1, 2. (a) Petulu chamulejeliyi Yesu nindi bayi wuhosha chuma chamuchidiwuku, Yesu wamwakwili nindidi? (Talenu mwevulu wakutachikilahu.) (b) Muloñadi Yesu chamwakwililiyi muniyi njila?

ATUMBANJI twaYesu akuhweleleli wanyi nsañu yatiyileñawu. Yesu, muntu akuhweleleliwu nawu wukufuntisha wanta muIsarela, wahosheli nindi keña yakabakani nikufwa. Kapostolu Petulu wahosheli nindi: “Mwanta bayi wuhosha chuma chamuchidiwuku; iyi yuma hiyakakumwekena hela hantiku.” Yesu wamwakwili nindi: “Eyi Satana, hitaku kunyima yami! Eyi wudi chuma chakunhukesha, muloña eyi watoñojokaña yitoñojoka yawantu bayi yitoñojoka yaNzambiku.”—Mat. 16:21-23; Yil. 1:6.

² Yesu chahosheliyi awa mazu, wamwekesheli chaambu chekala hayitoñojoka yaNzambi nayitoñojoka yidi mukaayi kanakuyuulawu kudi Satana. (1 Yow. 5:19) Petulu wamwekesheli yitoñojoka yamukaayi yakudikeña muntu yomweni. Ilaña Yesu welukili nindi Tata yindi wadiña nayitoñojoka yambukaku. Welukili nindi Nzambi wakeñeleña nindi yadiloñeshi hakukabakana nikufwa  kwayileñayi nakumona. Mazu amwakwiliyi Petulu amwekeshaña nawu, Yesu wakaanini yitoñojoka yamukaayi nakwiteja yitoñojoka yaYehova.

3. Muloñadi chichapelela kwikala nayitoñojoka yamukaayi kubadika yaYehova?

³ Indi etu? Komana twatoñojokaña yitoñojoka yaNzambi tahindi yitoñojoka yamukanu kaayi? Chakadi nikujina, twazataña nañovu kulonda twikali nayilwilu yakeñañayi Nzambi. Indi yitoñojoka yetu yekala ñahi? Komana twatoñojokaña nikumona yuma neyi chayimonañayi Yehova? Kwila mwenimu kwakeñekaña kuzata nañovu. Kwambukaku, hichakeñekaña kuzata nañovu hakwila nawu twikali nayitoñojoka yamukaayiku, muloña spiritu yamukaayi yinatandi kwejima. (Efwes. 2:2) Kubombelahu, chineli mukaayi munenzali yilwilu yakudikeña muntu yomweni, ninetu tunateli kufwila kwikala nayitoñojoka yamukaayi. Mwamweni, kutoñojoka neyi chatoñojokañayi Yehova kwakeñekaña kuzata nañovu, ilaña chapela nankashi muntu kwikala nayitoñojoka yamukaayi.

4. (a) Yumanyi yinateli kutumwekena neyi twiteja kaayi kuwumba yitoñojoka yetu? (b) Achinu chibaaba chikutukwasha ñahi?

⁴ Neyi twiteja kaayi kuwumba yitoñojoka yetu, tukwikala nayilwilu yakudikeña etu aweni niyilwilu yakukeña kudimena. (Maku 7:21, 22) Dichi, chalema nankashi kwikala ‘nayitoñojoka yaNzambi,’ bayi ‘yitoñojoka yawantuku.’ Achinu chibaaba chikutukwasha. Chinashimuni yuma yamwekeshaña nawu yitoñojoka yaYehova yatukañeshaña wanyi, ilaña yayiwahi nawa yakwashaña. Chinashimuni cheñi chitunateli kukaana kutuwumba kudi yitoñojoka yamukaayi. Chibaaba chinalondelihu chikashimuna chitunateli kutoñojoka neyi chatoñojokañayi Yehova muyuma yashiyashana yitwelaña nikuzatisha yitoñojoka yindi.

5. Muloñadi antu amakwawu chakaaninañawu kuyiwumba kudi antu amakwawu?

⁵ Antu amakwawu akaanaña yitoñojoka yawu kuyiwumba hela kuyiyuula kudi antu amakwawu. Ahoshaña nawu, “Kwosi watela kunlejaku.” Atalishaña mukwila nawu, anateli kudifuukwila awenawu yuma yinakukeñawu nawa nawu dichuma chachiwahi chiyatela kwila. Akeñaña wanyi kuyifuukwila hela kuhimpa yilwilu yawu. *

6. (a) Kusubukanyi kwatwinkayi Yehova? (b) Komana iku hikusubuka chikupu?

