1. Muloñadi chitwakeñelaña kutukundeja?

WEJIMA wetu twakeñaña kutukundeja. Hadaha tunakwakama, anakutwila chatama nawa tunakukabakana. Hadaha tunakukabakana muloña wakukula, yikatu hela muloña wakujimbesha antu itwakeña. Etu amakwawu atukabishaña. Tunakushakama nawantu anasweji madombu. Mwalala tunakwiteja netu ayinu ‘mpinji yakala’ yinakumwekesha nawu tunakushakama “mumafuku akukuminina” nawa ifuku chidahita dinakutuswija kwakwihi netuña dadiha. (2 Tim. 3:1) Hadaha twatachikili dehi kuhembelela netu tumoni kushikijewa kwayikaninu yaYehova nawa hadaha makabi anakuswejelaku. Hanu dinu, kudihi kutunateli kuwana kukundeja?

2, 3. (a) Yumanyi yitweluka hadi Habakuki? (b) Muloñadi chitukuhanjekela hamukanda waHabakuki?

² Hakwila nawu tuwani ñakwilu, tuhanjekenu hamukanda waHabakuki. Hela chakwila Nsona jashimuna wanyi chihandilu chaHabakuki ninyidimu yazatiliyi, mumukanda waHabakuki dimu tunateli kuwana nsañu yinateli kutukundeja. Hadaha ijina daHabakuki datalisha mukwila nawu ‘kukumbata kwakukeña.’  Chumichi chinateli kwimenaku Yehova chakumbatañayi hakukundeja hela akwakudifuukula indi chamukakelañawu. Habakuki wahosheli naNzambi nakumwihula malwihu. Chineli Yehova wamoneneni Habakuki kusoneka nsañu yahanjekeleñawu, dikwila nawu wadiña nakutwihwilaku ninetu.—Hab. 2:2.

³ Nsona yashimuna hohu nsañu yahanjekeliyi Yehova naniwu kaprofwetu waneñeli. Mukanda windi wekala hakachi “[kayuma] yejima yasonekeliwu kunyima” nawa yasonekawu Mwizu daNzambi Bayibolu, “kulonda mukuumika kwetu nimukukundeja kwamuNsona, twiikali nakuchiñeja.” (Rom. 15:4) Mukanda waHabakuki wunateli kutukwasha ñahi hamuntu-hamuntu? Wukutukwasha kwiluka mwatalisha kumukuhwelela Yehova. Cheñi, wuprofwetu waHabakuki watukwashaña kwiluka netu tunateli kuwundisha muchima hela chakwala tunakukabakana. Muloña wachumichi, tuhanjekenu nsañu yayivulu mumukanda waHabakuki.

4. Muloñadi Habakuki chaneñeleliyi?

⁴ Tañenu Habakuki 1:2, 3. Habakuki washakamineña mumpinji yakala. Waneñeli nankashi muloña washakamineña nawantu atama nawa akwamadombu. Adi kuleka mpinjinyi kukoña yuma yatama? Muloñadi Yehova chabuliliyi kumanisha swayi iku kukala? Habakuki wamweni yuma yatama yadiña nakukoñawu antu amwituña mwashakamineñayi. Wamweni neyi kukala kukumana wanyi. Muniyi mpinji yakala, wamutambikili Yehova kulonda yamanishi kukala. Hadaha Habakuki watachikili kutoñojoka nindi Yehova nakushaku maana wanyi hela nindi Nzambi wukumanisha wanyi swayi iku kukala. Komana ninenu mwatiyaña neyi chatiyiliyi iwu kambuña aNzambi?

5. Chikumanyi chalema chekala mumukanda waHabakuki? (Talenu mwevulu wakutachikilahu.)

⁵ Komana Habakuki walekeli kumukuhwelela Yehova? Komana walekeli kukuhwelela muyikaninu yaNzambi? Kwakulehi! Chineli wamulejelimu Yehova kukala niyitoñojoka yindi yejima, chinakumwekesha nawu washindameneni hadi antu wanyi nawa hazeyeliku. Waneñeli muloña wakwila welukili wanyi mpinji yatoñweliyi Nzambi hela chaletesheli Yehova kumwiteja kutwalekahu nakukabakana. Yehova chamoneneniyi Habakuki kusoneka yitoñojoka yindi, watulejaña chikuma chalema nindi: Twatela kumuleja Nzambi yuma yejima yitunakutoñojoka. Mwamweni, watulejaña nindi twichileña nyichima yetu kudi yena mukulomba. (Mas. 50:15; 62:8) Yishimu 3:5 niyena yatukoleshaña ‘kumukuhwelela Yehova namuchima wetu wejima, bayi tushindamenaña kukashinshi ketu etu awenuku.’ Habakuki welukili awa mazu nawa wayihembeli kumuchima.

