CHIBAABA CHAKUDIZA 18
KAMINA 1 Yilwilu yaYehova
Kuhwelelenu muLuwi Lukweti “Nsompeshi Yeseki Dejima”!
“Komana Nsompeshi yeseki dejima hakwila mwaloñaku?”—KUTACH. 18:25.
TUKUDIZA
Tukutiyishisha chikupu chekala luwi niwuñanji waYehova kutalisha hakusañuka kwawantu abula kuloña.
1. Chumanyi chakukundeja chamudizishiliwu Abarahama kudi Yehova?
IYI YADIÑA mpanji yabulili kuvulamenayi Abarahama. Nzambi wamulejeli Abarahama kuhitila mudi kañelu nindi wukujilumuna musumba waSodoma niwaGomora. Chumichi chamwakamishili iwu iyala washinshika. Wehwili nindi: “Chalala antu aloña wukuyijilumwina hamu nawantu atama tahindi? . . . Komana Nsompeshi yeseki dejima hakwila mwaloñaku?” Yehova wadiwunjikili nakumudizisha ibwambu dindi akeñayi chuma chalema chinateli kutukwasha nikutukundeja wejima wetu: Nzambi hakajilumuna antu aloñaku.—Kutach. 18:23-33.
2. Chumanyi chatukwashaña kukuhwelela chikupu netu Yehova wasompeshaña antu munjila yaloña nawa yaluwi?
2 Tunateli kukuhwelela ñahi chikupu netu mpinji yejima neyi Yehova asompesha antu wayisompeshaña munjila yaloña nawa yaluwi? Muloña tweluka netu “Yehova wamonaña mumuchima” wawantu. (1 Sam. 16:7) Kafwampi, weluka “muchima wamuntu wejima.” (1 Anya. 8:39; 1 Kushi. 28:9) Ichi dichalala. Kwila tutwesha kutiyishisha wunsompeshi waYehova wejima nehi. Dihafumini amwoneni kapostolu Pawulu kuhosha hadi Yehova Nzambi mazu akwila nawu: “Wunsompeshi windi ochiwakala kuwiluka!”—Rom. 11:33.
3-4. Malwihwinyi itunateli kudihula mpinji jikwawu, nawa yumanyi yitukuhanjekahu muchinu chibaaba? (Yowanu 5:28, 29)
3 Hela chochu, mpinji jikwawu tunateli kwihula malwihu wowamu neyi ehwiliyi Abarahama. Hadaha tunateli kudihula cheñi netu: ‘Komana chikatwesheka antu akisañeniwu kudi Yehova, chidi neyi ana amuSodoma naGomora kuhanda cheñi? Komana hakachi kawu hadihu antu ‘akasañwilawu hamu nawantu abula kuloña?’—Yilw. 24:15.
4 Tuhanjekenu yuma yitweluka hansañu yakusañuka. Katataka atulumbulwilili ntiyishishilu yayiha kutalisha hanowu “akasañukila kuwumi wahaya nyaaka” ninowu “akasañukila kukuyisompesha.” a (Tañenu Yowanu 5:28, 29.) Iku kulumbulula kunaleteshi kwiikali ntiyishishilu yikwawu yayiha yitukuhanjekahu muchinu chibaaba nimuchibaaba chinalondelihu. Kutalisha hawunsompeshi waYehova waloña, tukusambila kuhanjeka hayuma yitwabula kwiluka, kuhiñahu dinu yitweluka.
YUMA YITWABULA KWILUKA
5. Kufumatuhu kunyima, nyikanda yetu yalumbululaña nawudi kutalisha hadi antu ajilumukili muSodoma naGomora?
5 Kufuma tuhu kunyima, nyikanda yetu yinalumbululi chuma chayimwekenaña antu asompeshañayi Yehova nindi abula kuloña. Twahoshaña netu antu adi neyi ana adiña muSodoma naGomora hiyamba kasañukaku. Ilaña, hanyima yakusandujola nikulombelahu chikupu haniyi nsañu, chinamwekani hatooka nawu hitwatela kukunkulula muniyi njilaku. Muloñadi?
6. Yakutalilahwinyi yamwekeshaña chekala wunsompeshi waYehova kutalisha hadi antu abula kuloña, nawa chumanyi chitwabula kwiluka?
