1, 2. Yumanyi yitwelukaña neyi tupama kuspiritu? Lumbululenu.

KANSI anamwinki chuma. Anvwali jindi anamuleji nawu: “Hoshaku neyi nasakililiku.” Iwu mwana neli mwenimu muloña anamuleji chakumuleja. Hampinji yinakukulayi, watwalekañahu kuzatisha mazu awanvwali jindi, nikumwekesha kusakilila kudi antu anakumumwekeshela luwi. Neyi nakuli dehi, wukusakililaña chakufuma hamuchima. Muloñadi? Muloña neluki dehi kusakilila.

² Munjila yoyimu, chitwadizili chalala, twelukili kulema kwakwovwahila yuma yikwawu yakeñañayi Yehova nindi twileña. Ilaña chitwatwalekelihu kupama kuspiritu, twelukili chatoñojokañayi Yehova, chamonañayi yuma yakeñayi, yuma yahelayi niyuma yikwawu. Neyi tudiza kutoñojoka neyi chatoñojokañayi Nzambi nikwiteja yitoñojoka yindi kuwahisha yilwilu yetu niyuma yitwatondaña, tukumwekesha netu chidi yitoñojoka yaYehova dichidi niyetu.

3. Kutoñojoka neyi Nzambi kunateli kwikala ñahi kwakala mpinji yikwawu?

³ Chineli kutoñojoka neyi Yehova kwakuwahi, mpinji yikwawu kunateli kwikala kwakala. Muloñadi? Muloña wakubula kuwanina. Chakutalilahu, chinateli kutukalila kwiluka chamonañayi Yehova wuvumbi, maheta, mudimu wakushimwina, kuzatisha  mashi chatama niyuma yikwawu. Tunateli kwila ñahi? Tunateli kutwalekahu ñahi kutoñojoka neyi chatoñojokañayi Nzambi? Nawa kwila mwenimu kunateli kutukwasha ñahi makonu nikumbidi?

4. Yumanyi yadibombela mukulondela kufumba kwaPawulu kwakwila nawu ‘himpenu yitoñojoka yenu’?

⁴ Tañenu Aroma 12:2. Kapostolu Pawulu walumbulwili yuma yitwatela kwila hakwila nawu tutoñojokeña neyi Yehova. Muchibaaba chinafumihu twadizili netu hakwila ‘tuleki kwiteja yuma yamunshakaminu yamakonu kutubalumuna,’ twatela kukaana yitoñojoka niyilwilu yamukaayi. Pawulu washimwini chuma chikwawu chakeñekaña ‘hakuhimpa yitoñojoka yetu.’ Chumichi munabombeli kudiza Izu daNzambi, kutiyishisha yitoñojoka yindi, kutoñojokahu chikupu nikuzata nañovu kulonda tumoneña yuma neyi chayimonañayi.

5. Lumbululenu chaambu chekala hakachi kakutaña hohu nikudiza.

⁵ Bayi neyi kudiza hikutaña nakufunda ñakwilu hohuku. Neyi tunakudiza, twashinshikaña nsañu chiyinakutuleja hadi Yehova, njila jindi nichatoñojokañayi. Twafwilaña kwiluka muloña waweni Nzambi chetejelayi yuma yikwawu nichakaanishilayi yuma yikwawu. Twatoñojokaña hayuma yitunateli kuhimpa muchihandilu chetu nimuyitoñojoka yetu. Hela chakwila chinateli kwikala chapela wanyi kutoñojoka hayikuma yejima yitukudiza, twatela kuzatisha mpinji, hadaha kuzatisha chikunku champinji yakudiza kulonda tutoñojoki chikupu hansañu yitunatañi.—Mas. 119:97; 1 Tim. 4:15.

6. Yumanyi yamwekanaña neyi tutoñojoka chikupu hayitoñojoka yaYehova?

⁶ Neyi tunakutoñojoka mpinji yejima Hezu daNzambi, kudi yuma yayiwahi yamwekanaña. ‘Twelukaña’ chikupu netu yitoñojoka yaYehova yaloña. Twatachikaña kumona yuma neyi chayimonañayi nawa twazatishaña yitoñojoka yindi. ‘Twahimpaña yitoñojoka’ yetu nawa twatachikaña kutoñojoka munjila yambukaku. Mukuhita kwampinji, twatachikaña kwikala nayitoñojoka neyi yaNzambi.

