CHIBAABA CHAKUDIZA 20
KAMINA 67 “Shimwinaku Mazu”
Kukeña Kuyisañumuni Kutwalekahu Kushimwina!
“Nsañu yayiwahi atela kusambila kuyishimwina kunyuza yejima.”—MAKU 13:10.
TUKUDIZA
Kukeña chikwatusañumunaña kuzata mudimu wakushimwina neyena nawa namuchima wejima.
1. Yumanyi yatulejeliwu hakubulakana kwahachaaka kwamu 2023?
HAKUBULAKANA kwahachaaka kwamu 2023, a twazañaleli hakutiya ntiyishishilu yayiha hayuma yimu yitwakuhwelela nawa twatiyili yakubidika yayiwahi kutalisha hamudimu wetu wakushimwina. Chakutalilahu, atulejeli nawu antu amakwawu hadaha akekala nakukooleka kwakudibomba nawantu jaYehova nihanyima yakwila Babiloni Muneni anamujilumuni dehi. Cheñi atulejeli nawu kutachika nakakweji kaNovember 2023, akakushimwina aWanta hiyakusonekaña halipoti yawu yuma yejima yazatiliwu mumudimu wakushimwinaku. Komana iku kuhimpika ichi kukuletesha tumoneña mudimu wetu wakushimwina netu walema wanyi? Inehi mwani!
2. Muloñadi mudimu wetu wakushimwina chiwunakukeñekela kuwuzata mukunyakashana chikupu hefuku-hefuku? (Maku 13:10)
2 Hefuku-hefuku, mudimu wetu wakushimwina wunakukeñeka kuwuzata chikupu mukunyakashana. Muloñadi? Muloña mpinji yinamani. Toñojokenu chahosheleñahu dehi Yesu hachakekala mudimu wakushimwina mumafuku akukuminina. (Tañenu Maku 13:10.) Kwesekeja nansañu yaMatewu yadifwana nansañu yaMaku, Yesu wahosheli nindi nsañu yayiwahi akayishimwina mwahita iseki dejima mwashakamawu antu henohu “kukuma” kanda kwinzi. (Mat. 24:14) Idi izu datalisha kukukuma kwakaayi katama kaSatana. Yehova washaku ifuku niora mwakamwekena yuma yikumwekana katataka. (Mat. 24:36; 25:13; Yilw. 1:7) Hefuku-hefuku tunakuswina kwakwihi nanidi ifuku. (Rom. 13:11) Chayinu mpinji, twatela kutwalekahu kushimwina sampu kukuma kunenzi.
3. Chumanyi chatusañumunaña kushimwina?
3 Hampinji yitunakutoñojoka hamudimu wetu wakushimwina, tukwila chiwahi neyi tudihula ilu lwihu lwalema: Muloñadi wutwashimwinaña nsañu yayiwahi? Muwihi, kukeña dikwatusañumunaña kushimwina. Neyi tushimwina, twamwekeshaña netu twakeña nsañu yayiwahi, twakeña antu, nawa chasweja kubadika, twamukeña Yehova niijina dindi. Tuhanjekenu haniyi yuma chimu-chimu.
TWASHIMWINAÑA MULOÑATWAKEÑA NSAÑU YAYIWAHI
4. Twelaña ñahi neyi tunatiyi nsañu yayiwahi?
4 Munateli kwanuka chimwatiyili hampinji yimwatambwilili nsañu yayiwahi, hadaha hasemukiliyi mwana muchisaka chenu indi kwiji hayiñijiliwu mudimu wumwakeñesheleña chikupu? Chakadi nikujina, mwafwilileña kulejaku antaña niamabwambu jenu iyi nsañu yayiwahi. Komana dichimwelili nihampinji yimwatiyili nsañu yayiwahi nankashi, nsañu yayiwahi yaWanta waNzambi?
5. Mwatiyili ñahi chimwadizili katachi chalala chaMwizu daNzambi? (Talenu cheñi nyevulu.)
5 Toñojokenu chimwatiyili hampinji yimwadizili katachi chalala chaMwizu daNzambi. Mwelukili nenu Tata yenu wamwiwulu wayikeña, wakeñaña nindi mwiikali muchisaka chindi chawakakudifukula nawa wakana kumanisha kuyeña nimakabi. Mwelukili cheñi nenu munateli kwikala nakuchiñeja kwakumona antaña niamabwambu jenu afwa dehi chakayisañulawu mukaayi kakaha, nawa mwelukili niyuma yikwawu. (Maku 10:29, 30; Yow. 5:28, 29; Rom. 8:38, 39; Chim. 21:3, 4) Ichi chalala chejima chimwelukili chazañalesheli muchima wenu. (Luka 24:32) Mwakeñeli yuma yimwadizili, nawa mwafwilileña kulejaku antu ejima ichi chalala chalema!—Esekejenu Yeremiya 20:9.
