1, 2. Lumbululenu kukolesha chikwawahila.

CRISTINA wudi nayaaka 18 wahosheli nindi: “Anvwali jami hiyankoleshañaku, ilaña ansawulaña hohu. Nawa mazu awu ankatishaña kumuchima. ^[1] Ahoshaña nawu nichidi kansi, nakadiza wanyi nawa nawu natoha nankashi. Nadilaña mpinji yejima nawa hinakeñaña kuhosha nawuku. Nadimonaña neyi nidi wamukunkulwayi.” Chihandilu chawahaña wanyi neyi kwosi anakukukolesha.

² Munjila yikwawu, kuhosha mazu akukolesha kwatiyishaña muntu kuwaha. Rubén wahosheli nindi: “Nadimmweneña kwikala wamukunkulwayi hadi yaaka yayivulu. Ilaña ifuku dimu, nadiña nakushimwina naeluda wammweni nindi nidi nakukala. Wantiyilili nakanañachima chinamulejeleña kukala kunadiña naku. Dichi wanlejeli yuma yayiwahi yinelileña. Wanlejeli cheñi mazu aYesu akwila nawu ejima wetu twalema kubadika anzwimba. Nanukaña iyi nsona mpinji yejima nawa yankoleshaña. Mazu anlejeliyi iwu eluda ankolesheli chikupu.”—Mat. 10:31.

3. (a) Kapostolu Pawulu wahosheli nindidi hakukolesha amakwawu? (b) Tukudizadi muchinu chibaaba?

 ³ Twatela kuhayama wanyi chaleteshaña Bayibolu yikonkomweneña hakukolesha akwetu mpinji yejima. Kapostolu Pawulu wayisonekeleli akwaKristu aHeberu nindi: “Enu ana kwetu, babalenu hakenda kwikala mwinenu wumu wukweti muchima watama wakubula kukuhwelela, wakuleka Nzambi wamumi. Chiña kudikonkomwena hefuku hefuku, . . . mwinenu wumu wakenda kachinchika nakudimbana kwanshidi.” (Heb. 3:12, 13) Munateli kwiluka kulema kwakudikolesha wumu namukwawu neyi mwanuka chimwatiyili hampinji yayikolesheliwu. Tushinshikenu hanawa malwihu: Muloñadi kukolesha chikwawahila? Chumanyi chitunateli kudizila kudi Yehova, Yesu niPawulu chiyakolesheliwu antu? Nawa tunateli kukolesha ñahi muntu munjila yinateli kumukwasha?

4. Anyi akeñekaña kuyikolesha, nawa muloñadi antu chinakubulilawu kukolesha akwawu?

⁴ Ejima wetu twakeñekaña kutwikolesha. Sweje-e hampinji yitunakukula. Timothy Evans wadiza hadi anyana walumbulwili nindi: “Anyana. . . akeñekaña kuyikolesha neyi chochakeñekaña nyitondu menji. Mwana watiyaña kuwaha neyi amukolesha.” Ilaña tunakushakama mumpinji yatama. Antu anakudikeña aweni, anakuhela akwawu nawa hiyakoleshaña akwawuku. (2 Tim. 3:1-5) Anvwali amakwawu hiyahamekaña anyanawuku muloña adiña anvwali jawu hiyayikolesheleñaku. Akwanyidimu ayihamekaña wanyi, dichi abaña nawu hiyayikoleshañaku hamudimu hazatañawu.

5. Kukolesha kwabombelamu mwodi?

⁵ Kukolesha kwabombelamu kuhameka muntu yuma yayiwahi yineliyi. Twatela kukolesha amakwawu kuhitila mukuyileja netu adi nayilwilu yayiwahi hela ‘kukundeja antu ananeñi.’ (1 Tesa. 5:14) Izu dachiGiriki dabalumunawu nawu “kukolesha” daya mukwila nawu “kutambika muntu kulonda yakukundeji.” Chitukuzataña nawamanakwetu niahela, diyi mpinji yakuhosha mazu akukolesha. (Tañenu Mukwakutaŋisha 4:9, 10.) Komana twazatishaña mpinji yatelela kulonda eluki muloña chitwayikeñela nichitwayihamekelaña? Henohu kanda twakuli ilu lwihu, twatela kutoñojoka ntahi hanichi chishimu: “Izu dakuhoshela hadu hidinateleli o chidawaha!”—Yish. 15:23.

