1, 2. (a) Chumanyi chasweja kulema chitukweti? (b) Chalalanyi chitwalemesha, nawa muloñadi? (Talenu mwevulu wakutachikilahu.)

CHUMANYI chasweja kulema chimukweti? Komana munateli kuchihimpa nachuma chapela wuseya? Ñakwilu yanawa malwihu yapela kudi ambuña aYehova adihana. Chuma chasweja kulema chitukweti hiwubwambu wutukweti naYehova nawa kwila tuwulandisha nachuma chidi chejima nehi. Twalemesha cheñi chalala chamuBayibolu chatukwashaña kuswina kwakwihi naTata yetu wamwiwulu.—Kol. 1:9, 10.

² Toñojokenu hayuma yatudizishañayi Ntañishi Wabadika Mwizu dindi, Bayibolu! Watulejaña chalala hakulema kwejina dindi niyilwilu yindi yayiwahi. Watulejaña nindi watukeña chatwinkeliyi Mwanindi wakeñayi, Yesu, kwikala ifutu danyiloña. Yehova watulejaña cheñi haWanta wawuMesiya, wayinka awayishewa kuchiñeja kwakuya mwiwulu nawa “anyikoku amakwawu” wayinka kuchiñeja kwakushakama hamaseki muParadisa. (Yow. 10:16) Watudizishaña chitunateli kushakama. Twalemesha ichi chalala  muloña chatukwashaña kuswina kwakwihi naNleñi yetu. Chatukwashaña kwiluka netu chihandilu chikweti nkeñelu.

3. Komana kulanda chalala kwatalisha mukufweta mali?

³ Yehova hiNzambi wahanaña. Wominaña wanyi antu akeñakeñaña chalala. Yehova wahanini wumi waMwanindi wakeñayi kwikala chawaana. Nzambi hakeñaña nindi tufweti mali kulonda yatwinki chalalaku. Shimona chakeñeleñayi kumwinka kapostolu Petulu mali kulonda amwinki wuswa wakuhana spiritu yajila, Petulu wakaanini nakumuleja nindi: “Siliva yeyi yikisikili hamu naneyi aweni, muloña eyi wunakutoñojoka neyi watela kutambula chawaana chaNzambi namali.” (Yil. 8:18-20) Hanu dinu nsañu yonenawu yakwila nawu: ‘Landaku chalala’ yatalisha mudihi?

4. Yumanyi yitukudiza hachalala muchinu chibaaba?

⁴ Tañenu Yishimu 23:23. Twatela kuzata nañovu hakwila nawu twiluki chalala chaMwizu daNzambi. Kudi yuma yitwatela kwila hakwila twiluki chalala. Nsoneki waYishimu wahosheli nindi, neyi ‘tulanda’ hela tuheta ‘chalala’ twatela kwikala asoñama kulonda tubuli ‘kuchilandisha’ hela kuchijimbesha. Tuhanjekenu mwatalisha ‘kulanda’ chalala niwuseya wutunateli kuchilanda nachu. Twatela kulemesha chalala nikuzata nañovu kulonda tubuli ‘kuchilandisha.’ Neyi chitukushinshika, tukwiluka netu chalala chekala nawuseya kubadika yuma yejima.

5, 6. (a) Tunateli kulanda ñahi chalala chakubula mali? Lumbululenu. (b) Chalala chatukwashaña ñahi?

⁵ Chuma chawaana nichena chakeñekaña kuzata nañovu hakwila nawu twikali nachu. Izu dachiHeberu dekala haYishimu 23:23 dabalumunawu nawu “landaku,” dalumbuluka cheñi nawu “hetaku.” Mazu ejima ayedi atalisha mukwila nawu, kuzata nañovu hela kuhimpa chuma chimu nachuma chawuseya. Kulanda chalala tunateli kukulumbulula muniyi njila. Tuhoshenu netu hachisankanu anakuhana “Makondi Awaana.” Komana awa makondi anateli kudinjila hohu aweni? Kwakulehi! Twatela kuzata nañovu kulonda tuyi nakuyisenda kuchisankanu. Komana awa makondi awaana? Eña, ilaña twatela kuzata nañovu nikuzatisha mpinji kulonda tuyi kuchisankanu. Munjila yoyimu, bayi neyi twatela kufweta mali hakwila tulandi chalalaku. Hela chochu, twatela kuzata nañovu hakwila twiluki chalala.