6. Kulomba kwalemenadi?

⁶ Habakuki wazatili nañovu hakuswina kwakwihi naYehova, Ibwambu dindi wakuhwelelayi nawa Tata yindi. Habakuki hashindameneni hakashinshi kindi yomweni, nindi yamanishi kukalaku. Ilaña walombeli hachineñi nikwakama kwadiñayi naku, chuma chitunateli kwila ninetu. Dichi, Yehova Watiyaña mwalombañawu antu nakututambika nindi tumukuhweleli kuhitila mukulomba nakumuleja kwakama kwetu. (Mas. 65:2) Neyi twila mwenimu, tukumona Yehova chikwakulayi kulomba kwetu, chatukumbatañayi nakukeña hakutulombola. (Mas. 73:23, 24) Wukutukwasha kwiluka yitoñojoka yindi hela chakwila tudi mukala. Kulomba kwakufuma hamuchima kwamwekeshaña nawu twamukuhwelela Nzambi.

7. Yehova welili ñahi nakwakama kwadiña naHabakuki?

⁷ Tañenu Habakuki 1:5-7. Hanyima yakwila namuleji dehi Yehova kwakama kwindi, hadaha Habakuki wadiña nakutoñojoka chadi kwilayi Yehova. Chineli hiTata wakundejaña nawa watoñojokelañaku, Yehova hazuwili namazu ahosheliyi Habakukiku. Nzambi welukili nindi Habakuki wakeñeleña wukwashu. Mazu ahosheliyi Yehova hachuma chakayilayi aYudeya, Yehova wamulejeli Habakuki chuma chikayimwekena kumbidi. Hadaha Habakuki diyi muntu watachi alejeliwu kudi Yehova nawu kukuma kwanshakaminu yawu kwadiña mukamwihi.

8. Muloñadi Habakuki chahayamininiyi namazu aYehova?

⁸ Yehova wamulejeli Habakuki nindi keña yayibabeshi. Kujilumuka kwanidi ikiñu datama nawa dasweja madombu kwadiña kwakwihi. Mumazu akwila nawu “mumafuku enu,” Yehova wamwekesheleña nindi wunsompeshi wanawa antu wukekalaku mumpinji yaniwu kaprofwetu hela mumpinji yawantu amwikiñu dindi. Yehova welili yuma munjila yambukaku nachatoñojokeleñayi Habakuki. Komana dichuma chakeñeleñayi Habakuki? Chuma chamulejeliwu kudi Yehova chamwekesheleña nawu makabi akasweja muYuda. * A Kaladeya (aBabiloni) adiña atama nankashi nawa aswejeli madombu kubadika antu jaHabakuki, adiña elukaku nshimbi jaYehova. Muloñadi Yehova chikuzatishilayi iwu muza wadifukwileña kudi ankishi hakubabesha antu jindi? Mwadi kwila ñahi neyi iyenu alejeliwu mazu amuchidiwu?

9. Habakuki watela wadihwileña malwihwinyi?

⁹ Tañenu Habakuki 1:12-14, 17. Habakuki welukili nindi Yehova wakazatisha aBabiloni hakubabesha antu ashakamineñayi nawu akoñeleña yuma yatama, ilaña wachidiña nakujinoka. Hela chochu, wamulejeli Yehova nindi wukutwalekahu kwikala “Ilola” dindi. (Kuhit. 32:4; Isa. 26:4) Habakuki watwalekelihu kukuhwelela mukukeña kwaNzambi niluwi lwindi. Chumichi chamukwashili iwu kaprofwetu kufunta cheñi kudi Yehova nakumwihula malwihu. Hadaha wadihwileña awa malwihu, Muloñadi Nzambi chetejeleliyi yuma kusweja kutaminaku muYuda? Muloñadi chabuliliyi kushikena kumanisha kukala? Muloñadi Wañovu Jejima chetejeleliyi yuma kusweja kutaminaku? Muloñadi ‘chinamweneniyi nzo-o’ iku kutama kunasweji? Yena “Wajila,” “mesu [indi] atooka abulaña kutwesha kubanjila yatama.”