6. Muloñadi Diyabolu chinakukeñelayi kutuneñesha? Shimunenu chakutalilahu.

⁶ Satana Diyabolu nakukeña kutuneñesha muloña weluka nindi neyi tuneña tukuzeya kuspiritu nimuyuma yikwawu. Yishimu 24:10 yahosha nawu: “Neyi wakazeya hefuku dakala ñovu jeyi jakeha.” Satana wazatishili kukala kwashiyashana nikutwamba kulonda yamuneñeshi muntu waloña Yoba, ilaña wakañenyi. (Yoba 2:3; 22:3; 27:5) Tunateli kukañesha nyidimu yaDiyabolu kuhitila mukukolesha antaña jetu niantu amuchipompelu. Chumichi chikutukwasha kumona hetala detu niKwitala daWanta kwikala maluña amawahi nawa akutwikiña.

7, 8. (a) Yakutalilahwinyi yamuBayibolu yinakumwekesha nawu Yehova walemesha kukolesha? (b) Anvwali anateli kwiladi hakwila eli neyi cheliliyi Yehova? (Talenu mwevulu wakutachikilahu.)

⁷ Yehova. Ñimbi yamasamu wembili nindi: “Yehova wudi kwakwihi nawantu abaluka nyichima yawu mwivumu, wayamwinaña antu akweti spiritu yachikeka puchi.” (Mas. 34:18) Hampinji Yeremiya yatiyiliyi  woma nawa yaneñeliyi, Yehova wamukwashili kwikala nachikuhwelelu chakola. (Yer. 1:6-10) Nawa toñojokenu chatiyiliyi kaprofwetu wakashinaji Danyeli hampinji yelili Nzambi yatemeshi kañelu kulonda yamukoleshi wamuteneni nindi “muntu wasweja kukeñewa,” hela iyala ‘wasweja kulemeshewa.’ (Dan. 10:8, 11, 18, 19) Komana ninenu kwila mukoleshaku akwakushimwina, apayiniya niamanakwetu nawahela ashinakaja dehi anakukeñeka wukwashu nehi?

⁸ Nzambi wamweni wanyi nindi hatela kumukolesha nikumuhameka Yesu hampinji yadiñayi hamaseki muloña azatilili hamu hadi yaaka yayivuluku. Ilaña, Yesu watiyili Tata yindi nakuhosha kufuma mwiwulu nindi: “Diyi Mwanami nakeña, natiyaña kuwaha nankashi mudi yena.” (Mat. 3:17; 17:5) Ilaña Nzambi wamuhamekeli Yesu nakumuleja nindi nakwila chiwahi. Yesu wakolesheweli chatiyiliyi awa mazu kapampa kayedi hakutachika kwamudimu windi wakushimwina nichaaka chakumanisha mudimu windi hamaseki. Yehova watemesheli cheñi kañelu nakumukolesha Yesu hawufuku wakukumishaku hakabakeniyi henohu kanda yafwi. (Luka 22:43) Neyi tudi anvwali, tulondelunu cheliliyi Yehova kuhitila mukukolesha anyanetu mpinji yejima nikuyihameka neyi ela chiwahi. Twatela cheñi kuyikwasha neyi anakuyeseka chikuhwelelu chawu ifuku dejima kushikola.

9. Chumanyi chitunateli kudizila kudi Yesu cheliliyi nawapostolu indi?

⁹ Yesu. Hawufuku wadileñayi Yesu Chanukishu, wamweni chilwilu chakudivwimba mudi apostolu indi. Yesu mukudizoza wawelesheli nyendu yawu, ilaña achidiña kuditadikisha nawu mukulumpi hinyi; nawa Petulu diyi welileña nindi diyi mukulumpi. (Luka 22:24, 33, 34) Hela chochu, Yesu wayihamekeli apostolu indi ashinshika muloña amukakeleli hapinji yadiñayi mukweseka. Wayilejeli nindi akela yuma yabadika yeliliyi nawa wayilejeli nindi Nzambi wayikeña. (Luka 22:28; Yow. 14:12; 16:27) Twatela kudihula netu, ‘Kwila nimwimbujola Yesu kuhitila mukuhameka anyanami niantu amakwawu chatela nishinshikeña hayiluwa yawu nehi?’

10, 11. Kapostolu Pawulu wamwekesheli ñahi nindi kukolesha amanakwawu kwalema?