⁶ Hela chochu, twatela kwiluka netu kutoñojoka neyi chatoñojokañayi Yehova hichatalisha mukwila nawu twatela kuleka yitoñojoka yetu yejimaku. Neyi chahosha 2 Akorinda 3:17 nawu, “kwejima kudi spiritu yaYehova, kwenoku dikwekala nikusubuka.” Tukweti wuswa wakuditoñojokela. Wejima wetu twekala akasunuka kwila yuma yitunakukeña. Dichatuleñayi Yehova. Hela chochu, kusubuka kwetu kudi namwakukumina. (Tañenu 1 Petulu 2:16.) Neyi tunakukeña kwiluka yuma yayiwahi niyatama, Yehova wakeñaña nindi tuzatisheña yitoñojoka yindi neyi chashimuna Izu dindi. Komana chumichi chatukañeshaña tahindi chatukwashaña?

7, 8. Muloñadi chitukuhoshela netu kumona yuma neyi chayimonañayi Yehova kwatukañeshaña wanyi kwila yuma yikwawu? Lumbululenu.

⁷ Shinshikenu hanichi chakutalilahu. Anvwali akeñaña kukulisha anyanawu munjila yayiwahi. Anateli kuyidizisha kwikala nakashinshi, adikita nikutoñojokelañaku antu amakwawu. Ichi chuma hichinateli kuyikañesha  kwila yuma yikwawuku. Ilaña anvwali anakuyidizisha chakwikala nachihandilu chachiwahi neyi anakuli. Neyi anyana anakuli dehi nawa atachika kudishakamina, akwikala akasunuka kutonda yuma yinakukeñawu. Neyi atondahu kulondela yuma yayidizishiliwu kudi anvwali jawu, akufuukulahu kwila yuma yayiwahi yakabula kuditoñeshawu. Chikafumamu, hiyakamonaña kukala nikwakamaku.

⁸ Kufwana nvwali wamuwahi, Yehova wakeñaña nindi anyanindi ekali nachihandilu chachiwahi. (Isa. 48:17, 18) Dichi, watwinkaña yishina yatukwashaña kwikala nayilwilu yayiwahi nichitunateli kushakamaña nawakwetu. Muniyi njila, watulejaña nindi tutoñojokeña neyi chatoñojokañayi nikwila yuma yakeñañayi. Nshimbi jindi hijatukañeshañaku, ilaña jatukwashaña kutoñojoka munjila yayiwahi. (Mas. 92:5; Yish. 2:1-5; Isa. 55:9) Jatukwashaña kwila yuma yinateli kutuletela muzañalu nikwikala antu amawahi. (Mas. 1:2, 3) Mwamweni, kutoñojoka neyi chatoñojokañayi Yehova kwakuwahi nawa kwakwashaña!

9, 10. Yumanyi yinakumwekesha nawu yitoñojoka yaYehova yabadika yamukaayi?

⁹ Chuma chikwawu chaleteshaña akwakudifukula aYehova kukeña kutoñojoka neyi chatoñojokañayi Nzambi himuloña wakwila nawu yitoñojoka yindi yabadika chikupu yamukaayi. Mukaayi, antu akwashaña akwawu chakwikala nayilwilu yayiwahi, chakushakama chiwahi muyisaka, chakuzata chiwahi nyidimu nichakwikala nachihandilu chachiwahi. Ilaña yitoñojoka yikwawu yambukaku chikupu nachatoñojokañayi Yehova. Chakutalilahu, akoleshaña antu kufwila yuma yakuditiyisha aweni kuwaha. Etejaña yilwilu yawuvumbi. Mpinji yikwawu etejaña antu kudiseña hanyiloña yabula kushikilamu nawu kulonda ekali namuzañalu. Ilaña chumichi chambukaku chikupu nachahosha Nsona. Komana iyi yuma yinateli kutukwasha makonu?

¹⁰ Yesu wahosheli nindi: “Yuma yaloña yelañayi muntu, diyamwekeshaña nawu wukweti maana.” (Mat. 11:19) Kaayi kanakuyilaku hambidi mujakutuñatuña. Hela chochu, kanakañanyi kumanisha kukala kweneni kunakuletesha antu kubula kwikala namuzañalu, kukala kudi neyi njita, chaambu chekowa nimadombu. Indi yilwilu yawuvumbi, ayimonaña ñahi? Antu amavulu anawani nawu iyi yitoñojoka yinakumanisha wanyi kukala, ilaña yinakuletesha antu kudiseña, yikatu nikukala kukwawu. Kwambukaku, akwaKristu amonaña yuma neyi chayimonañayi Nzambi ekala namuzañalu muyisaka yawu, akola kumujimba muloña wayilwilu yayiwahi nawa adi nakuwunda nawakwawu akwakwitiya mukaayi kejima. (Isa. 2:4; Yil. 10:34, 35; 1 Kor. 6:9-11) Komana chumichi hichinakumwekesha nawu yitoñojoka yaYehova yabadika yitoñojoka yamukaayiku?

