1-2. (a) Muloñadi antu anadisumbuli katataka chiyanateli kumukuhwelelawu Yehova? (Masamu 37:3, 4) (b) Yumanyi yitukuhanjekahu muchinu chibaaba?

KOMANA munakukeña kwiñila muwulu ntahindi dihu himunadisumbuli? Neyi dimu, chakadi nikujina munakukeña kushakama chihandilu chamuzañalu namuntu imwakeña nankashi. Hela chochu, adisumbula amonaña kukala nawa antu anadisumbuli katataka ekalaña nayuma yalema yiyatela kufuukulahu. Yuma yimukwilaña neyi munamoni kukala niyuma yimukufuukulañahu yikumwekeshaña muzañalu wumukekala nawu muchihandilu chenu. Neyi mumushindamenaña Yehova mukufuukulaña chiwahi, wulu wenu wukwikala wakola nawa mukwikalaña namuzañalu. Neyi mukuzatishaña Izu daNzambi wanyi mukumonaña kukala kunateli kuleta kukala muwulu wenu nawa mukwikalaña namuzañalu wanyi.—Tañenu Masamu 37:3, 4.

² Hela chakwila achinu chibaaba chinakuhosha hadi anadisumbuli katataka, chikushimuna cheñi kukala kunateli kumonawu adisumbula ejima. Chikushimuna yuma yitunateli kudizila kuyuma yeliliwu amayala niambanda ashinshika ashimunawu muBayibolu. Iyi yakutalilahu yamuBayibolu yikutudizisha yuma yamboka-mboka yitunateli kuzatisha muchihandilu chetu kushilahu nimuwulu. Tukuhanjeka cheñi yuma yitunateli kudizila kudi adisumbula amakwawu adiku makonu.

3-4. Kukalanyi kunateli kumonawu antu anadisumbuli katataka?

³ Antu amakwawu anateli kuleja antu anadisumbuli katataka kuhanda neyi chinakuhandawu antu amavulu makonu.  Chakutalilahu, anvwali niantaña amakwawu anateli kukanjikija antu anadisumbuli kuvwala anyana. Hela amabwambu niantu amuchisaka anateli kukanjikija antu anadisumbuli kulanda itala nikwinzeshamu yuma yayivulu yayiwahi.

⁴ Neyi kubabala nehi, adisumbula anateli kwila yuma yinateli kuyiletesha kwiñila munyikudi. Chikufumamu, eyala namumbanda akuzataña maora amavulu hakwila nawu afweti nyikudi. Nyidimu yikuyidilaña nankashi mpinji chakwila hiyakudizaña Bayibolu halwawu, kwikalaña nakudifukula kwachisaka nikuya nakushimwinaku. Awa adisumbula nateli nikutachika kujiña-jiña kukupompa kulonda azateña maora amavulu hakwila ayishileñahu mali amavulu hela abuli kuyihaña nyidimu. Chikufumamu, akukañanyaña kuzataku nyidimu yikwawu yekala mumudimu waYehova.

5. Yumanyi yimunadizili kudi Klaus naMarisa?

⁵ Yakutalilahu yayivulu yamwekeshaña nawu neyi tusweja kukeña yuma yakumujimba, tukwikala namuzañalu wanyi. Talenu chuma chayimwekeneni aKlaus naMarisa. * Chadisumbwiliwu, wejima wawu azatileña mpinji yejima kulonda ekali namali amavulu niyuma yayivulu. Hela chochu, hiyadiña namuzañaluku. Manakwetu Klaus wahosheli nindi: “Twadiña nayuma yayivulu yakumujimba yitwafwilileña, ilaña hitwatoñojokeleñahu jakumukalakela Yehova nankashiku. Kuhosha hohu chalala, chihandilu chatukalili nawa twaneñeleña.” Hadaha ninenu munamoni nenu kusha muchima hakufwila maheta kwayiletelaña muzañalu wanyi. Neyi dimu bayi muneñañaku. Neyi mutoñojoka hayakutalilahu yayiwahi chinateli kuyikwasha kuhimpa chihandilu chenu. Chatachi, tuhanjekenu hadi amayala asumbula chiyanateli kudizilaku kudi Mwanta Yehoshafwati.

6. Yehoshafwati wazatishili ñahi chishina chekala haYishimu 3:5, 6, hampinji yenjili izaza deneni dawamashidika nakuzuña nawantu jindi?

