CHIBAABA CHAKUDIZA 48
Hembenuña Yitoñojoka Yenu Neyi Kashinshi Kenu Kadi Mukweseka
“Hembaña yitoñojoka yeyi muyuma yejima.”—2 TIM. 4:5.
KAMINA 123 Twatela Kumwovwahila Nzambi
NSAÑU YIDI MUCHIBAABA a
1. Kuhemba yitoñojoka yetu kwatalisha mudihi? (2 Timotewu 4:5)
NEYI tumona kukala, kashinshi ketu kudi Yehova nikuloñesha kwindi kanateli kwikala mukweseka. Tunateli kushinda ñahi iku kukala kwejima? Twatela kuhemba yitoñojoka yetu nikwikala atona, nakwimana akola mbe-e muchikuhwelelu. (Tañenu 2 Timotewu 4:5.) Twahembaña yitoñojoka yetu kuhitila mukudiwunjika, mukutoñojoka chiwahi nikufwila kumona yuma neyi chayimonañayi Yehova. Neyi twila mwenimu, hitukwiteja kutuyuula kudi yitoñojoka yatamaku.
2. Yumanyi yitukuhanjekahu muchinu chibaaba?
2 Muchibaaba chinafumihu, twahanjekeli hakukala kusatu kutunateli kumona kwafuminaña kudi antu abula kwikala muchipompelu. Muchinu chibaaba, tukuhanjeka hakukala kusatu kwafuminaña muchipompelu kunateli kweseka kashinshi ketu kudi Yehova. Dikweniku (1) neyi tumona netu anatwili katama kudi mukwetu mukaKristu, (2) neyi anatufumbi, nawa (3) neyi chinakutukalila kulondela kuhimpika kudi mukuloñesha. Tunateli kuhemba ñahi yitoñojoka yetu nakutwalekahu kwikala ashinshika kudi Yehova nikuloñesha kwindi neyi tunamoni kukala kwamuchidiwu?
NEYI TUMONA NETU ANATWILI KATAMA KUDI MUKWETU MUKAKRISTU
3. Mpinji yikwawu tunateli kutiya ñahi neyi tumona netu anatwili katama kudi mukwetu mukaKristu?
3 Komana mwatiyahu dehi nenu anayili katama kudi mukwenu mukaKristu, hadaha manakwetu wukweti kukooleka muchipompelu? Hekwawu iwu manakwetu hayineñeshelelimu hohuku. (Rom. 3:23; Yak. 3:2) Hela chochu, yuma yeliliyi hekwawu yayitiyishili kutama. Hadaha mwatoñojokeleña nankashi haniyi nsañu chakwila mwakañenyeña nikukaama. Hadaha mwadihwileña nenu, ‘Neyi manakwetu wukwila chuma chamuchidiwu, chalala iku hikuloñesha kwaNzambi?’ Ichi dichakeñañayi Satana nindi tutoñojokeña. (2 Kor. 2:11) Iyi yitoñojoka yatama yinateli kutwambula kudi Yehova nikuloñesha kwindi. Dichi neyi tumona netu manakwetu hela muhela natwili katama, tunateli kuhemba ñahi yitoñojoka yetu kulonda tubuli kwiteja yitoñojoka yatama?
4. Yosefu wahembeli ñahi yitoñojoka yindi hamwililiwu katama, nawa yumanyi yitunakudizila kudi yena? (Kutachika 50:19-21)
4 Bayi muhilaku. Yosefu hadiñayi mukwenzi, amwilili chatama kudi ayaya jindi awamayala. Amuheleli, nawa amakwawu hakachi kawu akeñeleña nikumujaha. (Kutach. 37:4, 18-22) Nkumininaku, amulandishili muwuduñu. Chafuminimu, Yosefu wamweni kukala kwakuvulu hadi yaaka kwakwihi na 13. Yosefu wadi kujinoka neyi mwamweni Yehova wadiña wamukeña. Nawa wadi kutachika kutoñojoka neyi chakwila Yehova wamushiyili mumpinji yakeñeleñayi wukwashu. Ilaña Yosefu wahilili wanyi. Hela chochu, wahembeli yitoñojoka yindi kuhitila mukudiwunjika. Hampinji yadiñayi nakukooleka kwakufuntisha katama nakatama kudi amanakwindi, welilimu wanyi, ilaña wayimwekesheleli kukeña nikuyanakena. (Kutach. 45:4, 5) Yosefu welili mwenimu muloña watoñojokeli chiwahi. Chatela ashi maana hakukala kwamweneñayi, ilaña watoñojokeleña hachuma chalema, kwila mwakeñeleñayi Yehova. (Tañenu Kutachika 50:19-21.) Yumanyi yitunakudizilaku? Neyi anayili katama, bayi mumuhilila Yehova hela kutoñojoka nenu nayishiyiku. Ilaña, toñojokenuña hachinakuyikwashayi kuumika kukala. Kubombelahu, neyi anayili katama kudi akwenu, fwilenuña kubuta hayiluwa yawu nakukeña.—1 Pet. 4:8.
