1-3. (a) Twatiyaña ñahi neyi tudiza chalala chamuBayibolu? Lumbululenu. (Talenu nyevulu yakutachikilahu.) (b) Malwihwinyi itukuhanjekahu muchinu chibaaba?

ANTU makonu adi nachaaku chakufuntisha yuma yinakulandawu. Yileji yinakumwekesha nawu akwakulanda anakufuntisha nankashi yuma yinakulandawu. Yuma yinakufuntishawu antu yalandañawu haintaneti yinateli kubadika kumapesenti 30. Hadaha akwakulanda awanaña nawu anayilandishi yuma yinabuli kukuhwelelawu, yakisika dehi hela yinabuli kukeñawu. Dichi akeñaña kuyinka yacheñi hela kuyifuntishila mali.

² Hela chakwila tunateli kukeña netu atufuntishili mali itwalanda nachu yuma, hitukutwesha kufuntisha hela ‘kulandisha’ “[kwiluka] kwalala kwakwiluka chalala” chamuBayibolu ‘chitwalandañaku.’ (Tañenu Yishimu 23:23; 1 Tim. 2:4) Neyi chitwadizili muchibaaba chinafumihu, twelukili chalala muloña wakuzatisha mpinji yeneni hakudiza. Kubombela hakulanda chalala, twatela kuleka kufwila nyidimu yamali, kuleka kudikunda nawantu amakwawu nikuleka yilwilu yatama hela kuleka yuma yakaanishawu munsona. Hela chochu, nkisu jitwatambwila jinabadiki wuseya wutwafweteli.

 ³ Neyi tudiza chalala chamuBayibolu, twatiyaña neyi chatiyiliyi muntu washimwiniyi Yesu muchakutalilahu chindi. Hakwila nawu Yesu yalumbululi kulema kwachalala chaWanta waNzambi kudi antu anachiwani, wayilejeli hadi mukwakulanda nakulandulula wayili nakukeñakeña mperola yayiwahi nawa yawana yimu. Iyi mperola yawaniniyi yadiña yalema chakwila “hohenohu wayili nakulandisha” yuma yejima yadiñayi nayu kulonda yayilandi. (Mat. 13:45, 46) Munjila yoyimu, chalala chitwadizili, chalala chaWanta waNzambi hela chitwadizili Mwizu daNzambi chalema nankashi chakwila twashikeneni kuleka yuma yikwawu yakeñekeleña hakuchilanda. Neyi tulemesha chalala, kwila ‘tuchilandisha nehi.’ Hela chochu, chawushona antu jaNzambi amakwawu hiyanamoni kulema kwachalala chiyalandiliwuku nawa anachilandishi. Bayi chuma chamuchidiwu chitumwekenaku! Hakwila nawu tumwekeshi netu twalemesha chalala nawa netu tukachilandisha wanyi, twatela kulondelaña chahosha Bayibolu nawu: ‘Twalekenuhu kwenda muchalala.’ (Tañenu 3 Yowanu 2-4.) Kwenda muchalala, kwatalisha mukusambila kutwamijaku Wanta muchihandilu chetu chejima nikuzatisha yuma yitunadizi. Tushinshikenu hanawa malwihu: Muloñadi nawa munjilanyi amakwawu munateli ‘kulandishilawu’ chalala? Tunateli kutondolwela ñahi kwila chuma chamuchidiwu? Tunateli kutwalekahu ñahi “kwenda muchalala”?

4. Muloñadi antu amakwawu mumafuku awapostolu chalekeleliwu kwenda muchalala?

⁴ Antu amakwawu atiyili kuntañishilu yaYesu mumafuku awapostolu, hiyatwalekelihu kwenda muchalalaku. Chakutalilahu, hanyima yakwila Yesu nadiishi dehi izaza dawantu muchihayamisha, izaza damulondeleli kwishinadi daKaluñalwiji kaÑaliliya. Kweniku, Yesu wahosheli mazu ayineñesheli nindi: “Neyi enu kuda mujimba waMwana kamuntu hela kunwa mashi indi nehi, himwakekala nawumiku.” Chatela amwihuli Yesu mwatalishiliyi, ilaña mazu indi ayituntwishili nawa ahosheli nawu: “Awa mazu akala; hinyi wukuyitiya?” Chafuminimu, “atumbanji twindi amavulu afuntili kuyuma yashiliwu nawa alekeli kwendela hamu nindi.”—Yow. 6:53-66.

5, 6. (a) Muloñadi antu amakwawu chinakukañenyawu kwenda muchalala? (b) Muntu nateli kutachika ñahi kufuma muchalala chovu-chovu?

