CHIBAABA CHAKUDIZA 47
Bayi Mwiteja Chuma Chidi Chejima Chiyambuli Kudi Yehovaku
“Nakukuhwelela, eyi Yehova.”—Mas. 31:14.
KAMINA 122 Ikalenu Akola Mbe-e Chakadi Kuswijewa!
NSAÑU YIDI MUCHIBAABA a
1. Tuneluki ñahi netu Yehova wakeñaña kuswina kwakwihi nanetu?
YEHOVA wakeñaña nindi tuswini kwakwihi nayena. (Yak. 4:8) Wakeñaña nindi ekali Nzambi yetu, Tata yetu nawa Ibwambu detu. Wakulaña kulomba kwetu nikutukwasha hampinji yitunakumona kukala. Nawa wazatishaña kuloñesha kwindi hakutudizisha nikutukiña. Hanu dinu yumanyi yitwatela kwila hakwila tuswini kwakwihi naYehova?
2. Tunateli kuswina ñahi kwakwihi naYehova?
2 Tunateli kuswina kwakwihi naYehova kuhitila mukulomba kudi yena, kutaña Izu dindi nikutoñojokahu chikupu. Neyi twila mwenimu, tukusweja kumukeña nawa tukumusakililaña. Chumichi chatukwashaña kumwovwahila nikumwinka kalemesha kamutelela. (Chim. 4:11) Neyi tusweja kumwiluka Yehova, tukusweja kumukuhwelela kushilahu nikuloñesha kwindi kwatwinkayi nindi kutukwasheña.
3. Diyabolu wafwilaña ñahi kutwambula kudi Yehova, ilaña chumanyi chinateli kutukwasha kubula kumushiya Nzambi yetu nikuloñesha kwindi? (Isamu 31:13, 14)
3 Hela chochu, Diyabolu wafwilaña kutwambula kudi Yehova, sweje-e hampinji yitudi mukukala. Welaña ñahi mwenimu? Wafwilaña kutulekesha chovu-chovu kumukuhwelela Yehova nikuloñesha kwindi. Ilaña tunateli kudikaña natufuta twindi. Neyi chikuhwelelu chetu chakola nawa twamukuhwelela chikupu Yehova, hitwakamushiya Nzambi yetu nikuloñesha kwindiku.—Tañenu Isamu 31:13, 14.
4. Yumanyi yitukuhanjekahu muchinu chibaaba?
4 Muchinu chibaaba, tukuhanjeka hakukala kusatu kunateli kufumina kudi antu abula kwikala amuchipompelu; kukala-hikukala kunateli kutuletesha kuleka kumukuhwelela Yehova nikuloñesha kwindi. Iku kukala kwejima kunateli kutwambula ñahi kudi Yehova? Nawa tunateli kwila ñahi hakwila tudikañi natufuta twaSatana?
NEYI TUNAKUHITA MUKUKALA
5. Kukala kunateli kutuletesha ñahi kuleka kumukuhwelela Yehova nikuloñesha kwindi?
5 Mpinji jikwawu, twamonaña kukala kudi neyi ikañesha damuchisaka hela nyidimu kumana. Kukala kwamuchidiwu kunateli kutuletesha ñahi kuleka kukuhwelela kuloñesha kwaYehova nikutwambula kudi yena? Neyi tunomiki kukala hadi mpinji yayilehi, tunateli kutachika kuzeya nikuneña. Satana wazatishaña mpinji jamuchidiwu kulonda atuleteshi kutoñojoka netu Yehova watukeña wanyi. Diyabolu wakeñaña nindi tutoñojokeña neyi chakwila Yehova hela kuloñesha kwindi dikwaleteshaña tukabakaneña. Chumichi dichayimwekeneni niaIsarela amakwawu muEjipitu. Hakusambila akuhweleleli nawu Yehova wayitondeli aMosi naAroni kulonda ayifumishi muwuduñu. (Kwid. 4:29-31) Ilaña mukuhita kwampinji, chelili Fwaru atachiki kuyikabisha nankashi, atachikili kuyitwika aMosi naAroni nyiloña hakukala kwamweneñawu, nakuyila nawu: “Munamuleñeli Fwaru niambuñindi kutuhela nawa munashi mpoku yakabali muchikasa chawu kulonda atujahi.” (Kwid. 5:19-21) Ayinkeli nyiloña ambuña aNzambi ashinshika. Chatamini nankashi. Neyi munomiki kukala hadi mpinji yayilehi, munateli kutwalekahu ñahi kumukuhwelela Yehova nikuloñesha kwindi?
