1. Lwihwinyi lutunateli kudihula?

KOMANA mpinji yikwawu mwakamaña neyi mutoñojoka hayuma yikamwekana kumbidi, chidi neyi kujilumuka kwansakililu yakutwamba, kulukuka kwaGogi wakuMagogi hela njita yaAmagedoni? Mwadihulahu dehi enu aweni nenu, ‘Neyi mpinji yinashiki dehi, komana nikatwalekahu kwikala washinshika haniyi mpinji yakutiyisha woma?’ Neyi mwatoñojokaña hanawa malwihu, mazu aYesu adi munsona yamutu wachinu chibaaba akuyikwasha. Yesu wayilejeli atumbanji twindi nindi: “Bayi mwakama munyichima yenuku. Kuhwelelenu.” (Yow. 14:1) Chikuhwelelu chakola chikatukwasha kudiwunjika nayuma yikamwekana kumbidi.

2. Tunateli kukolesha ñahi chikuhwelelu chetu nawa yumanyi yitukuhanjekahu muchinu chibaaba?

² Tunateli kweseka chikuhwelelu chetu kulonda tukomiki nakukala kutwakamona kumbidi neyi tutoñojokaña chitwomikaña neyi anatweseki chayinu mpinji. Neyi tutoñojokaña chitwelaña neyi anatweseki, chikutukwasha kwiluka hitwatela kuzatila. Mpinji yejima yitwomikaña kukala, chikuhwelelu chetu chakolelañaku. Chumichi chikatukwasha kuumika nikumbidi. Muchinu chibaaba, tukuhanjeka hayuma yiwana yeliliwu atumbanji twaYesu yamwekeshaña nawu ateleleli kwikala nachikuhwelelu chakola. Tukuhanjeka cheñi chitunateli kuumika nakukala kwokumu makonu nichitunateli kudiloñesha nayuma yikamwekana kumbidi.

3. Kwesekeja naMatewu 6:30, 33, Yesu wahosheli nindidi kutalisha hachikuhwelelu?

³ Iyala wejima wafwilaña kukeñela chisaka chindi yakuda, yakuvwala nihakukaama. Chumichi chakala muyinu mpinji yakala. Amanakwetu niahela amakwawu, nyidimu yawu yinamani  nawa aneseki kukeña keña ilaña anakañanyi kuwana nyidimu yikwawu. Amakwawu akaanini nyidimu yatela kubula kuzatawu akwaKristu. Muyuma yejimiyi, twatela kumukuhwelela Yehova netu wukutwinka yuma yitunakukeña yakwakamena nachu chisaka chetu. Yesu wayilejeli atumbanji twindi chumichi muMpanji yindi yahaMpidi. (Tañenu Matewu 6:30, 33.) Neyi tumukuhwelela chikupu Yehova netu hakatushiyaku, tukusha muchima hakumukalakela. Neyi twiluka Yehova chinakutukwashayi muyuma yitunakukeña, tukuswina kwakwihi nayena nawa chikuhwelelu chetu chikukola.

4-5. Chumanyi chakwashili chisaka chimu hampinji yakameneniwu nayuma yakankililiwu?

⁴ Talenu Yehova chakwashiliyi chisaka chimu muVenezuela hampinji yadiña nakwakama nayuma yakeñeleñawu. Kunyima, chisaka chamanakwetu Castro chadiña namali akuhanda nachu afumishileñawu mwiha dawu. Nkumininaku, amayala adiña namata ayitambwili iha dawu nawa ayihañilimu. Tata yawantu Miguel, wahosheli nindi: “Ichi twahandilaña hohu hakadiluña kantesha kitwalombaku hohu chakulomba. Ifuku nifuku namulombaña Yehova kulonda yatwinki yuma yitunakukeña.” Chihandilu chayikolela, ilaña kumukuhwelela Tata yawu wukweti kukeña nawu wukuyakamenaña nayuma yinakankiliwu, chisaka chamanakwetu Castro chinatwalekihu kupompa nikushimwina mpinji yejima. Atwamijaku Wanta muchihandilu chawu nawa Yehova wayinkaña yuma yiyakeñañawu.