⁵ Chawushona, antu amakwawu makonu niwena anakañanyi kutwalekahu kwenda muchalala. Amakwawu atuntukili muloña wantiyishishilu yayiha yansañu yekala muBayibolu hela namazu ahosheliyi hela yuma yeliliyi manakwetu akuhwelelawu. Amakwawu atuntukili muloña wakufumba kwamuNsona kwatambwililiwu, indi kwiji afumini muchalala muloña wakubula kutiyañana namukwawu mukwaKristu. Hela chochu, amakwawu niwena adibombeli nawakwakusekesha niakwankunyi netu adimbululaña yuma yitwakuhwelela. Chafuminimu, amakwawu atachikili ‘kusenuka nakufuma’ kudi Yehova nimuchipompelu. (Heb. 3:12-14) Chadi kuwaha nankashi neyi atwalekelihu kwikala nachikuhwelelu nikumushindamena Yesu neyi cheliliyi kapostolu Petulu! Yesu chayihwiliyi apostolu indi neyi chakwila niwena akeñeleña kumushiya, Petulu washikeneni dakwakula nindi: “Mwanta, tukuya kudinyi? Eyi yeyi wukweti mazu awumi wahaya nyaaka.”—Yow. 6:67-69.

⁶ Amakwawu afumineña muchalala chovu-chovu, hadaha chakadi nikwiluka yuma yamwekeneña. Muntu wafumaña muchalala chovu-chovu wudi neyi watu  wunakukumpuka chovu-chovu kufuma kuchikumu. Bayibolu yashimuna iku kuhimpika nawu “kuluwankana.” (Heb. 2:1) Kwambukaku namuntu wafumaña muchalala iku neluki, muntu wunaluwankani welilañamu wanyi. Hela chochu, muntu wamuchidiwu walekaña kusha maana hawubwambu windi naYehova nawa mukuhita kwampinji nateli kuwujimbesha. Tunateli kutondolwela ñahi chuma chamuchidiwu?

7. Chumanyi chatachi chitwatela kwila hakwila tubuli kufuma muchalala?

⁷ Hakwila nawu tutwalekihu kwenda muchalala, twatela kwiteja nikwovwahila yuma yejima yatulejañayi Yehova. Twatela kutwamijaku chalala muchihandilu chetu nikwila yuma kwesekeja nayishina yamuBayibolu. Mwanta Davidi halombeleñayi kudi Yehova, wahosheli nindi: “Nukwenda mwaya nsañu yeyi yalala.” (Mas. 86:11) Davidi wafuukwilihu kwenda muchalala. Ninetu twatela kuzata nañovu kulonda tutwalekihu kwenda muchalala chaNzambi. Neyi kuzata nañovu nehi, tunateli kutachika kutoñojoka yuma yitwalekeli hakwiluka chalala, hadaha tunateli kutachika kuyila cheñi. Ilaña twatela kutwalekahu kwenda muchalala mpinji yejima. Tweluka netu kwosi chalala chitunateli kudiwulaku. Ilaña twatela kwendaña “muchalala chejima.” (Yow. 16:13) Tuhanjekenu yuma yitanu yitwafweteli hakwila tulandi chalala. Kuhanjeka haniyi yuma kukutukwasha kubula kufunta kuyuma yitwashili kunyima.—Mat. 6:19.

8. Kuzatisha mpinji chatama kunateli kumuleñela ñahi mukwaKristu kufuma muchalala? Shimunenu chakutalilahu.

⁸ Mpinji. Hakwila nawu tubuli kufuma muchalala, twatela kuzatisha chiwahi mpinji yetu. Neyi kubabala nehi, tunateli kutachika kumbila mpinji yeneni kuyuma yitwakeña, yisela, kuya haintaneti hela kutala TV. Hela chakwila iyi yuma yatama wanyi, ilaña tunateli kutachika kukisila mpinji yitwazatishileña hakudiza nkawetu niyuma yikwawu yakuspiritu kwililamu iyi yuma. Talenu chuma chamwekeni kudi muhela mukwaKristu wejina daEmma. * Kufuma tuhu kuwansi windi, Emma wakeñeli nankashi tuwalu. Kakavulu wayileña nakuhemena hatuwalu. Chihaleheli chantesha, watachikili kuditoñesha nampinji yakisilileñayi kunichi chisela. Wahimpili nawa mukuhita kwampinji wahemeneña ichi chisela hampinji yatelela. Nawa yuma yelili Cory Wells wakeñeli nankashi kuhemena hatuwalu murodeo, niyena yamukwashili. * Chayinu mpinji, Emma nakuzatisha mpinji yindi kunyidimu yakuspiritu, kuwanika nawakwawu akwaKristu niamabwambu jindi. Ichi wubwambu windi naYehova wunakoli chikupu nawa wudi namuzañalu muloña nakuzatisha chiwahi mpinji yindi.