Hampinji yitwelukili katachi nsañu yayiwahi, twafwilileña kulejaku antu ejima ichi chalala chalema! (Talenu paragilafu 5)
6. Yumanyi yimunadizili kuchuma chamwekeneni manakwetu Ernest namuhela Rose?
6 Talenu ichi chuma chamwekeni. Manakwetu wejina daErnest b wadiña nayaaka kwakwihi na 10 hampinji yafwiliwu atata yindi. Manakwetu Ernest wahosheli nindi: “Nadihwileña nami: ‘Anayi mwiwulu? Tahindi anafwi haya nyaaka?’ Nakomokeleña akwetu atwansi achidiña nawatata jawu.” Wayileña kakavulu kumajamu, nakufukama kwijamu dawatata yindi, nawa walombeleña nindi: “Eyi Nzambi, nalembi, inakukeña kwiluka kudi atata.” Kwakwihi nayaaka 17 yahitilihu kufuma hafwiliwu atata yindi, manakwetu Ernest amwihwili neyi wukwiteja kudiza Bayibolu, dichi washikeneni dakwiteja. Wazañaleli nankashi chelukiliyi nindi afu hiyeluka chuma hela chimuku, adi hohu neyi adi mutulu twatweni, nawa Bayibolu yakana nawu kumbidi kwakekala kusañuka. (Mukwa. 9:5, 10; Yilw. 24:15) Nkumininaku, wawanini ñakwilu jakeñeleña kwilukayi hadi yaaka yayivulu! Manakwetu Ernest watiyileña kuwaha nankashi chalala chamuBayibolu chadizileñayi. Ñodindi Rose, watachikili kudizila hamu nindi nawa niyena wakeñeli nsañu yaWanta yadizileñayi. Apapatisheweli mu 1978. Anazati nañovu kulejaku chisaka chawu, amabwambu jawu niantu amakwawu chalala chalema chadiziliwu. Chinafumimu, manakwetu Ernest namuhela Rose anakwashi antu kubadika 70 kumwiluka Yehova nikupapatishewa.
7. Chumanyi chamwekanaña neyi tukeña nankashi yuma yitunakudiza muBayibolu? (Luka 6:45)
7 Neyi tukeña nankashi chalala chamuBayibolu chitunadizi, twafwilaña kuleja antu ejima ichi chalala. (Tañenu Luka 6:45.) Twatiyaña neyi chatiyiliwu atumbanji twaYesu akusambila, ahosheli nawu: “Hitukutwesha kuleka kuhosha yuma yitunamoni nikutiyaku.” (Yilw. 4:20) Twakeña chalala chikupu chakwila twafwilaña kulejaku antu amavulu nankashi ichi chalala.
TWASHIMWINAÑA MULOÑA TWAKEÑA ANTU
8. Yumanyi yatusañumunaña kuleja antu nsañu yayiwahi? (Talenu chikasha chinakwila nawu “ Keñenu Antu, Ilishenu Atumbanji.”) (Talenu cheñi mwevulu.)
8 Twayikeña antu neyi chayikeñawu kudi Yehova niMwanindi. (Yish. 8:31; Yow. 3:16) Twatiyilaña wushona chikupu ‘antu abula kumwiluka Nzambi’ nawa abula kwikala ‘nakuchiñeja.’ (Efwe. 2:12) Muloña wakukala kuyanakuhitamu anakutiya neyi adi mwibuku dakunama, ilaña etu tukweti mwonji wakuyikokamu nachu, nsañu yayiwahi yaWanta waNzambi. Kukeña niwushona jitwayitiyilaña awa antu, jatusañumunaña kuzata hakumina ñovu jetu kuyileja nsañu yayiwahi. Iyi nsañu yalema yayikwashaña kwikala nakuchiñeja chikupu, kwikala namuzañalu nihayinu mpinji nikwikala nakukooleka kwakukuhwelela nawu ifuku dimu akadiluñisha “[wumi] walala, dikwila nawu wumi wahaya nyaaka, mukaayi kakaha kaWanta waNzambi.—1 Tim. 6:19.