¹⁰ Kapostolu Pawulu. Munyikanda yindi, Pawulu wahamekeli chikupu akwawu akwaKristu. Amakwawu wendeli nawu hadi yaaka yayivulu nawa chakadi nikujina welukili yiluwa yawu, ilaña wahosheli yuma yayiwahi hadi wena. Chakutalilahu, Pawulu wamuteneni Timotewu nindi: “himwanami nakeña wamudi Mwanta,” wakayakamenaña akwaKristu. (1 Kor. 4:17; Fwi. 2:19, 20) Kapostolu Pawulu wahosheli hadi Titusa nindi “washaña muchima kunsañu jajivulu.” (2 Kor. 8:22, 23) Timotewu naTitusa akolesheweli chelukiliwu nawu Pawulu wadiña nakumona nyidimu yawu yayiwahi.

¹¹ Pawulu naBaranaba ashili wumi hakatoña chafuntiliwu kumaluña kwakabakeneniwu. Chakutalilahu, hela chakwila amweni kukala muLisitira ilaña afuntili nakukolesha atumbanji amaha kwikala akola muchikuhwelelu hela chakwila anakumona yihuñu. (Yil.14:19-22) MuEfwesesa, Pawulu wadimweni nawantu azuwa. Yililu 20:1, 2 yahosha nawu: “Ipumba chidinamweni, Pawulu hakutambika atumbanji; chaneliyi nayikundeji dehi, hakuyishalika chachiwahi, hakufumaku nindi ayi muMasidoniya. Chanahitiyi mumpatoyu, chanayikwashiyi namazu  amavulu, ashika nimuHeleni.” Pawulu wakeñeli nankashi kukolesha amakwawu.

12. Kupompa kwatukwashaña ñahi kudikolesha wumu namukwawu?

¹² Tata yetu wamwiwulu watuleja nindi tupompeña mpinji yejima kulonda tudikolesheña wumu namukwawu. (Tañenu Aheberu 10:24, 25.) Twapompaña hamuna kulonda tudizi nikudikolesha wumu namukwawu neyi chelileñawu atumbanji twaYesu akusambila. (1 Kor. 14:31) Cristina, wutwatena hakutachika kwachinu chibaaba wahosheli nindi: “Natiyaña kuwaha kuya nakupompa muloña amanakwetu niahela ankeña nawa ankoleshaña. Mpinji yikwawu nekalaña waneña neyi nidi Hetala daWanta. Ilaña amanakwetu niahela enzaña nakunkumbata nikuleja nawu wunamwekeni chiwahi. Anlejaña nawu ankeña nawa atiyaña kuwaha chinelaña chiwahi kuspiritu. Natiyaña kuwaha neyi ankolesha!” Chikuwaha neyi wejima wetu ‘tudikoleshaña wumu namukwawu.’—Rom. 1:11, 12.

13. Muloñadi ambuña aNzambi akuluka yitembi chiyakeñekelañawu kuyikolesha?

¹³ Niambuña aNzambi akuluka yitembi akeñekaña kuyikolesha. Toñojokenu hadi Yoshuwa. Wamukalakeleli Nzambi nakashinshi hadi yaaka yayivulu. Ilaña, Yehova wamulejeli Mosi kulonda yamukoleshi nindi: “Chiña wumuleja Yoshuwa, wumukundeji, wumukoleshi; muloña yena diyi wakazambukañahu dehi kumbidi yawantu awa, wakayiswanisha ituña diwakamona.” (Kuhit. 3:27, 28) Yoshuwa amwinkeli mudimu weneni wakulombola aIsarela Mwituña daChikaninu. Wamweni ikañesha nikumushinda kamu kunjita. (Yosh. 7:1-9) Dichi Yoshuwa wateleleli kukoleshewa. Dichi tuyikolesheña aeluda kushilahu niankoñi añinza azataña nañovu kwakamena nyikoku yaNzambi. (Tañenu 1 Atesalonika 5:12, 13.) Nkoñi wañinza wumu wahosheli nindi, “Mpinji yikwawu amanakwetu atusonekelaña nyikanda nakuhosha nawu adiluñishili chitwayendelili. Twahembaña iyi nyikanda nakuyitaña neyi tunaneñi. Atukoleshaña chikupu.”