6 Tuhanjekenu hamalwihu amakwawu. MuBayibolu mwekala nsañu yayivulu yahosha hachekala wunsompeshi waYehova kutalisha hadi antu abula kuloña. Chakutalilahu, Yehova wakisañeni antu ejima haDibaji kufumishaku hohu Nowa nichisaka chindi. Wazatishili cheñi aIsarela kujilumuna nyuza 7 yawantu ashakamineña Mwituña daChikaninu, nawa wazatishili kañelu wumu kujilumuna mashidika 185,000 muwufuku wumu hohu. (Kutach. 7:23; Kuhit. 7:1-3; Isa. 37:36, 37) Muniyi yuma yejima yamwekeni, komana ana antu ejima afwili Bayibolu yatuleja hatooka nawu Yehova wayifuukwila dehi kujilumuka kwahaya nyaaka, chakwila hamba kayisañulaku? Inehi, yashimuna wanyi. Tunahoshelidi mwenimu?
7. Chumanyi chitwabula kwiluka kutalisha hadi antu ajilumukili haDibaji hela hadi antu ajilumwiniwu hampinji yashindiliwu ituña daKenani? (Talenu mwevulu wudi .)
7 Tweluka wanyi Yehova chasompesheliyi muntu-himuntu, nawa tweluka wanyi neyi chakwila ana antu ajahiliwu adiña nakukooleka kwakudiza hadi Yehova nikubalumuka munyichima. Kutalisha hampinji yaDibaji, Bayibolu yahosha nawu Nowa wadiña “mukakushimwina kuloña.” (2 Pet. 2:5) Ilaña yahosha wanyi nawu hampinji yatuñileñayi watu weneni nankashi, washimwinineña cheñi muntu wejima hamaseki adi kushikenawu kudi Dibaji. Munjila yoyimu, kutalisha hanyuza yamuKenani, tweluka wanyi neyi chakwila ana antu ejima atama adiña nakukooleka kwakudiza hadi Yehova nikuhimpa yilwilu yawu.
Nowa nichisaka chindi anakutuña watu weneni. Tweluka wanyi neyi chakwila Nowa washiliku kampeni yakushimwina hayina mpinji yatuñileñawu watu kulonda ashimwini antu ejima ashakamineña heseki henohu Dibaji kanda dinzi (Talenu paragilafu 7)
8. Yumanyi yitwabula kwiluka kutalisha hadi antu amuSodoma naGomora?
8 Indi antu amuSodoma naGomora? Muntu waloña wejina daLoti, washakamineña nanawa antu muSodoma. Komana tweluka netu Loti wayishimwinini awa antu ejima? Inehi. Mwamweni adiña antu atama, hanu dinu elukili yuma yaloña niyabula kuloña? Anukenu nenu, izanvu dawamayala amuniwu musumba akeñeleña kukaama chakukanjikija enyi jaLoti. Bayibolu yahosha nawu munidi izanvu dawakamadombu mwadiña ‘atwansi niakulumpi.’ (Kutach. 19:4; 2 Pet. 2:7) Komana tweluka chikupu netu Nzambi waluwi, Yehova, wayijilumwini awa antu chakadi kuchiñeja kwakusañuka? Yehova wamulejeli Abarahama nindi muniwu musumba himwadiñahu hela antu 10 adiña aloñaku. (Kutach. 18:32) Mwamweni adiña antu abula kuloña, nawa Yehova welili mwaloña hakuyijilumuna muloña wayilwilu yawu. Komana tunateli kuhosha netu kwosi niwumu hakachi kawu wakasañuka ‘hakusañuka kwawantu abula kuloña’? Inehi, hitunateli kuhosha muniyi njilaku!
