MU 1935, atata nawa mama—aJames nawaJessie Sinclair—abukilili kuBronx, tawuni yekala muNew York City. Adiwanini naWillie Sneddon, wabukili kufuma kuScotland. Chadibulakeniwu wusatu wawu, atachikili kuhanjeka hayisaka yawu. Haniyi mpinji nadiña kanda nisemuki.

A mama ayilejeli aWillie nawu, henohu Njita Yeneni kanda, atata yawu niayaya awamama awamayala ajiyili chelili watu wuhumi mubomu yatiliwu mukaluñalwiji kaNorth Sea. A Willie ahosheli nawu, “Atata yeyi adi mukaluña!” A Willie adiña hiyaChinsahu chaYehova nawa awa mazu diwaletesheli amama atachiki kudiza chalala chamuBayibolu hela chakwila awa mazu ayitishili kutama.

Mazu ahosheliwu aWillie ahilishili amama muloña elukili nawu atata yawu akoñeleña wanyi nshidi. Ilaña aWillie enhwili nawu, “Mukutiya ñahi neyi niyileja nami Yesu wayili mukaluña?” Amama anukili yuma yatañileñawu kuchechi, yahosheleña nawu Yesu wayili mukaluña nawa hefuku damuchisatu amusañwili. Dichi atoñojokeli nawu, ‘Neyi helu hiluña dakesi mwayandishilañawu antu atama, muloñadi Yesu chayililimu?’ Dihatachikiliwu amama kudiza chalala. Atachikili kupompa muChipompelu chadiña kuBronx nawa apapatisheweli mu 1940.

Hayina mpinji, anvwali akaKristu ayilejeli wanyi nawu adizisheña anyanawu. Hinadiña nakukayila, neyi amama anayi nakupompa ninakushimwina kunsa yamulungu nashalileña nawatata. Chimwahitili yaaka yantesha, ami nawatata twatachikili kuya nakupompa hamu nawamama. Adiña nakushimwina nankashi nsañu yayiwahi nikulombola atudizi aBayibolu. Mpinji yimu, apompesheli atudizi awu hamu nakuyidizisha muloña wejima wawu ashakamineña mukamwihi. Nayileña nakushimwina nawu neyi tunashinki shikola. Kuya nawu nakushimwina, kwankwashili kwiluka yuma yayivulu muBayibolu nawa nelukili chakudizisha antu.

Chawushona, hinadiña kansi nakeñeli wanyi chalala. Hinakeñeli kudiza chalalaku. Hela chochu, chinashikijili yaaka 12, nekalili  mukwakushimwina waWanta nawa natachikili kushimwina chikupu. Chinashikijili yaaka 16, nadihanini kudi Yehova, nawa napapatisheweli muJuly 24, 1954, hakupompa kweluña muToronto, kuCanada.

Amanakwetu amakwawu muchipompelu munadiña, adiña nakuzatila haBeteli amakwawu adiña azatilahu dehi. Ankwashili chikupu. Chahosheleñawu nichalumbulwileñawu chalala chamuBayibolu chantiyishileña kuwaha. Hela chakwila antañishi yami akeñeleña nawu niyi kuyunivesiti, ilaña ami nafwilileña kuya nakukalakela haBeteli. Dichi, hakokuna kupompa kweluña muToronto nasonekeli fomu yakuzatila haBeteli. Nasonekeli cheñi yikwawu mu1955 hakupompa kweneni kwadiñaku muYankee Stadium, kuNew York City. Hashimbwili wanyi, chinashikijili yaaka 17 natambwilili mukanda wakuntambika kuya nakuzatila haBeteli kuBrooklyn muSeptember 19, 1955. Ifuku damuchiyedi haBeteli, natachikili kuzatila Kwakukasila nyikanda ku 117 Adams Street. Hashimbwili wanyi, natachikili kuzatila hekina dapompesheleña yipapilu, dadiña nakupompesha mafu 32 amukanda kulonda ayikasi nakuyitwala nakuyichimisha nekina dachimaña nyikanda.