⁵ Manakwetu Miguel niñodindi Yurai, amushindameneni Yehova nawu wukuyikwashaña. Mpinji yikwawu, Yehova wazatishileña amanakwetu niahela kuyinkahu yuma yakumujimba nikumukeñelaku mudimu. Cheñi, Yehova wazatishili kasanji kamutayi kuyinka yuma yakankililiwu. Hayishili chisayikilaku. Chinafumimu, chikuhwelelu chawu chinakoleliku. Chamweniwu Yehova chayikwashiliwu, mwanawu wamukulumpi Yoselin wahosheli nindi: “Chatukoleshaña chikupu hakumona Yehova chinatukwashiyi. Namumonaña neyi hibwambu dami nawa nakuhweleli nami wukunkwashaña mpinji yejima.” Wabombelelihu cheñi nindi: “Kukala kutwamweni, kunatukwashi kudiloñeshela chadimu nakukala kutwakamona kumbidi.”

6. Munateli kusweja ñahi kukolesha chikuhwelelu chenu neyi mudana mali akulandamu yuma yakuhanda nachu?

⁶ Komana chinakuyikalila kuwana mali akuhanda nachu? Neyi dimu, ichi chuma chapela wanyi. Hela chochu, munateli kuzatisha iyi mpinji kukoleshelamu chikuhwelelu chenu. Mulombenu Yehova, tañenu mazu aYesu ekala haMatewu 6:25-34 nawa toñojokenuhu. Toñojokenu hayakutalilahu yamakonu yamwekeshaña nawu Yehova wakwashaña antu asha muchima hakumukalakela. (1 Kor. 15:58) Chimwela mwenimu, mukusweja kumukuhwelela Tata yenu wamwiwulu nenu wukuyikwashaña neyi chinakwashiyi  antu amakwawu adiña nakukala neyi kumunakumona. Neluki yuma yimunakukeña nawa neluki chinateli kuyikwashayi. Neyi mumona Yehova chinakuyikwashayi muchihandilu chenu, chikuhwelelu chenu chikukolelaku kulonda mwakatweshi kuumika kukala kwasweja kumukamona kumbidi.—Hab. 3:17, 18.

7. Kwesekeja naMatewu 8:23-26, mpepela yeneni yesekeli ñahi chikuhwelelu chawatumbanji?

⁷ Hampinji yadiñayi Yesu niatumbanji twindi muwatu nawa kwinzi mpepela yasweja, Yesu wazatishili iyi mpinji kulonda yayikwashi atumbanji twindi kwiluka nawu atela kwikala nachikuhwelelu chakola. (Tañenu Matewu 8:23-26.) Haniyi mpinji yikwenjili mpepela yeneni nawa mankanda atachiki kwiñija menji muwatu, Yesu wadiña wakaama. Atumbanji atiyili woma chakwila amuhindwishili Yesu nawu yayamwini. Mwanta wayifumbili nindi: “Munakutiyiladi woma, enu mukweti chikuhwelelu chantesha?” Awa atumbanji atiyili woma ateleleli kukuhwelela nawu Yehova wukumukiña Yesu niwena. Chumanyi chitunakudizilaku? Chikuhwelelu chakola chinateli kutukwasha kuumika kukala kudi neyi “mpepela yeneni.”

8-9. Kukalanyi kwamweniyi muhela Anel nawa chumanyi chamukwashili?

⁸ Talenu muhela Anel, mujiki washakamaña kuPuerto Rico, chomikiliyi kukala kwasweja muloña wachikuhwelelu. Kukala kwamweniyi kwadiña “himpepela yeneni.” Mu 2017, mpepela yaHurricane Maria yakisañeni itala damuhela Anel. Nawa nimudimu windi wamanini muloña waniyi mpepela. Muhela Anel wahosheli nindi: “Haniyi mpinji yakala, nadakameneni, ilaña namukuhweleleli Yehova kuhitila mukulomba nikubula kwiteja chuma chidi chejima kuzeyesha chikuhwelelu chami.”

