1-2. Mpinji yikwawu tunateli kudihula netudi kutalisha hakulomba kwetu?

 MWADIHULAHU dehi neyi chakwila Yehova nakwakula kulomba kwenu hela nehi? Neyi mwadihulahu dehi, mudi nkawenu wanyi. Amanakwetu niahela amavulu ahoshaña nawu niwena adihulaña muniyi njila, sweje-e hampinji yinakuhitawu mukukala. Neyi tunakukabakana, chinateli kutukalila ninetu kwiluka neyi chakwila Yehova nakwakula kulomba kwetu hela nehi.

² Tukuhanjeka muloña waweni wukuletesha tukuhweleli netu Yehova waakulaña kulomba kwawakakudifukula indi. (1 Yow. 5:15) Tukuhanjeka cheñi hanawa malwihu: Muloñadi mpinji jikwawu chichinateli kumwekena neyi Yehova hanakwakula kulomba kwetuku? Njilanyi mwakwilañayi Yehova kulomba makonu?

3. Muloñadi Yehova chakeñelañayi nindi tulombeña kudi yena?

³ Nsona jatulejaña nawu Yehova watukeña chikupu nawa twalema kudi yena. (Hag. 2:7; 1 Yow. 4:10) Dichatulejelañayi nindi tulombeña wukwashu kudi yena. (1 Pet. 5:6, 7) Wakeñaña kutukwasha tutwalekihu kwikala kwakwihi nayena nikuumika kukala kwejima kutunakumona.

4. Tuneluki ñahi netu Yehova waakulaña kulomba kwawakakudifukula indi? (Talenu cheñi mwevulu.)

⁴ Twatañaña kakavulu muBayibolu nawu, Yehova waakwileña kulomba kwawakakudifukula indi. Kudihu muntu imukwanuka akwililiwu kulomba? Indi Mwanta Davidi? Muchihandilu chindi chejima wadiña nawayilumbu amavulu afwana akeñeleña kumujaha, nawa kakavulu walombeleña kudi Yehova nindi amukwashi. Mpinji yimu, wamulembeleli Yehova nindi: “Eyi Yehova, tiyaku kulomba kwami; tiyililaku kukulemba kwami kwakulomba wukwashu. Muloña wakushinshika kweyi nikuloña kweyi, ñaakuli.” (Mas. 143:1) Yehova waakwili kulomba kwaDavidi kwakukeña  kumwamwina. (1 Sam. 19:10, 18-20; 2 Sam. 5:17-25) Davidi wakuhweleleli nakuhosha nindi: “Yehova wudi kwakwihi nanowu ejima anakumutambika.” Ninetu tunateli kukuhwelela muniyi njila.—Mas. 145:18.

5. Komana mpinji yejima Yehova waakwileña kulomba kwawakakudifukula indi akunyima kwesekeja nachakuhweleleliwu? Shimunenu chakutalilahu. (Talenu cheñi mwevulu.)

⁵ Mpinji yikwawu Yehova hanateli kwakula kulomba kwetu kwesekeja nachitunakuhweleliku. Dichamumwekeneni nikapostolu Pawulu. Wamulombeli Nzambi nindi amufumishi “mwiña mumujimba.” Hampinji jisatu jashiyashana, Pawulu walombeli hohu haniku kukala kweneni kwamweneñayi. Komana Yehova waakwili akuna kulomba kwindi? Eña, ilaña bayi neyi chakuhweleleliyi Pawuluku. Chatela afumishihu akuna kukala, Yehova wamwinkeli ñovu yakeñekeleña kulonda yimukwashi kutwalekahu kumukalakela nakashinshi.—2 Kor. 12:7-10.

6. Muloñadi chitunateli kumwena mpinji jikwawu netu Yehova hanakwakula kulomba kwetuku?

⁶ Hadaha mpinji jikwawu ninetu anateli kutwakula munjila yinambukiku nachitunakuhweleli. Twatela kukuhwelela netu Yehova weluka chikupu chakutukwasha. Nateli cheñi “kukoña yuma yasweja kubadika chikupu yuma yitwamulombaña hela yitwatoñojokaña.” (Efwe. 3:20) Muloña wachumichi, nateli kwakula kulomba kwetu hampinji hela munjila yitunabuli kukuhwelela.