9. Kukeña yuma yakumujimba kunateli kumuletesha ñahi muntu kuleka kukeña yuma yakuspiritu?

⁹ Yuma yakumujimba. Neyi tunakukeña kutwalekahu kwenda muchalala, bayi tuswejesha kukeña yuma yakumujimbaku. Chitwadizili chalala, twelukili netu kumuzatila Nzambi kwalema kubadika yuma yakumujimba. Twalekeli kufwila yuma yakumujimba hakwila twendeña muchalala. Hela chochu, mukuhita kwampinji tunateli kumona antu amakwawu anakulanda yozelu yayiha hela anakudiluñisha nayuma yikwawu yakumujimba. Tukutachika kutoñojoka netu tunakushalahu yuma yimu. Mukuhita kwampinji, tunateli kutachika kudiwula yuma yakuspiritu nakutachika  kufwila kwikala namaheta akumujimba. Chumichi chatwanukishaña chuma cheliliyi Demasi. “Nshakaminu yamakonu” yakeñeliyi yamuleñeleli kuleka kukalakela hamu nakapostolu Pawulu. (2 Tim. 4:10) Muloñadi Demasi chamushiyililiyi Pawulu? Bayibolu yashimuna wanyi neyi chakwila wakeñeli yuma yakumujimba kubadika nyidimu yakuspiritu hela neyi wakeñeleña wanyi kudihana kuzatila hamu naPawulu. Tunakukeña wanyi iku kufwila kwakukeña yuma yakumujimba kutuluwañeshi nakuleka kukeña chalala.

10. Yumanyi yitwatela kwila hakwila nawu tutwalekihu kwenda muchalala?

¹⁰ Wubwambu wutukweti nawantu amakwawu. Hakwila nawu tutwalekihu kwenda muchalala, bayi twiteja antu amakwawu kutuluwañeshaku. Hampinji yitwatachikili kwenda muchalala, twalekeli kudikunda nawantaña nimabwambu abula kwikala aYinsahu. Amakwawu atiyili kuwaha ilaña amakwawu atiyili kutama. (1 Pet. 4:4) Hela chakwila tunakufwila kudikunda nawantaña jetu nikuyilila yuma yayiwahi, twatela kwikala ababala kulonda tubuli kudiwula chalala muloña wakukeña kuyizañalesha. Tukutwalekahu kuzata nañovu kudikunda nawantaña jetu. Ilaña kwesekeja nakufumba kwekala ha 1 Akorinda 15:33, twatela kudikunda hohu nawantu amukeña Yehova.

11. Tunateli kutondolwela ñahi yuma yakaanishawu munsona?

¹¹ Yilwilu niyitoñojoka yatama. Antu ejima endaña muchalala atela kwikala ajila. (Isa. 35:8; tañenu 1 Petulu 1:14-16.) Hampinji yitwatachikili kudiza chalala, wejima wetu twahimpili nakutachika kulondela chahoshaña Bayibolu. Amakwawu aleka yuma yayivulu. Hela chochu, twatela kwikala asoñama kulonda tubuli kulandisha yilwilu yetu yajila yakadi majilu nayilwilu yamajilu yidi mukaayi. Chumanyi chinateli kutukwasha kutondolwela kwila yuma yatama? Hikutoñojoka hawuseya wabadika wahaniniyi Yehova hakwila nawu etu twikali ajila, mashi alema aMwanindi, Yesu Kristu. (1 Pet. 1:18, 19) Hakwila tutwalekihu kwikala awunyonji kumesu aYehova, twatela kutwalekahu kutoñojoka hakulema kwamulambu wefutu danyiloña daYesu.

12, 13. (a) Muloñadi chitwatela kutwalekahu kumona mafuku akunooka neyi chayimonañayi Yehova? (b) Yumanyi yitukuhanjekahu?

¹² Yuma yachisemwa yakaanishawu munsona niyilwilu yatama. Antaña jetu, akwetu mutwazatilaña niakwetu akashikola, anateli kutuleja nawu twanakaneña nawu hamu mafuku akusemuka nimafuku akunooka. Tunateli kutondolwela ñahi ikakeja dachisemwa nikwanakana mafuku akunooka amuneñeshaña Yehova? Hakwila twili mwenimu, twatela kumonaña yumiyi neyi chayimonañayi Yehova. Kutaña nyikanda yetu yahosha kwafumini mafuku akunooka, yinateli kutukwasha. Neyi tutoñojokaña muloña waweni Nsona chiyakaanishila kwanakana mafuku akunooka, twelukaña netu tunakwenda munjila “yetejañayi Mwanta.” (Efwe. 5:10) Kumukuhwelela Yehova niIzu dindi dachalala kukutukwasha kubula “kutiya antu woma.”—Yish. 29:25.