⁹ Muhela Anel washimwini cheñi nindi kwovwahila dichuma chikwawu chamukwashili kuumika kukala kwamweniyi. Wahosheli nindi: “Kwovwahila wunlomboli watwinkañawu mukuloñesha kwaYehova, kwankwashili kwikala wadiwunjika. Yehova wazatishili amanakwetu niahela, ankolesheli nawa anyinkeli yuma yinakankilili.” Wabombelelihu cheñi nindi: “Yehova wanyinkeli yuma yayivulu kubadika niyuma yinakeñeleña nawa chikuhwelelu chami chakoleleliku chikupu.”

10. Chumanyi chimwatela kwila neyi munamoni kukala kudi neyi “mpepela yeneni”?

¹⁰ Komana munakumona “mpepela yeneni” muchihandilu chenu? Hadaha munakukabakana muloña wawubanji wadimwekenaña. Yinateli kwikala mpepela yeneni yidi neyi yikatu yasweja yinakuyineñesha nawa muneluki wanyi chakwila. Munateli kwakama mpinji yikwawu ilaña bayi mwiteja yuma yamuchidiwu yiyileteshi kuleka kumukuhwelela Yehovaku. Swinenu kwakwihi nayena kuhitila mukulomba chakadi kuleka. Koleshenu chikuhwelelu chenu kuhitila mukutoñojoka hampinji yayikwashiliyi Yehova kunyima. (Mas. 77:11, 12)  Mwatela kwiluka nenu hakuyishiya chayinu mpinji hela kumbidiku.

11. Muloñadi chitwatela kwovwahilaña antu anakutulombola?

¹¹ Chumanyi chikwawu chinateli kuyikwasha kuumika kukala? Neyi chashimunayi muhela Anel, hikwovwahila. Kuhwelelenuña antu akuhwelelayi Yehova niYesu. Mpinji yikwawu, antu atondawu kulombola anateli kufuukula yuma yikumwekana neyi yamukunkulwayi kudi etu. Hela chochu, Yehova wakiswilaña antu ovwahila. Izu dindi niyakutalilahu yawambuña ashinshika yatukwashaña kwiluka nawu kwovwahila kwakiñaña antu. (Kwid. 14:1-4; 2 Kushi. 20:17) Toñojokenuña haniyi yakutalilahu. Neyi mutoñojokañahu, chikuyikwasha kwovwahila ntanjikilu yakuloñesha kwaYehova chayinu mpinji nikumbidi. (Heb. 13:17) Dichi, mukwakamaña wanyi halukadi lwasweja lunakwinza kumbidi.—Yish. 3:25.

12. Luka 18:1-8 yashimuna ñahi kunuñañana kwekala hakwikala nachikuhwelelu nakuumika wuñanji waheña?

¹² Yesu welukili nindi wuñaji waheña wukaletesha chikuhwelelu chawatumbanji twindi kwikala mukweseka. Hakwila yayikwashi kuumika, wayilejeli chakutalilahu chashimunawu hamukanda waLuka. Yesu washimwini nsañu yamumbanda nfwila watwalekelihu kudilila nsompeshi wabula kuloña nindi yamusompeli mwaloña. Welukili chikupu nindi neyi yatwalekahu kumudilila wukumukwasha. Nkumininaku, iwu nsompeshi wetejeli kumukwasha. Chumanyi chitunakudizilaku? Yehova waloña. Yesu wahosheli nindi: “Komana chalala Nzambi hakayiñisha namuloña antu jindi atondewa amudililaña mwaana [niwufukuku]?” (Tañenu Luka 18:1-8.) Yesu wabombelelihu cheñi nindi: “Neyi Mwana kamuntu nashiki, komana wakawana ichi chikuhwelelu hanu hamaseki?” Neyi anakutwila chatama, twatela kudiwunjika nikutatakena kulonda tumwekeshi netu tudi nachikuhwelelu chakola neyi chadiña nanona mumbanda. Neyi twikala nachikuhwelelu chamuchidiwu, tukukuhwelela chikupu netu katataka hela kumbidi Yehova wukatukwasha. Twatela cheñi kwiluka netu kulomba kukweti ñovu. Mpinji yikwawu, kulomba kwetu anateli kukwakula munjila yitunabuli kukuhwelela.

