1, 2. (a) Antu amakwawu ahoshaña nawudi kutalisha hakuloñesha kwaNzambi? (b) Yumanyi yitukuhanjeka muchinu chibaaba?

KOMANA Nzambi wukweti kuloñesha? Antu amakwawu ahoshaña nawu, “Himwatela kwikala nakuloñesha kwatela kuyilombolaku. Mwatela kwikala hohu nawubwambu naNzambi.” Komana yitoñojoka yamuchidiwu yaloña? Indi nsañu yalala yamwekeshaña nawudi?

² Muchinu chibaaba, tukuhanjeka wunsahu wamwekeshaña Yehova, Nzambi wabulaña kuluwañesha chekalayi Nloñeshi wabadika. Tukushinshika cheñi chitunateli kwila nawunlomboli wutwatabwilaña mukuloñesha kwaYehova. (1 Kor. 14:33, 40) Kufuma tuhu mpinji yawapostolu nakushika nimakonu, Nsona jinakwashi kuloñesha kwaYehova kwahamaseki kuzata nañovu mumudimu wakushimwina nsañu yayiwahi. Twekalaña atooka, awunda nawa anuñañana muchipompelu muloña twelaña yuma yamuBayibolu nawa twalondelaña kufumba kwamukuloñesha.

3. Yumanyi yinaleteshi mukuhweleli nenu Yehova diyi Nloñeshi wabadika?

³ Yileñaleña yamwekesha nawu Nzambi hiNloñeshi wabadika. Bayibolu yahosha nawu, “Maana wowu ashimatishili nachu Yehova iseki, kashinshi kokakolesheliyi nachu mawulu.” (Yish. 3:19) Tweluka “yuma yakumpumpu yanjila [jaNzambi] hohu,” nawa “twamutiyaña kashawushawu kanti hohu.” (Yoba 26:14) Hela chochu, nsañu yantesha yitweluka hamapulaneti, tutumbwa ninyilalanji yatuleñelaña kwiluka netu yumiyi ayiloñesha chachiwahi chikupu. (Mas. 8:3, 4) Munyilalanji mwekala tutumbwa twatuvulu nankashi nawa twendaña chachiwahi chakadi kudihuma. Mapulaneti anyeñukukaña itena chovu-chovu neyi kwijila anakulondela nshimbi jahamukwakwa. Mwamweni, iyi yuma yamwiwulu chiyendaña chiwahi yatukwashaña kwiluka nawu, twatela kumushimeka, kumwovwahila nikudifukula kudi Yehova ‘waleñeli mawulu nimaseki namaana indi’.—Mas. 136:1, 5-9.

4. Muloñadi sayansi chiyakañenya kwakula malwihu amavulu?

⁴ Sayansi yashimuna yuma yayivulu yamwiwulu niyahamaseki nawa yinatukwashiku muyuma yayivulu muchihandilu. Ilaña kuchidi malwihu amavulu anakañanyiwu kwakulawu kudi sayansi. Chakutalilahu, antu eluka jatutumba hiyakutwesha kutuleja chikupu yileñaleña yejima chiyatachikili kwikalaku hela chitwekalila hanu haMaseki hekala yuma yayivulu yikweti wumi. Cheñi, antu hiyakutwesha kulumbulula chuma chaletesha antu akeñeña kuhanda haya nyaakaku. (Mukwa. 3:11.) Muloñadi chikunekalili malwihu amavulu alema akubula kwakula? Muloña asayantisti amavulu niantu amakwawu atoñojokaña yuma yatama nawa ahoshaña nawu yuma yadinjilili yayeni. Ilaña Yehova wazatishaña Mukanda windi kwakula malwihu ehulañawu antu ejima.

5. Munjilanyi mutwashindamena hanshimbi jakundama kuyileñaleña?

⁵ Yuma yejima yitwelaña yashindamena hanshimbi jashaku Yehova kutalisha kuyileñaleña. Akwamalayiti, atalaña jamenji, mainjiniya, akwakwendesha ndeki, akwakuladika, wejima wawu azataña kushindamena haniji nshimbi. Chakutalilahu, akwakuladika eluka chikupu chekala mujimba wamuntu. Dichi mukwakuladika hatela kukeñakeña hekalila muchima wamuntuku. Nawa wejima wetu twalemesha nshimbi yamuchidiwu. Neyi muntu wukudiwula iyi nshimbi wukufwa.

