Komana Munakubatama Mudi Yehova?
“Yehova wakuulaña wumi wawambuñindi; abatamaña mudi yena kwosi niwumu wakatanyaku.”—MAS. 34:22.
TUMINA: 49, 65
1. Hamuloña wanshidi, antu jaNzambi amavulu atoñojokaña nawudi?
“YAYO-O, ami nshona!” (Rom. 7:24) Ambuña aNzambi amavulu ahoshahu dehi awa mazu ahosheliyi kapostolu Pawulu. Wejima wetu twakabakanaña muloña wanshidi yitwaswana nawa neyi tunakufwila netu tumukalakeli Yehova ilaña tukañanya, twaneñaña. AkwaKristu amakwawu akoñahu dehi nshidi yahamesu bwi-i atoñojokaña nawu Nzambi kwila yayanakena nehi.
2. (a) Masamu 34:22 yamwekeshaña ñahi nawu ambuña aNzambi hiyatela kudinka nyiloña nanshidi yakoñeliwuku? (b) Yumanyi yitukuhanjeka muchinu chibaaba? (Talenu chikasha chinakwila nawu “Yuma Yakudizilaku Tahindi Yuma Yemenañaku?”
2 Hela chochu, Nsona yatukwashaña nawu ejima abatama mudi Yehova atela wanyi kutoñojoka nawu hiyanayanakeniku. (Tañenu Masamu 34:22.) Kubatama mudi Yehova mwabombeladi? Yumanyi yitwatela kwila hakwila nawu Yehova yatutiyili luwi nikutwanakena? Chashiliku ntanjikilu yanyisumba yakubatamina muIsarela wakushankulu dichatukwashaña kuwana ñakwilu yanawa malwihu. Iyi ntanjikilu yadiñaku hikwadiña chitiyañenu chaNshimbi, hela chakwila yenjili nakumana haPentakosta 33 C.E. Ilaña anukenu nenu, Lushimbi lwafumini kudi Yehova. Ntanjikilu yanyisumba yakubatamina yatukwashaña kwiluka Yehova chamonañayi nshidi, akwakuvulumuna nikubalumuka mumuchima. Tusambilenu kuhanjeka hankeñelu nimudimu wazatileña iyi nyisumba.
“AMBULENU NYIKALA YENU YAKUPULUKILA”
3. A Isarela elileña ñahi neyi muntu yajaha mukwawu mumushikila?
3 Yehova watiyileña kutama nanyiloña yejima yamashi yakoñeleñawu muIsarela. Muntu wajahileña mukwawu mumushikila amujahileña kudi antaña yanona anajahiwu, ateneneñawu nawu “Mukwakutenda mashi.” (Kuch. 35:19) Muniyi njila, mbanji amujahileña muloña wakupwekesha mashi amuntu wabula muloña. Kujaha muntu mukunyakashana kwakiñileña Ituña daChikaninu abuli kuditamisha, muloña Yehova wahosheli nindi: “Bayi mwakatamisha ituña dimwakashakamaku; muloña [kupwekesha mashi amuntu] kwatamishaña ituña.”—Kuch. 35:33, 34.
4. A Isarela elileña ñahi neyi muntu yajaha mukwawu chamaposu?
4 Hanu dinu, aIsarela elileña ñahi neyi muntu yajaha mukwawu chamaposu? Hela chakwila namujahi chamaposu iwu wunajahañani wadiña namuloña wakupwekesha mashi akadi muloña. (Kutach. 9:5) Kukooleka, iwu muntu amwitejeleña kutemukila kumusumba wumu hanyisumba 6 yakubatamina kuchina kumujaha kudi mukwakutenda mashi. Wapulukilileña kwenoku. Nawa washakamineña munowu musumba wakupulukila sampu kapristu muneni nafwi.—Kuch. 35:15, 28.
5. Ntanjikilu yanyisumba yakubatamina yatukwashaña ñahi kumwiluka Yehova chiwahi?
5 Bayi neyi muntu diyi washiliku iyi nyisumba yakubataminaku. Yehova yomweni wamulejeli Yoshuwa nindi: “Hoshaku nawanyana kaIsarela, neyi, Ambulenu nyikala yenu yakupulukila.” Iyi nyisumba ‘ayijilikili.’ (Yosh. 20:1, 2, 7, 8) Chineli Yehova niyena watondeliku iyi nyisumba kulonda yizateña mudimu wambukaku, tunateli kudihula netu iyi ntanjikilu yatukwashaña ñahi kumona Yehova chekalayi naluwi? Nawa chinakutudizisha ñahi chitunateli kubatama mudi yena makonu?