⁶ Tañenu Isaya 55:1-3. Mazu aYehova asonekeli Isaya alumbulula mwatalisha kulanda chalala. Muniyi vasi, Yehova wesekeja izu dindi namenji, mayeli nivinyu. Kufwana menji atuta nawa akadi majilu, mazu aNzambi niwena awundishaña nyichima yetu. Cheñi, neyi chochatukwashaña mayeli nikukwasha anyana kukula chiwahi, mazu aYehova niwena atukoleshaña nikutukwasha kwikala nawubwambu wakola naNzambi. Kubombelahu, mazu aYehova ekala neyi vinyu. Munjilanyi? Bayibolu yashimuna nawu vinyu yaluñishaña muntu. (Mas. 104:15) Yehova chalejañayi antu jindi nindi: “landenu vinyu,” watulejaña nindi tukudiluñishaña neyi twilaña mwatulejaña izu dindi. (Mas. 19:8) Yehova wazatishaña iyi yuma kulonda twiluki kuwaha kwafumaña mukudiza nikuzatisha chalala chamwizu daNzambi. Tunateli kwesekeja ñovu nawuseya wutwahanaña. Tuhanjekenu hayuma yitanu yitunateli kufweta hakulanda chalala.

7, 8. (a) Muloñadi chitwatela kwikalila nampinji yeneni hakwila nawu tulandi chalala? (b) Kansi wumu mukashikola welili ñahi hakwila nawu yalandi chalala, nawa mwafuminidi?

⁷ Mpinji. Dichuma chatela kufwetawu antu ejima alandaña chalala. Mpinji yakeñekaña  hakwila nawu tutiyi nsañu yaWanta, kutaña Bayibolu ninyikanda yashindamena haBayibolu, kudiza Bayibolu nkawetu, kuloñesha nikuya nakupompa. Twatela ‘kulanda’ hela kwikala nampinji kuhitila mukuleka yuma yamukunkulwayi yatudilaña mpinji. (Tañenu Aefwesesa 5:15, 16, nitumazu twaheshina.) Mpinji yishika hadihi yakeñekaña hakwila nawu twiluki chalala chamuBayibolu? Chumichi chashindamena hachihandilu chetu. Hosi mwakukumina kutalisha hakudiza kwiluka kwaYehova, njila jindi ninyidimu yindi. (Rom. 11:33) Kaposhi Kakutalila katachi kesekejeli chalala “nankenu yanyanya” nawa kahosheli nawu: “Bayi mumona hohu muchidi wumu wankenu yachalala nenu wunawanini. Neyi nkenu yimu yachalala yashikilili, chiña Nzambi watwinkelañahu chalala chikwawu wanyi. Keñelenuhu jikwawu jajivulu.” Tunateli kudihula netu: ‘Chisweku chami chachalala chinashiki hadihi?’ Hela chakwila tunateli kushakama haya nyaaka, tunateli kutwalekahu kudiza yuma yayivulu hadi Yehova. Makonu, chuma chalema hikuzatisha mpinji yetu chiwahi hakulanda chalala neyi chakwila chihandilu chetu chinatwiteji. Talenu muntu wumu wakeñesheli chalala.