⁶ Enu amayala, komana mpinji yikwawu mwakamaña hamuloña wanyidimu yimukweti? Neyi dichimwelaña, mukudizilaku yuma yayivulu kuyuma yeliliyi Mwanta Yehoshafwati. Chineli wadiña Mwanta, Yehoshafwati wadiña namudimu wakukiña muza wejima! Welili ñahi hakwila yazati iwu mudimu weneni? Yehoshafwati wazatili hakumina ñovu jindi kulonda yakiñi muza. Wakolesheli nyikala yamuYuda nawa wapompesheli amashidika amavulu añovu akubadika ha 1,160,000. (2 Kushi. 17:12-19) Nkumininaku, Yehoshafwati wamweni kukala kweneni. Mukanka weneni wawamashidika awaAmoni, Mowabi, niamayala ashakamineña kumpidi yaSeyiri amutiyishili woma yena, chisaka chindi niantu jindi. (2 Kushi. 20:1, 2) Chumanyi cheliliyi Yehoshafwati? Wamulombeli Yehova kulonda yamukwashi nikumwinka ñovu.  Chumichi chinesekani nakufumba kwekala haYishimu 3:5, 6. (Tañenu.) Kulomba kwaYehoshafwati kwakudizoza, kwashimunawu ha 2 Kushindulula 20:5-12, kwamwekeshaña nawu wamukuhweleli chikupu Tata yindi wamwiwulu. Yehova wakwili ñahi kulomba kwaYehoshafwati?

7. Yehova wakwili ñahi kulomba kwaYehoshafwati?

⁷ Yehova wahosheli naYehoshafwati kuhitila mudi kaLevi wejina daYahaziyeli. Yehova wahosheli nindi: “Mwakakumina dakwimana mwakaduñumika kwenu zo-o mwakamona wamwinu waYehova wudi nanenu.” (2 Kushi. 20:13-17) Iyi hidiyi njila yazuñilañamu njitaku! Hela chochu, iyi nshimbi hiyafumini kudi muntuku ilaña yafumini kudi Yehova. Yehoshafwati wovwahilili iyi nshimbi muloña wamukuhweleli Nzambi. Hayileñayi nakudibulakana nawayilumbu jindi kumbidi watwamijiluku añimbi, bayi amashidika akuluka yitembiku. Yehova welili mwamukaniniyi Yehoshafwati nawa washindili ayilumbu jindi.—2 Kushi. 20:18-23.

8. Chumanyi chinateli kudizilawu amayala kudi Yehoshafwati?

⁸ Enu amayala dizilenu kudi Yehoshafwati. Mukweti mudimu wakwakamena chisaka chenu, dichi mwatela kuzataña nañovu kulonda muchikiñi nikuchikwasha. Neyi munamoni kukala, hadaha munateli kutoñojoka nenu munateli kukwimanisha enu aweni. Hela chochu, bayi mushindamena hañovu yenu enu aweniku. Ilaña mulombenuña Yehova yayikwashi neyi mudi nkawenu. Kubombelahu, lombenuña cheñi hamu nawañodenu. Mulombenuña Yehova yayikwashi kuhitila mukudiza Bayibolu ninyikanda yitwatambwilaña mukuloñesha kwaNzambi, nikuzatisha kufumba kudimu. Amakwawu hiyanateli kwiteja chimunafuukuli kwesekeja nayishina yamuBayiboluku, nawa anateli nikuyileja nawu mudi amukunkulwayi. Anateli kuyileja nawu neyi mwikala namali niyuma chinateli kuyikwasha kwakamena chiwahi chisaka chenu. Ilaña anukenuña chakutalilahu chaYehoshafwati. Wamukuhweleleli Yehova nawa yuma yeliliyi yamwekesheli nawu wamukuhweleli. Yehova hamushili iwu iyala washinshikaku nawa hamba kayishiyaku. (Mas. 37:28; Heb. 13:5) Chumanyi chiyatela kwilawu adisumbula hakwila ekali namuzañalu muchihandilu chawu?

9. Tunateli kuhosha netudi hadi kaprofwetu Isaya nañodindi?

⁹ Kaprofwetu Isaya niñodindi ashili muchima hakumukalakela Yehova muchihandilu chawu. Isaya wadiña kaprofwetu chinamwekani neyi niñodindi wadiña namudimu wakuprofweta, chineli niyena amutena nawu wadiña “kaprofwetu wamumbanda.” (Isa. 8:1-4) Awa eyala namumbanda ashili muchima hakumukalakela Yehova muchihandilu chawu. Adisumbula makonu atela kwimbujola chuma cheliliwu!

10. Kudiza wuprofwetu wamuBayibolu kunateli kuyikwasha ñahi adisumbula kumuzatila Yehova hakumina ñovu yawu?

¹⁰ Adisumbula makonu atela kusha muchima hakumukalakela Yehova kuhitila mukuzata hakumina ñovu jawu mumudimu waYehova. Anateli kumukuhwelela chikupu Yehova kuhitila mukudizila hamu wuprofwetu wamuBayibolu nikumona chiwashikijewaña. (Tit. 1:2) Atela kutoñojoka chuma chatela kwilawu kulonda akwashani mumudimu wakushikija wuprofwetu wamuBayibolu. Chakutalilahu, akweti lubadi lwakushikija  wuprofwetu waYesu wakwila nawu nsañu yayiwahi atela kuyishimwina mwahita iseki dejima henohu kukuma kanda kwinzi. (Mat. 24:14) Neyi adisumbula akuhwelela chikupu nawu wuprofwetu wamuBayibolu wunakushikijewa akufwilaña kumuzatila Yehova chikupu.

