1-3. Kukala kwadiña hakachi kaEyodiya naSintiki kwatela kwatachikili ñahi, nawa kukala kwamuchidiwu tunateli kukwimanisha ñahi? (Talenu mwevulu wakutachikilahu.)

AMBUÑA aYehova alemesha chikupu mukanda wajila waNzambi, Bayibolu. Chineli twawanina wanyi, mpinji yikwawu atufumbaña kuzatisha Nsona. Twakela ñahi neyi atufumba? Shinshikenu hadi akwaKristu amuyaaka nkulakaji yakusambila aEyodiya niSintiki. Hamwekeni kukala kweneni hakachi kanawa ambanda ayedi awayishewa. Kukalanyi? Bayibolu hiyashimunaku. Ilaña tufwikijenu yuma yamwekeni.

² Twili netu Eyodiya watambikili amanakwetu niahela amu kwiitala dindi kulonda adiili hamu yakuda nikuhanjeka. Sintiki amutambikili wanyi, ilaña watiyili nindi akwawu ayiliku adiluñishili chikupu. Hadaha Sintiki wahosheli nindi: ‘Nahayami nankashi hakubula kuntambika kudi Eyodiya! Natoñojokeleña nami wubwambu wetu wezala kambuki namunu.’ Chineli watoñojokeleña nindi anamuheli, Sintiki watachikili kumujinoka Eyodiya nikubula kumukuhwelela. Dichi Sintiki waloñesheli  chidika chindi nawa watambikili amanakwindi niahela wowamu, ilaña Eyodiya wamutambikili wanyi. Kukala kwadiña hakachi kaEyodiya naSintiki hadaha kwadi kuleta kukala muchipompelu chejima. Bayibolu hiyatuleja yuma yafuminimuku, ilaña awa ahela atela etejeli kufumba kwayifumbiliyi Pawulu.—Fwi. 4:2, 3.

³ Kukala kwamuchidiwu kanateli kuleta kukala muyipompelu yawantu jaYehova makonu. Hela chochu, tunateli kumanisha kukala kwamuchidiwu neyi tuzatisha kufumba kwekala Mwizu daNzambi, Bayibolu. Nawa neyi tulemesha chikupu Mukanda waYehova, tukulondela kufumba kwekalamu.—Mas. 27:11.

4, 5. Kufumbanyi kwekala Mwizu daNzambi kutalisha hakuyuula yitoñojoka yetu?

⁴ Chakala kudiyuula neyi atwila chatama. Chinateli kutuneñesha nankashi neyi atwila chatama muloña wachisemwa chetu, ikowa hela kukala kukwawu kwakumujimba. Sweje-e dinu, chakataña nankashi neyi mukwetu mukwaKristu diyi wunatwili chatama! Komana Izu daNzambi dikweti kufumba kunateli kutukwasha neyi chakwila akwetu abula kuwanini atwila chatama?

⁵ Yehova weluka chahandañawu antu kufuma tuhu kunyima. Welukaña chitwatiyaña niyuma yitwelaña. Yitoñojoka yinateli kutukojeja kuhosha nikwila yuma yatama yitunateli kuditoñesha. Dichi, chalema nankashi kuzatisha kufumba kwamuBayibolu kulonda tubuli kwila chatama. (Tañenu Yishimu 16:32; Mukwakutaŋisha 7:9) Chakadi nikujina, wejima wetu twatela kuzata nañovu kulonda tubuleña kusha muchima hayiluwa yawakwetu nawa tuyanakeneña. Yehova niYesu alemesha chikupu kwanakena. (Mat. 6:14, 15) Komana mwakeñaña kwanakena hela kuyuula yitoñojoka yenu?

6. Muloñadi wutwatela kubulila kuzuwa?

⁶ Antu akañanyaña kuyuula yitoñojoka yawu avula kwikala azuwa. Chafumañamu, akwawu akuleka kudikunda nawu. Muntu wazuwa nateli kutamisha chipompelu. Nateli kuzata nañovu kulonda yadisweki nakumwekana neyi kwiji wazuwa wanyi, ilaña yitoñojoka yindi yatama yekala mumuchima ‘yikumwekena hatooka muchipompelu.’ (Yish. 26:24-26) Aeluda anateli kukwasha muntu wamuchidiwu kulonda yeluki nindi kuzuwa, kuhila nikuhemba nkunyi hiyilwilu yabula kwikala mukuloñesha kwaNzambi. Mukanda walema waYehova washimuna hatooka kutalisha hayilwilu yamuchidiwu. (Lev. 19:17, 18; Rom. 3:11-18) Komana mwalondelaña muwahosha?

