NSAÑU YACHIHANDILU
“Nakeñeleña Kumukalakela Yehova”
TWASHALISHILI izanvu danyanya dawantu itwayili nakuhempula kwakwihi namukala waGranbori, wekalila mukachi kevunda daSuriname mwanokaña nankashi nvula. Kufumahu twakandamini muwatu wakusoña nawa twatachikili kukulisha Kaloña Tapanahoni. Chimwahitili mpinji, hitwahitileña hadiña mpupa, chikuñu chavuwileña watu cheteli mwilola. Hohenohu, ntoñi yawatu yajiminini nawa tweñilili mumenji. Muchima watachikili kweta. Hela chakwila nendeli mumaatu hadi yaaka yayivulu hamu neyi nkoñi wañinza, hinelukili kusalaku!
Henohu kanda niyileji yuma yalondelelihu, lekenu niyileji ntahi chinatachikili mudimu wampinji yejima.
Navwalikili mu 1942 hachituutu chalubanji chaCaribbean muCuraçao. Atata adiña akuSuriname, ilaña abuukilili kunichi chituutu muloña wamudimu. Hadi yaaka yantesha yahitilihu henohu ami kanda nivwaliki, atata adiña hakachi kawaYinsahu jaYehova atachi kupapatishewa muCuraçao. a Mulungu-himulungu atudizishileña Bayibolu etu anyanawu, hela chakwila mpinji jikwawu hitwakeñeleña kudizaku. Hinadiña nayaaka 14, atata abuukili nachisaka chetu nakuya kuSuriname nakuhemba amama yawu adiña akula dehi.
KUDIKUNDA NAWAMABWAMBU AMAWAHI KWANKWASHILI
MuSuriname, natachikili kudikunda nawakwetu atwansi amuchipompelu amukalakeleleña Yehova chikupu. Ambadikiliku nayaaka yantesha nawa adiña apayiniya ampinji yejima. Neya anakuhosha yuma yayimwekeneneña mumudimu wakushimwina, amwekeneña muzañalu chikupu kumesu. Hanyima yakupompa, ami niamabwambu jami twahanjekeleña hansañu yamuBayibolu. Mpinji yikwawu twahanjekeleña iku tudi hanji tunakutala tutumbwa mumawulu. Awa amabwambu jami ankwashili kwiluka chuma chinakeñeleña muchihandilu chami; nakeñeleña kumukalakela Yehova. Dichi napapatisheweli hinadiña nayaaka 16. Nkumininaku, hinadiña nayaaka 18, natachikili wupayiniya wampinji yejima.
NADIZILI YUMA YALEMA
Inakukalakala wupayiniya muParamaribo
Nadizili yuma yayivulu muwupayiniya nawa yumiyi yinankwashi mumudimu wami wampinji yejima. Chakutalilahu, chuma chatachi chinadizili, hikulema kwekala mukudizisha amakwawu. Hinatachikili wupayiniya, mishonali wumu wejina daWillem van Seijl wankwashili chikupu. Wandizishili yuma yayivulu hachakuzata nyidimu yamukuloñesha kwaNzambi. Hayina mpinji, nelukili wanyi nami nakeñekeleña kundizisha chikupu. Chaaka chalondelelihu, antondeli kwikala payiniya wadimena
nawa natachikili kulombola mazanvu akwakulehi adiña mukachi kevunda daSuriname mwanokaña nankashi nvula. Nasakililaña chikupu chandizishiliwu amanakwetu haniyi mpinji yinakeñekeleña kundizisha! Kufuma hayina mpinji, nembujolaña chakutalilahu chawu kuhitila mukwikala nampinji yakudizishaku amakwawu.Chuma chamuchiyedi chinadizili chidi chakwila nawu, chachiwahi kushakama chihandilu chapela nikudiloñeshela chadimu. Hakutachika kwakakweji-hikakweji, ami nimukwetu payiniya wadimena twahanjekeleleña chadimu yuma yakulanda yakuzatisha munyilungu yinalondelihu. Kuhiñahu, wumu hakachi ketu wayileña lwendu lwalulehi, kwiluña kutwayileña nakulanda yuma yakeñekeleña. Twazatishileña chiwahi kadali ketu kitwatambwileña nakulandamu yuma yitunateli kuzatisha mukakweji kamukuma. Neyi yuma yakuzatisha yinatumani hampinji yituchidi mwivunda mwanokaña nankashi nvula, antu amakwawu enjileña nakutukwasha. Neluki nami kwiluka chakuhanda chihandilu chapela hinadiña kansi nikudiloñeshela chadimu, kunankwashi kusha maana hamudimu waYehova muchihandilu chami chejima.