“AKASHIMUNI NSAÑUYINDI KUDI AKULUMPI”
6, 7. Shimunenu chelileñawu akulumpi hakusompesha muntu wunajahi mukwawu chamaposu. (Talenu mwevulu wakutachikilahu.) (b) Muloñadi itunduka chayilileñayi nakudimona nawakulumpi?
6 Neyi namujahi mukwawu chamaposu, itunduka wasambilileña kushimuna “nsañu yindi kudi akulumpi” hachiisu chamusumba wakubatamina kunatemukiliyi. Amutambwilileña chiwahi. (Yosh. 20:4) Neyi munahiti dehi mafuku, amufuntishileña kudi akulumpi kumusumba kwajahililiyi mukwawu nawa akulumpi asompeleña muloña windi. (Tañenu Kuchinda 35:24, 25.) Itunduka wafuntileña kumusumba wakubatamina chiña hohu neyi anasompi nawu wajaha mukwawu chamaposu.
7 Muloñadi akulumpi chiyatalileña haniyi nyiloña? Afwililileña kuhemba chipompelu chawaIsarela chakadi majilu nikukwasha muntu wunajahi mukwawu chamaposu kulonda amwanakeni kudi Yehova. Muntu wumu wadiza jaBayibolu wasonekeli nindi neyi itunduka yabula kuya nakudimona nawakulumpi, “wadishileña yomweni muwubanji.” Wabombelelihu nindi: “Mashi indi adiña hamutu windi, muloña wadiwili njila yakupulukila yaloñesheliyi Nzambi.” Wukwashu wadiñakoku wakukwashilamu muntu wunajahañani chamaposu, ilaña wateleli kuwukeñakeña nikuwuzatisha. Neyi yakañanya kutemukila kunyisumba yakubatamina yaloñesheliyi Yehova, ntaña yanona
muntu wajahiliyi wadiña nawuswa wakumujaha niyena.8, 9. Muloñadi mukwaKristu wunakoñi nshidi yeneni chatelelayi kulejamu aeluda?
8 Makonu neyi mukwaKristu nakoñi nshidi yeneni watela kuya nakudimona nawakulumpi amuchipompelu kulonda amwanakeni. Muloñadi chumichi chichalemena? Chatachi, Yehova diyi washaku ntanjikilu yakwila nawu akulumpi asompeña nyiloña yahamesu bwi-i, neyi chashimunawu Mwizu dindi. (Yak. 5:14-16) Chamuchiyedi, iyi ntanjikilu yakwashaña muntu wunabalumuki mumuchima kumwanakena kudi Nzambi nikubula kukoña cheñi nshidi yoyimu. (Ñal. 6:1; Heb. 12:11) Chamuchisatu, akulumpi ayinka mudimu nawa ayidizisha chakukwasha muntu wunabalumuki kulonda yabuleña kuneña nikumona nindi hiyanamwanakeniku. Yehova wayitenaña awa akulumpi nindi “kwakweyama nvula.” (Isa. 32:1, 2) Mukwiteja wanyi nenu iyi ntanjikilu hinjila yimu mwamwekeshelañayi Nzambi luwi?
9 Ambuña aNzambi amavulu anamoni kuwaha kwekala mukulomba nikutambwila wukwashu kudi akulumpi. Chakutalilahu, manakwetu Daniel wakoñeli nshidi yeneni, ilaña hadi tukweji twatuvulu wachinineña kulejamu akulumpi. Wahosheli nindi: “Natoñojokeli nami akulumpi akunkwasha wanyi muloña hashimbwili. Hela chochu, nahembeleleña kukala kwejima kwadi kufuma muyuma yinelili. Nawa chinalombeli kudi Yehova, natoñojokeli nami natela kusambila kudanakena yuma yejima yinakoñeli.” Nkumininaku, Daniel walombeli wukwashu kudi aeluda. Chatoñojokeliyi yuma yamwekeni, wahosheli nindi: “Natiyileña woma kuyilejamu. Ilaña chinayilejeli, natiyili neyi kwiji kudi muntu wunanfumishi chiteli hachifwiji. Ichi namulombaña Yehova chakadi chuma chidi chejima kunkañesha.” Chayinu mpinji, Daniel wudi nachinleji chitooka nawa katataka amutonda kwikala nkoñi wakuzatila.