7. Muloñadi chitunateli kuhimpila yuma yitwalombaña? Shimunenu chakutalilahu.

⁷ Tunateli kuhimpa yuma yitwalombaña neyi twiluka chiwahi nkeñelu yaYehova. Talenu chuma chamwekeni kudi manakwetu Martin Poetzinger. Chasumbwiliyi hohu, Manakwetu Poetzinger amukasili muchilombu chakuyandishila chaNazi. Hakusambila, wamulombeli Yehova nindi amufumishi munichi chilombu chakuyandishila kulonda ayi nakumwakamena ñodindi nikutachika cheñi mudimu wakushimwina. Hela chochu, chimwahitili nyilungu yiyedi, hamwenihu chinjikijili chamwekesheleña nawu Yehova wukumukwasha kufuma mukaleyaku. Dichi watachikili kulomba nindi: “Eyi Yehova, nleji chuma chiwunakukeña neyi nili.” Kuhiñahu watachikili kutoñojoka hakukala kwahitileñamu amanakwetu amakwawu adiña muchilombu. Amavulu adiña nakwakamena chinakuhandawu añodi jawu nianyanawu. Kufumahu Manakwetu Poetzinger walombeli nindi: “Eyi  Yehova, nakusakilili hakunyinka mudimu wawuha. Nkwashi niyikolesheña amanakwami.” Hadi yaaka 9 yalondelelihu yashakaminiyi muchilombu, wayikolesheleña amanakwetu!

8. Chumanyi chalema chitwatela kwanukaña hampinji yitunakulomba?

⁸ Twatela kwanukaña netu Yehova wukweti nkeñelu, nawa wakayishikija hampinji yatoñolayi dehi. Iyi nkeñelu munabombeli kumanisha nikufumishahu chikupu kukala kwejima kwaleteshaña antu akabakaneña nankashi, kukala kudi neyi wubanji wadimwekenaña, yikatu nikufwa. Yehova wakashikija nkeñelu yindi kuzatisha Wanta windi. (Dan. 2:44; Chim. 21:3, 4) Hela chochu, chayinu mpinji Yehova namwiteji Satana kuyuula kaayi. b (Yow. 12:31; Chim. 12:9) Neyi Yehova afumishahu kukala kunakumonawu antu chayinu mpinji, chadi kumwekana neyi Satana nakuyuula chiwahi kaayi. Dichi hela chakwila twatela kumutalila Yehova hakwila akashikiji yikaninu yindi yimu, ichi hichinatalishi mukwila nawu watushiya chisayikilaku. Tuhanjekenu hanjila jimu mwatukwashilañayi Yehova.

9. Yehova nateli kutukwasha ñahi neyi kudi yuma yitunakukeña kufuukula? Lumbululenu.

⁹ Watwinkaña maana. Yehova watushiika nindi wukutwinkaña maana neyi tunakukeña kufuukula mwamuwahi. Twakeñekaña maana aNzambi, sweje-e hampinji yitunakufuukula yuma yakahimpa chihandilu chetu chejima, chidi neyi kutwalekahu kwikala mujiki hela nehi. (Yak. 1:5) Talenu chuma chamwekeni kudi muhela mujiki wejina daMaria. c Wadiña dehi payiniya wampinji yejima hatachikiliyi kudiluka namanakwetu wumu. Wahosheli nindi: “Wubwambu wetu chiwayileña nakukolelaku, kukeña kwetu kwaswejeleleñaku. Namweni nami natela kwilahu chuma chimu. Nalombelelihu chikupu haniyi nsañu. Nakeñeleña wunlomboli waYehova, ilaña nelukili cheñi nami Yehova hadi kunfuukwilaku.” Wakuhwelela chikupu nindi Yehova waakwili kulomba kwindi kwamulombeliyi maana. Munjilanyi? Chasandujoleliyi munyikanda yetu, wawanini yibaaba yamukwashili kuwana ñakwilu yamalwihu adihwileñayi. Watiyilili cheñi kukufumba kwakuwahi kwafumini kudi mama yindi washinshika. Iku kufumba kwamukwashili Maria kutoñojokahu cheñi hakuna kudikunda. Nkumininaku, wafuukwilihu chiwahi.

10. Kwesekeja naAFwilipi 4:13, chumanyi chikwilayi Yehova hakukwasha akakudifukula indi? Shimunenu chakutalilahu. (Talenu cheñi mwevulu.)