11. Yumanyi yeliliwu aPrisila naAkwila nawa muloñadi?

¹¹ Antu anadisumbuli katataka atela kudizila kudi aAkwila naPrisila, aYudeya ashakamineña mumusumba waRoma. Atiyili nsañu yayiwahi yaYesu nawa ekalili akwaKristu. Chakadi nikujina, ashakamineña hohu chiwahi. Hela chochu, chihandilu chawu chahimpikili hampinji yelili nguvulu Kaladusa yayileji aYudeya ejima kufuma muRoma. Toñojokenu chuma chayimwekeneni aPrisila naAkwila. Adi kushiya mukala wawu welukiliwu chikupu, kuwana mukala wawuha, nikutachika cheñi kuchima matenti kwiluña dabulili kwinjililawu. Komana iku kuhimpika kwayiletesheli kuleka kumuzatila Yehova hakumina ñovu jawu? Hadaha muneluki ñakwilu yanilu lwihu. Chayiliwu kuKorinda, aAkwila naPrisila atachikili kukwasha chipompelu chadiña mudina iluña nikuzatila hamu nakapostolu Pawulu kulonda ayikoleshi amanakwetu. Chimwahitili mpinji, abukilili kunyisumba yikwawu kwadiña kukankila kwawakwakushimwina. (Yilw. 18:18-21; Rom. 16:3-5) Adiña nanyidimu yayivulu nawa adiña namuzañalu.

12. Muloñadi adisumbula chatela kufuukulahu kumukalakela Yehova?

¹² Adisumbula makonu atela kutwamijañaku Wanta neyi aPrisila naAkwila. Antu anakukeña kudisumbula atela kuhanjekela chadimu yuma yakelañawu hampinji yinakudilukawu. Neyi adisumbula afuukulahu kumukalakela Yehova nawa azatila hamu kushikija munafuukuliwu, Yehova wukuyikwashaña. (Mukwa. 4:9, 12) Talenu chuma chayimwekeneni aRussell naElizabeth. Manakwetu Russell wahosheli nindi, “Hampinji yitwadilukileña, twahanjekeli hanyidimu yitukamuzatilaña Yehova.” Elizabeth wahosheli nindi, “Twahanjekeleli chadimu kulonda neyi kudi yuma yitukafuukulaña kumbidi yikabuli kutukañesha kushikija mutwafuukwili.” ARussell naElizabeth ayili nakuzatila  kuMicronesia kwadiña akwakushimwina antesha.

13. Kwesekeja naMasamu 28:7, chumanyi chikafumamu neyi tumukuhwelela Yehova?

¹³ Kufwana Russell niElizabeth, adisumbula amavulu apeleshaku chihandilu chawu kulonda asheña muchima hakushimwina nikudizisha antu nsañu yayiwahi. Neyi adisumbula afuukulahu kumukalakela Yehova nawa azatilaña hamu kushikija munafuukuliwu, mukafuma yuma yayiwahi. Akamona Yehova chakayakamenañayi, akamukuhwelela chikupu nawa akekala namuzañalu.—Tañenu Masamu 28:7.

14. Kapostolu Petulu niñodindi amwekesheli ñahi nawu akuhweleleli muchikaninu chekala haMatewu 6:25, 31-34?

¹⁴ Antu adisumbula atela kudizila cheñi kudi kapostolu Petulu niñodindi. Kwakwihi natukweji 6 hanyima yakudimona naYesu katachi, kapostolu Petulu wafuukwilihu chuma chalema. Petulu wadiña chibinda chanshi nawa dimwahembeleleñayi chisaka chindi. Dichi chelili Yesu yamuleji Petulu nindi yekali kambanji kindi, Petulu watoñojokeli hadi ñodindi hampinji yafuukwileñayi. (Luka 5:1-11) Petulu watondelihu kuya nakushimwina naYesu. Watondeli chuma chachiwahi! Nawa kudi chuma chikuletesha tukunkululi netu ñoda Petulu wetejeli mwafuukwiliyi. Bayibolu yamwekeshaña nawu chelili Yesu anamusañuli dehi, ñoda Petulu wayileña nanfumwindi mpinji jikwawu. (1 Kor. 9:5) Chakadi nikujina, chineli wadiña mumbanda mukwaKristu wamuwahi chamuletesheli Petulu kwikala wakasunuka kufumba amayala akwaKristu niañodi jawu. (1 Pet. 3:1-7) Petulu niñodindi akuhweleli muchikaninu chaYehova chakwila nawu neyi atwamijaku Wanta wukuyikwashaña muchihandilu chawu.—Tañenu Matewu 6:25, 31-34.