7, 8. (a) Yehova wamonaña ñahi maheta? (Talenu nyevulu yakutachikilahu.) (b) Neyi tumonaña maheta neyi chayimonañayi Yehova, chumanyi chitukutwamijañaku?

⁷ Bayi tuhosha netu kutoñojoka kwashindamena hohu hayuma yitwatoñojokañaku. Yitoñojoka niyuma yitwelaña jendelaña hamu. (Maku 7:21-23; Yak. 2:17) Hakwila nawu tutiyishi chumichi, tushinshikenu yakutalilahu yantesha. Chakutalilahu, Nsañu yayiwahi yashimuna hatooka Yehova chamonañayi yuma yakumujimba. Nzambi watondeli anvwali atela kukulisha Mwanindi, hela chakwila awa adisumbula adiña namali amavulu wanyi. (Lev. 12:8; Luka 2:24) Yesu chavwalikiliyi, Mariya “[wamukaamikili] mwadiilaña yimuna, muloña mwitala mwakukaama enyi himwadiña kapeka mwakukaama wenaku.” (Luka 2:7) Neyi Yehova wakeñeli, chiña wamukeñeleli Mwanindi iluña dadiwahi kwakusemukila. Hela chochu, chuma chadiña chalema kudi Yena, hichisaka chadifukwileña kudi Nzambi chatela kumuhemba nikumukulisha chiwahi Yesu.

⁸ Muniyi nsañu yamuBayibolu yahosha hakusemuka kwaYesu, yatudizishaña Yehova chamonañayi maheta. Anvwali amakwawu akanjikijaña anyanawu kwikala namaheta hela chakwila wubwambu wawanyanawu naYehova wunateli kuluwankana. Hela chochu,  Yehova walemesha wubwambu wetu nayena kubadika yuma yejima. Komana ninenu mwamonaña iyi yuma neyi chayimonañayi Yehova? Yilwilu yenu yamwekeshañadi?—Tañenu Aheberu 13:5.

9, 10. Tunateli kumwekesha ñahi netu twamonaña kuhukesha akwetu neyi chakwimonañayi Yehova?

⁹ Chuma chikwawu, hikwiluka Nzambi chamonañayi muntu wahukeshaña akwawu. Yesu wahosheli nindi: “Muntu wejima wukuhukesha wumu wahadi awa akehelamu akweti chikuhwelelu, chikuwaha neyi owu muntu akumukasila ilola dakuhalilaku munshiñu danyeñumunañayi chimbulu nakumunatila mukaluñalwiji.” (Maku 9:42) Awa mazu amwekeshaña nawu kuhukesha muntu kwatama! Chineli Yesu wamwekesheli yilwilu yekala naTata yindi, twatela kwiluka netu Yehova wahela muntu wabulaña kwakama nindi nakuhukesha muntu wumu wahadi akwakumulonda Yesu.—Yow. 14:9.

¹⁰ Komana twamonaña yuma neyi chayimonañayi Yehova niYesu? Tunakutoñojoka neyi chatoñojokañawu wena? Yilwilu yenu yamwekeshañadi? Chakutalilahu, hadaha twavwalaña yakuvwala yahukeshaña antu amakwawu muchipompelu hela yasañumuna antu kutachika kutoñojoka hawuvumbi. Komana kukeña kutwakeña akwetu akwakwitiya kukutuletesha kuleka kuvwala yakuvwala yahukeshaña akwetu?—1 Tim. 2:9, 10.

11, 12. Kumona yuma yatama neyi chayimonañayi Nzambi nikwikala nachilwilu chakudihemba kunateli kutukwasha ñahi tutondolwela yuma yatama?

¹¹ Chuma chamuchisatu: Yehova wahela yuma yaheña. (Isa. 61:8) Yehova weluka nindi twakoñaña yuma yatama muloña wakubula kuwanina kutwaswana, ilaña watulejaña nindi ninetu twatela kuhela yuma yatama. (Tañenu Masamu 97:10.) Kutoñojoka chikupu chaletesha Yehova yaheli yuma yatama kukutukwasha kutoñojoka neyi chatoñojokañayi nawa tukutondolwelaña kwila yuma yatama.