5. Manakwetu Miqueas wahembeli ñahi yitoñojoka yindi hamweniyi nindi anamwili katama?
5 Talenu chuma chamumwekeneni mukulumpi waku South America wejina daMiqueas. b Wanukili mpinji yimu yamweniyi nindi anamwili chuma chatama kudi amanakwetu amu alombweleña mukuloñesha kwaYehova. Wahosheli nindi: “Kanda nineñeñahu dehi muyina njila. Nakameneni chikupu. Nakañenyeña kukaama nawufuku, nawa nadilileña muloña namweneña nami kwosi chuma chinatela kwila.” Hela chochu, manakwetu Miqueas watwalekelihu kuhemba yitoñojoka yindi nawa wazatili nañovu kukañesha yitoñojoka yatama. Walombeleña kakavulu kudi Yehova kulonda amwinki spiritu yajila niñovu yakuumika. Wadiña cheñi nakusandujola nsañu munyikanda yetu yinateli kumukwasha. Yumanyi yitunakudizilaku? Neyi mumona nenu anayili katama kudi manakwetu hela muhela, diwunjikenu nawa fwilenu kukañesha yitoñojoka yatama yinakwinza muyitoñojoka yenu. Hadaha muneluki wanyi chaletesha owu muntu ahoshi munoyu njila hela kwila ochu chuma. Dichi mulejenumu Yehova nawa mulombenu ayikwashi kumona yuma neyi chinakuyimonayi mukwenu. Kwila mwenimu kukuyikwasha kwiluka nenu mukwenu mukakudifukula wayineñeshelamu hohu wanyi, nawa mukumwanakena. (Yish. 19:11) Anukenuña nenu, Yehova neluki kukala kumukweti nawa wukuyinka ñovu yakuumika.—2 Kushi. 16:9; Mukwa. 5:8.
NEYI ANATUFUMBI
6. Chalemenadi kumona kufumba kwaYehova netu hinjila mwamwekeshelañayi nindi watukeña? (AHeberu 12:5, 6, 11)
6 Kufumba kunateli kutukata kumuchima. Ilaña neyi tutoñojokaña hohu hakufumba chikunatukati, tunateli kutachika kutoñojoka netu anatufumbi munjila yayiwahi wanyi nawa iku kufumba kunatuteleli wanyi. Chikufumamu, tunateli kuvulamena chuma chalema, dikwila nawu, kumona kufumba netu hinjila mwamwekeshelañayi Yehova nindi watukeña. (Tañenu AHeberu 12:5, 6, 11.) Nawa neyi tutwalekahu kutoñojoka hakufumba chikunatukati, tukumwiteja Satana atulukuki. Wakeñaña tukaani kufumba, sweje-e dinu, wakeñaña nindi tudambuli kudi Yehova nichipompelu. Neyi anayifumbi, munateli kutwalekahu ñahi kuhemba yitoñojoka yenu?
Chineli Petulu wadizozeli nakwiteja kufumba, amuzatishili chikupu kudi Yehova (Talenu paragilafu 7)
7. (a) Neyi chinamwekeshiwu hamwevulu, Petulu amuzatishili ñahi kudi Yehova hanyima yakwiteja kufumba? (b) Yumanyi yimunadizili kudi Petulu?
7 Itejenu kufumba, nawa zatilenuhu. Yesu wamufumbilili Petulu hamesu awakwawu apostolu kapampa kakavulu. (Maku 8:33; Luka 22:31-34) Chumichi chatela chamutiyishili Petulu nsonyi! Hela chochu, Petulu watwalekelihu kwikala washinshika kudi Yesu. Wetejeli kufumba nawa wadizilili kuyiluwa yindi. Nkumininaku, Yehova wamukiswilili Petulu hakashinshi kindi nawa wamwinkeli nyidimu yalema muchipompelu. (Yow. 21:15-17; Yilw. 10:24-33; 1 Pet. 1:1) Yumanyi yitunakudizila kudi Petulu? Twahetelañamu etu aweni niakwetu neyi tubula kusha maana hansonyi yitunatiyi muloña wakutufumba, ilaña twiteja munatufumbiwu nawa tuzatilahu. Chitwela mwenimu, Yehova watuzatishaña nankashi niamanakwetu.