Kukeña niwushona jitwayimwekeshelaña antu, jatusañumunaña kuzata hakumina ñovu jetu kulonda tuyishimwini nsañu yayiwahi (Talenu paragilafu 8)
9. Kusoñamishanyi kutwayilejaña antu kutalisha hayuma yikamwekana kumbidi? (Ezekeli 33:7, 8)
9 Kukeña kutwayikeña antu kwatusañumunaña cheñi kuyisoñamisha netu kukuma kwakanu kaayi katama kudi kwakwihi. (Tañenu Ezekeli 33:7, 8.) Twayitiyilaña wushona antuñi netu niantaña jetu abula kwitiya. Antu amavulu asha hohu maana hakwila yuma yakudiluñisha muchihandilu chawu chakadi kwiluka chuma chinakwinza—“lukadi lwasweja lwakwila kanda lwikaleñaku dehi kufuma hatachikiliyi Nzambi kuleña yuma kushika nikulelu nawa hilwamba kekalaku cheñiku.” (Mat. 24:21) Tunakukeña kuyikwasha kwiluka yuma yakamwekana hayina mpinji yawunsompeshi—kudifukula kwakutwamba akakufumishahu, kuhiñahu kaayi katama kejima akakikisañana haAmagedoni. (Chim. 16:14, 16; 17:16, 17; 19:11, 19, 20) Tunakulomba netu antu amavulu nankashi atiyi iku kusoñamisha kulonda adibombi nanetu chayinu mpinji mukudifukula kwalala. Hanu dinu, chumanyi chikayimwekena antu akaanaña kutiyilila kuniku kusoñamisha chayinu mpinji, kushilahu niantaña jetu itwakeña?
10. Muloñadi wutwatela kunyakela chikupu kutwalekahu kusoñamisha antu chayinu mpinji?
10 Neyi chalumbulwiliwu muchibaaba chinafumihu, hadaha nkeñelu yaYehova yidi yakwila nindi akamwini antu akabalumuka munyichima chamonawu kujilumuka kwaBabiloni Muneni. Neyi dichakekala yuma, dikwila nawu ayinu diyi mpinji yitwatela kunyakala chikupu kutwalekahu kusoñamisha antu. Ilukenu chumichi: Yuma yitwayilejaña chayinu mpinji yinateli kuyikwasha kumbidi kwanuka. (Esekejenu Ezekeli 33:33.) Hadaha akanuka kusoñamisha kutwayisoñamishili nawa chumichi chakayisañumuna kudibomba nanetu mukudifukula kwalala henohu kuchidi mpinji. Kufwana mukakuhemba kaleya wamuFwilipi wabalumukili mumuchima hanyima yakumona “mutentanshi weneni” wenjili, hadaha amakwawu anakukaana kubalumuka chayinu mpinji akabalumuka mumuchima hanyima yakujilumuka kwaBabiloni Muneni kwakanyinkesha kaayi—Yilw. 16:25-34.
TWASHIMWINAÑA MULOÑA TWAMUKEÑA YEHOVA NIIJINA DINDI
11. Twamwinkaña ñahi Yehova kulema, kalemesha niñovu? (Chimwekeshu 4:11) (Talenu cheñi nyevulu.)
11 Chuma chacheni chalema nankashi chaleteshaña tushimwineña nsañu yayiwahi hikumukeña Yehova Nzambi niijina dindi dajila. Twamonaña mudimu wetu wakushimwina netu hinjila yakumushimekelamu Nzambi yetu itwakeña. (Tañenu Chimwekeshu 4:11.) Twetejaña namuchima wejima netu: Yehova Nzambi watelela kutambwila kulema, kalemesha niñovu kudi akakudifukula indi ashinshika. Twamwinkaña kulema nikalemesha neyi tukwasha antu kukuhwelela wunsahu walala wakwila nawu diyi “waleñeli yuma yejima” nawa twahandaña muloña diyi watwinka wumi. Twamwinkaña Yehova ñovu jetu neyi tuzatisha mpinji yetu, ñovu jetu niyuma yitukweti kulonda tuzati mudimu wakushimwina kwesekeja nachidi yuma muchihandilu chetu. (Mat. 6:33; Luka 13:24; Kol. 3:23) Twelaña mwenimu muloña twatiyaña kuwaha kuhosha hadi Nzambi itwakeña. Twatiyaña cheñi kuwaha kuleja antu ijina dindi nimudatalisha. Muloñadi?
Twamwinkaña Yehova ñovu jetu neyi tuzatisha mpinji yetu, ñovu jetu niyuma yitukweti kulonda tuzati mumudimu wakushimwina kwesekeja nachidi yuma muchihandilu chetu (Talenu paragilafu 11)
12. Twajilikaña ñahi ijina daYehova mumudimu wetu wakushimwina?
12 Kukeña kutwamukeña Yehova kwatuleteshaña kujilika ijina dindi. (Mat. 6:9) Twakeñaña kuzata mudimu wakutookesha ijina dindi kukasawuntu kaletayi Satana hanidi ijina kuhitila mumakudi indi atama. (Kutach. 3:1-5; Yoba 2:4; Yow. 8:44) Mumudimu wetu wakushimwina, twafwilaña kuhakwilaku Nzambi yetu, twalejaña antu ejima atiyililaña chalala kutalisha hadi yena. Twakeñaña muntu wejima eluki nindi chilwilu chaNzambi chabadika hikukeña, njila yayuulilañamu yayiwahi nawa yaloña, nawa eluki nindi Wanta windi katataka wumanishi makabi ejima nakuletela antu kuwunda nimuzañalu. (Mas. 37:10, 11, 29; 1 Yow. 4:8) Neyi tuhakwilaku ijina daYehova mumudimu wetu wakushimwina, tunakujilika ijina dindi. Nawa twazañalalaña cheñi hakwiluka netu tunakuhanda kwesekeja nejina ditukweti. Munjilanyi?
