1. Kufumbanyi kwayisonekeleliyi Pawulu akwawu akwaKristu? (Talenu mwevulu wakutachikilahu.)

KAPOSTOLU Pawulu watela wayisonekeleli akwaKristu amuKolosi mukanda kumakumishilu ayaaka yamukasiliwu muRoma hela kwakwihi na 60-61 C.E. Wayilejeli kulema ‘kwakutiyishisha yuma yakuspiritu.’ (Kol. 1:9) Pawulu wahosheli cheñi nindi: “Babalenu, kwakenda kekala muntu wukuyitwala muwunkoli kwesekeja namaana awantu, nintañishilu yamukunkulwayi yamwaya tushidikilu twawantu, nimwaya yuma yawansi yamukaayi, ilaña bayi neyi kwesekeja naKristuku.” (Kol. 2:4, 8) Pawulu walumbulwili chahosheleliyi nindi yitoñojoka yikwawu yatama nichaleteshaña yitoñojoka yamukaayi yikokoleña antu abula kuwanina. Chakutalilahu, yinateli kuletesha muntu kutoñojoka nindi wukweti maana nawa nindi wabadika akwawu. Pawulu wasonekeli iwu mukanda kulonda yakwashi amanakwetu kukaana yitoñojoka niyilwilu yamukaayi.—Kol. 2:16, 17, 23.

2. Muloñadi chitukushinshikila hayitoñojoka yamukaayi?

 ² Yitoñojoka yamukaayi yatukojejaña kudiwula hela kusekesha nshimbi jaYehova nawa yazeyeshaña chikuhwelelu chetu chovu-chovu. Makonu, wejima wetu tweluka yitoñojoka yamukaayi. Muloña ayimwekeshaña hama TV, haintaneti, kumudimu nikushikola. Muchinu chibaaba, tukuhanjeka hayuma yitwatela kwila kulonda tubuli kuluwankana nayitoñojoka yatama. Tukushinshika hayitoñojaka yitanu yamukaayi nichitunateli kuyikaana.

3. Antu amavulu ahoshaña nawudi, nawa muloñadi?

³ “Nateli kwikala muntu wamuwahi hela chakwila namukuhwelela Nzambi wanyi.” Mumatuña amavulu, antu ahoshaña nawu amukuhwelela wanyi Nzambi; dikwila nawu hiyetiyaku. Hadaha kanda atoñojokeñahu dehi nawu kwekala Nzambi, ilaña ayikokolaña nayitoñojoka yakwila nawu anateli kwila yuma yinakeñiwu. (Tañenu Masamu 10:4.) Amakwawu adimonaña nawu asweja maana chahoshañawu nawu, “Nateli kushakama hohu chiwahi chakadi kuluwañesha hela chakwila hinamukuhwelela Nzambiku.”

4. Tunateli kuhanjeka ñahi namuntu wahoshaña nindi hikwekala Nleñiku?

⁴ Komana yitoñojoka yawantu abula kwitiya yakwila nawu hikwekala Nleñiku, yalala? Muntu nateli kuluwankana neyi yasandujolaña nsañu yahosha hasayansi kutalisha kwafuma wumi. Henohu ñakwilu tuhu yapela. Neyi itala dakeñekaña wakudituña, indi yileñaleña yikweti wumi? Tumasewuzi twanyanya twekala muyileñaleña yahamaseki twazataña mudimu weneni kubadika wazataña itala. Muloña twena twasemununaña ilaña itala dasemaña wanyi. Awa masewuzi ahembaña nsañu nawa adituñululaña. Hinyi waleñeli awa masewuzi azataña muniyi njila? Bayibolu yakula nawu: “Itala dejima kudi muntu wadituñaña, ilaña waleñeli yuma yejima, hiNzambi.”—Heb. 3:4.

5. Mukuhosha nenudi kutalisha hayitoñojoka yakwila nawu muntu nateli kwiluka yuma yayiwahi chakadi kumukuhwelela Nzambi?

⁵ Tunateli kuhanjeka ñahi namuntu wahoshaña nindi nateli kwiluka yuma yayiwahi chakadi kumukuhwelela Nzambi? Izu daNzambi dahosha nawu antu abula kwitiya eluka yishina yimu yayiwahi. (Rom. 2:14, 15) Chakutalilahu, anateli kulemesha nikukeña anvwali jawu. Indi antu akaanaña kukuhwelelela Nleñi akutwesha ñahi kushakama chiwahi chakadi kwiluka washiliku yishina yakwila yuma yayiwahi niyatama? (Isa. 33:22) Antu amavulu makonu aneluki nawu yuma yatama yinakumwekana hamaseki yinakumwekesha nawu anakukeña wukwashu waNzambi.(Tañenu Yeremiya 10:23.) Dichi bayi tutoñojoka netu muntu nateli kwiluka yuma yayiwahi chakadi kumukuhwelela Nzambi nikulondela yishina yindiku.—Mas. 146:3