6. Muloñadi akwakudifukula aYehova chatelelawu kwila anuñañana?

⁶ Mawulu nimaseki ayiloñesha chiwahi. Dichi twatela kwiluka netu Yehova wakeñaña akwakudifukala indi kwikala anuñañana. Nawa hakwila nawu twili mwenimu Nzambi watwinka Bayibolu kulonda yitukwashi. Kushakama chakadi wukwashi wamukuloñesha kwaNzambi ninshimbi jindi kukutuleñela kwikala mukukala nikubula kwikala namuzañalu.

7. Yumanyi yamwekeshaña nawu Bayibolu himukanda wanuñañana?

⁷ Bayibolu bayi neyi akuminini dakuyisoneka nansañu yamunyikanda yawaYudeya niyawakwaKristuku. Ilaña, himukanda waloñeshawu chachiwahi nawa wonenawu kudi Nzambi. Nyikanda yekala muBayibolu yanuñañana. MuBayibolu, kufuma tuhu kumukanda waKutachika nakushika kuChimwekeshu mwekela nsañu yakujilika chiyuulu chaYehova niyakushikija nkeñelu yindi yaleñeleliyi iseki kuhitila muWanta windi wakayuulañawu kudi Kristu “mwana” akaniniwu.—Tañenu Kutachika 3:15; Matewu 6:10; Chimwekeshu 11:15.

8. Muloñadi wutukuhoshela netu aIsarela adiña anuñañana?

 ⁸ A Isarela akunyima adiña anuñañana. Chakutalilahu, munshimbi jaMosi ‘ambanda ayinkeli mudimu wakukalakela kuchisu chetenti dakubulakena.’ (Kwid. 38:8) Kutuntulula chilombu chawaIsarela nitabanaka akwizatileña munjila yayiwahi. Kuhiñahu, Mwanta Davidi wapompesheli aLevi niatupristu kulonda yayinki nyidimu. (1 Kushi. 23:1-6; 24:1-3) A Isarela azatileña chachiwahi, ekalileña mukuwunda nawa anuñañana neyi amwovwahila Yehova.—Kuhit. 11:26, 27; 28:1-14.

9. Chumanyi chinakumwekesha nawu akwaKristu akusambili adiña anuñañana?

⁹ Chipompelu chawakwaKristu akusambila chadiña chanuñañana, nawa ayilombweleña kudi izanvu dalombweleña, dadiña nawapostolu. (Yil. 6:1-6) Mukuhita kwampinji, abombeleliku cheñi amanakwetu amakwawu kunidi izanvu dalombweleña. (Yil. 15:6) Amamembala amwizanvu dalombweleña hela antu adikundili nanidi izanvu dalombweleña adiña nakufumba nikuhana nshimbi kuhitila munyikanda yonenewa yasonekeleñawu. (1 Tim. 3:1-13; Tit. 1:5-9) Yipompelu yahetelelimu ñahi muwunlomboli wezanvu dalombweleña?

10. Yumanyi yafuminimu chelili yipompelu yadiñaku hatachi yilondeli nshimbi jahaniniwu kudi izanvu dalombweleña? (Talenu mwevulu wakutachikilahu.)

¹⁰ Tañenu Yililu 16:4, 5. Amanakwetu endeleña adiña nakwimenaku izanvu dalombweleña ‘ayinkeleña antu nshimbi jakasiliwu apostolu niakulumpi adiña muYerusalema.’ Yipompelu chiyalondeleleña iyi nshimbi ‘yatwalekelihu kwikala nachikuhwelelu chakola nawa antu avulilileñaku hefuku-hefuku.’ Komana muniyi nsañu yamuBayibolu mudihu chikuma chitunateli kuzatisha mukuloñesha kwaNzambi makonu?

11. Amanakwetu atondewa atela kwila ñahi nawunlomboli watambwilañawu mukuloñesha kwaNzambi?

¹¹ Yumanyi yatela kwilawu amamembala amuKomiti yaMutayi hela amuKomiti yaMwituña ankoñi añinza niaeluda amuyipompelu neyi atambwila nshimbi kufuma mukuloñesha kwaNzambi? Mukanda waYehova watulejaña kwikala ovwahila. (Kuhit. 30:16; Heb. 13:7, 17) Mukuloñesha kwaNzambi mwekala wanyi antu akalisha hela akwakudikaña, muloña yilwilu yamuchidiwu yinateli kuluwañesha kukeña, kuwunda nikunuñañana kwamuchipompelu. Hela chochu, kwosi mukwaKristu washinshika wakeñaña kumwekesha yilwilu yakasawuntu nikubula kashinshi neyi Diyotefwesi. (Tañenu 3 Yowanu 9, 10.) Tunateli kudihula netu: ‘Komana nakoleshaña amanakwami kuspiritu? Komana netejaña nikulondela wunlomboli wahanañawu amanakwetu alombolaña?’

