1, 2. (a) Ambuña aNzambi atalilaña isomwinyi? (b) Yumanyi yatukwashaña kusha maana hesomu detu? (Talenu mwevulu wakutachikilahu.)

KUFWANA kapostolu Pawulu, akwaKristu awayishewa makonu akweti kuchiñeja kwakutambwila “wufwetu wamutambi wamwiwulu waNzambi.” (Fwi. 3:14) Achiñililaña kuzatila hamu naYesu Kristu muWanta windi wamwiwulu kulonda akakwashi antu kwikala awanina. (Chim. 20:6) Nzambi nakwashi awantu kwikala nakuchiñeja kwakuwahi. Anyikoku acheñi niwena akweti kuchiñeja kwacheñi. Anakutalila kutambwila isomu dawumi wahaya nyaaka hamaseki, iku kuchiñeja nikwena kwakuwahi!—2 Pet. 3:13.

² Kapostolu Pawulu wayikwashili akwawu akwaKristu kwikala ashinshika kulonda akatambwili isomu dawu. Wayikolesheli nindi: “Toñojokenuña hayuma yamwiwulu.” (Kol. 3:2) Ateleleli kusha maana hakuchiñeja kwawu kwakutambwila wuswana wawu wamwiwulu. (Kol. 1:4, 5) Mwamweni, kutoñojoka  hayuma yakayililayi Yehova antu jindi kwakwashaña ambuña aNzambi kusha maana hesomu dawu, chili damwiwulu hela dahamaseki.—1 Kor. 9:24.

3. Pawulu wayisoñamishili akwawu akwaKristu hayumanyi?

³ Pawulu wayisoñamishili cheñi akwawu akwaKristu hayuma yinateli kuyikañesha kutambwila isomu dawu. Chakutalilahu, wasonekeleli chipompelu chamuKolosi kutalisha hadi akwaKristu akutwamba akeñeleña nawu ayitiyi kuwaha nanyidimu yaNshimbi chatela amukuhweleli Kristu. (Kol. 2:16-18) Pawulu wahosheli cheñi hakukala kunakumwekana makonu kunateli kutukañesha kutambwila isomu. Chakutalilahu, walumbulwili chitunateli kukaana yilwilu yawuvumbi, chakumanisha kukala nawakwetu akwakwitiya nichakumanisha kukala kwamuchisaka. Iku kufumba kunateli kutukwasha ninetu makonu. Dichi, tuhanjekenu hakufumba kwaPawulu kudi mumukanda wayisonekeleliyi Akolosi.

4. Yilwilu yawuvumbi yinateli kutukañesha ñahi kutambwila isomu?

⁴ Hanyima yakuyanukisha amanakwindi hakuchiñeja kwawu kwakuwahi, Pawulu wayisonekeleli nindi: “Dichi, jahenu yiidi yenu yamujimba yidi hanu hamaseki mwamwekenaña yilwilu yatama, yidi neyi wuvumbi, wuzondu, mpwila yakutiya wuvumbi yakubula kudiyuula, kufwila kwatama, nilwisu.” (Kol. 3:5) Yilwilu yakufwila wuvumbi yatama yinateli kutukañesha kufwila yuma yakuspiritu. Manakwetu wumu welili wuvumbi chamufuntishiliwu muchipompelu wahosheli nindi: “Nelili nami nili he-e, naluwañesha dehi.”