Chuma chamuchisatu chinadizili, hiyuma yayiwahi yafumaña mukudizisha antu mwidimi dawu. Chinakulileña, nahosheleña idimi daDutch, Ingilishi, Papiamento, niSranantongo (datenañawu cheñi nawu Sranan), idimi dazatishañawu nankashi kuSuriname. Ilaña mwivunda mwanokaña nankashi nvula, namweni nami antu etejeleña nankashi nsañu yayiwahi neyi tuyishimwina mwidimi dawu dachisemwa. Chankalilileña kuhosha awa madimi amakwawu, chidi neyi Saramaccan, mwekala mazu akuhoshela hewulu nimwishina. Hela chochu, munafumi yuma yayiwahi. Hadi yaaka yayivulu, nadizishi antu amavulu chalala muloña nahoshaña idimi dawu dachisemwa.
Hela chochu, mpinji yikwawu kudi yuma yantiyishileña nsonyi. Chakutalilahu, mpinji yimu nehwili kadizi wami waBayibolu wahosheleña idimi daSaramaccan kulonda niiluki chatiyileñayi, chineli wakatileña nankashi mwivumu. Ilaña njila yinamwihwililimu yatiyakeni neyi inakumwihula neyi wudi nevumu! Chawushona, lwihu lunamwihwili lwamutiyishili nsonyi. Hela chakwila naluwañesheleña neyi ichi chuma chamwekeni, mpinji yejima nesekeleña kuzatisha idimi dachisemwa dawantu amwiluña munashimwinineña.
ANYINKELELIHU NYIDIMU YIKWAWU
Mu 1970, antondeli kwikala nkoñi wañinza. Muchina chaaka, natalishili progiramu yanyevulu yadiña namutu nawu “Kuhempula Kasanji Keneni kawaYinsahu jaYehova kamuKaayi Kejima” kumazanvu amavulu akwakulehi adiña mwivunda mwanokaña nvula nankashi. Hakwila tushiku kunawa mazanvu, ami niamanakwetu amakwawu, twahitileña hatuloña twamunidi ivunda kuzatisha watu wakusoña wawulehi, wapepela. Muwatu twasendeleleñamu generator, chindundu chamanji, manoñu amanji niikina dakutalisha nachu nyevulu. Neyi tunashiki dehi kutunakuya, twasendeleña yuma yejima nakuyitwala mwivunda mwanokaña nankashi nvula mutwadiña nakutalishila antu nyevulu. Chuma chinanukaña nankashi hanawa malwendu, hikumona antu amumaluña amwamulehi chakeñeliwu nankashi ana maprogiramu. Natiyili kuwaha chikupu kukwasha antu kulonda amwiluki Yehova nikuloñesha kwindi kwahamaseki. Kumona antu chaswinineñawu kwakwihi
naYehova, kwanzañalesheleña muloña nelukili nami nazatileña nañovu muniwu mudimu.KUPIKULA CHIBAABA CHANYONJI YISATU
Ami naEthel twadisumbwili muSeptember 1971
Hela chakwila wujiki wankwashileña kuzata chiwahi mudimu wami, ilaña nakeñeleña kusumbula. Dichi natachikili kulombelahu kulonda niwani mumbanda watela kuumikila hamu nanami namuzañalu mukukala kunamweneña mumudimu wampinji yejima mwivunda mwanokaña nankashi nvula. Chimwahitili chaaka, natachikili kudiluka naEthel, payiniya wadimena wadiña namuchima wakudihana. Kufuma tuhu kuwansi, Ethel wadiña nakutiya kuwaha nankashi chazatileña kapostolu Pawulu nawa wakeñeleña kudihana yomweni mumudimu wawakaKristu neyi cheliliyi. Twadisumbwili muSeptember 1971 nawa twatachikili kuzatila hamu mumudimu wawunkoñi.
