1-2. (a) Malwihwinyi itukuhanjekahu? (b) Yumanyi yinakumwekesha chikupu nawu Yehova nakufwila kutukwasha?

 YEHOVA nateli kutukwasha kuumika kukala kutunakumona muchihandilu nikwikala namuzañalu mumudimu wajila wutwazataña. Njilanyi mwatukwashilañayi? Nawa tunateli kuhetelamu ñahi muwukwashu watwinkañayi Yehova? Awa malwihu akuyakula muchinu chibaaba. Hela chochu, henohu kanda tuhanjeki hañakwilu, tuhanjekenu ntahi hanilu lwihu lukwawu: Komana Yehova nakufwila chikupu kutukwasha?

² Izu dazatishiliyi kapostolu Pawulu mumukanda wasonekeleliyi aHeberu dinateli kutukwasha kuwana ñakwilu. Pawulu wasonekeli nindi: “Yehova hinkwashi yami; hinukutiya womaku. Chumanyi chikuñilayi muntu?” (Heb. 13:6) Nyikanda yimu yahosha haBayibolu yashimuna nawu izu dakwila nawu ‘nkwashi,’ dinazatishiwu muniyi vasi nawu, datalisha kudi muntu wanyakalaña kuya nakukwasha muntu wunakukeñeka wukwashu. Fwikijenu munakumona Yehova nakunyakala kuya nakukwasha muntu wudi mukukala. Mukwiteja nenu iku kulumbulula kunakumwekesha chikupu Yehova chafwilañayi kutukwasha. Neyi Yehova wudi kukabadi ketu, tukuumika kukala kudi kwejima namuzañalu.

3. Njilanyi jisatu mwatukwashilañayi Yehova kuumika namuzañalu?

³ Njilanyi mwatukwashilañayi Yehova kuumika kukala namuzañalu? Hakwila twakuli ilu lwihu, tuhanjekenu hamukanda waIsaya. Muloñadi? Wuprofwetu wawuvulu wamwoneneniwu Isaya nawu asoneki, wunakundami kudi ambuña aNzambi makonu. Kubombelahu, Isaya kakavulu wamulumbululaña Yehova mumazu atupelelaña kutiya.  Chakutalilahu, talenu Isaya kapetulu 30. Munaka kapetulu, Isaya wazatisha mazu atukwashaña kufwikija Yehova chatukwashañayi etu antu jindi (1) kuhitila mukutiyilila nakanañachima nikwakula kulomba kwetu, (2) kuhitila mukutulombola, nawa (3) kuhitila mukutukiswila makonu nikumbidi. Tuhanjekenu haniji njila jisatu mwatukwashilañayi Yehova.

4. (a) Yehova wayilumbulwili nindidi aYudeya amumafuku aIsaya, nawa wayitejeli kumona chumanyi? (b) Yehova wayikanini nindidi ana adiña ashinshika? (Isaya 30:18, 19)

⁴ Mumazu akutachikilahu amukapetulu 30 kamukanda waIsaya, Yehova wayilumbulula aYudeya nindi “anyana achinchika,” “[abombelaña] nshidi kunshidi.” Watwalekahu kuyilumbulula nindi: “Hiyantu adikaña, . . . abulaña kwovwahila lushimbi lwaYehova.” (Isa. 30:1, 9) Chineli antu akaanini kutiyilila, Isaya washimwineñahu dehi nindi Yehova wakayiteja akamoni yihuñu. (Isa. 30:5, 17; Yere. 25:8-11) Nawa dichuma chamwekeni, ayitwalili muwunkoli kudi eni Babiloni. Hela chochu, hakachi kawaYudeya hadiña amakwawu ashinshika, nawa Isaya wadiña nansañu yadi kuyikwasha kwikala nakuchiñeja. Wayilejeli nindi ifuku dimu Yehova wakayimwekeshela cheñi wuselewa. (Tañenu Isaya 30:18, 19.) Nawa dichenjili nakumwekana. Yehova wayifumishili muwunkoli. Hela chochu, hiyashikeneni dakuyifumisha muwunkoliku. Mazu akwila nawu “Yehova nadiwunjiki nakuhembelela kulonda ayimwekesheli wuselewa,” amwekesheli nawu hakahita mpinji hakwila awa antu ashinshika ayamwini. Kafwampi, aIsarela ashakamini yaaka 70 muwunkoli muBabiloni henohu ashalilihu kanda ayiteji kufunta kuYerusalema. (Isa. 10:21; Yere. 29:10) Chafuntiliwu antu kumukala wawu, madilu achineñi adililiwu muwunkoli ayisinsishili namadilu amuzañalu.