9. Chumanyi chitwabula kwiluka kutalisha hadi solomoni?
9 Hela chochu, muBayibolu twatañañamu cheñi antu aloña ekalili abula kuloña. Mwanta Solomoni wudi hakachi kanawa antu. Amudizishili chikupu kwesekeja nachakeñañayi Nzambi nawa amukiswilili nankashi kudi Yehova, ilaña mukuhita kwampinji watachikili kudifukula kudi anzambi akutwamba. Nshidi jakoñeliyi jamuhilishili Yehova nawa chumichi chaletesheli muza waIsarela wejima kukabakana hadi yaaka yayivulu. Solomoni chafwiliyi, Bayibolu yahosha nawu “wakaamini hamu nawankakulula jindi,” kushilahu niamayala ashinshika adi neyi Mwanta Davidi. (1 Anya. 11:5-9, 43; 2 Anya. 23:13) Komana njila mwamujiikililiwu hichinjikijilu chamwekeshaña nawu mwamweni akamusañula? Bayibolu yahoshahu wanyi. Ilaña antu amakwawu anateli kuhosha nawu “muntu wunafwi, nasubuki dehi kunshidi jindi.” (Rom. 6:7) Hela chochu, ichi chatalisha wanyi mukwila nawu antu ejima afwa dehi akayisañula. Kafwampi, ichi hichinatalishi mukwila nawu muntu chafwayi hohu wekalaña nalusesa lwakuhanda cheñiku. Kusañuka hichawaana chafumaña kudi Nzambi wakukeña. Wachihanaña kudi ana enkañayi kukooleka kwakumukalakela haya nyaaka. (Yoba 14:13, 14; Yow. 6:44) Komana Solomoni wakatambwila ichi chawaana? Yehova diyi weluka ñakwilu, etu tweluka wanyi. Hela chochu, tweluka netu Yehova wakela chuma chaloña.
YUMA YITWELUKA
10. Yehova watiyaña ñahi kutalisha hakukisañana antu? (Ezekeli 33:11) (Talenu cheñi mwevulu.)
10 Tañenu Ezekeli 33:11. Yehova watulejaña chatiyañayi kutalisha hakusompesha antu. Kapostolu Petulu amwoneneni kuhosha mazu adifwana namazu asonekeliyi kaprofwetu Ezekeli, wahosheli nindi “Yehova . . . hakeñaña muntu hela wumu akakisikiku.” (2 Pet. 3:9) Muloña wanawa mazu akukundeja chikupu, tweluka netu Yehova hanateli kushikena kukisañana muntu haya nyaakaku, chiña neyi kudi chuma chacheni chinaleteshi eli mwenomu. Diyi saluwi nawa wamwekeshaña luwi hatelela.
Antu abula kuloña chakasañukawu, antu ashiyashana akekala nakukooleka kwakudiza kulonda akamwiluki Yehova (Talenu paragilafu 10)
11. Anyi akabula kusañulawu, nawa tuneluki ñahi chumichi?
11 Yumanyi yitweluka kutalisha hadi antu akabula kusañulawu? Bayibolu yashimuna hohu antu antesha. b Yesu wahosheli nindi Yudasi Isakaroti hiyakamusañulaku. (Maku 14:21; Yow. 17:12) c Yudasi welukili nawa wadikañili mumushikila naYehova Nzambi niMwanindi. (Maku 3:29) d Munjila yoyimu, Yesu wahosheli hadi akulumpi jakudifukula amakwawu adikañili nayena nindi akafwa nawa hiyakayisañulaku. (Mat. 23:33; Yow. 19:11) Nawa kapostolu Pawulu wasoñamishili nindi akakusekesha abulaña kubalumuka munyichima hiyakayisañulaku.—Heb. 6:4-8; 10:29.
12. Yumanyi yitweluka haluwi lwaYehova? Shimunenu yakutalilahu.
12 Hela chochu, yumanyi yitweluka haluwi lwaYehova? Wamwekeshaña ñahi hatooka nindi “hakeñaña muntu hela wumu akakisikiku”? Toñojokenu haluwi lwamwekesheleliyi antu amu akoñeli nshidi yahamesu bwi-ii. Mwanta Davidi wakoñeli nshidi jamaneni jashiyashana, kushilahu wujila nikujahañana. Hela chochu, Davidi wabalumukili mumuchima, dichi Yehova wamutiyilili luwi nawa wamwanakeneni. (2 Sam. 12:1-13) Mwanta Manasi wakoñeli yuma yatama yayivulu kwakwihi nachihandilu chindi chejima. Hela chakwila wakoñeli yuma yatama ñana, Yehova wamutiyilili Manasi luwi nawa wamwanakeneni muloña wabalumukili mumuchima. (2 Kushi. 33:9-16) Iyi yakutalilahu yinakutwanukisha nawu Yehova watiyilaña muntu luwi neyi chakwila amona nindi kudi chuma chalema chikuletesha eli mwenimu. Wakayisañula awa antu muloña elukili nawu akoñeli nshidi jamaneni nawa abalumukili munyichima.
13. (a) Muloñadi Yehova chayitiyililiyi luwi aNiniva? (b) Mukuhita kwampinji, Yesu wahosheli nindidi kutalisha hadi aNiniva?