10. Mpinji yikwawu tunateli kutiya ñahi neyi chatiyiliyi Habakuki?

¹⁰ Mpinji yikwawu tunateli kutiya neyi chatiyileñayi Habakuki. Twamutiyililaña Yehova. Muloña wakumukuhwelela, twatañaña nikudiza Izu dindi nawa chumichi chatukwashaña kuchiñeja. Twatiyaña yikaninu yindi munshimbi jitwatambwilaña mukuloñesha kwindi. Hela chochu, tunateli kudihula netu, ‘Yihuñu yitunakumona yakamana mpinjinyi?’ Chumanyi chitunateli kudizila kudi Habakuki?

11. Chumanyi chafuukwiliyi Habakuki kwila hanyima yakutiyilila kudi Yehova?

¹¹ Tañenu Habakuki 2:1. Habakuki chahanjekeliyi naYehova, muchima windi wawundili. Wafuukwilihu kumuchiñilila Yehova kulonda yamanishi kukala. Tuneluki chumichi muloña watwalekelihu kuhosha  nindi wukutwalekahu “nakuchiñilila ifuku dayihuñu.” (Hab. 3:16) Ambuña aNzambi amakwawu ashinshika achiñililili, anakutukolesha tumuchiñilileña Yehova yamanishi kukala.—Mika 7:7; Yak. 5:7, 8.

12. Yumanyi yitwadizilaña kudi Habakuki?

¹² Habakuki wafuukwiliyi kwila chumanyi? Chatachi, bayi tuleka kumulomba Yehova hela chakwila tudi mukwesekaku. Chamuchiyedi, twatela kutiyililaña kuyuma yatulejañayi Yehova Mwizu dindi nimukuloñesha kwindi. Chamuchisatu, twatela kumuchiñilila Yehova nikumukuhwelela chikupu netu wakamanisha yihuñu yetu mumpinji yatoñolayi. Neyi tutwalekahu kuhosha naYehova nikumutiyilila nakuhembelela neyi cheliliyi Habakuki, ninetu nyichima yetu yakawunda, chuma chakatukwasha kutwalekahu kuumika. Kuchiñeja kwetu kwakatukwasha kudiwunjika, chuma chakatukwasha kwikala namuzañalu hela chakwila tunakumona kukala kwakuvulu. Kuchiñeja kwatukwashaña kukuhwelela netu Tata yetu wamwiwulu wukamanisha kukala.—Rom. 12:12.

13. Kukundejanyi kwekala haHabakuki 2:3?

¹³ Tañenu Habakuki 2:3. Yehova watiyili kuwaha chamuchiñilililiwu kudi Habakuki. Wañovu Jejima wamweneña kukala kwahitileñamu Habakuki. Dichi, Nzambi wamukundejeli nakukeña chamulejeliyi kaprofwetu nindi wakakula malwihu indi. Yihuñu yindi yadiña kwakwihi nakumana. Nzambi wamulejeli Habakuki nindi: “Wundaku, nkuhweleli. Nakakwakula hela chakwila nakalaba!” Yehova wamwanukishili nindi Watoñola dehi mpinji yakushikija yikaninu Yindi. Wamukolesheli Habakuki kutwalekahu kuchiñilila mpinji yakashikijayi yikaninu Yindi. Chafuminimu, yuma yakeñeleñayi kaprofwetu yazatikili.

14. Yumanyi yitwatela kufwila kwila neyi tudi mumpinji yakala?

¹⁴ Neyi tudiwunjikaña nakumuchiñilila Yehova nikutiyilila yuma yatulejañayi tukuwundisha nyichima yetu hela chakwila tunakuhita mukukala kwakuvulu. Yesu wamwekesheli nindi twatela kumukuhwelela Yehova Mukwakuhemba Mpinji Muneni, chatela tusheña maana “[hampinji] hela yilaaka” yabula kushimunayi Nzambi. (Yil. 1:7) Dichi, bayi tuleka kuhembelela nakudizoza, nachikuhwelelu nikudiwunjikaku, tuzatisheña mpinji yetu chiwahi kumukalakela Yehova hanakumini ñovu jetu jejima.—Maku 13:35-37; Ñal. 6:9.