¹² Neyi tumonaña yuma yatama neyi chayimonañayi Yehova chikutukwasha cheñi kwiluka yilwilu yikwawu yatama hela chakwila hiyayishimuna Mwizu daNzambiku. Chakutalilahu, yilwilu yakuhañena muntu hamakata yinatandi nankashi mukaayi. Antu amakwawu anateli kudiwula iyi yilwilu nakutoñojoka nawu hikwila wuvumbiku. * Komana iyi yilwilu yamwekeshaña yitoñojoka yaNzambi wahela yuma yatama yejima? Tutondolweleña yuma yatama kuhitila mukwikala nachilwilu chakudihemba nikuhela yuma yejima yahelayi Yehova.—Rom. 12:9.

13. Muloñadi kutoñojokela chadimu neyi chatoñojokañayi Yehova chikunateli kutukwasha kufuukula chiwahi kumbidi?

¹³ Neyi tunakudiza, twatela kumona yuma neyi chayimonañayi Yehova muloña chikatukwasha kufuukulahu chiwahi kumbidi. Chikafumamu, neyi tumona kukala kunakukeñeka kufuukulahu swayi, twakadiloñesha nawa twakeluka chakukwimanisha. (Yish. 22:3) Tushinshikenu yakutalilahu yamuBayibolu.

14. Chumanyi chitwadizilaña kudi Yosefu chamukaaniniyi ñoda Potifwari?

¹⁴ Yosefu chashikeneniyi kukaana hamudimbekeleñawu kudi ñoda Potifwari, wamwekesheli nindi wadiña nakutoñojoka chikupu chamonañayi Yehova wulu. (Tañenu Kutachika 39:8, 9.) Kubombelahu, chamwakwiliyi ñoda Potifwari nindi: “Nukutwesha ñahi  kukoña chumichi chasweja kutama nakumuvulumuna Nzambi?” wamwekesheli nindi wadiña nakumona yuma neyi chayimonañayi Nzambi. Indochu etu? Mukwila ñahi neyi mukwenu mumwazatilaña yatachika kuyikenkamina? Indi kwiji ayitumina nsañu yinakuhosha hawuvumbi hela mwevulu wanzekesi hafoni yenu? * Chikwikala chaswayi kushinda neyi tutoñojokañahu dehi nikumona yuma neyi chayimonañayi Yehova.

15. Kufwana aHeberu asatu, tunateli kutondolwela ñahi ikakeja dakufumpa kashinshi ketu kudi Yehova?

¹⁵ Ichi dinu tushinshikenu hadi aHeberu asatu aShadaraki, Meshaki niAbedinego. Chakaaniniwu kudifuukula kumukishi wawuru waMwanta Nebukaneza nichamwakwiliwu chamwekesheli nawu adiña adiloñeshela dehi chadimu haniku kukala kwamwekeni nakutwalekahu kwikala ashinshika kudi Yehova. (Kwid. 20:4, 5; Dan. 3: 4-6, 12, 16-18) Mukwila ñahi neyi mukulumpi wayiñija mudimu yayileja nindi muhaniku mali akukwasha chidika munadibombeli nsakililu yakutwamba? Chatela muhembeleleña chuma chamuchidiwu chikayimwekeni, kwila mutoñojokela chadimu hachuma chamuchidiwu neyi chatoñojokañayi Yehova nehi? Neyi chuma chamuchidiwu chiyimwekena, chikwikala chaswayi kwila nikuhosha yuma yaloña neyi cheliliwu aHeberu asatu.

16. Kutoñojoka neyi chatoñojokañayi Yehova kunateli kutukwasha ñahi kudiloñeshela chadimu neyi tunakati?

¹⁶ Kutoñojokela chadimu hakubula kufumpa kashinshi ketu kudi Nzambi, kunateli kutukwasha neyi anakutuuka yikatu. Chineli twakaanaña kutwisha mashi hela nyichidi yejima yiwana yamashi, jinjila jikwawu jakuukilamu munabombeli mashi jakeñekaña muntu yomweni kufuukulahu kushindamena hayishina yamuBayibolu yamwekeshaña chatoñojokañayi Yehova. (Yilw. 15:28, 29) Mwamweni, bayi neyi twatela kufuukula hampinji yitudi muchipatelaku, muloña haniyi mpinji twatiyaña kukata chakwila kwila tutwesha kufuukula chiwahi nehi. Ayinu diyi mpinji yimwatela kusandujola, kufwachika kaadi yamashi nikuhanjeka nandotolu. *

17-19. Muloñadi chichalemena chayinu mpinji kumona yuma neyi chayimonañayi Yehova? Shimunenu chakutalilahu chinakumwekesha nawu twatela kudiloñeshela chadimu.

