemiki chayinu mpinji.—Fwili. 3:16.

18. Chumanyi chitwatela kwanukaña kwila hampinji yitunakuzata nañovu kulonda tushikiji chikonkwanyi chetu? (Talenu cheñi mwevulu.)

¹⁸ Nawukwashu waYehova, munateli kushikija chikonkwanyi chenu, neyi mukakwendesha watu wunazañalali hakushika kunayeñayi. Ilaña anukenu nenu, akakwendesha matu amavulu adiluñishaña cheñi halwendu lwawu. Ninenu hampinji yimunakutwalekahu kuzata nañovu kushikija chikonkwanyi chenu chakuspiritu, bayi muvulamena kumona Yehova chinakuyikwashayi nikuyikiswila himunakuzata nañovu kulonda mushikiji chikonkwanyi chenuku. (2 Kor. 4:7) Neyi mubula kuzeya, mwakatambwila nkisu jajivulu kumbidi.—Ñal. 6:9.