6. Antu amavulu amonaña ñahi kwitiya?

⁶ “Munateli kwikala namuzañalu hela chakwila mwetiya wanyi.” Antu amavulu mukaayi adi nayitoñojoka yamuchidiwu muloña amonaña nawu kwitiya kwamukunkulwayi. Cheñi, kwitiya kwakuvulu kwatañishaña antu kulonda abuli kumwiluka Nzambi nawu kwekala kesi kahelu, kwatambulaña mali awantu nawa kwatañishaña nsañu yamapolitiki. Dichinaleteshi antu amavulu kutoñojoka nawu anateli kwikala namuzañalu hela chakwila hiyetiyaku. Antu amuchidiwu ahoshaña nawu, “Natela kudiza hadi Nzambi ilaña hinatela kwikala mukwitiyaku.”

7. Kudifukula kwalala kwaletaña ñahi muzañalu?

⁷ Mwalala muntu nateli kwikala namuzañalu chakadi kwikala mukwitiya? Chakadi nikujina,  muntu nateli kwikala namuzañalu neyi wukubula kwikala mukwitiya kwakutwamba, ilaña muntu wukwikala namuzañalu waweni neyi yekala nawumbwambu wawuwahi naYehova, “Nzambi wamuzañalu.” (1 Tim. 1:11) Yuma yejima yelañayi Nzambi yatukwashaña. Ambuñindi ekala namuzañalu muloña akwashaña antu amakwawu. (Yilw. 20:35) Chakutalilahu, talenu kudifukula kwalala chikwaletaña muzañalu muchisaka. Kudifukula kwalala kwatudizishaña kulemesha mwinikwetu, kushikija chikaninu chetu chawulu, kubula kwila wujila, kukulisha anyana munjila yayiwahi nikumwekesha kukeña kwalala. Chafumañamu, kudifukula kwamuchidiwu kwanuñañeshaña antu nikwikala namuzañalu muchipompelu nimukaayi kejima.—Tañenu Isaya 65:13, 14.

8. Tunateli kuzatisha ñahi Matewu 5:3 neyi tunakuhanjeka namuntu hanilu lwihu, Chumanyi chayiletelaña antu muzañalu?

⁸ Tukuhosha netudi hayitoñojoka yamukaayi yakwila nawu muntu nateli kwikala namuzañalu chakadi kumukalakela Nzambi? Toñojokenu hanawa malwihu, Chumanyi chayiletelaña antu muzañalu? Antu amakwawu nyidimu, yisela hela kuhema dikwayiletelaña muzañalu. Amakwawu kwakamena chisaka hela mabwambu kwayikwashaña kwikala namuzañalu. Yuma yejimiyi yinateli kututiyisha kuwaha, ilaña wumi wetu wuketi nkeñelu yaletaña muzañalu wayaha nyaaka. Kwambukaku nawatunyama, etu tunateli kumwiluka Nleñi yetu nikumukalakela nakashinshi. Atuleña munjila yakwikala namuzañalu neyi tumwiluka Nleñi. (Tañenu Matewu 5:3.) Chakutalilahu, antu ekala mukudifukula kwalala ekalaña namuzañalu nawa ayikoleshaña neyi anapompi nakudifukula kudi Yehova. (Mas. 133:1) Atiyaña cheñi kuwaha kwikala hakachi kawamanakwetu mukaayi kejima, chihandilu chachiwahi, muzañalu nikuchiñeja.

9. (a) Yitoñojokanyi yidi mukaayi kutalisha hawuvumbi? (b) Muloñadi Izu daNzambi chidakaanishila kwila wuvumbi namuntu wabula kwikala mwinikweyi?