⁸ Mariko, *kansi wamumbanda wakuJapan, wayili kushikola kuNew York City, U.S.A. Haniyi mpinji, wadiña wakeña nsakililu yimu yamuJapan yatachikili mu 1959. Muhela wumu payiniya wadiña nakushimwina kwitala nikwitala wamuhumañeni Mariko. Chatachikiliyi kudiza chalala chamuBayibolu, Mariko watiyili kuwaha nawa wamulejeli iwu muhela nindi adizeña kapampa kayedi mumulungu. Hela chakwila wadiña nakuya kushikola nikuzata mudimu wamafuku antesha mumulungu, Mariko watachikili kuya nakupompa. Walekeli cheñi kukisila mpinji kuyuma yamukunkulwayi hakwila yekali nampinji yakudiza chalala. Kuleka iyi yuma kwamukwashili kudiza chalala mukunyakashana. Muchaaka chochimu, wapapatisheweli. Mu 2006, hanyima yakwila munahiti dehi tukweji 6, watachikili wupayiniya nawa natwalekihu kuzata wupayiniya.

9, 10. (a) Kulanda chalala kwatukwashaña ñahi chitwamonaña yuma yakumujimba? (b) Yumanyi yalekeliyi kansi wumu wamumbanda, nawa chayinu mpinji nakutiya ñahi?

⁹ Yuma yakumujimba. Hakwila nawu tulandi chalala, hadaha tunateli kuleka nyidimu yamali niyuma yikwawu yitwafwilaña. Hampinji yelili ayibinda anshi aPetulu niAnderi ayileji kudi Yesu nawu atela kwikala “ayibinda awantu,” “ashiyili tuleñi twawu.” (Mat. 4:18-20) Hela chochu, antu anakudiza chalala makonu hiyanateli hohu kushikena kuleka nyidimu yawuku. Ayinka mudimu wakwakamena chisaka. (1 Tim. 5:8) Hela chochu, antu anakudiza chalala kakavulu atela kuhimpa yitoñojoka yakusweja kukeña yuma yakumujimba niyuma yalemeshawu. Yesu wahosheli hatooka chumichi chahosheliyi nindi: “Lekenu kudilumbikila maheta hamaseki . . . Ilaña, dilumbikilenu maheta mwiwulu.” (Mat. 6:19, 20) Shinshikenu chuma chelili kansi wumu wamumbanda.

¹⁰ Maria, watachikili kuhema chisela chagolf hachidiñayi kansi henohu kanda yatachiki shikola. Hampinji yadiñayi kushikola yahewulu, welukili chikupu kuhema ichi chisela chakwila atachikili nikumutañisha shikola yayunivesiti chawaana. Wakeñeli nankashi chisela chagolf nawa wakeñeleña kwikala wakuluka yitembi munichi chisela nikwikala namali amavulu. Dichi, Maria watachikili kudiza chalala nawa wakeñeli nankashi yuma yadizileñayi. Watiyili kuwaha muloña chalala chahimpili yuma muchihandilu chindi. Wahosheli nindi:  “Chinatachikili kuzatisha yuma yinadizileña muBayibolu nekalili namuzañalu.” Maria welukili nindi chikumukalila kukalakela Nzambi niyuma yakumujimba hampinji yoyimu. (Mat. 6:24) Wafweteli mali kuhitila mukuleka yuma yakeñeliyi kwila muchihandilu chindi, kukuluka yitembi muchisela chagolf, kwikala namaheta nikuya mpuhu. Muloña wakulanda chalala, chayinu mpinji nakukalakala wupayiniya nawa wahoshaña nindi wudi “namuzañalu waweni nichihandilu chachiwahi.”