6. Yumanyi yitunakudizila kudi kaprofwetu Habakuki kutalisha hakuumika kukala? (Habakuki 3:17-19)
6 Mulejenu Yehova mukulomba yuma yejima yimunakukeña nawa mulejenu ayikwashi. Kaprofwetu Habakuki wamweni kukala kwakuvulu. Mpinji yimu, wajinokeli neyi chakwila Yehova wamwakameneneña. Dichi wamulejelimu Yehova mukulomba chatiyileñayi. Wahosheli nindi: “Eyi Yehova, nukudila nakulomba wukwashu kushika mpinjinyi, ilaña eyi kutiya nehi? . . . Muloñadi chiwetejelaña makabisha?” (Hab. 1:2, 3) Yehova waakwili kulomba kwakufuma hamuchima kwakambuñindi washinshika. (Hab. 2:2, 3) Hanyima yakutoñojoka hadi Yehova chamwinañayi, Habakuki wekalili cheñi namuzañalu nankashi. Wenjili nakwiluka chikupu nindi Yehova wamwakameneneña nawa wukumukwashaña kuumika kukala kwejima kukumonañayi. (Tañenu Habakuki 3:17-19.) Chumanyi chitunakudizilaku? Neyi munakuhita mukukala, lombenuña kudi Yehova nakumulejamu chimunakutiya. Nawa mulejenu kulonda ayikwashi. Neyi mwila mwenimu, ilukenu nenu Yehova wukuyinka ñovu yimunakukeña hakwila muumiki. Nawa neyi mumona chinakuyikwashayi, mukusweja kumukuhwelela chikupu.
7. Antaña jamuhela Shirley akeñeleña nawu Shirley akuhweleli nindidi, nawa chumanyi chamukwashili kutwalekahu kumukuhwelela Yehova?
7 Twalekenuhu kwila yuma yakuspiritu. Talenu kwila mwenimu chikwamukwashili muhela Shirley waku Papua New Guinea, hampinji yahitileñayi mukukala. b Chisaka chamuhela Shirley adiña atuzweñi, nawa mpinji jikwawu, chayikalilileña kuwana yakuda. Ntaña yindi wumu wakeñeleña kumuletesha aleki kumukuhwelela Yehova. Wamwilili nindi: “Wahoshaña neyi spiritu yajila yaNzambi yakukwashaña, hanu owu wukwashu wudi hadihi? Muchisaka chenu muchidi atuzweñi. Wunakumanisha hohu mpinji yeyi kuya nakushimwina.” Muhela Shirley wahosheli nindi: “Nadihwili ami aweni nami: ‘Komana Nzambi chalala watwakamenaña, tahindi nehi?’ Dichi hohenohu nalombeli kudi Yehova nawa namulejelimu yuma yejima yinatoñojokeleña. Natwalekelihu kutaña Bayibolu ninyikanda yetu nawa natwalekelihu kushimwina nikuya nakupompa.” Hashimbwili wanyi, watachikili kwiluka nindi Yehova wadiña nakwakamena chisaka chindi. Chisaka chindi chadiña nakukaama nanzala wanyi, nawa adiña namuzañalu. Muhela Shirley wahosheli nindi: “Nenjili nakwiluka nami Yehova wadiña nakwakula kulomba kwami.” (1 Tim. 6:6-8) Neyi mutwalekahu kwila yuma yakuspiritu, ninenu himwaketeja kukala hela chilwilu chakujinoka kuyambula kudi Yehovaku.