 ¹⁷ Ichi dinu tushinshikenu chashikeneniyi Yesu kumwakula Petulu hamukwashileñayi mwaluwa nindi: “Mwanta bayi wuhosha chuma chamuchidiwuku.” Yesu wadiña nakutoñojoka chikupu hakwila nkeñelu yaNzambi nikushikija wuprofwetu wahosheleña hakufwa kwindi hanu hamaseki. Kutoñojoka haniyi yuma kwamukwashili kutwalekahu kwikala washinshika kudi Nzambi nikuhana wumi windi kukoola antu ejima.—Tañenu Matewu 16:21-23.

¹⁸ Makonu, Nzambi nakukeña nindi antu ejima ekali amabwambu jindi nawa adikiteña mumudimu wakushimwina. (Mat. 6:33; 28:19, 20; Yak. 4:8) Neyi chichamumwekeneni Yesu, hadaha antu itwakuhwelela anateli kutukañesha kuzata iwu mudimu. Chakutalilahu, mukwila ñahi neyi mukulumpi wamudimu yayileja nindi nakukeña kuyinka chifulu chahewulu nawa nindi mukufolaña mali amavulu, ilaña iwu mudimu wukuyikañeshaña kuzata nyidimu yakuspiritu? Indi neyi mudi mukashikola, munateli kwila ñahi neyi ayileja nawu mufumi kwitala denu nakuya nakutañilaku cheñi chawana kwiluña dacheñi? Haniyi mpinji, kwila musambila kulomba, kusandujola, kulomba wukwashu kudi anvwali jenu hela akulumpi, kuhiñahu dinu himukufuukulahu nehi? Chikuwaha neyi chayinu mpinji mumonaña yuma neyi chayimonañayi Yehova nikutoñojoka neyi chatoñojokañayi. Dichi neyi yuma yamuchidiwu yikayimwekena, chikwikala chaswayi kushinda iku kweseka. Nawa mukwiluka chakwila muloña mwadikasa dehi mumuchima wenu kutwalekahu kumukalakela Yehova.

¹⁹ Mwatela cheñi kutoñojoka hayuma yinateli kuyimwekena mukukasumwisha. Hela chochu, hitukutwesha kudiloñeshela chadimu hayuma yejima yinateli kutumwekenaku. Ilaña neyi tutoñojokaña chikupu hayitoñojoka yaYehova hakudiza kwankawetu, tukwanukaña yuma yitunadizi nikuyizatisha hakukala kwejima kunateli kutumwekena. Dichi, neyi tunakudiza, tutoñojokeña nankashi chamonañayi Yehova yuma nikutoñojoka neyi chatoñojokañayi nikwiluka yitoñojoka yindi chiyinateli kutukwasha kufuukulahu chiwahi makonu nikumbidi.

20, 21. (a) Muloñadi chitukadiluñishila kusubuka kwalala mwituña dadiha? (b) Tunateli kwikala ñahi namuzañalu chayinu mpinji?

²⁰ Wejima wetu twatalilaña chikupu ituña dadiha. Tunakutalila paradisa hanu hamaseki mutukadiluñishaña wumi wahaya nyaaka. Muchiyuulu chaWanta waNzambi antu hiyakaneñaña neyi chinakuneñawu muyinu nshakaminu yamakonuku. Hela chochu, nihaniyi mpinji antu akatwalekahu kwikala nawuswa wakudifuukwila. Muntu wejima nateli kutondahu kwila yuma yinakukeñayi.

²¹ Hela chochu, iku kusubuka kwakekala namwakukumina. Kutalisha hakufuukulahu yuma yatama niyayiwahi, akwakudizoza akekala mwituña dadiha akafuukulaña kwesekeja nanshimbi jaYehova niyitoñojoka yindi. Chumichi chikawaha muloña chikaleta muzañalu chikupu nikuwunda. (Mas. 37:11) Chayinu mpinji hitunateli kudiluñisha muzañalu waswejaku, ilaña tukutwalekahu kudiluñisha muzañalu wutukweti hayinu mpinji yitunakutachika kutoñojoka neyi chatoñojokañayi Yehova.