“AKATEMUKILI KUMUKALA OWU”
10. Hakwila nawu muntu wunajahani chamaposu amwanakeni, wateleleli kwiladi mukanyakashana?
10 Muntu wunajahi mukwawu chamaposu wateleli kwilahu chuma hakwila nawu amwanakeni. Yoshuwa 20:4.) Iwu itunduka washintajalileña wanyi, muloña kuhanda kwindi kwashindameneni hakutemukilila swayi kumusumba wakubatamina nikushakamaku yaaka yayivulu. Dikwila nawu wateleleli kudihana. Washileña mudimu windi, yuma yindi yejima nawa hadiña wakasunuka kwendaku, sampu kapristu muneni nafwi. * (Kuch. 35:25) Wateleleli kwila mwenimu. Neyi yafunta kumusumba wawu, chadi kumwekesha neyi kwiji chamwañiliyi mashi chadiña hohu chiwahi nawa chumichi chadi kusha wumi windi muwubanji.
Watemukilileña kumukala wakupulukila wadiña mukamwihi. (Tañenu11. Yumanyi yamwekeshaña nawu mukwaKristu wunabalumuki mumuchima wasakililaña haluwi lwaNzambi?
11 Muntu wunavulumuni niyena watela kwilahu chuma, hakwila nawu Nzambi yamwanakeni. Twatela kuleka chikupu kwila nshidi yahamesu bwi-i, ninshidi yanyanya yinateli kutukojeja kukoña nshidi yasweja. Kapostolu Pawulu amoneneni kusoneka yuma yeliliwu akwaKristu abalumukili mumuchima muKorinda nawu: “Kuneña kwesekeja nankeñelu yaNzambi chikunayikojeji enu mwiikali adikita, chikunayikwashi kudiyiñisha kuyiluwa, chikunayileteshi kutiya kutama, kutiya woma, kufwila kubalumuka mumuchima, chikunayileteshi kwikala neyena dakufwila kwolola yuma yinaheñi!” (2 Kor. 7:10, 11) Neyi tuzata nañovu kuleka yuma yikutuletesha kukoña nshidi chikumwekesha nawu twamulemesha Yehova nawa netu tunakukeña luwi lwindi.
12. Yumanyi yatela kulekayi mukwaKristu hakwila nawu atwalekihu kumumwekeshela luwi kudi Nzambi?
12 Yumanyi yatela kulekayi mukwaKristu hakwila nawu atwalekihu kumumwekeshela luwi kudi Nzambi? Watela kuleka yuma yejima hela chakwila wayikeña neyi yinateli kumuletesha yakoñi nshidi. (Mat. 18:8, 9) Neyi amabwambu jenu amu anakuyikanjikija nawu mwili yuma yahelayi Yehova, mukuleka kudikunda nawu? Neyi mwakañanyaña kunwa walwa nakwesekeja, komana kwila mutondolwela yuma yinateli kuyiletesha kusheta nehi? Neyi mwakañanya kuleka kufwila kwakwila wuvumbi, komana mwatondolwelaña kutamba nyivwimbimbi, mawebusayiti hela yuma yinateli kuyiletela yitoñojoka yatama? Mwatela kwiluka nenu, neyi tuzata nañovu kulonda tuhembi kashinshi ketu kudi Yehova, mwakafuma yayiwahi. Kwosi chuma chasweja kukata neyi Yehova yatushiya. Nawa, kwosi chuma chatiyishaña kuwaha neyi twiluka netu watutiyilaña “luwi lwahaya nyaka.”—Isa. 54:7, 8.
“YAKEKALI NYIKALA YENU YAKUPULUKILA”
13. Lumbululenu chaletesheleña itunduka kwikala wakiñewa nawa wamuzañalu mumusumba wakubatamina.
13 Itunduka wadiña wakiñewa neyi wudi mumusumba wakubatamina. Yehova wahosheli kutalisha kuniyi nyisumba nindi: “Yakekali nyikala yenu yakupulukila.” (Yosh. 20:2, 3) Yehova wakeñeleña wanyi nindi muntu wunajahañani amusompeshi cheñi, nawa hiyetejeleña mukwakutenda mashi kwiñila mumusumba nakujaha ona muntuku. Dichi itunduka wachinineña wanyi kumujaha. Yehova wamukiñileña hampinji yadiñayi mumusumba. Aka hikadiña kaleya kakubataminaku. Musumba wamukwashileña kuzata, kukwasha amakwawu nikumukalakela Yehova mukuwunda. Mwamweni, washakamimineña chiwahi namuzañalu!
