“Mazu aNzambi. . .Akweti Ñovu Chikupu”
“Mazu aNzambi amomi nawa akweti ñovu chikupu.”—HEB. 4:12.
TUMINA: 114, 113
1. Muloñadi chitukuhoshela netu Mazu aNzambi akweti ñovu chikupu? (Talenu mwevulu wakutachikilahu.)
ETU antu jaYehova tweluka chikupu netu mazu aNzambi, “amomi nawa akweti ñovu chikupu.” (Heb. 4:12) Etu amavulu tunadimweni Bayibolu chiyinakwashi antu amavulu kuhimpa yihihandilu yawu. Amanakwetu niahela amakwawu adiña amakombi, ateñuka nayitumbu yashetana hela ayivumbi. Amakwawu adiluñishileña yuma yamukanu kaayi ilaña amweneña nawu kudi chuma chabulileña kwilawu. (Mukwa. 2:3-11) Mukuhita kwampinji, antu abulili kuchiñeja, chayinu mpinji akweti kuchiñeja muloña Bayibolu yayikwashili. Chakadi nikujina, mwatañahu dehi nsañu yayivulu hadi antu abalumukili muchibaaaba yamuKaposhi Kakutalila yahoshaña nawu “Bayibolu yahimpaña Yihandilu Yawantu.” Nawa munamoni nenu Bayibolu yinakwashi akwaKristu kutwalekahu kupaminaku kuspiritu nihanyima yakwiluka chalala.
2. Izu daNzambi dakwashili ñahi antu adiñaku mumafuku awapostolu?
2 Komana twatela kuhayama hakumona antu amavulu makonu anakuhimpa yihandilu yawu chinakudizawu Izu daNzambi? Inehi! Yumiyi yatwanukishaña chahimpiliwu amanakwetu niahela 1 Akorinda 6:9-11.) Hanyima yakutena antu akabula kuswana Wanta waNzambi, kapostolu Pawulu wabombelelihu nindi: “Enu amakwawu dichi chimwadiña.” Ilaña Nsona nispiritu yaNzambi yajila yayikwashili kuhimpa. Nihanyima yakwiteja chalala, amakwawu atwalekelihu kwila yuma yatama. Bayibolu yashimuna mukwaKristu wawayishewa wadiñaku mumafuku awapostolu ahañiliwu muchipompelu nawa afuntishiliwu cheñi. (1 Kor. 5:1-5; 2 Kor. 2:5-8) Neyi tunakutaña nsañu yawakwetu akakwitiya amanishili kukala kwawu nawukwashu Wezu daNzambi, twakoleshewaña wanyi?
amumafuku awapostolu adiña nakuchiñeja kwakuya mwiwulu. (Tañenu3. Tukuhanjekadi muchinu chibaaba?
3 Chineli Izu daNzambi dikweti ñovu chikupu nawa watwinkadu, twatela tudizatisheña mpinji yejima. (2 Tim. 2:15) Muchimu chibaaba tukudiza chitunateli kuzatisha Izu daNzambi (1) muchihandilu chetu, (2) neyi tunakushimwina nawa (3) neyi tunakutañisha kuchinañamu. Yumiyi yikutukwasha kumukeña nikumusakilila Tata yetu wamwiwulu wukweti kukeña, watulejaña yuma yinateli kutukwasha.—Isa. 48:17.
MUCHIHANDILU CHETU
4. (a) Chumanyi chitwatela kwila hakwila nawu Izu daNzambi ditukwashi?(b) Mwekalaña ñahi nampinji yakutaña Bayibolu?
4 Hakwila nawu Izu daNzambi ditukwashi, twatela kuditaña mpinji yejima, neyi chinatwesheki tuyitañeña hefuku-hefuku. (Yosh. 1:8) Hela chochu, etu amavulu twekala nanyidimu yayivulu. Ilaña, bayi twiteja chuma chidi chejima hela nyidimu yitukañeshi kutaña Bayiboluku. (Tañenu Aefwesesa 5:15, 16.) Antu jaYehova amavulu ekala nampinji yakutaña Bayibolu mpinji yejima, amakwawu atañaña nantetemena, amakwawu namwaana nawa amakwawu namelela. Atiyaña neyi chatiyiliyi ñimbi yamasamu wasonekeli nindi: “Nshimbi jeyi o chinajikeña! Najitoñojokaña mwaana wejima.”—Mas. 119:97.
5, 6. (a) Kutoñojokahu chikupu kwalemenadi? (b) Chumanyi chinateli kutukwasha kutoñojokahu chikupu? (c) Kutaña Izu daNzambi nikutoñojokahu chikupu kunayikwashi ñahi enu?