14. Chumanyi chinakumwekesha nawu kuhameka nikukolesha kwazatikaña chiwahi hakufumba?

¹⁴ Aeluda nianvwali akwaKristu eluka nawu kuhameka nikukolesha muntu kwakwojejaña muntu kutambwila kufumba kwamuBayibolu. Pawulu chayihamekeli akwaKorinda cheliliwu mwayifumbiliyi, atela akolesheweli nakutwalekahu kwila yuma yayiwahi. (2 Kor. 7:8-11) Andreas, nvwali wukweti anyana ayedi wahosheli nindi: “Kukolesha kwakwashaña anyana kupama  kuspiritu nimuyitoñojoka. Munateli kuyifumba kuhitila mukuyikolesha. Hela chakwila anyanetu aluka yuma yayiwahi, ilaña akutwalekahu kwila yuma yayiwahi neyi munakuyikolesha mpinji yejima.”

15. Njilanyi yimu yitunateli kwila kulonda tukoleshi akwetu?

¹⁵ Hamekenu nyidimu yinakuzatawu amanakwenu niahela niyilwilu yawu yayiwahi. (2 Kushi. 16:9; Yoba 1:8) Yehova niYesu alemesha chikupu yuma yitwelaña hakukwasha Wanta, hela chakwila twahanaña yuma yantesha kwesekeja nahanakumi ñovu jetu. (Tañenu Luka 21:1-4; 2 Akorinda 8:12.) Chakutalilahu, amanakwetu niahela ashinakaja dehi azataña nañovu kulonda ashimwini nikupompa mpinji yejima. Kwila tuyihameka nikuyikolesha nehi?

16. Muloñadi wutwatela kukoleshela akwetu?

¹⁶ Koleshenuña akwenu mpinji yejima. Neyi mumona muntu neli chuma chachiwahi, kwila mumusakilila nehi? Toñojokenu yuma yayimwekeneni aPawulu niBaranaba hampinji yadiñawu kuAntiyoki muPisidiya. Anyuuli amusinagogi ayilejeli nawu: “Enu ana kwetu, neyi mukwetuhu kadizu kakukundeja nachu antu, kihoshenu.” Pawulu wayikundejeli kuhitila mukuhana mpanji. (Yil. 13:13-16, 42-44) Neyi mudi nezu dakukolesha, kwila mudihosha nehi? Neyi tukukoleshaña akwetu, niwena akatukoleshaña.—Luka 6:38.

17. Tunateli kukolesha ñahi muntu munji yinateli kumukwasha?

¹⁷ Hamekenu chakufuma hamuchima nawa chakubula kuhita mumbadi. Mazu akukolesha akwashaña, ilaña nsañu yahosheliyi Yesu kudi akwaKristu akuTiyatira amwekeshaña nawu kubula kuhita mumbadi kwakuwahi. (Tañenu Chimwekeshu 2:18, 19.) Chakutalilahu, neyi tudi anvwali tunateli kuleja anyanetu yuma yitunakuyihameka chinakwilawu chiwahi kuspiritu. Tunateli kuleja nvwali wamumba wabula kusumbuka yuma yatutiyishaña kuwaha kutalisha chahembayi anyanindi hela chakwila nakumona kukala. Kuhameka nikukolesha kwamuchidiwu kunateli kumukwasha chikupu.

18, 19. Tunateli kukwasha ñahi antu anakukeñeka kukoleshewa?

¹⁸ Yehova wukutuleja wanyi nindi tukoleshi antu neyi chalejeliyi Mosi kukolesha Yoshuwa. Ilaña, Nzambi watiyaña kuwaha neyi tuhosha mazu akukolesha kudi amanakwetu nawahela niantu amakwawu. (Yish. 19:17; Heb. 12:12) Chakutalilahu, tunateli kuleja manakwetu wunahani mpanji yawantu amavulu netu mpanji yindi yinatukwashi kwiluka mwatalisha nsona yimu. Muhela wumu wasonekeleli nhoshi mwenyi nindi: “Hela chakwila twahanjekeli kapinji kantesha ilaña mwelukili jadiña kumuchima wami nawa mwankundejeli nikuntiyisha kuwaha. Inakukeña kuyileja nami china chimwahosheleña hachinañamu nichitwadiwanini natiyili neyi kwiji hichawaana chinafumi kudi Yehova.”

¹⁹ Tunateli kuwana njila jajivulu jakukoleshela amanakwetu kuspiritu neyi tulondela kufumba kwaPawulu kwakwila nawu: “Dikundejenu wejima wenu nakudikolesha wumu namukwawu, mwomumwelaña.” (1 Tesa. 5:11) Tukumuzañalesha Yehova neyi ‘tukutwalekahu kudikolesha wumu namukwawu hefuku-hefuku.’