7, 8. (a) Yehova walombolaña ñahi chibalu chakuloñesha kwindi chahamaseki? (b) Nshimbinyi jikwawu jekala Mwizu daNzambi nawa muloñadi wutwatela kujovwahila?

⁷ Yehova nakulombola nikudiisha chibalu chakuloñesha kwindi chekala hamaseki kuhitila mudi ‘nduñu wamaana nikashinshi’ anakulombolawu kudi Kristu, “mutu wachipompelu.” (Mat. 24:45-47; Efwes. 5:23) Kufwana izanvu dalombweleña mumafuku awapostolu, iwu nduñu walondelaña izu daNzambi donenewa hela nsañu nikuyilemesha chikupu. (Tañenu 1 Atesalonika 2:13.) Njilanyi hela nshimbinyi yekala muBayibolu yatukwashaña?

⁸ Bayibolu yatulejaña kupompa mpinji yejima. (Heb. 10:24, 25) Yatukonkomwenaña kwikala anuñañana. (1 Kor. 1:10) Izu daNzambi datulejaña kutwamijaku Wanta  waNzambi muchihandilu chetu. (Mat. 6:33) Nsona yahosha cheñi hamudimu wetu wakushimwina kwitala nikwitala, kumaluña kwawanikaña antu amavulu nikwakukolekela. (Mat. 28:19, 20; Yil. 5:42; 17:17; 20:20) Mukanda waNzambi walejaña aeluda akwaKristu kuhemba kuloñesha kwindi chakadi majilu. (1 Kor. 5:1-5, 13; 1 Tim. 5:19-21) Nawa Yehova washaku nshimbi yakwila nawu antu ejima amukuloñesha kwindi atela kwikala akadi majilu kumujimba nikuspiritu.—2 Kor. 7:1.

9. Njilanyi yimu hohu yinakuzatishawu kulonda yitukwashi kutiya Izu daNzambi?

⁹ Antu amakwawu atoñojokaña nawu anateli kutiya Bayibolu chakadi kuyilumbulwila. Hela chochu, Yesu watondeli ‘nduñu wakashinshi’ kulonda yekali njila yimu hohu yakuhaninamu yakuda yakuspiritu. Kufuma tuhu mu 1919, Yesu Kristu alemeshawu nazatishi iwu nduñu kulonda akwashi atumbanji twindi kutiyishisha Mukanda waNzambi nikulondela kufumba kwekalamu. Neyi twovwahila nshimbi jamuBayibolu, tukukwasha chipompelu kwikala chakadi majilu, chawunda nawa chanuñañana. Wejima wetu twatela kudihula netu, ‘Komana novwahilaña njila yinakuzatishayi Yesu makonu?’

10. Chibalu chamwiwulu chakuloñesha kwaYehova achilumbulula ñahi mumukanda waEzekeli?

¹⁰ Izu daYehova datunuñañeshaña nachibalu chamwiwulu chakuloñesha kwindi. Chakutalilahu, kaprofwetu Ezekeli wamweni chimwenu mwadiña ikalu damwiwulu demeneneñaku chibalu chakuloñesha kwaNzambi kwamwiwulu. (Ezek. 1:4-28) Yehova wendeshaña idi ikalu nawa dayaña kwejima kunakudilombolawu kudi spiritu yindi. Nawa, chibalu chamwiwulu chakuloñesha kwindi chalombolaña chibalu chahamaseki. Chakadi nikujina, idi ikalu dinakwenda! Toñojokenu hakuhimpika kwakuvulu kunamwekani hayaaka yinahitihu nawa ilukenu nenu Yehova diyi wunakwila yuma yejimiyi. Chineli Kristu niañelu ajila keña ajilumuni kanu kaayi katama, ikalu daYehova dinakwenda lufuchi kulonda dihakwiliku chiyuulu chindi nikujilika ijina dindi dajila.

11, 12. Yumanyi yineli kuloñesha kwaYehova?

¹¹ Talenu yuma yinazati kuloñesha kwaYehova kwahamaseki munanu mafuku akukuminina. Kutuña. Akwakuzata amavulu adiña nakutuña kasanji keneni kawaYinsahu jaYehova kuWarwick, New York, U.S.A. Dipatimenti Yatalaña Mudimu Wakutuña Mukaayi Kejima yinakukwasha akwakudihana amavulu mukaayi kejima kutuña Matala aWanta nikutohesha tusanji twanyitayi. Tunakusakilila akwakudihana ejima azataña nañovu iyi nyidimu! Ilukenu nenu Yehova nakukiswila akwakushimwina aWanta mukaayi kejima anakuhana mali mukudizoza nimukudikeñela hakukwasha iwu mudimu.—Luka 21:1-4.