⁹ “Muloñadi chakaanishilawu kwila wuvumbi namuntu wabula kwikala mwinikweyi?” Antu anateli kutuleja nawu: “Muntu watela kudiluñisha chihandilu. Muloñadi chakaanishilawu kwila wuvumbi namuntu wabula kwikala mwinikweyi?” Yitoñojoka yakwila nawu mukwaKristu watela kwila wuvumbi yatama. Muloñadi? Muloña Izu daNzambi dakaanisha kwila wuvumbi. * (Tañenu 1 Atesalonika 4:3-8.) Yehova wukweti wuswa wakushaku nshimbi muloña diyi watuleñeli. Nzambi chashaku nshimbi yakwila nawu adisumbula hohu diwu atela kuhumañana chamwekeshaña nawu diyi ntanjikilu yawulu. Nzambi watwinka nshimbi muloña watukeña. Yatukwashaña nankashi. Yisaka yalondelaña nshimbi jindi ekalaña adikeña, adilemesha nawa akiñewa. Nzambi wahela antu afumpaña nshimbi jindi mumushikila.—Heb. 13:4.

10. MukwaKristu nateli kutondolwela ñahi wuvumbi?

¹⁰ Izu daNzambi datudizishaña chakutondolwela wuvumbi. Yesu washimwini nindi: “Nami muntu wejima wukutala mumbanda namesu akufwila kudikaama nindi, neli dehi nindi wujila mumuchima windi. Neyi disu deyi dachidiilu dinakukuhukesha, difumishi wudinatili kwakulehi.” (Mat. 5:28, 29) Dichi, mukwaKristu watela kutala wanyi nyevulu yanzekesi hela kutiyilila kutumina tunakuhosha hawuvumbi. Kapostolu Pawulu wayisonekeleleli akwawu akwaKristu nindi: “Jahenu yiidi yenu  yamujimba yidi hanu hamaseki mwamwekenaña yilwilu yatama, yidi neyi wuvumbi.” (Kol. 3:5) Kubombelahu twatela kuyuula yitoñojoka yetu ninhoshelu yetu.—Efwe. 5:3-5.

11. Muloñadi antu amavulu chafwililañawu nyidimu yakumujimba?

¹¹ “Mudimu wawuwahi waletaña muzañalu.” Antu amavulu atukanjikijaña kufwila nyidimu yakumujimba muchihandilu chetu. Nyidimu yaletaña mpuhu, chifulu, nimaheta. Chineli antu amavulu afwilaña nyidimu yakumujimba, mukwaKristu niyena nateli kutachika kutoñojoka munjila yoyimu.

12. Komana mwalala nyidimu yakumujimba yinateli kutuletela muzañalu?

¹² Komana mwalala nyidimu yakumujimba yinateli kutuletela muzañalu? Inehi! Anukenu nenu Satana wafwilileña kuyuula amakwawu nikuya mpuhu, ilaña chayinu mpinji wahila nawa wudana muzañalu. (Mat. 4:8, 9; Chim. 12:12) Esekejenu muzañalu wenzaña hamuloña wakukwasha antu amakwawu kumwiluka Nzambi kulonda akatambuli wumi wahaya nyaaka namudimu wakumujimba wakapinji kantesha. Kubombelahu, antu mukanu kaayi adi nachilwilu chakudibecha. Chinakuletesha antu kuditiya, kuditiyila lwisu nawa nkuminaku ‘anakukabila tuhu mpempela.’—Mukwa. 4:4.

13. (a) Twatela kumona ñahi kufwila nyidimu yakumujimba? (b) Kwesekeja namukanda wayisonekeleliyi Pawulu Atesalonika, chumanyi chamuleteleleli muzañalu waweni?

¹³ Chidi hohu chiwahi kuzata mudimu, nawa chatama wanyi kukeña mudimu wawuwahi. Ilaña bayi tusha maana hamudimu wakumujimbaku.Yesu wahosheli nindi: “Hikudi muntu wunateli kukalakela anyanta ayediku; watela kuhelahu wumu nakukeñahu mukwawu, hela wukukakelahu wumu nakusekeshahu mukwawu. Himunateli kukalakela Nzambi hampinji yoyimu niMahetaku.” (Mat. 6:24) Neyi tusha maana hakumukalakela Yehova nikudizisha antu amakwawu Izu dindi, tukwikala namuzañalu chikupu. Dicheliliyi kapostolu Pawulu. Hakusambila, Pawulu wafwilileña nyidimu yakumujimba muYudeya, ilaña wekalili namuzañalu waweni chelili yekali mukwakwilisha atumbanji nawa yamoni nsañu yaNzambi chiyahimpili chihandilu chawu. (Tañenu 1 Atesalonika 2:13, 19, 20.) Kwosi mudimu waletaña muzañalu neyi iwuku.

