TWAKUNDEJEWAÑA nikukoleshewa neyi atumwekeshela luwi. Twatiyaña kuwaha neyi muntu yatwakamenaña. Chineli wejima wetu twatiyaña kuwaha kutumwekeshela luwi, hanu dinu tunateli kwikala ñahi nanichi chilwilu chachiwahi?

Kumwekesha luwi mwabombela kwakamena antu kuhitila mukuhosha mazu akuyikolesha nikuyilila yuma yayiwahi yinateli kuyikwasha. Chineli kumwekeshela antu luwi mwabombela kuyilila yuma yayiwahi, hitwatela kumwekesha luwi lwahamesu hohuku. Kukeña niwushona diyi yilwilu yaleteshaña muntu kumwekesha luwi. Chasweja kulema, luwi lwekala hakachi kanyikabu yaspiritu yajila yaNzambi yalejawu akwaKristu ejima nawu atela kwikala nayu. (Ñal. 5:22, 23) Wejima wetu twatela kwikala naluwi, dichi tutalenu Yehova niMwanindi chamwekeshañawu luwi nichitunateli kuyimbujola.

Yehova wamwekeshaña luwi nikutoñojokelaku antu ejima, kushilahu “antu atama niabulaña kusakilila.” (Luka 6:35) Chakutalilahu, Yehova “watuntwishaña itena dindi hadi antu ejima atama niamawahi nawa wanokeshaña nvula hadi antu ejima aloña niabula kuloña.” (Mat. 5:45) Dichi, niantu abulaña kwiteja nawu Yehova diyi Nleñi, adiluñishaña wumi wayinkayi muloña waluwi lwindi nawa ekalañaku namuzañalu.

Chuma chayilililiwu aAdama naEva, hichakutalilahu chachiwahi chamwekeshaña nawu Yehova wukweti luwi. Hanyima yakwila aAdama naEva anavulumuni dehi, ‘achimini mafu achikuyu nakutuña yakuvwala.’ Hela chochu, Yehova welukili nindi akeñekeleña yakuvwala yashikila yatela kuyikiña hanji yaEdeni, hadiña iseki dashiñiliwu ‘nanyiña ninyisonsonyi.’ Dichi Yehova wayitiyilili luwi nakuyituñila “yikovwelu yayitembi.”—Kutach. 3:7, 17, 18, 21.

Hela chakwila Yehova wamwekeshaña luwi kudi “antu ejima atama niamawahi,” waswejeshaña kumwekesha luwi kudi ambuñindi ashinshika. Chakutalilahu, mumafuku akaprofwetu Zekariya, kañelu watiyili kutama chelili aIsarela aleki kutuña tembeli yaYehova muYerusalema. Yehova watilili chahosheliyi kañelu nawa wamwakwili ‘namazu amawahi nawa akukundeja.’ (Zek. 1:12, 13) Yehova welili cheñi chuma chochimu nikudi kaprofwetu Elija. Mpinji yimu, kaprofwetu Elija waneñeli chakwila wamwilili Yehova nindi yafwi. Yehova wamweni chatiyileñayi Elija, dichi watumini kañelu kuya nakumukundeja. Yehova wamulejeli kaprofwetu nindi hakumushiya nkawindiku. Hanyima yakwila anamuleji dehi mazu amawahi niwukwashu wakeñeleñayi, watwalekelihu kuzata mudimu windi. (1 Anya. 19:1-18) Hakachi kawambuña aNzambi, hinyi wamwimbujolaña Yehova chikupu wamwekeshaña luwi munjila yayiwahi?

Hampinji yadiñayi nakushimwina hanu hamaseki, Yesu amwilukili nawu himuntu wadiña naluwi nawa watoñojokeleleñaku. Hadiña wazuwa hela kukanjikija antu kwila yuma yakeñeleñayiku. Muloña wawushona, wayilejeli nindi: “Twayenu kudi ami, enu ejima munakukabakana nawa munasendi yiteli yalema, nukuyihizumwisha. . . . Muloña mpaanda yami yaswayi kusenda.” (Mat. 11:28-30) Muloña waluwi lwamwekesheleñayi Yesu, antu adiña nakumulondela kwejima kwayileñayi. Muloña wakwila “wayitiyilili wushona,” Yesu wayidishili, wayuukili nawa wayidizishili “yuma yayivulu.” yahosha hadi Tata yindi.—Maku 6:34; Mat. 14:14; 15:32-38.