13. Kulomba kwakwashili ñahi chisaka chimu chakabishiliwu?

¹³ Talenu yuma yamweniyi muhela Vero, washakamaña kuDemocratic Republic of Congo. Muhela Vero ninfumwindi wabula kwitiya kushilahu nimwanawu wayaaka 15, atemukili nakushiya mukala wawu hayilukukiliwu kudi amashidika. Hampinji yatemukileñawu, ashikili hamukoleku hemenaña amashidika, ayimikili nakuyichinisha nawu anakuyijaha. Chatachikiliyi muhela Vero kudila, mwanindi wamumbanda watachikili kulomba nezu datiyakana nikufuntisha funtishahu  ijina daYehova mukulomba kwindi kulonda yamuwundishi. Chamanishiliyi, mukulumpi wawamashidika wamwihwili nindi: “Eyi mwana, hinyi wakudizishili kulomba?” Wakwili nindi, “Amama diwu, kuzatisha chakutalilahu chidi haMatewu 6:9-13.” Mukulumpi wawamashidika wahosheli nindi, “Eyi mwana, yaña nawanvwali jeyi mukuwunda nawa Yehova Nzambi yenu yayikiñi.”

14. Yumanyi yinateli kweseka chikuhwelelu chetu nawa chumanyi chikatukwasha kuumika?

¹⁴ Ichi chuma chamwekeni chinakutudizisha netu kulomba kwalema. Indi neyi kulomba kwenu anakwakuli swayi wanyi? Kufwana nfwila washimunawu muchakutalilahu chaYesu, twalekenuhu kulomba nikukuhwelela nenu Nzambi yetu hakuyishiyaku nawa nenu mukuhita kwampinji wukakula kulomba kwenu. Twalekenuhu kumulomba Yehova kulonda yayinki spiritu yindi yajila. (Fwili. 4:13) Anukenuña nenu Yehova keña yayikiswili nawa mukavulamena makabi imunakumona chayinu mpinji. Neyi muumikaña makabi imunakumona nawukwashu waYehova mukwikala nachikuhwelelu chakola nawa mukomika kukala kumukamona kumbidi.—1 Pet. 1:6, 7.

15. Neyi chashimunawu haMatewu 17:19, 20, kukalanyi kwamweniwu atumbanji twaYesu?

¹⁵ Yesu wayilejeli atumbanji twindi nindi chikuhwelelu chikayikwasha kuumika kukala. (Tañenu Matewu 17:19, 20.) Mpinji yimu, hiyatwesheli kufumisha andemoniku, hela chakwila mpinji yikwawu afumishileña andemoni. Chumanyi chaletesheli akañanyi? Yesu washimwini nindi ateleleli kwikala nachikuhwelelu chakola. Neyi adiña nachikuhwelelu chasweja, adi kutwesha kuumika kukala kudi neyi mpidi. Makonu, ninetu tunateli kumona kukala kunateli kutukalila kuumika.