13 Tweluka cheñi Yehova chamwekesheleliyi aNiniva luwi. Nzambi wamulejeli Yona nindi: “Kutama kwawu kunashiki kudi ami.” Ilaña chabalumukiliwu munyichima nakuleka nshidi jawu, Yehova wayanakeneni chakufuma hamuchima. Wayitiyilili luwi chikupu kubadika chayitiyililiyi Yona. Nzambi wamwanukishili kaprofwetu kindi wahilili nindi ana aNiniva elukili wanyi “chachiwahi nichatama.” (Yona 1:1, 2; 3:10; 4:9-11) Mukuhita kwampinji, Yesu wazatishili ichi chuma chamwekeni hakudizisha antu chekala wuñanji niluwi lwaYehova. Yesu wahosheli nindi aNiniva abalumukili munyichima “akasañuka . . . hakusompesha.”—Mat. 12:41.
14. ANiniva akasañukila kuwunsompeshi wamuchidinyi?
14 Hanu dinu mazu akwila nawu aNiniva “akasañuka . . . hakusompesha” atalisha mudihi? Yesu wahosheli nindi kumbidi kwakela antu “akasañukila kukuyisompesha.” (Yow. 5:29) Yesu watalishileña kumpinji yaChiyuulu Chindi chaYaaka Ikombakaji, hakasañuka antu “aloña niabula kuloña.” (Yilw. 24:15) Antu abula kuloña “akasañukila kukuyisompesha.” Dikwila nawu, Yehova niYesu akashinshika nikuhituluka muyilwilu yanawa antu kulonda akamoni neyi akwovwahila nikuzatisha yuma yakadizawu. Neyi kaNiniva akasañulawu akaana kudifukula kwalala, Yehova wakamwiteja wanyi kutwalekahu kuhanda. (Isa. 65:20) Ilaña antu ejima akatondahu kudifukula kudi Yehova nakashinshi, akekala nakukooleka kwakushakama haya nyaaka!—Dan. 12:2.
15. (a) Muloñadi wutwatela kutondolwela kuhosha netu kwosi muntu niwumu akasañulawu hadi ana antu akisikili muSodoma naGomora? (b) Tunateli kutiyishisha ñahi mazu asonekawu haYuda 7? (Talenu chikasha chinakwila nawu “ Yuda Watalishili Mudihi?”)
15 Hampinji yahosheleñayi hadi antu amuSodoma naGomora, Yesu wahosheli nindi awa antu chakayikalila nankashi wanyi “Hefuku daKusompesha” neyi chichakayikalila antu amukaanini yena nintañishilu yindi. (Mat. 10:14, 15; 11:23, 24; Luka 10:12) Watalishili mudihi? Hadaha tunateli kutoñojoka netu Yesu wadiña nakulebumuna haniyi mpinji. Ilaña dichichadiña wanyi, chidi hohu neyi chahosheliyi kutalisha hadi aNiniva. e Dichi, chinamwekani neyi awa mazu ahosheliyi Yesu adiña akulebumuna wanyi. ‘Ifuku daKusompesha’ dateneniyi kutalisha hadi aSodoma naGomora, dadiña dodimu nefuku dateneniyi kutalisha hadi aNiniva. Antu amuSodoma naGomora niwena akoñeleña yuma yatama neyi aNiniva. Ilaña aNiniva adiña nakukooleka kwakubalumuka munyichima. Kubombelahu, anukenu mazu ahosheliyi Yesu kutalisha hadi antu “akasañukila kukuyisompesha.” Hakachi kanawa antu hakekala ninowu “akoñeleña yuma yatama.” (Yow. 5:29) Dichi, chinamwekani neyi kudi kuchiñeja kwawantu amuSodoma naGomora. Hadaha kwakela antu amakwawu akasañulawu hakachi kanana antu, nawa hekwawu twakekala nakukooleka kwakuyidizisha kulonda akamwiluki Yehova niYesu Kristu!
16. Chumanyi chitweluka kutalisha hachakafuukulayi Yehova hadi antu akasañulayi? (Yeremiya 17:10)
16 Tañenu Yeremiya 17:10. Muniyi vasi twatañañamu chuma chitweluka hachasompeshañayi Yehova: mpinji yejima Yehova ‘wasandujolaña muchima nakushinshika chikupu yitoñojoka yayeni yamukachi.’ Hampinji yakafuukulañayi muntu atela kusañulayi, “[wakafweta] muntu wejima kwesekeja nanjila jindi.” Yehova hakatiyila antu luwi hanabuli kutelelaku, chiña hanateleli. Dichi bayi tukunkulula hadi muntu wudi wejima netu hakasañukaku, chiña hohu neyi tuneluki chikupu netu dichahosha Bayibolu!