Yesu wadiña nakuyitiyilila nikuyitoñojokelaku antu muloña waluwi lwindi lwasweja. Hela chakwila wadiña nakutoñojoka wanyi kwila mwenimu, ilaña wayitambwilileña “chachiwahi” antu ejima enjileña kudi yena. (Luka 9:10, 11) Chakutalilahu, mumbanda wakatili musoñu wakupweka mashi wenjili nakukwata kuchakuvwala chindi chahewulu nindi hekwawu wukukola. Kwesekeja nanshimbi jaMosi iwu mumbanda wadiña namajilu, ilaña Yesu wamuzuwilili wanyi. (Lev. 15:25-28) Yesu wamutiyilili wushona iwu mumbanda wakabakeni hadi yaaka 12, dichi wamulejeli nindi: “Mwanami, chikuhwelelu cheyi chinakukoleshi. Yaña mukuwunda nawa musoñu weyi wumani.” (Maku 5:25-34) Mwalala Yesu wadiña naluwi!

Muyakutalilahu yitunahanjeki hewulu, tunadizi netu luwi lwamwekenaña muyuma yitwelaña. Yesu wamwekesheli yuma yitwatela kwila muchishimu chakaSamariya wamuwahi. Hela chakwila aSamariya nawaYudeya adiña nakutiyañana wanyi, kaSamariya wamunichi chishimu wamutiyilili wushona muntu alukukiliwu, weteliwu nakumushiya kwakwihi nakufwa. Luwi lwamuletesheli kaSamariya kwilahu chuma. Wamukasilikasili hayilonda nakumutwala kwitala kwashikenaña enyi. Kuhiñahu, kaSamariya wanoneli mali nakumwinka iwu nhembi kulonda yakameni nachu iwu iyala akatishiliwu nawa wamulejeli nindi neyi yazatisha mali akubadika hamali amwinkeliyi, wakenza nakumufuntishila.—Luka 10:29-37.

Chineli kakavulu luwi lwamwekenaña munyidimu yitwazataña, tunateli kulumwekeshela cheñi mukutoñojokelaku muntu nimumazu akukolesha. Dichi, chineli “kaneñu mumuchima wamuntu kaleta kuzembesha nyima,” Bayibolu yabombelahu nawu “izu dadiwahi daletesha kutiya kuwaha.” (Yish. 12:25) Tunateli kukolesha antu amakwawu neyi tuyimwekeshelaña luwi nikuhanjekaña nawu nsañu yakuyikolesha. * Neyi tuhoshaña mazu awushona tukumwekesha netu twayakamenaña. Neyi tuyikolesha, akushindaña kukala kwamonañawu muchihandilu chawu.—Yish. 16:24.

Chineli atuleña neyi “chochekalayi Nzambi,” antu ejima anateli kwikala nachilwilu chaluwi. (Kutach. 1:27) Chakutalilahu, Yuliyusi mukulumpi wawamashidika awaRoma wadiña namudimu wakutala kapostolu Pawulu hamutwalileñawu kuRoma, wamwakameneni kapostolu “[nawushona] chakwila wamwitejeli kuya kudi amabwambu jindi kulonda amwakameni” mumusumba waSidoni. (Yilw. 27:3) Chimwahitili mpinji, antu ashakamineña muMelita amumwekesheleli Pawulu “luwi chikupu” niakwawu adiña muwatu wakisikili. Antu ashakamineña hachitutu abutwili kesi kulonda Pawulu niakwawu adiña muwatu wakisikili atiyi iyena. (Yilw. 28:1, 2) Elili chuma chachiwahi, ilaña hakwila nawu twikali akwaluwi, twatela kutwalekahu kuyilila antu yuma yayiwahi mpinji yejima, bayi kamu hohuku.

Hakwila nawu tumuzañalesheña Nzambi chikupu, twatela kumwekeshaña luwi muchihandilu chetu chejima. Muloña wachumichi, Yehova watulejaña nindi “vwalenu” chilwilu chaluwi. (Kol. 3:12) Kushimuna hohu walala,  mpinji yikwawu twakañanyaña kumwekesha ichi chilwilu chaNzambi. Muloñadi? Mpinji yikwawu twakañanyaña kumwekesha luwi muloña wansonyi, woma, kutukabisha hela muloña wakudikeña etu aweni. Hela chochu, tunateli kushinda iku kukala neyi tushindamena hawukwashu waspiritu yajila nikwimbujola chamwekeshañayi Yehova luwi.—1 Kor. 2:12.