16. Chikuhwelelu chamukwashili ñahi muhela Geydi kuumika kukala kwasweja nichineñi?

¹⁶ Talenu chakutalilahu chamuhela Geydi, wakuGuatemala. Nfumwindi Edi, amujahili hampinji yafumineñawu nakupompa. Chikuhwelelu chamuhela Geydi chinamukwashi ñahi kuumika chineñi? Wahosheli nindi: “Kulomba kwankwashaña kumbila chiteli chami hadi Yehova, kwankwashaña kwikala nakuwunda kwamuyitoñojoka. Yehova wankwashaña kuhitila mudi chisaka chami niamabwambu muchipompelu. Kumukalakela Yehova nankashi mumudimu windi kwankwashaña kumanisha chineñi nikubula kwakamena hayuma yikamwekana kumadiki. Muyuma yejimiyi yinnamoni nadizi nami hela chakwila nikamona kukala kwamuchidinyi kumbidi, nikatwesha kuumika nawukwashu waYehova, Yesu nikuloñesha kwaYehova.”

17. Chumanyi chitwatela kwila neyi tunamoni kukala kwasweja kudi neyi mpidi?

¹⁷ Komana munakuneña muloña wakujimbesha ntaña yenu? Ikalenuña nampinji yakutaña nsañu yamuBayibolu kulonda mukoleshi chikuhwelelu chenu. Komana  munakuneña muloña wakwila ntaña yenu amuhañili muchipompelu? Dizenuña kulonda mwiluki chikupu nenu Nzambi wababeshaña munjila yayiwahi. Kukala kwejima kumunakumona, kuzatishenuña kulonda mukoleshi chikuhwelelu chenu. Mulejenuña Yehova chimunakutiya. Bayi mudambulaña kudi amanakwenu niahelaku, ilaña dikundenuña nawu. (Yish. 18:1) Zatenuña nyidimu yikuyikwasha kuumika hela chakwila munakudila neyi mwanuka chuma chamwekeni. (Mas. 126:5, 6) Twalekenuhu kupompa, kuya nakushimwina nikudiza Bayibolu mpinji yejima. Nawa toñojokenuña hayikaninu yaYehova yayishiikayi nindi wukayinka kumbidi. Neyi mumonaña Yehova chinakuyikwashayi, chikuhwelelu chenu chikuswejelaku kukola.

18. Chumanyi chimwatela kwila neyi mumona nenu chikuhwelelu chenu chazeya?

¹⁸ Neyi kukala kumwamweni kunyima hela kumunakumona chayinu mpinji kunakumwekesha nawu chikuhwelelu chenu chazeya, bayi muneñaku. Zatishenu iyi mpinji kulonda mukoleshi chikuhwelelu chenu. Lombenu chuma chochimu neyi cheliliwu apostolu aYesu ahosheli nawu: “Tuvulishili chikuhwelelu.” (Luka 17:5) Cheñi, toñojokenuña hayakutalilahu yitunahanjekihu muchinu chibaaba. Kufwana Miguel niYurai, anukenuña mpinji yayikwashiliyi Yehova. Lombenuña mpinji yejima kudi Yehova neyi munamoni kukala neyi cheliliyi mwana kamuhela Vero niAnel. Nawa kufwana Geydi, ilukenu chikupu nenu Yehova wukuyikwasha kuhitila mudi chisaka hela amabwambu. Neyi mumwiteja Yehova kuyikwasha nakukala kumunakumona chayinu mpinji, mukukuhwelela chikupu nenu wukayikwasha kuumika kukala kudi kwejima kumukamona kumbidi.

19. Yesu welukili nindidi nawa chumanyi chitwatela kwiluka?

¹⁹ Yesu wayikwashili atumbanji twindi kwiluka hiyateleleli kuzatila kulonda ekali nachikuhwelelu chakola, ilaña welukili nindi Yehova wukayikwasha kuumika kukala kwadi kumonawu kumbidi. (Yow. 14:1; 16:33) Welukili chikupu nindi chikuhwelelu chikakwasha izaza deneni kupuluka halukadi lwasweja lunakwinza. (Chim. 7:9, 14) Komana ninenu mukapuluka? Nawukwashu waYehova mukapuluka, neyi muzata hakumina ñovu jenu kulonda mukoleshi chikuhwelelu chenu.—Heb. 10:39.