11. Yitoñojoka yanyi yamulombweleña Mosi, nawa yumanyi yafuminimu?

¹¹ Antu akunyima adifukwileña kudi Yehova amweni chabadika yitoñojoka yaYehova. Chakutalilahu, hela chakwila Mosi wadiña wadiza “maana ejima awaEjipitu,” ilaña wamulombeli Nzambi nindi yekali ‘namaana mumuchima.’ (Yil. 7:22; Mas. 90:12) Wamulembeleli Yehova nindi: “[Nleji] dinu njila yeyi.” (Kwid. 33:13) Muloña wakuzatisha yitoñojoka yaYehova, watwesheli kuzata mudimu wakushikija nkeñelu yaNzambi nawa amusoneka munyikanda yajila nawu iyala wukweti chikuhwelelu.—Heb. 11:24-27.

12. Kapostolu Pawulu wadiña nakushindamena hachumanyi neyi nakufuukula?

¹² Kapostolu Pawulu wadiña muntu wadiza nawa wadiña weluka madimi ayedi. (Yil. 5: 34; 21:37, 39; 22:2, 3) Wakaanini yitoñojoka nimaana amukaayi muloña wakuzatisha yishina yamuBayibolu. Wazatishileña Nsona hakufuukula. (Tañenu Yilwilu 17:2; 1 Akorinda 2:6, 7, 13.) Chafuminimu, Pawulu wazatili chiwahi mudimu wakushimwina nawa watambwilili nkisu jahaya nyaaka.—2 Tim. 4:8.

13. Hinyi wudi nawuswa wakutufuukwila kutoñojoka neyi chatoñojokañayi Yehova?

¹³ Mwamweni, yitoñojoka yaNzambi yabadika yitoñojoka yidi mukaayi. Neyi tulondela mwatulejañayi Nzambi tukwikala namuzañalu nichihandilu chachiwahi. Ilaña Yehova hatukanjikijaña kutoñojoka neyi chatoñojokañayiku. “Nduñu wamaana nikashinshi” niakulumpi hiyafuukwilaña antuku. (Mat. 24:45; 2 Kor. 1:24) Ilaña mukwaKristu wejima wudi nawuswa wakudifuukwila yomweni kumona yuma neyi chayimonañayi Nzambi. Tunateli kwila ñahi mwenimu?

14, 15. (a) Yumanyi yitwatela kutoñojokahu chikupu hakwila tutoñojokeña neyi Yehova? (b) Kwesekeja naAroma 12:2, muloñadi chitwatela kutondolwela yitoñojoka yamukaayi? Lumbululenu.

¹⁴ Aroma 12:2, yatufumbaña nawu: “Lekenu kwiteja yuma yamunshakaminu yamakonu yiyibalumuni, ilaña balumukenu kuhitila mukuhimpa yitoñojoka yenu kulonda mwiluki nkeñelu yaNzambi nenu yayiwahi, wayiteja nawa yawanina chikupu.” Awa mazu onenawu amwekeshaña nawu tunateli kuhimpa nakutachika kutoñojoka neyi chatoñojokañayi Nzambi, hela chakwila kudi yuma yawumbili yitoñojoka yetu henohu kanda twiluki chalala. Mwamweni, yitoñojoka yetu yinateli kuluwankana, hadaha muloña wakwila dichitwasemukili niyuma yitwahitilimu kunyima. Ilaña yitoñojoka yinateli kuhimpika mpinji yidi yejima. Ilaña iku kuhimpika kunashindameni hayuma yitwatoñojokaña niyuma yitwatondaña kwila muchihandilu chetu. Neyi tushindamena nikutoñojoka chikupu chamonañayi Yehova yuma, tukwiluka netu yitoñojoka yindi yayiwahi. Chumichi, chikutukwasha kutoñojoka neyi chatoñojokañayi.

¹⁵ Hela chochu, hakwila nawu tuhimpi yitoñojoka yetu nakutachika kutoñojoka neyi chatoñojokañayi Yehova, twatela ‘kuleka kwiteja yuma yamunshakaminu yamakonu yitubalumuni.’ Twatela kuleka kutoñojoka yuma yahelayi Nzambi. Hakwila twiluki kulema kwanichi chikuma, tutoñojokenu hachakutalilahu chayakuda. Muntu wunakukeña kwikala namujimba wawuwahi, watela kudaña yakuda yayiwahi. Hanu nateli kwikala ñahi namujimba wawuwahi neyi nakuda cheñi yakuda yamajilu hela yatoka? Munjila yoyimu, yitoñojoka yaYehova yinateli kuzatika wanyi mudi etu neyi twiteja cheñi yitoñojoka yatama yamukaayi.