12. Kuhimpikanyi kunekaliku hakutonda ankoñi akuzatila niaeluda?

¹² Shinshikenu kufuukula kwafuukulawu katataka kudi Izanvu Dalombolaña. Chibaaba ‘chaMalwihu Kufuma Kudi Antañi’ muKaposhi Kakutalila kaNovember 15, 2014, chashimwini yuma yahimpiliwu yakulondela hakutonda aeluda niankoñi akuzatila. Ichi chibaaba chahosheli nawu izanvu dalombweleña, denkeli ankoñi endeleña iwu mudimu. Kufuma tuhu mu September 1, 2014, ankoñi endaña anakuzatisha iyi njila hakutonda aeluda niankoñi akuzatila. Ankoñi añinza akeñaña kwiluka antu anatondiwu nikuzatila nawu hamu mumudimu wakushimwina neyi chinatwesheki. Wekalaña cheñi namudimu wakutala chisaka chamanakwetu anatondiwu. (1 Tim. 3:4, 5) Izanvu dawaeluda ninkoñi wañinza ashinshikaña hayuma yamuNsona  yakeñekaña hakwila nawu nkoñi wakuzatila nieluda amutondi.—1 Tim. 3:1-10, 12, 13; 1 Pet. 5:1-3.

13. Tunateli kumwekesha ñahi netu tunakulondela wunlomboli wutwatambwilaña kudi aeluda?

¹³ Twatela kulondela kufumba kwamuBayibolu kutwatambwilaña kudi aeluda. Awa atubiña ashinshika amukuloñesha kwaNzambi alondelaña nshimbi ‘jajiwahi,’ hela netu ‘jalumbwa; jaheteshaña,’ jekala muMukanda waNzambi. (1 Tim. 6:3.) Anukenu kufumba kwaPawulu kutalisha hadi antu abulaña kulondela nshimbi muchipompelu. Antu amakwawu ‘hiyadiña nakwenda mukuloñaku, ilaña adiña nakudiñija munsañu yabula kuyikundama.’ Chakadi nikujina ayifumbili kudi aeluda ilaña atwalekelihu kukaana mwayifumbiliwu. Indi chipompelu chelileña ñahi nawantu amuchidiwu? Pawulu wafumbili nindi: “Mushinshikenu, bayi mushakama ninduku.” Hela chochu antu hiyatela kumumona neyi kwiji hichilumbuku. (2 Tesa. 3:11-15) Makonu aeluda anateli kuhana mpanji kutalisha hadi muntu wunakutwalekahu kwila yuma yinateli kutamisha chipompelu, yidi neyi kudiiluka namuntu wabula kwikala Chinsahu. (1 Kor. 7:39) Mwelaña ñahi neyi aeluda ahana mpanji yamuchidiwu? Neyi munelukihu muntu wudi nayilwilu yinakuhoshawu muniyi mpanji, mukuleka kudikunda nindi? Kukeña kumukumwekesha nichimukufuukula kukuletesha muntu kuleka yilwilu yindi yatama. ^[1]

14. Tunateli kukwasha ñahi chipompelu kwikala chakadi majilu?

¹⁴ Tunateli kwilisha chipompelu kwikala chakadi majilu kuhitila mukulondela kufumba kwaMwizu daNzambi. Shinshikenu yuma yayimwekenini muKorinda. Pawulu wadihanini kushimwina mumusumba nawa wakeñeli akwawu “akwakujila” adiñamu. (1 Kor. 1:1, 2) Chatela chamukalilili kuhosha hansañu yawuvumbi wadiña nakwilawu antu amuchipompelu. Pawulu walejeli aeluda kuhana muntu wuneli wuvumbi kudi Satana, dikwila nawu kumuhaña muchipompelu. Hakwila nawu chipompelu chikali chakadi majilu, aeluda ateleleli kufumishamu “iluñi.” (1 Kor. 5:1, 5, 6, 12) Neyi tukulondela kufuukula kwawaeluda kwakuhaña muntu wunavulumuni wunabuli kubalumuka mumuchima, tukukwasha chipompelu kwikala chakadi majilu nawa iwu muntu nateli kubalumuka nakulomba kwanakena kudi Yehova.