Chinazatili kuDipatimenti yaKukasa nyikanda hadi kakweji kamu, anhimpili kuya nakuzatila kuDipatiment yaMagazini muloña nelukili kutayipa. Kunyima, amanakwetu niahela atayipileña makeyala awantu asonekesheleña Kaposhi Kakutalila naLoleni! Chimwahitili tukweji twantesha, natachikili kuzatila kuDipatimenti Yatwalaña Nyikanda. Klaus Jensen, mukulumpi waniku kudipatimenti wañilili nindi, niyi nañendeshi nakutwala nyikanda kwemenaña mbopolu. Twasendeli cheñi masaka amagazini itwatwalileña kuposti ofesi kulonda ayitemeshi muyipompelu yamuUnited States. Manakwetu  Jensen wanlejeli nindi iwu mudimu wawuwahi wukunkwasha kwikala wakola kumujimba. Nadiña namujimba wanyanya nawa nadiña nama kg 57. Kutwala nyikanda kwemenaña mbopolu nikuposti ofesi kwankwashili kwikala nañovu. Manakwetu Jensen welukili nindi iwu mudimu wanteleleli chikupu!

Dipatimenti yaMagazini yatemesheleña nyikanda yasonekesheleñawu muyipompelu. Nelukili namba yamadimi apulinteleña magazini etu muBrooklyn atemesheleñawu mukaayi. Madimi amakwawu kanda niyitiyeñahu dehi ilaña nadiña namuzañalu kwiluka nami magazini amavulu ayitemesheleña mumatuña akwakulehi. Nadiña nakukooleka kwakwendela awa matuña muyaaka yalondelelihu hela chakwila nelukili wanyi nami nakayendela.

Mu 1961, nayili kudipatimenti yamali. Manakwetu Grant Suiter diyi wadiña mukulumpi kuniyi dipatimenti. Chimwahitili yaaka, antambikili kudi Manakwetu Nathan Knorr, wadiña nakulombola hayina mpinji mukaayi kejima. Wanlejeli nindi manakwetu wumu wadiña nakuzatila mukasanji kindi wayileña kuShikola yaMudimu waWanta. Nawa neyi nafumi dehi kushikola wakatachika kuzatila kuDipatimenti yaMudimu. Anyinkeli mudimu wazatileñayi nawa twazatileleña hamu naDon Adams. Chakadi nikwiluka, manakwetu Don diyi watambwilili fomu yami yakuntambikilahu haBeteli yinasonekeli hakupompa kweluña mu 1955. Wadiña nakuzatila hamu nawamanakwetu ayedi aRobert Wallen niCharles Molohan. Wejima wetu awaana twazatilili hamu hadi yaaka 50. Natiyili kuwaha  kukalakela hamu nanawa amanakwetu ashinshika!—Mas. 133:1.

Mu 1970, anyinkeli mudimu wakwendela tusanji twanyitayi twawa Watch Tower Society nyilungu yantesha muchaaka hela muyaaka yiyedi. Muniwu mudimu mwadiña nikwendela yisaka yaBeteli niamishonali mukaayi kejima, kuyikolesha kuspiritu nikutala kasanji kamutayi chikanakuzata. Natiyili muzañalu kubulakana antu adizili maShikola akusambila aGileyadi nawa anatwalekihu kwikala ashinshika hela chakwila adiña nakuzatila kumatuña acheñi. Nendeleli matuña kubadika 90 mumudimu wakwendela tusanji twanyitayi.

Antu ejima amuchisaka chaBeteli kuBrooklyn ayileña nakupompa muyipompelu yamuNew York City. Ami nayileña nakupompela kuchipompelu chadiña kuBronx. Chipompelu chadiña munidi iluña chatoheli nawa achambwili hayedi. Chatachi achiteneneña nawu Upper Bronx, nawa dimunapompeleleña.