Ethel amukulishilili muchisaka mwadiña antu abulili yuma yayivulu yakumujimba, dichi chamupeleleli kuzata chiwahi mumudimu wakwenda mwivunda mwanokaña nvula nankashi. Chakutalilahu, neyi tunakudiloñesha kuya nakuhempula yipompelu mukachi kevunda, twaloñejekeleña hohu yuma yantesha. Twakoseleleña yakuvwala yetu mutuloña nikuwela. Twenjililili cheñi kuda yakuda yejima yatwinkeleñawu kudi amanakwetu, yidi neyi maiguana, mapiranha, hela yakuda yejima yazombeleñawu mwivunda hela yakwatileñawu mutuloña. Neyi tudana yeña, twadiililileña hamafu amakondi. Neyi tudana yuma yakudiilaku, twadiileña namakasa. Ami naEthel twatiyaña netu kudihana nakumukalakela Yehova hamu kunatukwashi kudikunda nakwikala chibaaba chanyonji yisatu chakupikula. (Mukwa. 4:12) Yuma yatumwekeneni kwila tuyesekeja nachuma chidi chejima nehi!
Ifuku dimu chitwafumineña nakuhempula amanakwetu mwivunda mwanokaña nvula nankashi, kudi yuma yatumwekeneni yinashimuna hakusambila. Watu chiwashikili hampupa, wajiminini chanti mumenji ilaña wanyakeli cheñi kusefuka. Kukooleka, twavwalili yakuvwala yakudikiña nachu hamenji nawa hitwaholokeli muwatuku. Ilaña
watu wetu wenzeli menji. Yakuda yetu yadiña mumadehu twayimwañilili mukaloña nawa twazatishili awa madehu kuswaha nachu menji adiña muwatu.Chineli twamwañili yakuda yetu yejima, twatachikili kulowa inshi hitwakulishileña hakaloña. Ilaña twalowelihu jidi jejima wanyi. Dichi twamulombeli Yehova netu atwinki yakuda yitwatela kuda hanodu ifuku. Hanyima yakulomba, manakwetu wumu wanatilili ilowa hamenji nawa waloweli inshi weneni wakuda wejima wetu atanu hanowu wufuku nakwikuta.
IYALA, TATA YAWANTU, NAWA NKOÑI WAÑINZA
Hanyima yakuzatila hamu yaaka yitanu mumudimu wakwenda, ami naEthel twatambwilili nkisu yitwabulili kukuhwelela, twayileña nakwikala anvwali. Nazañaleli chikupu chinatiyili iyi nsañu, hela chakwila nelukili wanyi yuma yakamwekana kumbidi. Ami naEthel twafwilileña kutwalekahu mumudimu wampinji yejima neyi chinatwesheki. Mu 1976, mwanetu weyala Ethniël wavwalikili. Chimwahitili yaaka yiyedi nachikunku, mwanetu mukwawu weyala wamuchiyedi Giovanni, wavwalikili.
Nidi kunakupapatishilawu antu kuKaloña Tapanahoni kukamwihi naGodo Holo Kumusela waSuriname—mu 1983
Muloña wakukaankila kwadiña muSuriname haniyi mpinji, kasanji kamutayi kanlejeli kutwalekahu kukalakala neyi nkoñi wañinza iku tunakukulisha anyanetu. Anyanetu hachidiñawu anyanya, anlejeli kukalakela mujiñinza mwadiña yipompelu yantesha. Chumichi chaletesheli nizateña hamu neyi nkoñi wañinza nyilungu yantesha mukakweji-hikakweji, nawa mafuku anashali nazatileña hamu neyi payiniya muchipompelu mwantemesheliwu. Twayileña hamu naEthel nianyanetu hampinji yinayileña nakukalakela muyipompelu yadiña mukamwihi nakutwashakamineña. Hela chochu, hinayileña nakukalakela muyipompelu hela mujiñinza jamwivunda, nayileña nkawami.