15. Tunateli kutwalekahu ñahi kuleta kuwunda muchipompelu?

¹⁵ Kukala kukwawu kwateleleli kumanishawu muKorinda. Amanakwetu amakwawu atwalileña akwawu akwakudifukula kuyota. Pawulu wayihwili lwihu lwakutoñojokahu nindi: “Mwalekelañadi kukumina dakwiteja kuyikoña chatama?” (1 Kor. 6:1-8) Kukala kwamuchidiwu kunakumwekena nimakonu. Mpinji yikwawu, kuwunda kwekalaña hakachi kawamanakwetu akuspiritu, kwaluwankanaña neyi bisinisi yawu yiluwankana hadaha akutachika nikuditwambila nawu anadi mali. Amakwawu atwalaña amanakwawu kuchota chanyiloña, ilaña Mukanda waNzambi watukwashaña kwilula netu chachiwahi kukabakana kubadika kuleta kasawuntu hejina daNzambi hela kuluwañesha kuwunda kwamuchipompelu. ^[2] Twatela kuzatisha kufumba kwaYesu hakwila nawu tumanishi kukala niyikonkojola. (Tañenu Matewu 5:23, 24; 18:15-17.) Neyi twila mwenenimu, tukuleta kuwunda muchisaka chawakwakudifukula aYehova.

16. Muloñadi wutwatela kukuhwelela antu jaNzambi kwikala anuñañana?

¹⁶ Mukanda waYehova wamwakeshaña chitunateli kukuhwelela antu jindi kwikala  anuñañana. Ñimbi yamasamu wembili nindi: “Tiyenu, o kuwaha o kutowala antu amwivumu dimu akushakama hamu nakutiyañana!” (Mas. 133:1) A Isarela anuñañeneña neyi amwovwahila Yehova. Nzambi wahosheli kutalisha hayuma yikayimwekena antu jindi nindi: “Nakayisha hamu neyi nyikoku yakuBozira.” (Mika 2:12) Kubombelahu, Yehova washimwineñahu dehi kuhitila mudi kaprofwetu Zafwaniya nindi: “Nakabalumuna madimi anyuza akekali idimi ditooka [dachalala chamuNsona], kulonda wejima wawu akatambikaña ijina daYehova, kulonda akamukalakelaña namuchima wawu wumu [dikwila nawu kudifukula kudi yena mukunuñañana.]” (Zef. 3:9) Twatiyaña kuwaha kudifukula kudi Yehova mukunuñañana.

17. Aeluda atela kumanisha ñahi nyiloña yawantu anavulumuni hakwila nawu chipompelu chikali chanuñañana nawa chakadi majilu?

¹⁷ Aeluda atela kunyakashana kusompa nyiloña nawa mukukeña neyi tunakukeña kutwalekahu kwikala anuñañana nawa akadi majilu muchipompelu. Pawulu welukili nindi, kukeña kwaNzambi kwekala kwamunhosheluku nawa nindi Nzambi wamonaña yuma yatama. (Yish. 15:3) Dichi Pawulu wazeyeli wanyi kuyisonekela akwaKorinda mukanda Watachi wakuyifumba mukukeña. Chimwahitili tukweji, mukanda Wamuchiyedi wasonekeleliyi akwaKorinda wamwekeshaña nawu antu abalumukili muloña aeluda azatishili kufumba kwawapostolu. Neyi mukwaKristu navulumuni chakadi kwiluka, amayala apama atela kumwolola naspiritu yakwovwaha.—Ŋal. 6:1.

18. (a) Kufumba kwekala Mwizu daNzambi kwakwashili ñahi chipompelu chadiñaku kunyima? (b) Yumanyi yitwakadiza muchibaaba chinalondelihu?

¹⁸ Chinamwekani hatooka to-o nawu kufumba kwonenewa kwekala Mwizu daNzambi kwakwashili akwaKristu atachi amuKorinda niakumaluña amakwawu kwikala akadi majilu, awunda nawa anuñañana muchipompelu. (1 Kor. 1:10; Efwes. 4:11-13; 1 Pet. 3:8) Chafuminimu, amanakwetu niahela adiñaku hayina mpinji azatili chikupu mumudimu wakushimwina. Pawulu wahosheli nindi nsañu yayiwahi ‘anakuyishimwina mwahita kuleña kwejima kwekala mwishina dewulu.’ (Kol. 1:23) Makonu, nsañu yakwiluka nkeñelu yaNzambi anakuyishimwina mwahita iseki dejima muloña wakwila antu ekala mukuloñesha kwanuñañana kwashimwinaña. Chibaaba chinalonelihu chikumwekesha nawu awa antu alemesha chikupu Bayibolu nawa anakufwila chikupu kulemesha Chiyuulu chaMwanta Wabadika Yehova.—Mas. 71:15, 16.