8-9. Hanyima yakumufumba, manakwetu Bernardo watiyileña ñahi hakusambila, ilaña chumanyi chamukwashili kuhimpa yitoñojoka yindi?
8 Talenu chuma chamumwekeneni manakwetu Bernardo, waku Mozambique. Amutambwili kukooleka kwakwikala mukulumpi. Watiyili ñahi hakusambila? Wahosheli nindi, “Nahilili nankashi muloña natiyili kutama chanfumbiliwu.” Wakameneni hachikumumonañawu kudi antu amuchipompelu. Wahosheli nindi, “Mwahitili tukweji hakwila nimoni nami iku kufumba kwakuwahi nikumukuhwelela cheñi Yehova nikuloñesha kwindi.” Chumanyi chamukwashili manakwetu Bernardo kuhimpa yilwilu yindi?
9 Manakwetu Bernardo wahimpili yitoñojoka yindi. Walumbulwili nindi: “Hinadiña mukulumpi, nazatishileña aHeberu 12:7 hakukwasha amakwawu kulonda amoneña kufumba kwaYehova munjila yayiwahi. Dichi nadihwili nami, ‘Anyi atela kwovwahila kufumba kudi muniyi nsona?’ Ambuña aYehova ejima, kushilahu ninami.” Kuhiñahu manakwetu Bernardo wazatili nañovu kulonda atachiki kumukuhwelela cheñi Yehova nikuloñesha kwindi. Watachikili kutaña Bayibolu nankashi nikutoñojoka chikupu hayuma yatañileñayi. Hela chakwila wachidiña nakudakamena hachamumweneñawu amanakwetu niahela, wazatileña nawu mumudimu wakushimwina nawa wakwileñahu hakupompa. Mukuhita kwampinji, manakwetu Bernardo amutondeli cheñi kwikala mukulumpi. Neyi anayifumbi neyi chamufumbiliwu manakwetu Bernardo, bayi musha maana hansonyi yimukutiyaku, ilaña itejenu kufumba nawa zatilenuhu. c (Yish. 8:33; 22:4) Neyi mwila mwenimu, mwatela kukuhwelela nenu Yehova wakayikiswila muloña wakutwalekahu kwikala ashinshika kudi yena nikuloñesha kwindi.
NEYI CHINAKUTUKALILA KWITEJA KUHIMPIKA KUDI MUKULOÑESHA
10. Kuhimpikanyi kwamukuloñesha kwatela kwashili kashinshi kawaIsarela amakwawu mukweseka?
10 Kashinshi ketu kanateli kwikala mukweseka neyi kudi yuma yinahimpiki mukuloñesha. Neyi kubabala nehi, iku kuhimpika kunateli nikutuletesha kudambula kudi Yehova. Chakutalilahu, talenu kuhimpika kwamukuloñesha kwadiña muNshimbi jaMosi chikwahimpili chihandilu chawaIsarela amakwawu. Henohu kanda ashiku Nshimbi, nyitu yayisaka diyazatileña nyidimu yawatupristu. Atuñileña tumeña nawa alambwilileñahu nyilambu yayisaka yawu kudi Yehova. (Kutach. 8:20, 21; 12:7; 26:25; 35:1, 6, 7; Yoba 1:5) Ilaña chelili ashiku Nshimbi, nyitu yayisaka yalekeli kuzata iwu mudimu. Yehova watondeli atupristu kufuma muchisaka chaAroni kulonda alambuleña nyilambu. Chelili iku kuhimpika mukuloñesha kunatachiki dehi kuzatika, neyi mutu wachisaka wabulili kwikala wamuchisaka chaAroni atachika kuzata mudimu wawupristu, amujahileña. d (Lev. 17:3-6, 8, 9) Komana iku kuhimpika dikwaletesheli aKora, Datani, Abirami nianlomboli 250 adikañi nawunlomboli waMosi naAroni? (Kuch. 16:1-3) Tuneluki wanyi. Ilaña tweluka netu, Kora niamayala adiñayi nawu akañenyi kwikala ashinshika kudi Yehova. Neyi yuma yinahimpiwu muloñesha yinashi kashinshi kenu mukweseka, chumanyi chimwatela kwila?