¹⁰ Watwinkaña ñovu yakuumika. Neyi cheliliyi nakapostolu Pawulu, Yehova wukutwinka ñovu yakuumika kukala kutunakumona. (Tañenu AFwilipi 4:13.) Talenu Yehova chamukwashiliyi manakwetu Benjamin kuumika kukala kwamweneñayi. Kwakwihi nachihandilu chindi  chejima chakuwansi, manakwetu Benjamin nichisaka chindi ashakamineña muyilombu yamatunduka muAfrica. Wahosheli nindi: “Natwalekelihu kumulomba Yehova, nakumuleja nami anyinki ñovu yikunkwasha kwila yuma yikumutiyishaña kuwaha. Yehova waakwili kulomba kwami kuhitila mukunyinka kuwunda kwamuyitoñojoka, nyikanda yakolesheleña wubwambu wami nayena nikunkwasha kwikala wahamuka kulonda nitwalekihu kushimwina.” Watwalekelihu kulumbulula nindi: “Muloña wakutaña nsañu yahosha hayuma yayimwekeneni akwetu aYinsahu nikwiluka Yehova chayikwashiliyi kuumika, nekalaña nañovu yakutwalekahu kwikala washinshika.”

11-12. Yehova nateli kwakula ñahi kulomba kwetu kuzatisha amanakwetu niahela? (Talenu cheñi mwevulu.)

¹¹ Wazatishaña amanakwetu niahela. Hawufuku wakutwala kwifuku dakulambula wumi windi, Yesu walombeli chikupu. Wamulembeleli Yehova nindi abuli kwiteja antu kutoñojoka nawu himukakasawuntu. Ilaña chatela eli chumichi, Yehova wamukwashili Yesu kuhitila mukumutemeshela manakwindi wumu hakachi kawañelu nakumukolesha. (Luka 22:42, 43) Yehova nateli kutukwasha ninetu kuhitila mukuzatisha manakwetu hela muhela kututemeshela foni yakutukolesha hela kutuhempula. Wejima wetu twatela kwikalañaku nampinji yakuhosha “izu dadiwahi” kudi akwetu akakwitiya.—Yish. 12:25.

¹² Talenu chuma chamwekeni kudi muhela Miriam. Chimwahitili nyilungu yantesha kufuma hafwiliyi nfumwindi, Miriam washalili nkawindi, wadihombeleña nikudineña. Walekeleña kudila wanyi, dichi wakeñekeleña muntu wakuhosha nindi. Wahosheli nindi: “Hinadiña nañovu yakutemeshela muntu foniku, dichi nalombeli kudi Yehova. Hampinji yinachidiña nakudila nikulomba, foni yami yadilili. Antemesheleli kudi mukulumpi wamuchipompelu, ibwambu wukweti kukeña.” Miriam amukundejeli kudi ona mukulumpi niñodindi. Wakuhwelela chikupu nindi Yehova diyi wamukojejeli ona manakwetu kutemesha foni.

13. Shimunenu chakutalilahu chinakumwekesha Yehova chinateli kuzatishayi antu abulaña kudifukula kudi yena kwakwilamu kulomba kwetu.

¹³ Nateli kuzatisha antu abulaña kudifukula kudi yena. (Yish. 21:1) Mpinji jikwawu,  Yehova waakulaña kulomba kwawantu jindi kuzatisha antu abulaña kudifukula kudi yena kulonda ayikwashi. Chakutalilahu, wazatishili Mwanta Atazakisheshi kumwiteja Nehemiya kufunta kuYerusalema kulonda ayi nakukwasha kutuñulula musumba. (Nehe. 2:3-6) Nimakonu, Yehova nateli kuzatisha antu abulaña kudifukula kudi yena kulonda enzi nakutukwasha neyi tudi mukukala.