Mumudimu wawunkoñi, kakavulu nayileña nawatu nakuhempula yipompelu yakwakulehi
Nadiña nakuloñesha chiwahi yuma hakwila nizati nyidimu yejima yinadiña nayu. Nazatileña nañovu kulonda twikaleña nakudifukula kwachisaka mulungu-himulungu. Neyi nendeli yipompelu yamwivunda, Ethel wadiña nakulombola kudifukula kwachisaka nawanyanetu hetala. Hela chochu, neyi chinatwesheki, kakavulu twazatilileña hamu neyi chisaka. Cheñi ami naEthel twayileña nakuhemena hamu nawanyanetu yisela nikuya kumaluña amawahi amukamwihi. Kakavulu nakaamineña swayi wanyi nawufuku, muloña wakwakamena nyidimu yamukuloñesha. Nawa chineli Ethel wadiña mumbanda watelela washimunawu haYishimu 31:15, wahindukileña ntetemena nankashi kulonda tutañileña hamu nsona yefuku-niifuku hamu neyi chisaka nikudiila hamu henohu anyanetu kanda ayi kushikola. Natiyaña kuwaha nankashi hakwikala namumbanda wadihana wankwashaña mpinji yejima kushikija nyidimu yanyinkawu kudi Yehova!
Hamu neyi anvwali, twazatili nañovu kukwasha anyanetu kulonda amukeñi Yehova nimudimu wawakaKristu. Twakeñeleña anyanetu atondihu kuzata mudimu wampinji yejima, bayi neyi dichitwakeñeleña netu eliku, ilaña muloña diwu mudimu wakeñeliwu. Mpinji yejima twayilejeleña mudimu wampinji yejima chiwawahila. Chakadi kujimbalaku kukala kutwamweneña, twayilejeleña Yehova chatukwashiliyi nichakiswililiyi chisaka chetu. Nawa twazatileña nañovu kulonda anyanetu adikundeña nawakwetu aYinsahu, amutwamijileñaku Yehova muchihandilu chawu.
Yehova watwinkeleña yuma yejima yakeñekeleña hampinji yitwakulishileña anyanetu. Hela chochu, nazatileña nañovu kulonda nikwasheña chisaka chami. Yuma yinahitilimu hinadiña payiniya wadimena mujiki mwivunda mwanokaña nankashi nvula, yankwashili kuloñeshela chadimu yuma yakumujimba yakeñekeleña. Ilaña mpinji jikwawu, hela chakwila tunazati nañovu chamuchidinyi, hitwekalileña nayuma yejima yitwakeñeleñaku. Haniji mpinji jejima, nelukileña nami Yehova wadiña nakutukwasha. Chakutalilahu, kumakumishilu achaaka cha 1980 nikumatachikilu achaaka cha 1990, muSuriname mwadiña njita. Muniyi yaaka, mpinji jikwawu chakalileña kulanda nituyuma twapela. Hela chochu, Yehova wadiña nakutwinka yuma yejima yitwakeñeleña.—Mat. 6:32.
KWANUKA YUMA YINAMWEKANI MUCHIHANDILU CHAMI
Kufuma kuchimunswa nakuya kuchidiilu: Ami nañodami, Ethel
Mwanetu wamukulumpi, Ethniël, nañodindi, Natalie
Mwanetu Giovanni nañodindi, Christal
Yehova natwalekihu kutukwasha muchihandilu chetu nawa natukwashi kwikala namuzañalu chikupu nikuzañalala nayuma yitukweti. Anyanetu anatuleteli muzañalu chikupu nawa twatiyaña kuwaha nankashi muloña twayikulisha munjila yakwila anakumukalakela Yehova. Tudi cheñi namuzañalu kwiluka netu atondahu kuzata mudimu wampinji yejima muchihandilu chawu. Ethniël naGiovanni wejima wawu ayedi amanisha mashikola aWanta nawa ichi anakuzatila hakasanji kamutayi muSuriname hamu nawañodi jawu.
Ami niñodami Ethel twakula dehi, ilaña tunatwalekihu kumukalakela Yehova neyi apayiniya adimena. Kafwampi, twekala nanyidimu yayivulu nankashi chakwila nakañanyaña kwikala nampinji yakudiza kusala! Ilaña naditoñeshaña wanyi. Neyi nanuka yuma yinamwekani muchihandilu chami, kufuukula kunafuukwilihu henohu nichidi kansi kwakukalakala mumudimu wampinji yejima muchihandilu chami, kwadiña hikufuukula kwakuwahi chikupu.