5. Tunateli kudihemba ñahi neyi tumona kukala?

⁵ Twatela kudihemba sweje-e neyi tumona kweseka kunateli kutuletesha kufumpa nshimbi jaYehova. Chakutalilahu, antu anakudiluka atela kutondolwela yilwilu yidi neyi kudikwata kwata, kudifufwa nikwikala kumaluña ankawawu. (Yish. 22:3) Kukala kukwawu kunateli kumwekena neyi mukwaKristu yaya mubizinesi hela neyi nakuzata namuntu wabula kwikala mwinikwindi. (Yish. 2:10-12, 16) Neyi mwikala mukukala kwamuchidiwu, dimwekeshenu nenu mudi Chinsahu chaYehova, ikalenu nayilwilu yayiwahi nawa ilukenu nenu neyi mukenkama mukufuma yuma yatama. Tunateli cheñi kwikala mukweseka neyi tunazeyi hela tunaneñi. Mpinji yamuchidiwu, yinateli kutuletesha kutachika kukeña wukwashu. Tunateli kuzeya muyitoñojoka chakwila tukulomba hela kutambwila wukwashu kudi muntu wudi wejima. Neyi chuma chamuchidiwu chiyimwekenahu dehi, lombenu wukwashu kudi Yehova nikudi antu jindi kulonda mubuli kushalahu isomu.—Tañenu Masamu 34:18; Yishimu 13:20.

6. Neyi tunakutonda yisela, chumanyi chitwatela kwanuka?

⁶ Hakwila nawu tujahi kufwila kwatama, twatela kukaana yisela yawuvumbi. Makampani ayisela adiku makonu, adi nayilwilu neyi yadiña muSodoma naGomora. (Yuda 7) Akulumpi jamakampani akojejaña yilwilu yatama kuhitila mukumwekesha yilwilu yawuvumbi neyi yatelela nawa kwosi yuma yatama yafumañamu. Bayi tweseka hela hanti kutala yisela yamuchidiwuku. Twatela kutonda yisela yayiwahi yikubula kutukañesha kusha maana hakutalila isomu dawumi.—Yish. 4:23.

7. Kukalanyi kutunateli kumona muchipompelu chawakwaKristu?

⁷ Wejima wetu tukwiteja netu kwikala muchipompelu chawakwaKristu hikukooleka  kwakweni. Kudiza Bayibolu hakupompa kwetu nikukeña kutwadimwekeshelaña wumu namukwawu kwatukwashaña kusha maana hesomu detu. Hela chochu, mpinji yikwawu kubula kutiyashana kwaleñelaña chipompelu kubula kwikala mukuwunda. Neyi tukañanya kumanisha iku kukala, tunateli kutachika kudihembela nkunyi.—Tañenu 1 Petulu 3:8, 9.

8, 9. (a) Yilwilwinyi yinateli kutukwasha kutambwila isomu? (b) Chumanyi chikutukwasha kuleta kuwunda neyi mukwetu mukwaKristu yatuneñesha?

⁸ Tunateli kuleka ñahi kuhemba nkunyi kulonda yibuli kutukañesha kutambwila isomu? Pawulu wayilejeli akwaKolosi nindi: “Chineli mudi antu atondawu kudi Nzambi, ajila nawa akeñayi, vwalenu muchima wawushona, luwi, kudizoza, kwovwaha nikudiwunjika. Ditiyililenuña wumu namukwawu nikudanakena wumu namukwawu chakufuma kumuchima hela chakwila kudi muntu wudi namuloña namukwawu. Neyi chayanakeneniyi Yehova chakufuma kumuchima, ninenu nawa mwatela kwila mwomumu. Ilaña chabadika hayuma yejimiyi, vwalenu kukeña, muloña dikwanuñañeshaña chikupu antu mumpaanda yimu.”—Kol. 3:12-14.

⁹ Kukeña niluwi kunateli kutukwasha kudanakena wumu namukwawu. Chakutalilahu, neyi mukwetu mukwaKristu yatuneñesha namazu anahoshiyi hela nayuma yineliyi, twatela kwanuka mpinji yitwahosheli hela yitwelili chuma chatama. Komana twatiyaña wanyi kuwaha chatwanakeneniwu kudi amanakwetu niahela hayuma yitwelili? (Tañenu Mukwakutañisha 7:21, 22.) Sweje-e dinu, twasakililaña haluwi lwaKristu lwamwekesheliyi hakutunuñañesha mukudifukula kwalala. (Kol. 3:15) Wejima wetu twakeña Nzambi yowumu, twashimwinaña nsañu yoyimu nawa twavula kumona kukala kwokumu. Tunateli kuleta kunuñañana hakachi kawakwaKristu nikusha maana hesomu dawumi neyi tudikeña nikudanakena wumu namukwawu.