 ¹² Mashikola. Toñojokenu mashikola ashiyashana anakudizishayi Nzambi. (Isa. 2:2, 3) Tukweti mashikola adi neyi Shikola yaMudimu wawu Payiniya, Shikola Yawakwakushimwina aWanta, Shikola yaGileyadi, Shikola yawaMuchisaka chaBeteli, Shikola yawaNkoñi Añinza niAñodijawu, Shikola yawaEluda Muchipompelu, Shikola yaMudimu waWanta, niShikola Yamamembala Amukometi Yamutayi niAñodijawu. Yehova watiyaña kuwaha kudizisha antu jindi. Shikola yakudiza Bayibolu yidi hawebu sayiti yetu ya, jw.org/lun, hadi ninyikanda yetu mumadimi amavulu. Haniyi webu sayiti hadi chibalu chawanyana nichayisaka kushilahu nichibalu chansañu. Komana mwazatishaña jw.org/lun mumudimu wakushimwina nihakudifukula kwenu kwachisaka?

13. Yumanyi yitwatela kwila chineli tudi akwakudifukula aYehova ashinshika?

¹³ Kwikala mukuloñesha kwaYehova hikukooleka kweneni. Chineli tweluka yuma yakeñañayi Nzambi, twatela kwila yuma yayiwahi nikuhakwilaku chiyuulu chindi. Twatela ‘kuhela yuma yatama’ neyi chelañayi Yehova, muloña kaayi kanakutaminaku chikupu. (Mas. 97:10) Twakaanaña kudibomba nawantu atama elaña nawu: “Yatama nawu yayiwahi, yayiwahi nawu yatama.” (Isa. 5:20) Twafwilaña kwikala akadi majilu kumujimba, muyitoñojoka nikuspiritu muloña twakeñaña kumuzañalesha Nzambi. (1 Kor. 6:9-11) Twamukeña Yehova, twamukuhwelela nawa twamwekeshaña netu twashinshika kudi yena kuhitila mukulondela nshimbi jindi jasonekawu muMukanda windi wajila. Nawa twalondelaña iji nshimbi hetala, muchipompelu, kumudimu, kushikola nikudi kwejima. (Yish. 15:3) Tushinshikenu cheñi chitunateli kumwekesha netu twamwovwahilaña Nzambi.

14. Anvwali akwaKristu anateli kumwekesha ñahi nawu amwovwahila Nzambi?

¹⁴ Kukulisha anyana. Anvwali akwaKristu amwekeshaña nawu amwovwahilaña Yehova neyi adizisha anyanawu kwesekeja Nezu dindi. Anvwali amwakamaña Nzambi hiyakulishaña anyana kwesekeja nachiswemwaku. AkwaKristu hiyatela kulondeli yuma yelañawu mukaayiku. (Efwes. 2:2) Nvwali mukwaKristu wapapatishewa watela kutoñojoka wanyi nindi, ‘Mwituña detu ambanda diwu atela kudizisha anyana.’ Bayibolu yahosha hatooka haniyi nsañu nawu: “Atata yawantu, . . . yilelenuña [anyanenu] nakuyibabesha nikuyikonkomwena [munshimbi; nimuwunlomboli] mudi Yehova.” (Efwes. 6:4.) Atata nawamama jawantu amakwakamaña Nzambi akeñaña kukulisha anyanawu neyi chamukulishiliwu Samweli, muloña Yehova wadiña nindi hampinji yakulileñayi.—1 Sam. 3:19.

15. Twamwekeshaña ñahi netu twamwovwahila Yehova neyi tunakufuukula yuma yalema?

¹⁵ Kufuukula. Njila yimu yitunateli kumwekesha netu twamwovwahilaña Nzambi, hikukeña wukwashu Mwizu dindi dasonekawu nikuloñesha kwindi hampinji yitunakufuukula yuma yalema muchihandilu. Hakwila nawu twiluki kulema kwakukeña wukwashu, tushinshikenu yuma yelañawu anvwali amavulu. Antu amavulu atwalaña anyanawu anyanya kudi antaña jawu nakuyihembelaku kulonda wena atwalekihu kuzata nikuwana mali mwituña dacheñi. Iku hikufuukula kwamuntu, ilaña twatela kwiluka netu Nzambi wakatusompesha nayuma yitwafuukulaña. (Tañenu Aroma 14:12.) Komana chachiwahi kufuukula yuma yalema muchisaka  nimuchihandilu chetu chakadi kusandujola chahosha Bayibolu? Inehi! Chineli hitukutwesha kulombola nyendu yetuku, twatela kukeña wukwashu kufuma kudi Tata yetu wamwiwulu.—Yer. 10:23.