NEYI AMANAKWETU ANAKULOMBOLA ANAKUYIKABISHA
8. Chumanyi chinateli kuyimwekena amanakwetu anakulombola mukuloñesha kwaYehova?
8 Ayilumbu jetu azatishaña intaneti kutaandisha makudi hadi amanakwetu anakulombola mukuloñesha kwaYehova. (Mas. 31:13) Amanakwetu amakwawu ayikasa nikuyinka nyiloña nawu hiyambanji. AkaKristu akusambila niwena amweni kukala kwokumu hampinji yamutwambililiwu kapostolu Pawulu nakumukasa. Elili ñahi?
9. AkaKristu amakwawu elili ñahi hampinji yamukasiliwu kapostolu Pawulu?
9 AkaKristu akusambila amakwawu alekeli kumukwasha kapostolu Pawulu hampinji yamukasiliwu muRoma. (2 Tim. 1:8, 15) Muloñadi? Komana atiyileña nsonyi muloña Pawulu amumweneña kudi antu nawu himbanji? (2 Tim. 2:8, 9) Tahindi atiyili woma nawu niwena akuyikabisha? Hela chakwila tuneluki wanyi chatoñojokeleñawu, fwikijenu chatiyiliyi Pawulu. Womikili kukala kwakuvulu chikupu nawa washili wumi windi muwubanji kukoola wena. (Yilw. 20:18-21; 2 Kor. 1:8) Bayi twikala neyi ana antu amushiyili Pawulu hampinji yakeñekeleñayi wukwashuku! Chumanyi chitwatela kwanukaña neyi amanakwetu anakulombola anakuyikabisha?
10. Chumanyi chitwatela kwanukaña neyi amanakwetu anakulombola anakuyikabisha, nawa muloñadi?
10 Anukenuña chuma chaleteshaña atukabisheña niwakojejaña. Timotewu Wamuchiyedi 3:12 yahosha nawu: “Ejima afwilaña kuhanda kwesekeja nakumwakama Nzambi muloña wakudikunda naKristu Yesu, niwena akayikabisha.” Dichi hitwatela kuhayamaku neyi tumona Satana nakulukuka amanakwetu anakulombola. Wayilukukaña kulonda afumpi kashinshi kawu nikututiyisha etu woma.—1 Pet. 5:8.
Hela chakwila Pawulu wadiña mumaleñi, Onesifwolu wahamukili nakumukwasha. Makonu, amanakwetu niahela akwashaña akwawu akakwitiya akasawu, neyi chinamwekeshiwu mumwevulu wachuma chamwekeni (Talenu maparagilafu 11-12)
11. Yumanyi yitunakudizila kuchuma cheliliyi Onesifwolu? (2 Timotewu 1:16-18)
11 Twalekenuhu kuyikwasha amanakwenu nikubula kuyishiya. (Tañenu 2 Timotewu 1:16-18.) MukaKristu wamumafuku awapostolu wejina daOnesifwolu, welili chuma chambukaku hamukasiliwu Pawulu. “Hatiyili nsonyi muloña wakumukasa [Pawulu] mumaleñiku.” Ilaña Onesifwolu wamukeñakeñeli Pawulu nawa chamuwaniniyi, wazatileña nañovu kulonda amukwashi munakaankiliyi. Chelileñayi mwenimu, Onesifwolu washileña wumi windi muwubanji. Chumanyi chitunakudizilaku? Bayi twiteja antu atutiyishi woma hela kutukañesha kukwasha amanakwetu anakukabishawuku. Ilaña tuyihakwileñaku nikuzata nañovu kulonda tuyikwashi. (Yish. 17:17) Anakukeñeka kuyikwasha nikuyimwekeshela kukeña.
12. Yumanyi yitunakudizila kudi amanakwetu niahela muRussia?
12 Talenu amanakwetu niahela muRussia chinakukwashawu akwawu akakwitiya anakasiwu mutuleya. Neyi amakwawu anakuyisompesha, amanakwetu niahela amavulu enzaña kuchota chanyiloña nakuyikolesha. Chumanyi chitunakudizilaku? Neyi amanakwetu anakulombola anayitwambili, anayikasi hela kuyikabisha, bayi mutiya womaku. Yilombelenuñaku, akamenenuña amuchisaka chawu nawa keñakeñenuña njila mumwatela kuyikwashila.—Yilw. 12:5; 2 Kor. 1:10, 11.