¹³ Kwenda muchalala kwakumaña wanyi nawa hichuma chitwafwilaña kwila haya nyaaka. Tunateli kutwalekahu ñahi kwenda muchalala? Tuhanjekenu njila jisatu.

14. (a) Kutwalekahu kulanda chalala kukutukwasha ñahi kubula kuchilandisha? (b) Muloñadi maana, kufumba nikashinshi chijalemena?

¹⁴ Chatachi, twalekenuhu kudiza chalala chalema chaMwizu daNzambi nikutoñojokahu chikupu. Landenu chalala kuhitila  mukwikala nampinji yakutaña chalala chalema chaMwizu daNzambi. Neyi mwila mwenimu, mukusweja kukeña chalala nawa mukuchilandisha wanyi. Kubombela hakulanda chalala, Yishimu 23:23 yatulejaña nawu twatela kulanda cheñi ‘maana, kufumbewa nikashinshi.’ Bayi tukumina hohu dakwiluka chalalaku, ilaña twatela kuchizatishaña muchihandilu chetu. Kashinshi katukwashaña kuhemba yuma yitwadiza dehi niyuma yinakutulejayi Yehova. Maana atukwashaña kwila yuma yitweluka. Chalala chatufumbaña nikutuleja yuma yitunateli kuhimpa. Mpinji yejima twitejeña iku kufumba. Kufumba kwalema kubadika siliva.—Yish. 8:10.

15. Mushipi wachalala watukiñaña ñahi?

¹⁵ Chamuchiyedi, zatenu nañovu kulonda muzatisheña chalala chimunakudiza mafuku ejima. Vwalenu mushipi wachalala mumbunda yenu. (Efwe. 6:14) Mumafuku akunyima, mushipi wamushidika wamukwashileña nikukiña mbunda niyiidi yamukachi. Hela chochu, hakwila nawu mushipi wumukiñi, wateleleli kuwukasisha. Ilaña neyi kuwukasisha nehi, hiwukumukiña nankashiku. Mushipi wetu wachalala wakuspiritu watukiñaña ñahi? Chalala chikutukiña kuyitoñojoka yatama nikutukwasha kufuukula chiwahi neyi tutwalekahu kuchikasisha hamujimba wetu neyi mushipi. Neyi tudi mukweseka hela mukukala, chalala chamuBayibolu chikutukwasha kwila yuma yayiwahi. Neyi chochabulañayi mushidika kuya kunjita chakadi mushipi, ninetu hitwatela kubumbulwisha hela kukasununa mushipi wetu wachalalaku. Ilaña twatela kuzata nañovu kulonda tuchikasishi hamujimba wetu kuhitila mukuzatisha chalala muchihandilu chetu. Mushipi wamushidika wamukwashaña cheñi kukobekaku mpoku. Tutalenu cheñi chuma chamuchisatu chikutukwasha kutwalekahu kwenda muchalala.

16. Kushimwina chalala kwatukwashaña ñahi kutwalekahu kwenda muchalala?

¹⁶ Chamuchisatu, dizishenuña antu amakwawu chalala chamuBayibolu. Neyi twila mwenimu, tukutwalekahu kukobeka mpoku yetu yakabali yakuspiritu, dikwila nawu ‘Izu daNzambi.’ (Efwe. 6:17) Wejima wetu twatela kuzata nañovu kulonda twikali antañishi ashikahu “[atañishaña] nikulumbulula chiwahi mazu achalala.” (2 Tim. 2:15) Neyi tuzatishaña Bayibolu hakukwasha amakwawu hakwila alandi chalala nikuleka ntañishilu yakutwamba, twashimatishaña mazu aNzambi muyitoñojoka nimumuchima wetu. Muniyi njila, twamwekeshaña netu tunakufwila kutwalekahu kwenda muchalala.

17. Chalala chalemenadi?

¹⁷ Chalala hichawaana chalema chatwinkayi Yehova. Muloña wanichi chawaana, tukweti iheta dasweja kulema, wubwambu wetu naTata yetu wamwiwulu. Yuma yejima yinatudizishiyi Nzambi, hintachikilu hohu. Nzambi watukana nindi wakatwalekahu kutudizisha haya nyaaka kulonda tubombeleña hachalala chitweluka dehi. Dichi, lemeshenuña chalala neyi mperola yayiwahi. Twalekenuhu ‘kulanda chalala, bayi muchilandishaku.’ Kufwana Davidi, ninenu mukutwalekahu kuhemba ichi chikaninu kudi Yehova chakwila nawu: “Nukwenda mwaya nsañu yeyi yalala.”—Mas. 86:11.