10, 11. (a) Ichima dataminadi? (b) Tunateli kwila ñahi hakwila nawu ichima dibuli kutukañesha kutambwila isomu?

¹⁰ Yakutalilahu yakusoñamisha yamuBayibolu yamwekeshaña nawu ichima dinateli kutukañesha kutambwila isomu. Chakutalilahu, Kena wamutiyilili ichima manakwindi Abeli nawa wamujahili. Kora, Datani Abirami amutiyilili Mosi ichima nawa adikañili nindi. Nawa, Mwanta Sawulu wamutiyilili Davidi ichima nayuma yelileñayi nawa wakeñeleña kumujaha. Dihafuma Izu daNzambi kuhosha nawu: “Kwejima kudi ichima niyikonkojola, kwenoku kwekalaña nikuluwañeshewa niyuma yawuzondu yejima.”—Yak. 3:16.

¹¹ Neyi twikala nakukeña niluwi mumuchima wetu, hitukwikala nechimaku. Izu daNzambi dahosha nawu: “Kukeña kwadiwunjikaña nawa kwatiyilaña luwi. Kukeña hikwatiyilaña ichimaku.” (1 Kor. 13:4) Hakwila nawu tubuli kwikala nechima, twatela kumona yuma neyi chayimonañayi Nzambi, kumona amanakwetu nawahela neyi yiidi yamujimba wumu, dikwila nawu chipompelu chawakwaKristu. Chumichi chikutukwasha kukeña akwetu, kwesekeja nakufumba kwonenewa kwakwila nawu: “Neyi chiidi chimu achilemesha, dikwila nawu yiidi yikwawu yejima yazañalelaña hamu nachu.” (1 Kor. 12:16-18, 26) Dichi, chatela tutiyi ichima, tukuzañalala neyi akwetu anatambwili nkisu. Shinshikenu cheliliyi Jonatani mwana kaMwanta Sawulu. Hatiyili ichima chelili Davidi amutondi nawu wakaswana wantaku. Ilaña wamukolesheli Davidi. (1 Sam. 23:16-18) Kwila twikala naluwi nikukeña neyi Jonatani nehi?

12. Kufumbanyi kwamuNsona kunateli kutukwasha kutambwila isomu hamu neyi chisaka?

¹² Kuzatisha yishina yamuBayibolu kunateli kuleta kuwunda nimuzañalu muchisaka nawa kukuyikwasha kutambwila isomu. Kufumbanyi kwamuNsona kwafumbiliyi Pawulu yisaka yawakwaKristu amuKolosi? Wayifumbili nindi: “Enu ambanda, ovwahilenuña anfumu jenu, muloña dichuma chatelela mudi Mwanta. Enu amayala, keñenuña añodi jenu nawa bayi muyilendumokelañaku. Enu anyana, ovwahilenuña anvwali jenu muyuma yejima, muloña chumichi dichamutiyishaña Mwanta kuwaha. Enu atata jawantu, bayi muhilishaña anyanenuku, kulonda abuli kudihomba.” (Kol. 3:18-21) Chakadi nikujina, kuzatisha kufumba kwaPawulu kwonenewa kunateli kukwasha amayala, ambanda nianyana.

13. Muhela mukwaKristu nateli kumukoka ñahi nfumwindi wabula kwitiya?

¹³ Neyi mwasumbuka nawa nfumwenu wabula kwitiya nakuyikabisha, mukwila ñahi? Komana mukuwahisha yuma neyi mumutadikishaña hayilwilu yindi? Hela chakwila wukwila yuma yimunakukeña, komana munateli kumubalumuna nakwinza muchalala? Kwakulehi. Ilaña neyi mwovwahilaña wumutu windi, munateli kuleta kuwunda muchisaka, mukumushimeka  Yehova nawa munateli kumukoka nfumwenu mukudifukula kwalala, nawa wejima wenu munateli kutambwila isomu.—Tañenu 1 Petulu 3:1, 2.