16. Twatela kudikiña kuyumanyi?

¹⁶ Komana tunateli kutondolwela yitoñojoka yejima yamukaayi? Inehi, tukutwesha wanyi muloña dimu twashakamaña. Muloña yuma yikwawu kwila tuyitemuka nehi. (1 Kor. 5:9, 10) Mumudimu wakushimwina, tunateli kuwana antu anakuhosha hantañishilu yakutwamba. Hela chochu, chineli hitukutwesha kutondolwela yitoñojoka yatamaku, bayi tuyitejaña hela kuyitoñojokañaku. Kufwana Yesu, tunyakaleña kutondolwela yuma yamutiyishaña Satana kuwaha. Kubombelahu, tunateli cheñi kudikiña kuyitoñojoka yamukunkulwayi yidi mukaayi.—Tañenu Yishimu 4:23.

17. Tunateli kutondolwela ñahi yitoñojoka yatama yamukaayi?

¹⁷ Chakutalilahu, twatela kusoñama hakutonda amabwambu. Bayibolu yatusoñamishaña nawu neyi tudikundaña nawantu abulaña kudifukula kudi Yehova, yitoñojoka yawu yikutamisha yitoñojoka yetu. (Yish. 13:20;  1 Kor. 15:12, 32, 33) Twatela cheñi kwikala asoñama hakutonda yisela. Neyi tukaanaña yisela yatiyakeshaña nawu yuma yadileñeli yayeni, madombu, yilwilu yatama, dikwila nawu tunakutondolwela kutoñojoka hayuma “yakañeshaña antu kumwiluka Nzambi.”—2 Kor. 10:5.

18, 19. (a) Muloñadi chitwatela kudikiñila kuyitoñojoka yamukaayi yamwekanaña neyi yinateli kutuluwañesha wanyi? (b) Malwihwinyi itwatela kudihula, nawa muloñadi?

¹⁸ Tukwila chiwahi neyi twiluka nikukaana yitoñojoka yamukaayi yamwekanaña neyi yinateli kutuluwañesha wanyi. Chakutalilahu, nsañu jikwawu anateli kujitiyakesha nakuhakwilaku izanvu dimu damapolitiki. Atiyakeshaña cheñi nsañu yakuwahishaku yuma mukaayi nikuwahishaku nshakaminu yawantu. Mafwilimu ninyikanda yikwawu yatiyakeshaña nsañu yakwila nawu “yuma yayiwahi yatela kusambila kwikala yami nichisaka chami” nakumwekesha neyi hiyilwilu yayiwahi nawa yaloña. Yitoñojoka yamuchidiwu yadiwulaña chahosha Bayibolu nawu, etu nichisaka chetu tukwikala namuzañalu neyi tumukalakelaña Yehova. (Mat. 22:36-39) Kubombelahu, hela chakwila nsañu yikwawu yahoshaña hadi atwansi ayiteja, yinateli kuleñela atwansi kutachika kwikala nayilwilu yatama.

¹⁹ Ilaña chatama wanyi kudiluñisha yisela yayiwahi. Hela chochu, twatela kudihula netu: ‘Komana twelukaña ntañishilu yamukaayi hela chakwila anakuyitandisha munjila yitunateli kubula kwiluka? Komana twadikiñaña etu aweni nianyanetu kumaprogiramu amakwawu aha TV hela kutaña nyikanda yikwawu? Komana twakwashaña anyanetu kumona yuma yamukaayi yatiyañawu hela yamonañawu neyi chayimonañayi Yehova?’ Neyi twiluka chaambu chekala hayitoñojoka yaNzambi nayitoñojoka yamukaayi, tukuleka “kwiteja yuma yamunshakaminu yamakonu” kutuwumba.

20. Yumanyi yikutukwasha kwiluka neyi chakwila atuwumbaña kudi Nzambi hela kudi kaayi?

²⁰ Ilukenu nenu, tukweti nsulu jiyedi kwafumaña nsañu, kudi Yehova nikaayi kanakuyuulawu kudi Satana. Hadi awa ayedi, hinyi watuwumbaña? Ñakwilu yidi yakwila nawu kwejima kutwafumishaña nsañu. Neyi twiteja yitoñojoka yamukaayi, yikuwumba yitoñojoka yetu nawa tukutachika kutoñojoka hayuma yafwilaña mujimba. Dichi, twatela kwikala asoñama nansañu yitwatañaña, yuma yitwatalaña niyuma yitwatoñojokaña.

21. Chumanyi chitukahanjekahu muchibaaba chinalondelihu?

²¹ Neyi chitwashimuna hakusambila, hakwila nawu tutoñojokeña neyi chatoñojokañayi Yehova, twatela kwila yuma yikwawu kubadika hohu kutondolwela yuma yinateli kuluwañesha yitoñojoka yetu. Twatela cheñi kudiza hayitoñojoka yaNzambi nichitunateli kutoñojoka neyi yena. Chibaaba chinalondelihu chikatukwasha cheñi chitunateli kwila mwenimu.