AKohati chayihimpiliwu mudimu wazatileñawu, adihanini namuchima wejima kwikala akakwimba tumina, akakuhemba kuyiisu, hela akakuhemba matala mwakuhembela yakuda (Talenu paragilafu 11)
11. Yumanyi yitunakudizila kudi aLevi amakwawu adiña aKohati?
11 Ovwahilenuña chikupu kuhimpika kwamukuloñesha. Hampinji yendeleñawu mwisaña, aKohati azatileña mudimu walema chikupu. Mpinji yejima yanyamukileña aIsarela hanateekeliwu, aKohati amakwawu asendeleña chimbañu chachitiyañenu nakutwaminaku kumbidi yawantu ejima. (Kuch. 3:29, 31; 10:33; Yosh. 3:2-4) Iwu wadiña himudimu walema chikupu! Hela chochu, yuma yahimpikili helili aIsarela atachiki kushakama Mwituña daChikaninu. Haniyi mpinji, Chimbañu hiyavulileña kuchituntujolaku. Dichi mpinji yayuulileñayi Solomoni hawanta, aKohati amakwawu ayinkeli mudimu wakwimba tumina, amakwawu kuhemba kuyiisu nawa amakwawu kuhemba matala mwakuhembela yakuda. (1 Kushi. 6:31-33; 26:1, 24) Kwosi hitwatañaña nawu aKohati atoobeli hela akeñeli nawu ayinki mudimu walema chineli azatileña mudimu walema hakusambilaku. Chumanyi chitunakudizilaku? Ovwahilenuña namuchima wejima neyi kudi kuhimpika mukuloñesha kwaYehova, kushilahu nikuhimpika kwamudimu wumwazataña mukuloñesha. Zañalalenuña namudimu wejima wunayinkiwu. Anukenuña nenu mudimu wumwazataña hidiwu waleteshaña mwiikali alemaku. Yehova walemesha chimwamwovwahilaña kubadika mudimu wejima wumukweti.—1 Sam. 15:22.
12. Muhela Zaina watiyili ñahi chamufumishiliwu haBeteli?
12 Talenu chuma chamumwekeneni muhela Zaina, waku Middle East. Amulekesheli kuzata mudimu wakeñeliyi nankashi. Hanyima yakukalakela haBeteli hadi yaaka kubadika ha 23, amulejeli kuya nakukalakala mudimu wawupayiniya wadimena. Wahosheli nindi: “Kuhimpika kwamudimu wami kwanneñesheli nankashi. Nadimweneña kwikala wamukunkulwayi, nawa natwalekelihu kudihula nami, ‘Chumanyi chatama chinelili?’” Chawushona, amanakwetu amakwawu niahela muchipompelu amuneñesheleliku kuhitila mukumuleja nawu: “Neyi wakalakeleña chiwahi, kuloñesha hikwadi kukufumisha haBeteliku.” Hadi mpinji yayilehi, muhela Zaina waneñeleña nankashi chakwila wadilileña mafuku ejima nawufuku. Ilaña wahosheli nindi: “Hinachesekelihu kujinoka kuloñesha hela kukeña kwatukeñayi Yehovaku.” Muhela Zaina watwalekelihu ñahi kuhemba yitoñojoka yindi?
13. Chumanyi cheliliyi muhela Zaina hakwila akañeshi yitoñojoka yatama?
13 Muhela Zaina watwesheli kukañesha yitoñojoka yatama. Chumanyi chamukwashili? Watañili yibaaba yamunyikanda yetu yahosheleña hakukala kwadiñayi naku. Chibaaba chahosheleña nawu “Kuti Mwacimfya Ukufuupulwa!” muKaposhi Kakutalila kaCibemba kaFebruary 1, 2001, chamukwashili nankashi. Ichi chibaaba chashimuna nsoneki wumu waBayibolu wejina daMaku chakabakeniyi nayitoñojoka yoyimu hampinji yamuhimpa-himpileñawu nyidimu yazatileñayi. Muhela Zaina wanukaña nindi, “Chakutalilahu chaMaku dichankwashili kumanisha chineñi chami.” Muhela Zaina cheñi watwalekelihu kudikunda nawamabwambu jindi. Halekeli kudikunda nawakwawu, hela kuditiyila wushona yomweniku. Wakunkulwili nindi spiritu yaYehova diyalombolaña mukuloñesha kwindi nawa nindi antu alombolaña adiña nakumwakamena chikupu. Ilaña welukili cheñi nindi kuloñesha kwaNzambi kunateli kwila chuma chachiwahi kulonda mudimu waYehova wuzatiki.