NEYI ANAKUTUSEHA
13. Kutuseha kudi antu kukutuletesha ñahi kuleka kumukuhwelela Yehova nikuloñesha kwindi?
13 Antaña jetu abula kwitiya, akwetu mutwazatilaña, hela akwetu akashikola anateli kutuseha muloña wamudimu wetu wakushimwina hela muloña wakulondela nshimbi jaYehova. (1 Pet. 4:4) Anateli kutuleja nawu: “Nakukeña, ilaña muchechi muwayaña asweja kukolesha nshimbi nawa yawakulumpi.” Amakwawu anateli kutwinka nyiloña nachitwelaña nawantu anahañiwu muchipompelu, nawu: “Enu mwelaña nenu mukweti kukeña, hanu dinu kudi hadihi?” Nhoshelu yamuchidiwu yinateli kutuletesha kutachika kujinoka. Tunateli kujinoka netu: ‘Komana Yehova nakukeña nindi nileña yuma yabadika muñovu jami? Komana kuloñesha kwindi kwakalisha?’ Neyi munakuhita mukukala kwamuchidiwu, munateli kutwalekahu ñahi kuswina kwakwihi naYehova nikuloñesha kwindi?
Yoba wakaanini kukuhwelela mumakudi awamayala aditeneneña nawu amabwambu jindi adiña nakumuseha. Ilaña, wafuukwilihu kutwalekahu kwikala washinshika kudi Yehova (Talenu paragilafu 14)
14. Tunateli kwila ñahi neyi antu anakutuseha muloña wakulondela nshimbi jaYehova? (Isamu 119:50-52)
14 Fwilenuña kukakela kunshimbi jaYehova. Yoba wakakeleli kunshimbi jaYehova hela chakwila antu adiña nakumuseha muloña wakwila chumichi. Iyala wumu hakachi kanowu aditeneneña nawu hiyamabwambu jaYoba, wesekeli nikumushinjila Yoba nindi hela chakwila wukulondela nshimbi jaNzambi hela nehi, Nzambi washañaku maana wanyi. (Yoba 4:17, 18; 22:3) Ilaña Yoba wakaanini kukuhwelela awa makudi. Welukili nindi nshimbi jaYehova jahosha hayuma yaloña niyabula kuloña jalala, dichi wafuukwilihu kukakela kuniji nshimbi. Hetejeli antu amuleteshi kufumpa kashinshi kindiku. (Yoba 27:5, 6) Chumanyi chitunakudizilaku? Bayi muleka antu anakuyiseha ayileteshi kujinoka nshimbi jaYehovaku. Toñojokenu hayuma yinayimwekeni muchihandilu chenu. Chakadi nikujina, muloña wayuma yayivulu yimunahitimu muchihandilu chenu, mukwiteja nenu kulondela nshimbi jaYehova kunayikwashi. Twalekenuhu kuhakwilaku kuloñesha kwalondelaña iji nshimbi. Dichi hela antu akutuseha chamuchidinyi, hiyakatwesha kutwambula kudi Yehovaku.—Tañenu Isamu 119:50-52.
15. Antu amuseheleleñadi muhela Brizit?
15 Talenu chuma chamumwekeneni muhela Brizit waku India. Antaña jindi adiña nakumuseha muloña wayuma yakuhweleleliyi. Hanyima yakupapatishewa mu 1997, nfumwindi wabulili kwikala Chinsahu chaYehova mudimu wamumanini. Dichi nfumwindi wafuukwilihu nindi, yena, muhela Brizit nianyanawu awambanda ayi nakushakama nawanvwali jindi adiña nakushakama mumusumba wacheñi. Ilaña kukala kwamuhela Brizit dihikwayileña nakuswejelaku. Chineli nfumwindi mudimu wamanini, yena diyi wazatileña kulonda akwashi chisaka chindi. Kubombelahu, chipompelu chadiña kwakwihi nawena hadiña makilomita 350. Chawushona, chisaka chanfumwindi chamuheleli muloña wayuma yakuhweleleliyi. Yuma yaswejeleliku kutama chakwila chisaka chamuhela Brizit chabuukili cheñi. Chakadi nikukuhwelela, nfumwindi wafwili. Chimwahitili mpinji, mwanindi wamumbanda wadiña nayaaka 12 wafwili nakansa. Chaswejeli kutama, antaña jamuhela Brizit atachikili kumwinka nyiloña muloña waniyi yuma yamwekeneña. Ahosheli nawu neyi wekalili Chinsahu chaYehova wanyi, iku kukala kwejima hikwadi kumwekanaku. Hela chochu, watwalekelihu kumukuhwelela Yehova nikuswina kwakwihi nakuloñesha kwindi.
