Munateli Kwinjilila Ñahi Muchipompelu Chachiha?
ALLEN * wahosheli nindi: “Natiyileña woma chitwenjili kunu. Nelukili wanyi neyi nikwikala nawamabwambu.” Allen nenjilili dehi muchipompelu chachiha hadi makilomita akubadika 1,400 kufuma kumukala wawu.
Neyi mubukila muchipompelu chacheñi, ninenu munateli kutiya woma. Chumanyi chinateli kuyikwasha kwinjilila? Yumanyi yimwatela kwila neyi chinakuyikalila kwinjilila kubadika chimwakuhweleleli? Indi neyi yenu munakubuuka wanyi, munateli kukwasha ñahi antu anabukili muchipompelu chenu?
MUNATELI KUHIMPA ÑAHI KULONDA MWINJILILI?
Toñojokenu hanichi chakutalilahu: Mutondu neyi awutuntulula, wakalaña hakwila nawu wukwati. Hakuwutuntulula, kakavulu nyiji ayiketolaña kulonda awusendi chiwahi. Neyi anawutuntululi dehi, mutondu watachikaña kumena nyiji yacheñi. Munjila yoyimu, chinateli kumukalila muntu neyi yabuukila muchipompelu chacheñi. Chipompelu chimwadiña, mwameneni “nyiji” chineli mwadiña nawamabwambu nindandanda yayiwahi yakuspiritu. Ichi dinu mwatela kumena nyiji yacheñi kulonda mwileña chiwahi. Chumanyi chikuyikwasha kwila mwenimu? Kuzatisha yishina yamuNsona. Tushinshikenu hayishina yimu.
Muntu watañaña Izu daNzambi mpinji yejima wudi neyi “mutondu wakutumba kutupila twamenji, wasoñaña nyikabu yindi hachilaaka chindi, mafu indi hiyalepukañaku; yejima yakwilayi yikulumbuluka hohu.”—Mas. 1:1-3
Neyi chochiwanwaña mutondu menji hakwila nawu wutwalekihu kuhanda, mukwaKristu watela kutañaña Izu daNzambi mpinji yejima hakwila nawu yekali nawubwambu wakola naNzambi. Dichi, twalekenuhu kutaña Bayibolu nikuya nakupompa mpinji yejima. Twalekenuhu kudifukula kwachisaka nikudiza kwahalwenu. Neyi mukwila mwenimu, mukutwalekahu kwila yuma yejima yakuspiritu yimwelileña muchipompelu chimwadiña.
“Watukumwinaña akwawu mumatempawu akamutukumwina nimwindi nawa.”—Yish. 11:25.
Mukwinjilila swayi neyi muyaña nakushimwina. Kevin eluda mukwaKristu wahosheli nindi: “Chuma chatukwashili ami niñodami kwinjilila twashikeneni kuzata wupayina wakukwasha muchipompelu. Twelukili swayi amanakwetu, apayiniya niluña dakushimwina. Roger wabukilili kwiluña hadiña makilomita 1,600 wahosheli nindi: “Chuma chachiwahi chatela kwilayi muntu hakwila nawu yenjili muchipompelu chachiha, hikuya nakushimwina mpinji yejima.” Cheñi, zatenuñaku nyidimu yahachipompelu yidi neyi, kuwahisha Itala daWanta, kuhana mpanji neyi yomweni hosi, kusendaku antu amakwawu mumotoka hakuya nakupompa kulonda aeluda amoni nawu mwadihana kuzata mudimu wudi wejima. Neyi amanakwetu niahela amona muntu wamuha wudi namuchima wakudihana, akumutambwila chiwahi.
“Enzununenu chikupu nyichima yenu.”—2 Kor. 6:13.
Ikalenu akasunuka nawamanakwenu ejima. Hanyima yakwila Melissa niavwali jindi anabukili dehi muchipompelu chacheñi, washili maana hakwikala namabwambu amaha. Wahosheli nindi: “Twahanjekeleña hachipompelu henohu kanda tupompi nihanyima
yakupompa. Chumichi chatukwashili kuhanjeka nsañu yayivulu bayi kudimusha hohuku.” Chumichi chakwashili cheñi chisaka kwiluka majina swayi. Kubombelahu, adilukili nawamanakwawu chikupu kuhitila mukwikala nachisambu, chakoleshaña amabwambu amaha. Wabombelelelihu nindi: “Twadinkeli manamba afoni kulonda atutemesheleña nikutuzatisha munyidimu yakuspiritu ninyidimu yikwawu.”Neyi mwakañanyaña kuhanjeka nawantu amaha, mwatela kutachikila mutuyuma twanyanya. Chakutalilahu munateli kutumba chimwemweta. Chimwemweta chikukokola akwenu kwinza kudenu. Rachel wayili kwiluña dacheñi wahosheli nindi: “Nekala nansonyi. Mpinji yikwawu nadikanjikijaña kuhosha nawamanakwami niahela muchipompelu chetu. Nakeñakeñaña muntu wunashakami nkawindi Mwitala daWanta, wunakubula kuhanjeka namuntu. Muntu wamuchidona wudi nansonyi neyi ami.” Kwila mufwila kuhanjeka namuntu wamuha, henohu kupompa kanda hela hanyima yakupompa nehi?
Munjila yikwawu, mukutiya kuwaha kuwana antu amaha munyilungu yantesha. Ilaña “wuñenji” wayaña nakumana mukuhita kwampinji. Neyi munenjilili dehi, twalekenuhu kukwata amabwambu amaha.