Mu 1965, chisaka chawa Latvian chekalili aYinsahu muchipompelu chaBronx chayili nakuzatila munidi iluña mwadiña ichi chipompelu. Livija, mwanawu wamumbanda wamukulumpi, chamanishiliyi shikola wekalili payiniya. Chimwahitili tukweji twantesha, wayili nakuzatila kuMassachusetts kwadiña kukankila kwawakwakushimwina aWanta. Natachikili kumusonekela nyikanda nakumwihula kutalisha hachipompelu, yena wakwileña nakunleja chinakwenda mudimu wakushimwina muBoston.

Chimwahitili tukweji twantesha, Livija amutondeli kwikala payiniya wadimena. Wakeñeleña kuzata nankashi mudimu waYehova, dichi wasonekeli fomu yakuzatila haBeteli nawa amutambikili mu 1971. Chamwekeni neyi Yehova diyi wamutambikili! Mu 1973 haOctober 27, twadisumbwili nawa Manakwetu Knorr diyi wahanini mpanji. Yishimu 18:22 yahosha nawu: “Yowu wukuwana mumbanda nawani chuma chachiwahi, namoni dehi wuselewa wakudi Yehova.” Ami naLivija tunakalakeli hamu muBeteli yaaka kubadika 40. Nawa tunakutwalekahu kukwasha chipompelu chamu Bronx.

Twatiyili kuwaha kuzatila hamu naManakwetu Knorr. Wadiña nakudikita chikupu muchalala nawa wahamekeleña nankashi amishonali mukaayi kejima. Amavulu diwu adiña aYinsahu atachi mumatuña mwayitemesheliwu. Natiyili kutama hakumona Manakwetu Knorr nakukata kansa mu 1976. Mpinji yimu, chamukamikiliwu mukadidi, wanlejeli nindi nimutañileña nyikanda yatwalileña nakupulintawu. Wanlejeli cheñi nindi nimutambiki Frederick Franz kulonda niyena yatiyeña chinikutañaña. Nawanini kwila nami chineli Manakwetu Franz wamweneña chiwahi wanyi, Manakwetu Knorr wadiña nakumutañila nyikanda.

Manakwetu Knorr wafwili mu 1977, ilaña antu amwilukili niamukeñeli akundejeweli  muloña wamanishili chihandilu chindi chahamaseki nakashinshi. (Chim. 2:10) Kuhiñahu, Manakwetu Franz watachikili kulombola mudimu wetu.

Hayina mpinji, nadiña nsoneki yaMilton Henschel, wakalakeleli naManakwetu Knorr hadi yaaka yayivulu. Manakwetu Henschel wanlejeli nindi mudimu wunukuzataña haBeteli wukwikala wakukwasha Manakwetu Franz wakeñekeleña wakumukwasha. Nadiña nakumutañila nyikanda yejima henohu kanda ayipulinti. Manakwetu Franz wadiña nakashinshi kakwanuka yuma nikutiyilila nsañu yejima yinatañileña. Natiyili kuwaha kumukwasha muniyi njila kushika nimpinji yamanishiliyi chihandilu chindi hamaseki muDecember 1992!

Yaaka 61 yinakalakeli haBeteli yinendi swayi. Anvwali jami ejima afwili ashinshika nawa inakutalila mpinji yinakayitambwila mwituña dadiha. (Yow. 5:28, 29) Kwosi chuma chidi chejima chamukanu kaayi chinateli kwesekana nakumuzatila Nzambi hamu nawamayala niambanda ashinshika mukaayi kejima. Ami naLivija hampinji yitunakalakali mumudimu wampinji yejima tunamoni “muzañalu waYehova” chiwunekali ñovu yetu.—Neh. 8:10.

Kwosi muntu wabadika akwawu mukuloñesha kwaYehova, nawa mudimu wakushimwina nsañu yachalala chaWanta anakutwalekahu kuwutandisha. Kwadiña hikukooleka kweneni kuzatila hamu nawamanakwetu niahela akola nawa ashinshika hadi yaaka yayivulu. Awayishewa amavulu inazati nawu aya dehi. Ilaña inakusakilila hakukalakala nakashinshi hamu nanawantu ashinshika mumudimu waYehova.