Kuhwelelenu nenu Yehova wanakenaña antu (Talenu maparagilafu 14-16
14. MukwaKristu wunabalumuki mumuchima watela kukuhwelela nindidi?
14 Antu jaNzambi amakwawu avulumunahu dehi ilaña abalumuka mumuchima atiyiña neyi adi “mukaleya” muloña wanshidi yakoñeliwu, nikutiya neyi kwiji Yehova hakavulamena Masamu 103:8-12.
nshidi jawu jakoñeliwuku. Neyi dichimwatiyaña, mwani mwatela kwiluka nenu Yehova neyi nayanakeni, dikwila nawu chinahiti. Daniel itwatena hakusambila niyena dichatiyiliyi. Hanyima yakwila aeluda anamufumbi nikumwolola wahosheli kutalisha hachinleji chindi nindi: “Nekalili wakasunuka. Chelili muloña wami anawusompi dehi nalekeli kudinka nyiloña. Neyi anakwanakeni, dikwila nawu chinahiti. Neyi chahoshayi Yehova nindi, wafumishaña nyiloña yetu nakuyitwala kwakulehi. Watela kuyimona cheñiku.” Itunduka neyi wudi mumusumba wakubatamina hadiña nakwakamena nindi mukwakutenda mashi wukumwendelaku. Munjila yoyimu, Yehova neyi natwanakeni nshidi jetu, hitwatela kutiya woma netu nakukeña njila yakutusompeshelamu cheñi nanshidi yitwakoñeliku.—Tañenu15, 16. Mudimu wukwetiyi Yesu hamu neyi Nkuuli nawa Kapristu Muneni wunateli kuyikwasha ñahi kukuhwelela muluwi lwaNzambi?
15 Etu tuneluki yuma yayivulu yikuletesha tukuhweleli netu Yehova wukututiyila luwi kubadika chakuhweleliwu aIsarela. Pawulu washimwini chatiyiliyi hanyima yakukañanya kumwovwahila Yehova, wahosheli nindi: “Namusakilili Nzambi kuhitila mudi Yesu Kristu Mwanta wetu!” (Rom. 7:25) Hela chakwila Pawulu walwishileña nanshidi niyitoñojoka yatama yayuma yakoñeliyi, nawa yadanakeneniyi, wakuhweleleli nindi Nzambi namwanakeni kuhitila mudi Yesu. Yesu nkuuli yetu watookeshaña chinleji chetu nikutwinka kuwunda. (Heb. 9:13, 14) Chineli hiKapristu Muneni, “yena nateli nikwamwina chikupu antu amusolomokaña Nzambi kuhitila mudi yena, muloña yena wahandaña mpinji yejima kulonda yayilembeleleñaku.” (Heb. 7:24, 25) Neyi kapristu muneni wadiña nakuyikolesha aIsarela nindi nshidi yawu akuyanakena, dikwila nawu Kapristu Muneni, Yesu wukutukolesha etu nindi anateli kututiyila “wushona niluwi lwasweja lwakutukwasha hampinji yatelela.”—Heb. 4:15, 16.
16 Hakwila nawu mubatami mudi Yehova, kukuhwelelenu mumulambu waYesu. Bayi mukumina dakumona kulema kwefutu danyiloña kuhitila mukukwasha antu amavuluku. Ilaña, kuhwelelenu nenu ifutu danyiloña adihaninini enu nkawenu. (Ñal. 2:20, 21) Kuhwelelenu nenu nshidi jenu anateli kujanakena kushindamena hefutu danyiloña. Nawa kuhwelelenu nenu ifutu danyiloña dayinka kuchiñeja kwawumi wahaya nyaaka. Mulambu waYesu hichawaana chayinkayi Yehova.
17. Muloñadi chimwatela kubatamina mudi Yehova?
17 Nyisumba yakubatamina yamwekeshaña luwi lwaYehova. Kuhitila muniyi ntanjikilu, Yehova wamwekesha kulema kwawumi, mudimu wazatañawu aeluda hakutukwasha, chuma chatela kwilayi muntu wunabalumuki mumuchima nichatunateli kukuhwelela chikupu netu Yehova natwanakeni. Komana munakubatama mudi Yehova? Kwosi iluña dadiwahi kubadika idiku! (Mas. 91:1, 2) Muchibaaba chinalondelihu, shinshikenu nyisumba yakubatamina chiyinateli kutukwasha kwimbujola wuñanji niluwi lwaYehova.
^ para. 10 Kwesekeja namukanda wumu wawaYudeya, chisaka chamuntu wunajahani chamaposu chamulondeleleña kumusumba wakubatamina.