14. Yitoñojoka yakwila nawu antu anateli kumanisha kukala yinateli kumwekana ñahi neyi yalala?

¹⁴ “Antu anateli kumanisha kukala kwawu.” Antu amavulu mukaayi adi nayitoñojoka yamuchidiwu. Mulonadi? Neyi dimu, dikwila nawu antu hiyatela kuyilombola kudi Nzambiku nawa atela kwila yuma yejima yinakeñiwu. Cheñi, yitoñojoka yakwila nawu antu anateli kumanisha kukala yinateli kumwekena neyi yalala, muloña yileji yikwawu yinakumwekesha nawu njita, wubanji, yikatu niwuzweñi jinakukehelaku. Chileji chimu chahosheli nawu: “Chuma chinakuletesha yuma kuwahilaku muloña antu anafuukulihu kuwahisha kaayi.” Komana mazu amuchidiwu anakumwekesha nawu antu anateli kufumishahu kukala kunamoniwu hadi yaaka yayivulu? Hakwila nawu twakuli, tuhanjekenu haniku kukala.

15. Chumanyi chinakumwekesha nawu antu anakukabakana?

¹⁵ Jinjita: Majita ayedi amaneni amukaayi ajahili antu 60 miliyoni nikubadikahu. Kufuma tuhu haNjita Yakaayi Yamuchiyedi antu anatwalekihu kuzuña majita. Wunsahu washimwiniwu mu 2015, wamwekesheli nawu antu 65 miliyoni ashili matalawu muloña wanjita nimakabisha. Mu 2015 hohu, antu akushika ku 12.4 miliyoni ayipalañesheli. Wubanji: Hela chakwila wubanji wukwawu wunakehi kumaluña amakwawu, wubanji wukwawu wunakuswejelaku chikupu. Kubombelahu, antu amavulu anakuhweleli nawu majika kanwa anasweji nankashi mukaayi. Antu kwila afumishahu wubanji nehi. Yikatu: Yikatu yikwawu anakuyuuka. Ilaña chileji chamu 2013 chinakumwekesha nawu antu 9 miliyoni adi nayaaka 60 nakufunta mwishina anakufwa nayikatu yamuchima, kalepa, kansa, chikatu chakañeshaña koona nishuga. Wuzweñi: Kwesekeja naWorld Bank, atuzweñi muAfrica anakuvulilaku, mu 1990 adiña 280 miliyoni, ilaña mu 2012 ashikili 330 miliyoni.

16. (a) Muloñadi chitukuhoshela netu Wanta waNzambi hohu diwu wakafumishahu kukala kunakumonawu antu? (b) Nkiswinyi jikatambwilawu antu muWanta jashimwiniyi Isaya niñimbi yamasamu?

¹⁶ Makonu, antu anakulombola nianakuyuula matuña adi nalwisu. Mwamweni akutwesha wanyi kufumishahu majita, madombu, yikatu niwuzweñi, chiña Wanta waNzambi hohu. Talenu yuma yakelayi Nzambi. Njita: Wanta waNzambi wakafumishahu yuma yinakuleta njita yidi neyi lwisu, majika kanwa, kukeña ituña dimu, kwitiya kwakutwamba niSatana. (Mas. 46:8, 9) Wubanji: Wanta waNzambi wunakudizisha antu amavulu kudikeña nikudikuhwelela wumu namukwawu chuma chabulaña kwila nfulumendi yawantu. (Isa. 11:9) Yikatu: Yehova wakayinka antu jindi nyijimba yakola. (Isa. 35:5, 6) Wuzweñi: Yehova wakawufumishahu nawa wakayinka antu jindi maheta akuspiritu nikumujimba, akekala nachihandilu chachiwahi kubadika maheta amakonu.—Mas. 72:12, 13.

17. Munateli kukaana ñahi yitoñojoka yamukaayi?

¹⁷ Neyi mutiya antu anakuhosha nsañu yinateli kuzeyesha chikuhwelelu chenu, sandujolenu chahosha Izu daNzambi hanoyu nsañu nawa lejenumu mukwenu mukwakwitiya wapama. Shinshikenu iyi nsañu chiyinateli kuyikokola, iyi yitoñojoka chiyatamina nichimunateli kuyikaana. Mwamweni, wejima wetu twatela kudikiña kuyitoñojoka yamukaayi neyi tulondela kufumba kwaPawulu kwafumbiliyi chipompelu chamu Kolosi nindi: “Endenuña namaana kumesu awantu adi hanji . . . kulonda mwiluki chimwatela kwakula muntu-himuntu.”—Kol. 4:5, 6.