11. Neyi tulanda chalala, wubwambu wetu nawantaña niamabwambu jetu wekalaña ñahi?

¹¹ Wubwambu wutukweti nawantu amakwawu. Neyi tutachika kuzatisha yuma yitunadizi muBayibolu, wubwambu nawantaña nimabwambu jetu watela kuhimpika. Muloñadi? Yesu wayilombeleliku akwakumulonda nindi: “Yijiliki nachalala; izu deyi dichalala.” (Yow. 17:17) Izu dakwila nawu “Yijiliki,” dinateli kulumbuluka cheñi nawu “yaambuli.” Neyi tudiza chalala, twadambulaña nakaayi muloña twalekaña kwila yuma yamukaayi. Antu atumonaña munjila yambukaku muloña chihandilu chetu chahimpikaña. Twalondelaña nshimbi jamuBayibolu. Hela chakwila tunakukeña kuleta chaambu wanyi, amabwambu jetu amakwawu niantaña jetu anateli kudambula kufuma kudi etu hela kudimbulula yuma yitunakudiza. Twahayamaña wanyi neyi chuma chamuchidiwu chimwekana. Yesu wahosheli nindi: “Chalala, ayilumbu jamuntu akekala antu amwitala dindi yomweni.” (Mat. 10:36) Watulejeli cheñi nindi yuma yitukatambwila muloña wakulanda chalala yinabadiki yuma yitunachilandi nachu.—Tañenu Maku 10:28-30.

12. Wuseyanyi wahaniniyi kaYudeya hakulanda chalala?

¹² Kufuma tuhu kuwansi windi, kaYudeya wumu mukwakulanda nakulandulula wejina daAaron amudizishili nawu bayi yatenaña ijina daNzambiku. Hela chochu, Aaron wadiña nampwila yakukeña kudiza chalala. Watiyili kuwaha chelili Chinsahu wumu yamuleji nsona jiwana jachiHeberu jemenañaku ijina daNzambi, ditwatenaña netu “Yehova.” Kufumahu, wayili musinagogi nakuyileja arabi yuma yadiziliyi. Aaron hakuhweleleli yuma yamwililiwuku. Chatela niwena azañalali hakwiluka chalala hejina daNzambi, ilaña amufwijilili mazeñi nawa amuhañili. Antaña jindi niwena amuheleli. Chakadi kutiya woma, watwalekelihu kulanda chalala nawa wekalili Chinsahu chaYehova wahamuka muchihandilu chindi chejima. Kufwana Aaron, hakwila nawu twendeña muchalala, twatela kufweta wuseya nakwiteja yuma yikuhimpika muchihandilu chetu kushilahu nichitwadiluka nawantaña jetu.

13, 14. Tunateli kuhimpa ñahi yitoñojoka niyilwilu yetu hakwila nawu tulandi chalala? Shimunenu chakutalilahu.

¹³ Yilwilu niyitoñojoka yatama. Neyi tudiza chalala nawa tutachika kulondela chahosha Bayibolu, twatela kuleka yitoñojoka niyilwilu yatama. Shinshikenu chasonekeliyi Petulu haniku kuhimpika nindi: “Hakwikala anyana ovwahilaña, lekenu kwiteja kufwila kumwadiña naku kunyima kumwafwilileña mukubula kwiluka kuyiluwañeshiku, ilaña ikalenu ajila muyilwilu yenu yejima.” (1 Pet. 1:14, 15) Antu ashakamineña mumusumba waKorinda mwenzeli yilwilu yatama, ahimpili yilwilu yawu chelili adizi chalala. (1 Kor. 6:9-11) Antu amavulu makonu niwena analeki yilwilu yawu yatama hanyima yakudiza chalala. Petulu wayilejeli cheñi akwaKristu amumafuku indi nindi: “Mpinji yakwila mwaya nkeñelu yawakwanyuza yinahiti dehi, yimwakoñeleña yilwilu yawukapwa nsonyi, kufwila yuma yatama, kusweja  kunwa walwa, yidika yamapumba, kusheta nikupesha kwakufumpa nshimbi.”—1 Pet. 4:3.