“NSOMPESHI YESEKI DEJIMA” WAKELA MWALOÑA
17. Chumanyi chakayimwekena antu afwa dehi?
17 Kufuma tuhu hampinji aAdama naEva yadibombeliwu naSatana nakudikaña naYehova Nzambi, antu amavulu nankashi anafwi. Kufwa hichilumbu wabadika chikupu! (1 Kor. 15:26) Chumanyi chakayimwekena awa antu ejima? Antu antesha hohu, akushika ku 144,000, ekala hakachi kawakakumulondela Kristu ashinshika, akasañukila kuwumi wakafwaña mwiwulu. (Chim. 14:1) Antu amavulu nankashi, amayala niambanda ashinshika amukeñeli Yehova, akekala hakachi kawantu akasañukila “[kukusañuka] kwawantu aloña” nawa akashakama haya nyaaka heseki neyi atwalekahu kwikala aloña muChiyuulu chaKristu chaYaaka Ikombakaji nihampinji yakweseka kwakukumishaku. (Dan. 12:13; Heb. 12:1) Cheñi mumpinji yaChiyuulu chaKristu chaYaaka Ikombakaji antu “abula kuloña,” kushilahu niantu abulileña kumukalakela Yehova hadaha “akoñeleña [niyuma] yatama,” akayinka mpinji yakuhimpa yilwilu yawu nakwikala ashinshika. (Luka 23:42, 43) Hela chochu, antu amakwawu adiña atama nankashi, afwilileña chikupu kudikaña naYehova ninkeñelu yindi chakwila wayifuukwila dehi nindi hiyamba kasañukaku.—Luka 12:4, 5.
18-19. (a) Muloñadi wutunateli kukuhwelela muwunsompeshi waYehova kutalisha hadi antu afwa dehi? (Isaya 55:8, 9) (b) Yumanyi yitwakadiza muchibaaba chinalondelihu?
18 Komana tunateli kukuhwelela chikupu netu neyi Yehova asompesha antu mpinji yejima wasompeshaña mwaloña? Eña! Neyi chelukiliyi chiwahi Abarahama, Yehova ‘hinsompeshi yeseki dejima’ wawanina, wukweti maana abadika niluwi. Wamudizisha Mwanindi nawa wamwinka wuswa wejima wakusompesha. (Yow. 5:22) Wejima wawu, Tata yawantu niMwana anateli kwiluka yuma yidi mumuchima wamuntu. (Mat. 9:4) Dichi neyi asompesha muntu, mpinji yejima elaña ‘mwaloña!’
19 Tufwileña kumukuhwelela Yehova niyuma yejima yafuukulañayi. Tweluka netu etu twashikilamu kwikala ansompeshi wanyi, chiña yena! (Tañenu Isaya 55:8, 9.) Dichi, mudimu wejima wakusompesha tumushilenu yena niMwanindi, Mwanta wembujolaña chikupu wuñanji niluwi lwaTata yindi. (Isa. 11:3, 4) Hanu dinu tukuhoshahu netudi hachakasompeshayi Yehova niYesu antu hampinji yalukadi lwasweja? Yumanyi yitwabula kwiluka? Nawa yumanyi yitweluka? Chibaaba chinalondelihu chakakula awa malwihu.
KAMINA 57 Kushimwina Antu Ejima
b Kutalisha hadi Adama, Eva niKena, talenu Kaposhi Kakutalila,January 1, 2013, ifu 12, tth.
c Mazu akwila nawu “mwana kakujilumuka” azatishawu haYowanu 17:12, atalisha mukwila nawu Yudasi chafwiliyi wajilumukili chahaya nyaaka chakadi kwikala nakuchiñeja kwakusañuka.
d Talenu mutu wunakwila nawu “Komana Munayivulumuni Spiritu Yajila?” muKaposhi Kakutalila, August 1 2007, ifu 8, mapara. 8-9.
e Neyi muntu nakulebumuna wabombelañaku mazu amakwawu kulonda akoleshi chikuma, hakeñaña antu atiyi owu mazu neyi chinayihoshiyiku. Ilaña mazu ahosheliyi Yesu kutalisha hadi antu amuSodoma naGomora adiña alala, dichi hiyadiña akulebumunaku.