15. Chumanyi chitunadizili kudi aTiago naEsther?

¹⁵ Adisumbula, munateli kutwalekahu ñahi kumukalakela Yehova chikupu? Njila yimu hikudizila kudi adisumbula amakwawu. Chakutalilahu, munateli kutaña yibaaba yidi muKaposhi Kakutalila yinakuhosha nawu “Adihanini naMuchima Wumu.” Iyi yibaaba yayikwashili aTiago naEsther, adisumbula akuBrazil, kwikala nampwila yakukeña kuya nakuzatila kwadiña kukankila. Tiago wahosheli nindi: “Chitwatañili nsañu yinakumwekesha Yehova chinakwashiyi ambuñindi makonu, ninetu twakeñeleña kwovwahila kufumba kwaYehova kulonda yatukwashi.” Kufuma tuhu mu 2014 ayili nakuzatila kuParaguay, kwiluña kwazatishañawu idimi dachiPortuguese. Esther wahosheli nindi: “Wejima wetu twakeña nankashi mazu ekala haAEfwesesa 3:20. Kakavulu tunamoni chashikijewaña awa mazu kudi antu amukalakelaña Yehova.” Mumukanda wayisonekeleliyi AEfwesesa, Pawulu wayilejeli nindi Yehova wukuyikwashaña kubadika nihayuma yimunakulomba. Awa mazu anashikijewi kakavulu.

16. Antu anadisumbuli katataka atela kwihula anyi neyi anakukeña kufuukula yuma yatela kwilawu?

¹⁶ Antu anadisumbuli katataka atela kudizila kudi antu aneluki chakumushindamena Yehova. Adisumbula amakwawu anakalakali yaaka yayivulu mumudimu wampinji yejima. Yihulenu kulonda ayikwashi neyi munakufuukula yuma yimwatela kwila. Diyi njila yikwawu yakumwekeshalamu nenu mwamukuhwelela Yehova. (Yish. 22:17, 19) Akulumpi niwena atela kukwasha antu anadisumbuli katataka kufuukula yuma yatela kwilawu nikushikija munafuukuliwu.

17. Chumanyi chayimwekeneni aKlaus naMarisa, nawa chumanyi chitunakudizilaku kudi wena?

 ¹⁷ Mpinji yikwawu, tunateli kufuukula kumukalakela Yehova munjila yimu ilaña anateli kutuleja kumukalakela munjila yacheñi. Talenu chuma chayimwekeneni aKlaus naMarisa, itwatena hakusambila. Chelili hanahiti dehi yaaka yisatu kufuma hadisumbwiliwu, ashili mukala wawu nakuya nakukwashana mumudimu wakutuña kasanji kaFinland. Hela chochu, ayilejeli nawu akutwalekahu kushakama hanaka kasanji tukweji kubadika ha 6 wanyi. Hakusambila aneñeli. Chimwahitili mpinji, ayitambikili kuya nakudiza idimi daArabic nawa ichi adi namuzañalu kuya nakuzatila mwituna dacheñi mwazatishañawu idimi dachiArabic. Marisa neyi yanuka yuma yamwekeni wahoshaña nindi: “Natiyileña woma kwila yuma yinabulahu dehi kwila nawa nateleli kumukuhwelela Yehova chikupu. Nawa namoni Yehova chinatukwashiyi munjila yinabulili nikukuhwelela. Hanyima yachumichi, namukuhweleli nankashi Yehova.” Neyi chinamwekeshiwu munichi chakutalilahu, munateli kukuhwelela chikupu nenu Yehova wukuyikwashaña neyi mumukuhwelela chikupu.

18. Chumanyi chatela kwilawu adisumbula hakwila atwalekihu kumukuhwelela Yehova?

¹⁸ Wulu hichawaana chafuma kudi Yehova. (Mat. 19:5, 6) Wakeñaña adisumbula adiluñisheña ichi chawaana. (Yish. 5:18) Enu munadisumbuli katataka shinshikenu chidi chihandilu chenu. Komana munakuzata nañovu kulonda mumwekeshi nenu munakusakilila hachawaana chayinkayi Yehova? Mulombenu Yehova. Sandujolenu yishina yinateli kuyikwasha Mwizu Dindi. Zatishenu kufumba kunakuyinkayi Yehova. Mwatela kwiluka nenu mukwikala namuzañalu nichihandilu chachiwahi neyi mumukalakelaña Yehova muwulu wenu!