14. Kuhimpikanyi kwamukuloñesha kwamukalilili manakwetu Vlado kulondela, nawa chumanyi chamukwashili?
14 Manakwetu Vlado, mukulumpi wudi nayaaka 73 waku Slovenia, chamukalilili hampinji yabombeliwu chipompelu mwapompeleleñayi nachipompelu chikwawu, nawa Itala daWanta mwapompeleleñayi adishinkili. Wahosheli nindi: “Nakañenyi kwiluka chaletesheli adina Itala daWanta dadiwahi adishinki. Natiyili kutama chineli dihitwafumini hohu nakudiwahisha. Ami nekala mukakusoña nawa nasoñeliku niyitwamu yayiha. Cheñi nawa, kubomba kwaniyi yipompelu kwakeñekeleña kuhimpa yuma yayivulu yatukalilili etu akakushimwina akula dehi.” Chumanyi chamukwashili manakwetu Vlado kwovwahila iku kufuukula? Walumbulwili nindi: “Kwovwahila kuhimpika kudi mukuloñesha kwaYehova, mpinji yejima mwafumaña yuma yayiwahi. Iku kuhimpika kunakutukwasha kwikala adiloñesha kwiteja kuhimpika kwamaneni kudi kumbidi.” Komana chinakuyikalila kwovwahila kuhimpika kwenzaña hamuloña wakubomba yipompelu, indi kwiji kuhimpika kwamudimu wumwazataña mukuloñesha? Mwatela kwiluka chikupu nenu Yehova neluki chimunakutiya. Neyi mwovwahila iku kuhimpika nawa mutwalekahu kwikala ashinshika kudi Yehova nikuloñesha kwindi kunakuzatishayi, akayikiswila chikupu.—Mas. 18:25.
HEMBENUÑA YITOÑOJOKA YENU MUYUMA YEJIMA
15. Tunateli kuhemba ñahi yitoñojoka yetu neyi tumona kukala kunakufumina muchipompelu?
15 Chitunakuswina kwakwihi nakukuma kwanshakaminu yamakonu, twatela kukuhwelela kumona kukala kukufuminaña muchipompelu. Iku kukala kunateli kusha kashinshi ketu kudi Yehova mukweseka. Dichi twatela kuhembaña yitoñojoka yetu. Neyi mumona nenu anayili katama kudi mukwenu mukaKristu, bayi muhilaku. Neyi anayifumbi, bayi musha maana hansonyi yimukutiyaku, ilaña itejenu kufumba nawa zatilenuhu. Nawa neyi kuloñesha kwaYehova kuhimpa yuma yinayineñeshi halwenu, itejenu oku kuhimpika namuchima wenu wejima nawa ovwahilenu munafuukuliwu.
16. Munateli kutwalekahu ñahi kumukuhwelela Yehova nikuloñesha kwindi?
16 Munateli kutwalekahu kumukuhwelela Yehova nikuloñesha kwindi neyi kashinshi kenu kadi mukweseka. Ilaña hakwila mwili mwenimu, mwatela kuhembaña yitoñojoka yenu, dikwila nawu, kwikala adiwunjika, kutoñojoka chiwahi nikumona yuma neyi chayimonañayi Yehova. Fwilenuña kudiza hadi antu ashimunawu muBayibolu omikili kukala kwadifwanaku nakumukweti, nawa toñojokenuña chikupu hayuma yayikwashili. Mulombenu Yehova kulonda ayikwashi. Nawa bayi mudambula nachipompeluku. Chikufumamu, hela chakwila mukumona kukala kwamuchidinyi, Satana hakutwesha kuyambula kudi Yehova hela kuloñesha kwindiku.—Yak. 4:7.
KAMINA 126 Tonenu, Imanenu Chakola, Ikalenu naÑovu
a Kashinshi ketu kudi Yehova nikuloñesha kwindi kanateli kwikala mukweseka, sweje-e neyi tumona kukala kunakufumina muchipompelu. Muchinu chibaaba, tukuhanjeka haniku kukala kusatu nichitunateli kwila hakwila tutwalekihu kwikala ashinshika kudi Yehova nikuloñesha kwindi.
b Majina amakwawu anayihimpi.
c Munateli kuwana nsañu yikwawu yikuyikwasha muchibaaba chinakwila nawu “Bushe Mwalibala Amubombapo? Bushe te Kuti Mutemwe Ukubomba na Kabili?” chidi muKaposhi Kakutalila, kaCibemba kaAugust 15, 2009, ifu 30.
d Nshimbi yashimwini nawu neyi nyitu yayisaka yinakukeña kujaha chimuna chakuda, yatela kutwala owu chimuna kwiluña dajila. Nyitu yayisaka yashakamineña kwakulehi nankashi neluña dajila diyetejeliwu hohu.—Kuhit. 12:21.