5 Bayi tukumina dakutaña Bayibolu hohuku, ilaña twatela kutoñojokahu chikupu hansañu yitunakutaña. (Mas. 1:1-3) Neyi twila mwenimu tukuzatishaña maana ekalamu muchihandilu chetu. Neyi tunakutaña Bayibolu yakupulinta ahela hachozelu, twatela kuzatisha nsañu yitunakutaña.
6 Chumanyi chinateli kutukwasha kutoñojokahu chikupu? Amakwawu ahudikilaña hakapinji kanti neyi anakutaña Nsona nawa adihulaña malwihu adi neyi: Iyi nsañu yinakundizishadi hadi Yehova? Munjilanyi munazatishilaña ichi chishina 2 Kor. 10:4, 5.
chinatañi Mwizu daNzambi? Hadihu hinatela kuzatila? Kutoñojokahu chikupu Hezu daNzambi, chikutukwasha kuzatisha kufumba kudimu. Mwamweni, yinateli kutukwasha chikupu muchihandilu chetu.—MUMUDIMU WAKUSHIMWINA
7. Twatela kuzatisha ñahi Izu daNzambi chiwahi mumudimu wetu wakushimwina?
7 Chumanyi chinateli kutukwasha kuzatisha chiwahi Izu daNzambi mumudimu wakushimwina? Chatachi twatela kudizatisha nankashi neyi tunakushimwina hela tunakutañisha. Manakwetu wumu wahosheli nindi, “Neyi munakushimwina hamu naYehova kwitala nikwitala, komana yenu mukuhoshaña hohu tahindi mukumwiteja yena kuhosha?” Watalishili mukwila nindi: Neyi tunakutaña Mwizu daNzambi hakushimwina, dikwila nawu tunakumwiteja Yehova kuhosha namwini itala. Neyi tutonda nsona yayiwahi, yinateli kumushika muntu hamuchima kubadika mazu itunateli kuhosha. (1 Tes. 2:13) Dihulenu nenu, ‘Komana natañaña Izu daNzambi neyi inakushimwina nsañu yayiwahi kudi antu?’
8. Muloñadi chitwatela kubula kukumina dakuyitañila hohu nsona antu itunakushimwina?
8 Hela chochu, kudi yuma yayivulu yitwatela kwila kubadika kuyitañila hohu antu itukushimwina Bayibolu. Muloñadi? Muloña antu amavulu elukisha wanyi Bayibolu nawa ayitiyishishaña wanyi. Mumafuku awapostolu antu atiyishishileña wanyi nsona, nimakonu chochimu. (Rom. 10:2) Dichi, bayi tutoñojoka netu muntu wukutiyishisha chikuma chidi munsona neyi tumutañilayi hohuku. Twatela kwikala nampinji yakutaña kulonda twiluki chikuma chidi muvasi nikulumbulula muchinatalishi. Hadaha munateli kutaña cheñi chikuma chidi muvasi. Neyi tukwila mwenimu, nsañu yidi Mwizu daNzambi yinateli kushika antu itunakushimwina hanyichima.—Tañenu Luka 24:32.
9. Neyi tunakutaña nsona, twatela kuhosha munjilanyi yikuletesha antu alemeshi Bayibolu? Shimunenu chakutalilahu.
9 Neyi tunakutaña nsona, twatela kuhosha mazu akuletesha antu alemeshi Bayibolu. Chakutalilahu, tunateli kuhosha netu, “Tutalenu Nleñi yetu chahoshayi haniyi nsañu.” Neyi tunakuhanajeka namuntu wabula kwikala mukwaKristu, tunateli kuhosha netu, “Talenu chahosha Nsona Jajila.” Hela neyi tunakushimwina muntu wabula kwitiya tunateli kumwihula netu, “Mwatiyahu dehi ichi chishimu chakunyaaka?” Twatela kushinshika yuma yakuhwelelayi muntu nakutachika kumushimwina munjila yayiwahi.—1 Kor. 9:22, 23.
10. (a) Shimunenu chuma chamumwekeneni manakwetu wumu. (b) Yumanyi yinayikwashi kwiluka nenu Izu daNzambi dikweti ñovu chikupu mumudimu wakushimwina?
10 Akwakushimwina amavulu awana nawu kuzatisha Izu daNzambi kunakwashi antu ashimwinañawu mwiha. Chakutalilahu. Manakwetu wumu wayili kudi mukulumpi watañili magazini etu hadi yaaka yayivulu. Wamwinkeli Kaposhi Kakutalila kakaha nawa wamutañilili nsona yadiña muniyi magazini. Watañili 2 Akorinda 1:3, 4, yahosha nawu: “Tata wasweja luwi nawa Nzambi wakukundeja kwejima . . . watukundejaña mukweseka kwejima kutwamonaña.” Mwiniitala chatiyiliyi awa mazu walejeli manakwetu yamutañili cheñi. Iwu iyala wamulejeli manakwetu nindi yena niñodindi aneñeli nawa akeñeleña wakuyikundeja nawa haniyi mpinji wakeñeli kudiza Bayibolu. Komana himukwiteja nenu Mazu aNzambi akweti ñovu chikupu mumudimu wetu wakushimwinaku?—Yilw. 19:20.