14. Iyala mukwaKristu wukweti mumbanda wabula kwitiya wunakubula kumulemesha, watela kwiladi?

¹⁴ Indochu neyi ñodenu hetiyaku nawa nakuyovwahila wanyi, mukwila ñahi? Komana mukumukanjikija nenu yayilemesheña kuhitila mukumuzuwila nenu mudi mwanta hetala? Himukwila mwenimuku. Nzambi wakeñaña nindi mumwimbujoleña Yesu kuhitila mukuzatisha wumutu wenu munjila yakukeña. (Efwe. 5:23) Yesu wazatishili wumutu windi chiwahi kuhitila mukukeña chipompelu chindi mukudiwunjika. (Luka 9:46-48) Iyala nateli kumukoka ñodindi mukudifukula kwalala neyi yamwimbujola Yesu.

15. Iyala mukwaKristu wamwekeshaña ñahi kukeña kudi ñodindi?

¹⁵ Amayala ayileja nawu: “Keñenuña añodi jenu nawa bayi muyilendumokelañaku.” (Kol. 3:19) Iyala wukweti kukeña walemeshaña ñodindi kuhitila mukutiyilila yitoñojoka nikulemesha yuma yinakuhoshayi. (1 Pet. 3:7) Hela chakwila mpinji yikwawu wukwiteja wanyi yuma yejima yikuhoshayi, ilaña wukumwihulaña neyi nakufuukula. (Yish. 15:22) Iyala wukweti kukeña hakanjikijaña ñodindi kumulemeshaku ilaña welaña yuma yikuleñela amulemeshi. Iyala wakeña ñodindi nianyanindi wekalaña nachisaka chamukalakelaña Yehova namuzañalu nawa akatambwili isomu dawumi.

16, 17. Enu atwansi, munateli kwila ñahi hakwila nawu mubuli kusweja kuhilila anvwali jenu?

¹⁶ Indi neyi wudi kampululu nawa wunakutiyañana wanyi nawanvwali jeyi akwaKristu nawa wumona neyi anakukukañesha kwila yuma yimu, wukwiladi? Neyi wukuhila, chikukukojeja kumona neyi kumukalakela Yehova kwatama. Nawa neyi wuleka kumukalakela Yehova muloña wakuhila, wukumona neyi kwosi muntu wakwakamenaña chikupu kubadika chipompelu nianvwali amwakamaña Nzambi.

¹⁷ Neyi anvwali jeyi abula kukufumba, wukutoñojoka neyi akwakamenaña? (Heb. 12:8) Hadaha kufumba kwakufumbawu kudi anvali jeyi dikwakuhilisha. Chatela wuhili nachakufumbawu, watela kwiluka neyi kudi chuma chaletesha akufumbi. Dichi diwunjiki nawa zataku nañovu kulonda wubuli kuhila nankashi nachinakuzuwiliwu. Izu daNzambi dahosha nawu: “Waanzaña mazu indi wukweti kwiluka; niwadiwunjika mumuchima himuntu wakashinshi.” (Yish. 17:27) Zataku nañovu kulonda wileña yuma neyi muntu wapama watambwilaña kufumba munjila yakuwunda, chakadi kutiya kutama njila mwakufumbilawu. (Yish. 1:8) Hikukooleka kwakweni kwikala nawanvwali akwakwitiya amukeña chikupu Yehova. Akukukwasha chikupu kulonda wukatambwili isomu dawumi.

18. Muloñadi chimukufwila kusha maana hesomu?

¹⁸ Isomu ditukambwila dadiwahi nankashi, chili dawumi wakafwaña mwiwulu hela dawumi wahaya nyaaka hamaseki. Hikuchiñeja kwalala kwatushikayi Nleñi yomweni. Nzambi wahosha haParadisa yahamaseki nindi: “Iseki dejima dakawanina kumwiluka Yehova.” (Isa. 11:9) Ejima akashakamaña hamaseki akayidizisha kudi Nzambi. Twatela kuzata nañovu kulonda tukatambwili idi isomu. Dichi shenu maana hayuma yakanayi Yehova, bayi mwiteja chuma chidi chejima chiyikañeshi kutambwila isomuku.