15, 16. (a) Yikaninwinyi yasweja kulema yekala mumukanda waHabakuki? (b) Iyi yikaninu yatudizishañadi?

¹⁵ Yehova wayikana antu ashinshika nindi: ‘Mukwakuloña wakahandila chikuhwelelu chindi’ nawa “hanu heseki hakenzala nakwiluka kwakwiluka kulema kwaYehova.” (Hab. 2:4, 14) Mwamweni, antu achiñililaña nakumukuhwelela Nzambi akayinka wumi.

¹⁶ Neyi mutaña chikaninu chekala haHabakuki 2:4, neyi dikatachi, munateli kutiya neyi himazu hohu. Hela chochu, kapostolu Pawulu wamweni kulema kwanichi chikaninu chaYehova chakwila wachizatishili kapampa kasatu munyikanda yindi. (Rom. 1:17; Ñal. 3:11; Heb. 10:38) Hela chakwila muntu waloña wukumona kukala, chikuhwelelu chindi chikumukwasha kuchiñilila mpinji yakashikijayi Nzambi yikaninu yindi. Yehova watulejaña nindi tutwalekihu kutalila yuma yakumbidi.

17. Yikaninwinyi yitwadizaña mumukanda waHabakuki?

¹⁷ Mukanda waHabakuki watudizishaña yikuma yalema wejima wetu tunakushakama  munanu mafuku akukuminina. Yehova wayikana antu aloña nawa amukuhwelela Yena nindi wakayinka wumi. Dichi, tutwalekihu kumukuhwelela Nzambi hela chakwila tunakumona makabi asweja. Nsañu yamulejeliwu Habakuki kudi Yehova yatukoleshaña nawu Nzambi wukatwalekahu kutukwasha nawa wakatwamwina. Watulejaña nindi tumukuhweleli nikuchiñilila mpinji yatoñolayi, mpinji yitukashakamaña muWanta waNzambi, iseki dejima dakenzala nawantu adi namuzañalu nawa awunda adifukulaña kudi Nzambi.—Mat. 5:5; Heb. 10:36-39.

18. Mazu aYehova amukwashili ñahi Habakuki?

¹⁸ Tañenu Habakuki 3:16-19. Mazu aYehova amukwashili Habakuki. Watoñojokeli chikupu hayuma yakuhayamisha yelililiyi Yehova antu jindi akunyima. Welukili nindi Yehova keña yamanishi kukala. Chumichi chamukundejeli iwu kaprofwetu hela chakwila welukili nindi hadaha wukutwalekahu kumona kukala. Habakuki walekeli kujinoka nawa wakuhweleleli chikupu nindi Yehova wukumukwasha. Mazu ahosheliyi anakumwekesha chikupu nawu wadiña hakachi kawantu ashimunawu muBayibolu amukuhweleleli Yehova. Antu adiza ahoshaña nawu mazu ekala muvasi 18 atalisha mukwila nawu “nukukiluka nakuzañalala mudi Mwanta; nukuhañana nakuzañalala mudi Nzambi.” Wejima wetu twatela kudizila kunawa mazu. Bayi neyi Yehova watuleja yuma yayiwahi hohuku, ilaña watulejaña nindi katataka yashikiji yikaninu yindi.

19. Tunateli kukundejewa ñahi neyi chakundejeweliyi Habakuki?

¹⁹ Chakadi nikujina, nsañu yalema yaHabakuki yatulejaña kumukuhwelela Yehova. (Hab. 2:4) Tunateli kumukuhwelela nikukolesha wubwambu wetu naYehova neyi hohu (1) tulombaña mpinji yejima, kumuleja Yehova kwakama kwetu kwejima (2) kutoñojoka nankashi Hezu daYehova nikulondela chatulejañayi mukuloñesha kwindi (3) nikukuhwelela nakumuchiñilila Yehova. Dichuma cheliliyi Habakuki. Hela chakwila watachikili mukanda windi namazu achineñi, wawumanishili nachikuhwelelu nimuzañalu. Twatela kwila neyi chelili Habakuki hakwila nawu ninetu atukumbati kudi Yehova. Chumanyi chinateli kutukundeja mudinu ituña datama?