NEYI TUNAKUTAÑISHA KUCHINAÑAMU
11. Amanakwetu atañishaña kuchinañamu akweti mudimwinyi?
11 Wejima wetu twatiyaña kuwaha kuya kukupompa kwachipompelu, kwañinza nikweluña. Neyi tunayi nakupompa, twayaña nakudikufula kudi Yehova. Dikutwatambwilaña cheñi nshimbi yatukwashaña. Amanakwetu ahanaña mpanji kuchinañamu hanikupompa ekalaña nakukooleka kweneni. Ilaña atela kwiluka nawu adi namudimu weneni. (Yak. 3:1) Atela kwiluka nawu mpinji yejima yinakutañishawu atela kutañisha yuma yashindamena Hezu daNzambi. Neyi anayinki mudimu wakutañisha kuchinañamu, munateli kuzatisha ñahi ñovu yaMazu aNzambi neyi munakutañisha.
12. Nhoshi nateli kumwekesha ñahi nindi mpanji yindi yinashindameni haNsona?
12 Zatishenuña Nsona yidi mumpanji hampinji yimunakutañisha. (Yow. 7:16) Chumichi chabombelamu yumanyi? Chuma chatachi, bayi muzatisha yakutalilahu, hela haninu yenu yileteshi antu abuli kutiya nsañu yidi muvasi yamuBayibolu yimunazatishiku. Cheñi, mwatela kwiluka nenu kutaña nsona kunambuki nakutañisha nsañu yamuBayibolu. Nawa, kuzatisha nsona jajivulu kukuletesha antu abuli kutiya nsañu yimunakuhosha nawa hiyikuyishika hamuchimaku. Dichi, tondenu chiwahi nsona hanashindameni yikuma, nawa yitañenu, yilumbululenu nawa yizatishenu chiwahi. (Nehe. 8:8) Neyi munakuzatisha awutilayini yasonekawu kudi kuloñesha kwetu, hitulukenu munsona jejima jidi muawutilayini. Ilukenu nsañu yidi muawutulayini yenu chiyinakwatankani nansona jidimu. Kuhiñahu, zatishenu jinsona kulonda mushimuni yikuma yidi muawutilayini. (Munateli kuwana njila yikuyikwasha kuhana chiwahi mpanji mumukanda waNonkelenimo mu Masambililo ya Isukulu lya Butumikishi Ilya Bulesa hakudiza 21 kushika ku 23.) Sweje-e dinu, mulombenu Yehova yayikwashi kulumbulula chiwahi nsañu yidi Mwizu dindi.—Tañenu Ezera 7:10; Yishimu 3:13, 14.
13. (a) Muhela wumu watiyili ñahi chazatishiliwu chiwahi nsona hakupompa kwawakwaKristu? (b) Munahetelimu ñahi muNsona jatañishiliwu hakupompa kwetu?
13 Muhela wumu kuAustralia watiyili kuwaha chazatishiliwu jinsona hakupompa kwawakwaKristu. Hela chakwila wamweni kukala kuwansi windi, wetejeliyi nsañu yamuBayibolu nawa wadihanini kudi Yehova. Hela chochu, chamukalilili kwiteja nindi Yehova wamukeña. Mukuhita kwampinji, welukili chikupu nindi Nzambi wamukeña. Chumanyi chamuletesheli yakuhweleli chumichi? Wahimpili chelili yatoñojokihu chikupu hansona yazatishiliwu hakupompa kwetu nawa wayesekejeli namavasi makwawu amuBayibolu. * Komana ninenu mwatiyahu dehi kuwaha chalumbulwiliwu Mazu aNzambi hakupompa kwachipompelu, kweluña nikwañinza?—Nehe. 8:12.
14. Tunateli kumwekesha ñahi kusakilila Hezu daYehova?
14 Komana twamusakililaña wanyi Yehova chatwinkayi Izu dindi, Bayibolu? Bayi neyi wayinkeliyi hohu antuku ilaña watushiika nindi yikatwalekahu. (1 Pet. 1:24, 25) Mwamweni, twatela kutañaña Izu daNzambi mpinji yejima, kudizatishaña muchihandilu chetu, nikukwasha nachu antu amakwawu. Neyi tukwila mwenimu, tukumwekesha netu twakeña nawa twasakilaña ichi chawaana sweje-e dinu Nsoneki, Yehova Nzambi.
^ para. 13 Talenu chikasha chinakwila nawu “ Nahimpili.”