Mutondu neyi awutuntulula, wakalaña hakwila nawu wukwati, ilaña neyi anawutuntululi dehi, watachikaña kumena nyiji yacheñi
HAHITAÑA MPINJI HAKWILA NAWU MWINJILILI
Nyitondu yikwawu yashimbulaña hakwila yishimati nyiji hanayitumbiwu. Munjila yoyimu, bayi neyi antu ejima ashikenaña dakwinjilila muchipompelu chachihaku. Neyi mwabukili dehi ilaña munakukañanya kwinjilila, neyi muzatisha iyi yishina yamuBayibolu kukuyikwasha.
“Bayi tuleka kwila yuma yayiwahiku, muloña mumpinji yatelela tukamuna neyi tubula kuzeya.”—Ñal. 6:9.
Hahitaña mpinji yeneni hakwila nawu muhimpi. Chakutalilahu, amishonali atumañawu nakuzatila kwakulehi hahitaña yaaka yayivulu hakwila nawu akahempuli kwituña dawu. Kwila mwenimu kwayikwashaña kukolesha wubwambu nawamanakwawu nawa chayikwashaña kwinjilila chisemwa chanoku kwiluña.
Alejandro, wunabukili kumaluña amavulu weluka nindi hahitaña mpinji hakwila nawu muntu yenjilili. Wahosheli nindi: “Chitwabukili kakukumishaku ñodami wahosheli nindi, ‘Amabwambu jami anashali muchipompeli chitwadiña.’” Wamwanukishili nindi dichahosheliyi cheñi yaaka yiyedi yahitilihu hampinji yabukiliwu. Ilaña haniyi yaaka yiyedi, washili maana hadi akwawu nawa wakwatili wubwambu nawantu amaha.
“Bayi wila neyi, Mafuku akusambila chanabadikuwu mafuku anu chinafumi hankaku? Muloña hansañu iyi hiwudi nakwihula chamaanaku.”—Mukwa. 7:10.
Bayi mwesekejaña chipompelu chenu chachiha nachipompelu mumwadiñaku. Chakutalilahu, hadaha amanakwenu muchipompelu mumunayi ahoshahosha kubadika kumwadiña. Shenu maana hayilwilu yawu yayiwahi neyi chochimwakeñaña nenu niwena eleña. Antu amaha abuukaña amonaña nawu kubuuka kwawu kunayileteshi adihuli nawu, ‘Komana mwalala nakeña amanakwami ejima’?—1 Pet. 2:17.
“Twalekenuhu kukeñakeña, mwakawana.”—Luka 11:9.
Twalekenuhu kulomba wukwashu. David eluda wahosheli nindi: “Bayi mudikoleshela yumaku. Kudi yuma yayivulu yitwatela kwila nawukwashu waYehova. Lombelenuhu.” Rachel, itwashimuna hakusambila wahosheli nindi: “Neyi ami nanfumwami tunamoni netu tunakwambu nachipompelu, twalembeleña kudi Yehova netu, ‘Yehova tukwashi kulonda tumoni neyi tunakwila yuma yinakuletesha amanakwetu abuleña kudikunda nanetu.’ Dichi twatachikili kwikala hamu nawamanakwetu hadi mpinji yayeneni.”
Enu anvwali, neyi anyanenu chinakuyikalila kwinjilila, lombelenu hamu nawu hakukala kunakumonawu. Yikwashenu ekali namabwambu amaha kuhitila mukutambika amanakwenu kwitala.
KWASHENU AÑENJI KULONDA EKALI AKASUNUKA
Chumanyi chimwatela kwila hakwila nawu mukwashi amaha anenzi muchipompelu chenu? Fwilenu kukwata nawu wubwambu hampinji yinashikiwu. Hakwila nawu mwili mwenimu, fwikijenu neyi iyenu mwadiña ñenji nawa ayilila yuma yamuchidiwu. (Mat. 7:12) Kwila mutambikaku antu amaha hakudifukula kwenu kwachisaka hela kutala progilamu yaJW Broadcasting yahakakweji hamu nawu nehi? Kwila muya nawu mumudimu wakushimwina nehi? Neyi mukudiila hamu nawu yakuda, akatwalekahu kwanuka chisambu chenu. Munateli kukwasha cheñi amaha munjilanyi?
Carlos wahosheli nindi: “Chitwashikili muchipompelu chachiha, muhela watulejeli mastolu akweti wuseya wawuwahi. Chumichi chatukwashili nankashi.” Antu anafumi kumaluña acheñi atiyaña kuwaha neyi muyileja chimwavwalaña mumpinji yankanza, yamashika niyanvula. Munateli cheñi kuyikwasha kwiluka chakushimwina kuhitila mukuyileja chekala antu amwiluña denu niyuma yakuhwelelawu.
CHAKEÑEKAÑA KUZATA NAÑOVU HAKWILA NAWU MWINJILILI
Allen, itwatena hakutachika kwachinu chibaaba, nashakami kubadika hadi chaaka chimu muchipompelu mwabuukililiyi. Wanukaña nindi: “Nazatili nañovu hakwila nawu niluki amanakwami niahela. Chayinu mpinji adi tuhu neyi chisaka chami nawa natiyaña kuwaha.” Allen wamweni nindi wajimbesheli wanyi amabwambu jindi hela chakwila wabuukili. Ilaña, wekalili namabwambu amaha nawa akutwalekahu kwikala amabwambu jindi.
^ para. 2 Majina amakwawu anayihimpi.