16. Chineli muhela Brizit wamukakeleli Yehova nikuloñesha kwindi, yumanyi yayiwahi yafuminimu?
16 Chineli muhela Brizit washakamineña kwakulehi nachipompelu, nkoñi wañinza wamulejeli nindi ashimwineña mwomwiluña mwashakamineñayi nikupompela kwitala dindi. Hakusambila, wamweneña nindi wukutwesha wanyi. Ilaña wovwahilili mwamulejeliwu. Washimwinineña antu nsañu yayiwahi, kupompela mwitala dindi nawa wekalileña nakudifukula kwachisaka nawanyanindi mpinji yejima. Yumanyi yafuminimu? Muhela Brizit watachikili kudizisha atudizi aBayibolu amavulu nawa atudizi indi amavulu apapatisheweli. Mu 2005 wekalili payiniya wampinji yejima. Mwafumini yuma yayiwahi muloña wakumukuhwelela Yehova nikwovwahila kuloñesha kwindi. Anyanindi anakumukalakela Yehova nakashinshi, nawa ichi munidi iluña mudi yipompelu yiyedi. Muhela Brizit weluka chikupu nindi Yehova diyi wamwinkeli ñovu yakuumika kukala kwamweneñayi nichamuseheleñawu kudi antaña jindi.
TWALEKENUHU KWIKALA ASHINSHIKA KUDI YEHOVA NIKULOÑESHA KWINDI
17. Chumanyi chitwatela kufwilaña kwila?
17 Satana wakeñaña tukuhweleli netu Yehova watushiyaña neyi tudi mukukala nawa nindi kutwalekahu kwikala mukuloñesha kwaYehova kukuletesha hohu yuma kutaminaku muchihandilu chetu. Satana wakeñaña nindi tutiyeña woma neyi tumona amanakwetu anakulombola anakuyitwambila, kuyikabisha hela kuyikasa. Nawa neyi antu anakutuseha, wakeñaña nindi tuleki kukuhwelela nshimbi jaYehova nikuloñesha Kwindi. Ilaña tweluka chikupu tufuta twindi twatama nawa kwila atudimba nehi. (2 Kor. 2:11) Fwilenuña kukaana makudi aSatana nawa twalekenuhu kwikala ashinshika kudi Yehova nikuloñesha Kwindi. Anukenuña nenu Yehova hamba kayishiyaku. (Mas. 28:7) Dichi, bayi mwiteja chuma chidi chejima chiyambuli kudi Yehovaku!—Rom. 8:35-39.
18. Yumanyi yitwakahanjekahu muchibaaba chinalondelihu?
18 Muchinu chibaaba, tunahanjeki hakukala kutunateli kumona kwafuminaña kudi antu abula kwikala amuchipompelu. Ilaña cheñi nikukala kwafuminaña muchipompelu, kunateli kutuletesha kuleka kumukuhwelela Yehova nikuloñesha kwindi. Tunateli kushinda ñahi iku kukala? Ilu dilwihu lutwakahanjekahu muchibaaba chinalondelihu.
KAMINA 118 “Tuvulishili Chikuhwelelu”
a Hakwila tuumikeña nakashinshi munanu mafuku akukuminina, twatela kutwalekahu kumukuhwelela Yehova nikuloñesha kwindi. Diyabolu wafwilaña kuzatisha kweseka kulonda akisañani chikuhwelelu chetu. Muchinu chibaaba tukuhanjeka hakukala kusatu kwazatishañayi Diyabolu nichitwatela kwila hakwila tutwalekihu kwikala ashinshika.
b Majina amakwawu anayihimpi.