16. Mumbanda wumu wakeñeleña kwiladi hanyima yakuvwala mananindi, nawa chumanyi chamukwashili kufukula mwamuwahi?

¹⁶ Mumbanda wumu wavwalili mwana weyala hampinji yadiñayi mwituña dacheñi wakeñeleña kutwala mwanindi kumukala windi kulonda akamuhembi kudi ankaka jindi. Haniyi mpinji Chinsahu chaYehova watachikili kudiza Bayibolu naniwu mumbanda. Watwalekelihu nakudiza nawa wadizili nindi Nzambi wamwinkeli mudimu wakukulisha mwana kulonda yadifukuleña kudi Yehova. (Mas. 127:2; Yish. 22:6) Iwu mumbanda walombeli chakufuma hamuchima kudi Yehova, neyi chochatulejañawu muNsona. (Mas. 62:7, 8) Nawa wamulejelimu muntu wamudizishileña Bayibolu niantu amakwawu amuchipompelu. Hela chakwila adiña nakumukanjikija kudi antaña jindi nawu yatwali mwanidi kudi ankaka jindi, welukili nindi chatelela wanyi. Nfumwindi watiyili kuwaha chakwila watachikili kudiza Bayibolu nikuya nakupompa hamu nañodindi nimwanawu muloña wakwila chipompelu chayikwashili. Munakutoñojoka nenu iwu mumbanda welukili nindi Yehova nakuli kulomba kwindi kwakufuma hamuchima? Chakadi nikujina, welukili.

17. Wunlombolinyi wutunatambwili kutalisha hadi atudizi aBayibolu?

¹⁷ Kulondela wunlomboli. Njila yimu yitwamwekeshelañamu netu twamwovwahila Nzambi hikulondela wunlomboli wutwatambwilaña mukuloñesha kwindi. Chakutalilahu, shinshikenu njila jatwinkawu kutalisha hadi atudizi etu aBayibolu. Twatela kushiyaku mpinji yakumulumbulwila kadizi chekala kuloñesha kwetu hanyima yakudiza nindi Bayibolu mumukanda waChumanyi Chacheni Chatañishaña Bayibolu?. Tunateli kwila mwenimu kuhitila mukuzatisha vidiyo yaChumanyi Chamwekanaña Hetala daWanta? nibuloshuwa yaAnyi Anakwila Mwaya Muchima waYehova Makonu? Anakutuleja nawu neyi tunamanishi kudiza mumukanda waChatañishaña Bayibolu nakadizi wunakuyilaku hambidi, twatela kutwalekahu kumudizisha mumukanda ‘waShakamenu mukukeña kwaNzambi,’ hela chakwila wapapatishewa dehi. Kuloñesha kwahanaña iwu wulomboli kulonda atumbanji amaha ‘akoli muchikuhwelelu.’ (Kol. 2:7) Komana mwalondelaña iwu wunlomboli wahanaña kuloñesha kwaYehova?

18, 19. Muloñadi chitwatela kumusakilila Yehova?

¹⁸ Yehova watwinka yuma yayivulu yitwatela kumusakilila. Watwinka wumi, chakubula yena kachi twekalaku wanyi. (Yil. 17:27, 28) Watwinka chawaana chalema, mukanda windi Bayibolu. Twayimonaña netu hinsañu yafuma kudi Nzambi, neyi chochayimweneñawu akwaKristu amuTesalonika nawu izu daNzambi.—1 Tesa. 2:13.

¹⁹ Tunakundami kwakwihi naYehova nawa niyena nakundami kwakwihi nanetu muloña Wezu daNzambi datwinkayi. (Yak. 4:8) Tata yetu wamwiwulu watwinka kukooleka kwakweni kwakwikala mukuloñesha kwindi. Twasakililaña chikupu. Ñimbi yamasamu wasakilili chachiwahi chembiliyi nindi: “Musakililenu Yehova, himuwahi; luwi lwindi lwahaya nyaka.” (Mas. 136:1) Mumukanda waMasamu 136 mwekala mazu akwila nawu “luwi lwindi lwahaya nyaka” mapampa 26. Neyi tumwovwahila Yehova nikuloñesha kwindi, tukumona awa mazu alala muloña twakashakama haya nyaka!