Yumanyi yitunateli kuzatilahu hakwila nawu tumwekesheña luwi? Twatela kudihula netu: ‘Komana natiyililaña antu nikutoñojoka chinakutiyawu? Komana nashañaku maana neyi antu anakukeña wukwashu? Mpinjinyi yinamwekesheli luwi kudi muntu wabula kwikala ntaña yami hela wabula kwikala ibwambu dami?’ Twatela kufwila kwiluka antu itwashakamaña nawu, sweje-e dinu akwetu ekala muchipompelu chawakwaKristu. Kwila mwenimu, kukutukwasha kwiluka chidi chihandilu chawu niyuma yinakaankiliwu. Cheñi, twatela kumwekeshelaña antu luwi munjila yayiwahi neyi chochitwakeñaña ninetu kutumwekeshela luwi. (Mat. 7:12) Nkumininaku, Yehova wukutukwasha kwikala naluwi neyi tumulomba netu yatukwashi.—Luka 11:13.

Kapostolu Pawulu hasonekeleñayi yilwilu yamwekesheleña nawu himukwakumukalakela Nzambi, wabombelelihu “luwi.” (2 Kor. 6:3-6) Antu amukeñeli Pawulu muloña wayakameneni chiwahi, welileña mwenimu kuhitila mukuyilila yuma yayiwahi nikuyileja mazu akuyikolesha. (Yil. 28:30, 31) Munjila yoyimu, ninetu tunateli kukokola antu muchalala neyi tuyimwekeshelaña luwi. Neyi tumwekeshaña luwi kudi antu ejima kushilahu niantu atudimbululaña, tunateli kuyikwasha kuwundisha muchima nawa akwikala awunda nanetu. (Rom. 12:20) Mukuhita kwampinji, anateli kwiteja nsañu yamuBayibolu.

MuParadisa yidi kwakwihi nakwinza, antu amavulu akasañulawu akatiya kuwaha naluwi lwakayimwekeshelawu, hadaha amakwawu dikakekala katachi. Muloña waluwi lwakayimwekeshelawu, niwena akamwekesha luwi kudi antu amakwawu. Muntu wakabulaña kumwekesha luwi nikukwasha akwawu, wakashakama wanyi haya nyaaka muWanta waNzambi. Kwambukaku, antu aketejayi Nzambi kushakama haya nyaaka, akamwekeshaña luwi nikudikeña wumu namukwawu. (Mas. 37:9-11) Dakekala ituña dakiñewa nawa dawunda! Hela chochu, henohu iyi mpinji yayiwahi kanda yishiki, tunateli kudiluñisha ñahi yuma yayiwahi yafumaña mukumwekesha luwi?

Bayibolu yahoshaña nawu: “Muntu wekala naluwi wadiwahishaña yomweni.” (Yish. 11:17) Antu aswinaña kwakwihi namuntu wekala naluwi nawa niwena amumwekeshelaña luwi. Yesu wahosheli nindi: “Chesekelu chimunakwesekelaku nachu akwenu, dichi chakayesekelawu nachu ninenu nawa.” (Luka 6:38) Muntu wamwekeshaña luwi, wawanaña amabwambu swayi nawa watwalekañahu kwikala nawamabwambu amawahi.

Kapostolu Pawulu wayilejeli antu adiña muchipompelu chamuEfwesesa nindi: “Ditiyilenuña luwi wumu namukwawu, wushona nikudanakena wumu namukwawu.” (Efwes. 4:32) Chipompelu chakolaña neyi akwaKristu ekalamu amwekeshaña luwi nikudikwasha wumu namukwawu. Antu amuchidiwu ahoshaña wanyi mazu akutoba, matuñu hela masensi atama. Hiyatuñulaña akwawuku, ilaña azatishaña idimi dawu chiwahi nakukolesha akwawu. (Yish. 12:18) Chafumañamu, chipompelu chakolaña nawa mwekala muzañalu chikupu.

Mwamweni, luwi hichilwilu chamwekenaña muyuma yitwahoshaña niyitwelaña. Neyi tumwekeshaña luwi, dikwila nawu tunakumwimbujola Nzambi yetu Yehova, wekala nachisambu. (Efwes. 5:1) Chikufumamu, tukukolesha chipompelu chetu nawa tukukokola antu amakwawu kwinza mukudifukula kwalala. Dichi, tuzatenu nañovu kulonda atwiluki nawu twekala antu amwekeshaña luwi!