14. Chuma chamwekeni kudi muhela Soo Hing chinayikoleshi ñahi? (Talenu cheñi mwevulu.)

¹⁴ Muhela Soo Hing welukili nindi Yehova wamukwashili kuhitila mudi ndotolu. Mwanindi weyala wakabakanaña nayikatu yakuwoñu yayivulu. Mwanawu chadiñayi mumaposu, iwu muhela ninfumwindi alekeli nyidimu yazatileñawu kulonda amwakameneña. Chafuminimu, ekalili nakukala kwamali. Muhela wahosheli nindi wamweni neyi hakutwesha kutwalekahu kuumikaku. Walombeli kudi Yehova nindi amukwashi. Ona ndotolu wawanini njila yakuyikwashilamu nakukala kwadiñawu naku. Muloña wachumichi, atambwili wukwashu kunfulumendi niitala dadiña hawuseya wawuwahi. Nkumininaku, muhela Soo Hing wahosheli nindi: “Twamweni Yehova chatukwashiliyi muniku kukala. Mwamweni diyi ‘Mukakutiya kulomba.’”—Mas. 65:2.

15. Chumanyi chamukwashili muhela wumu kwiluka nindi kulomba kwindi akwakwileña?

¹⁵ Kulomba kwetu hiyavula kukwakula munjila yakuhayamishaku. Ilaña ñakwilu yitwatambwilaña yatukwashaña kutwalekahu kwikala ashinshika kudi Tata yetu wamwiwulu. Dichi ilukenuña chakulañayi Yehova kulomba kwenu. Muhela Yoko wamweneña nindi Yehova hakwileña kulomba kwindiku, dichi watachikili kusoneka yuma yamulombeleñayi Yehova. Chimwahitili mpinji, watalili mumukanda windi nawa wenjili nakwiluka nindi yuma yayivulu yamulombeliyi Yehova nayakuli, kushilahu niyuma yavulameneniyi. Mpinji yejima, twatela kwikalañaku nampinji yakutoñojoka chinakwakulayi Yehova kulomba kwetu.—Mas. 66:19, 20.

16. Tunateli kumwekesha ñahi chikuhwelelu kutalisha hakulomba kwetu? (AHeberu 11:6)

¹⁶ Twamwekeshaña chikuhwelelu neyi tulombaña kudi Yehova nikwiteja njila yidi yejima yakwilañamu kulomba kwetu. (Tañenu AHeberu 11:6.) Talenu chuma chamwekeni kudi manakwetu Mike niñodindi Chrissy. Emikili chikonkwanyi chakuzatila haBeteli. Manakwetu  Mike wahosheli nindi: “Twasonekeleli kasanji kamutayi nyikanda hadi yaaka yayivulu nawa twalombeli kudi Yehova kakavulu hanichi chikonkwanyi, ilaña hiyatutambikiliku.” Manakwetu Mike naChrissy atwalekelihu kukuhwelela nawu Yehova welukili chakuyizatisha mumudimu windi. Atwalekelihu kuzata hakumina ñovu jawu, akalakeleña wupayiniya wampinji yejima kwadiña kukaankila nikukwashanaku mumudimu wakutuña mukuloñesha kwaYehova. Ichi adi dehi mumudimu wakwenda. Manakwetu Mike wahosheli nindi: “Mpinji yejima Yehova hadiña nakwakula kulomba kwetu kwesekeja nachitwakuhweleleliku, ilaña wakwakula kwejima nawa munjila yayiwahi chikupu yitwabulili nikukuhwelela.”

17-18. Kwesekeja Nesamu 86:6, 7, chumanyi chitwatela kukuhwelela?

¹⁷ Tañenu Isamu 86:6, 7. Ñimbi yaMasamu Davidi wakuhweleleli nindi Yehova watiyileña nikwakula kulomba kwindi. Ninenu dichimunateli kukuhwelela. Yakutalilahu yawantu itunahanjekihu muchinu chibaaba yinatukwashi kukuhwelela netu Yehova nateli kutwinka maana niñovu yakutukwasha kuumika. Nateli kuzatisha amanakwetu niahela hela antu abulaña kudifukula kudi yena chayinu mpinji kulonda atukwashi muyuma yikwawu.

¹⁸ Hela chakwila mpinji jikwawu Yehova hanateli kwakula kulomba kwetu munjila yitunakuhweleliku, tweluka netu wakaakula. Wakatwinka wukwashu wutunakukeña nawa hampinji yitunakuwukeña. Dichi twalekenuhu kulomba nakukuhwelela nenu Yehova wukuyakamenaña chayinu mpinji nawa nenu “[wakekutisha] yuma yejima yayumi nayuma yakeñañawu” mukaayi kakaha kanakwinza.—Mas. 145:16.