13. Muloñadi wutwatiyilaña kuwaha kututena nawu aYinsahu jaYehova? (Isaya 43:10-12)
13 Yehova watutena nindi tudi “ayinsahu” jindi. (Tañenu Isaya 43:10-12.) Yaaka yayivulu yinahitihu, mukanda wafumini Kwizanvu Dalombolaña wahosheli nawu: “Kalemesha kabadika katela kudiluñishayi muntu-himuntu hakachi ketu hikumutena nawu Chinsahu chaYehova.” c Muloñadi? Talenu ichi chakutalilahu. Neyi munakukeña muntu wukuyimenaku hamu neyi chinsahu muchota chanyiloña, mukutonda muntu imweluka nawa imwakuhwelela, wukweti ijina dadiwahi dikuletesha nsañu yikushimunayi ayikuhweleli. Muloña wakututonda kwikala aYinsahu jindi, Yehova wamwekeshaña nindi watwiluka chachiwahi nawa watukuhwelela kumuhakwilaku netu diyi Nzambi walala hohu. Twatiyaña netu watulemesha nankashi hakwikala aYinsahu jindi chakwila twazatishaña mpinji yejima yitukweti kuleja antu ijina dindi nikumwekesha hatooka netu yuma yejima yatama yahoshañawu hadi yena yakutwamba. Kuhitila mukwila mwenimu, twahandaña kwesekeja nejina ditwatiyaña kuwaha kwikala nadu, dakwila nawu aYinsahu jaYehova!—Mas. 83:18; Rom. 10:13-15.
TUKUTWALEKAHU KUSHIMWINA KUSHIKA NIKUNSA
14. Yumanyi yayiwahi yitwatalilaña kumbidi?
14 Yenoyu yuma yayiwahi yitwatalilaña kumbidi! Nawukwashu waYehova, tunakuhweleli kumona antu amavulu kwiteja chalala henohu lukadi lwasweja kanda lutachiki. Tunazañalali cheñi hakwiluka netu nihampinji yakala nankashi muchihandilu chawantu, mpinji yalukadi lwasweja, hadaha twakamona cheñi antu amavulu nankashi akafuma mukaayi kaSatana kakajilumunawu nakudibomba nanetu nakumushimeka Yehova!—Yilw. 13:48.
15-16. Chumanyi chitukutwalekahu kwila, nawa kushika mpinjinyi?
15 Chayinu mpinji tukweti mudimu wutwatela kuzata. Tukweti kukooleka kwakuzata mudimu wakushimwina wutwakabula kuzatahu cheñi, kushimwina nsañu yayiwahi yaWanta waNzambi mwahita iseki dejima. Hampinji yoyimu, twatela kutwalekahu kusoñamisha antu. Antu atela kwiluka nawu kukuma kwanshakaminu yamakonu yatama kunakunyakala kwinza. Dichi neyi ayina mpinji yawunsompeshi yinashiki dehi, akeluka nawu nsañu yitwashimwinineña yafumini kudi Yehova Nzambi.—Ezek. 38:23.
16 Hanu dinu, chumanyi chitwatela kufwilaña kwila? Muloña wakutusañumuna kudi kukeña— kukeña kwakukeña nsañu yayiwahi, kukeña kwakukeña antu nawa chasweja kubadika, kukeña kwakumukeña Yehova Nzambi niijina dindi— tukutwalekahu kushimwina namuchima wakufwila chikupu, mukunyakashana nineyena sampu Yehova nahoshi nindi, “Kunahu!”
KAMINA 54 “Iyi Diyi Njila”
a Kubulakana kwahachaaka kwadiñaku haOctober 7, 2023, mwitala dakupompela kupompa kwañinza dawaYinsahu jaYehova muNew York, U.S.A. Nkumininaku, progiramu yejima ayidishili muJw Broadcasting®—Chibalu chatachi muNovember 2023 nawa Chibalu chamuchiyedi muJanuary 2024.
b Talenu chibaaba chinakwila nawu “Baibolo Ilaalula Abantu—Nalitemenwe Sana pa Kusanga Ifyasuko Muli Baibolo” chedishiliwu muKaposhi Kakutalila, kaCibemba, February 1, 2015.
c Talenu 2007 Yearbook of Jehovah’s Witnesses, ifu 3.