¹⁴ Hadi yaaka yayivulu, Devynn niJasmine adiña nakusheta. Hela chakwila Devynn wadiña weluka mudimu wakusoneka yileji yamali, amuhañileña nyidimu muloña wakusheta. Jasmine wadiña nayilwilu yatama nimadombu. Ifuku dimu Jasmine chayileñayi munjila iku nasheti wabulakeni amishonali ayedi. Awa amishonali atiyañeni kutachika kudiza nindi Bayibolu, ilaña chayiliwu nakumuwana hetala, awanini Jasmine niDevynn anasheti. Akuhweleleli wanyi nawu awa amishonali akuyendela kwitala dawu. Yuma yahimpikili ifuku dalondelelihu. Kufuma tuhu hadiziliwu katachi, aJasmine naDevynn akeñesheli nankashi kudiza Bayibolu nawa atachikili kuzatisha yuma yadizileñawu. Mutukweji tusatu hohu, alekeli kunwa walwa nawa asonekesheli wulu wawu kunfulumendi. Antu amavulu amweni chahimpiliwu nawa chumichi chaletesheli antu amavulu mumukala wawu kutachika kudiza Bayibolu.

15. Chumanyi chinateli kwikala chakala kuleka hakwila nawu mulandi chalala, nawa muloñadi?

¹⁵ Yuma yachisemwa yakaanishawu munsona niyilwilu yatama. Kuleka yilwilu yachisemwa yakaanishawu munsona niyilwilu yatama hakwila nawu muntu yalandi chalala hichuma chikwawu chinateli kwikala chakala kuleka. Hela chakwila antu amakwawu chinateli kuyipelela kuleka yuma yachisemwa yakaanishawu muNsona, amakwawu anateli kushintajala muloña wekakeja dawantaña jawu, antu azatañawu nawu niamabwambu jawu. Chumichi chinateli kwikala chakala sweje-e dinu neyi munabombeli nsañu yakwanakana antu afwa dehi. (Kuhit. 14:1) Kuhamuka kwamwekesheliwu antu amakwawu kunateli kutukwasha kuhimpa. Shinshikenu antu amumafuku awapostolu ashakamineña muEfwesesa chamwekesheliwu kuhamuka.

16. Antu amakwawu amuEfwesesa elili ñahi hakwila nawu alandi chalala?

¹⁶ Antu ashakamineña muEfwesesa akoñeleña yuma nawukwashu wawandemoni. Hakwila nawu aleki yuma yakaanishawu muBayibolu nakulanda chalala, yumanyi yeliliwu antu akoñeleña yuma nawukwashu wawandemoni ekalili akwaKristu? Bayibolu yalumbulula nawu: “Dichi, antu amavulu owu akoñeleña yuma nawukwashu wawandemoni apompesheli nyikanda yawu hamu nakuyochela hamesu awantu ejima. Nawa chachindiliwu wuseya waniyi nyikanda, washikili kumali 50,000 asiliva. Mazu aYehova atwalekelihu nakutanda nawa emikileña mushindu chikupu.” (Yil. 19:19, 20) AkwaKristu ashinshika adihanini chikupu nawa atambwilili nkisu jabadika.

17. (a) Yumanyi yinadibombeli muwuseya wakulanda nachu chalala? (b) Malwihwinyi itukakula muchibaaba chinalondelihu?

¹⁷ Yumanyi yimwafweteli hakulanda chalala? Wejima wetu twazatishaña mpinji hakulanda chalala. Amakwawu niwena alekaña kufwila yuma yakumujimba nikukeheshaku wubwambu wukwetiwu nawantu amakwawu. Amavulu analeki yilwilu niyitoñojoka yatama nawa analeki yuma yachisemwa yakaanishawu munsona niyilwilu yatama. Hichikweti muloña nayuma yitunafwetiku, ilaña tuneluki chikupu netu chalala chamuBayibolu chalema kubadika wuseya wutunateli kufweta. Twatambwilaña chuma chasweja kulema, wubwambu wetu naYehova. Neyi tutoñojoka hankisu jinafumi mukwiluka chalala, kwosi nimuntu hela wumu wunateli kutoñojoka kuchilandishaku. Chuma chamuchidiwu chinateli kumwekana ñahi nawa tunateli kuchitondolwela ñahi? Tukakula awa malwihu muchibaaba chinalondelihu.