5. Isaya 30:19 yatulejaña kukuhwelela netudi?

⁵ Makonu twakundejewaña namazu akwila nawu: “Chakadi nikujina, wakakutiya kuwaha chakatiyayi kwaaba kweyi kwakukeña wukwashu.” (Isa. 30:19) Isaya watulejaña nindi Yehova wukututiyilila nakanañachima neyi tumwaabila nawa wukunyakala kwakula kulomba kwetu kwakulembelela. Isaya wabombelelihu nindi: “Chachitiyayi hohu wakakwakula.” Awa mazu anakutwanukisha nawu Tata yetu nakufwila chikupu kukwasha antu amwaabilaña. Kwiluka chumichi kwatukwashaña kuumika namuzañalu.

6. Mazu aIsaya amwekeshaña ñahi nawu Yehova watiyililaña kukulomba kwakambuñindi wejima?

⁶ Chumanyi chikwawu chinakutudizisha iyi vasi kutalisha hakulomba? Yehova watiyililaña kukulomba kwetu hamuntu-hamuntu. Tunahoshelidi mwenimu? Mazu akutachikilahu aIsaya kapetulu 30, izu dakwila nawu “ayimwekesheli” anadizatishi hakutena antu amavulu muloña Yehova nakuleja antu jindi neyi izanvu. Hela chochu, muvasi 19 izu dakwila nawu “eyi” adizatisha hakutena muntu wumu; iyi nsañu anakuleja muntu-himuntu. Isaya wasonekeli nindi: “Eyi wakadila wanyi”; “chakadi nikujina wakakutiya kuwaha”; “wakakwakula.” Chineli hiTata wukweti kukeña, Yehova walejaña wanyi mwanindi weyala hela wamumbanda wunaneñi nindi, “Watela kwikala wakola neyi manakweyi hela muheleyi.” Ilaña, watwakamenaña hamuntu-hamuntu nawa watiyililaña kukulomba kwetu hamuntu-hamuntu.—Mas. 116:1; Isa. 57:15.

7. Isaya niYesu anamwekeshi ñahi chichalemena kulomba nanyikoyu?

⁷ Neyi tumuleja Nzambi yetu kukala kunakutwakamisha, Yehova wukunyakala kutwakula  kuhitila mukutwinka ñovu yakuumika oku kukala. Nawa neyi kukala kwetu kunakumana swayi wanyi kwesekeja nachitwakuhweleleli, tunateli kumulomba Yehova nakufuntisha-funtishahu kulonda atwinki ñovu yakuumika iku kukala. Dichatulejañayi nindi twileña. Chumichi chamwekenaña mumazu ahosheliyi Isaya nindi: ‘Bayi mumunookesha Yehovaku.’ (Isa. 62:7) Awa mazu anatalishi mudihi? Twatela kutwalekahu kulomba kudi Yehova chakadi kuleka neyi kwiji hitunakumwiteja kunookaku. Mazu aIsaya atwanukishaña yakutalilahu yaYesu yahosha hakulomba yekala haLuka 11:8-10, 13. Muniyi nsona Yesu watukoleshaña kulomba ‘nanyikoyu’ ‘nikutwalekahu kulomba’ spiritu yajila. Tunateli cheñi kumulembelela Yehova kulonda atulomboleña munjila yikutukwashaña kufuukula chiwahi.

8. Mazu ekala haIsaya 30:20, 21 ashikijeweli ñahi kunyima?

⁸ Tañenu Isaya 30:20, 21. Amashidika aweni Babiloni chakuchikiliwu Yerusalema hadi chaaka chimu nachikunku, yihuñu yamweneñawu antu yaswejeli chakwila atachikili kuyimona neyi diyakuda yawu. Ilaña kwesekeja navasi 20 ni 21, Yehova wayikanini aYudeya nindi neyi abalumuka munyichima nawa ahimpa yilwilu yawu, wakenza nakuyamwina. Chamuteneniyi Yehova nindi “Ntañishi [yawu] Wabadika,” Isaya wakanini antu nindi Yehova wakayidizisha chakudifukula kudi Yena munjila yetejayi. Awa mazu ashikijeweli hampinji yayifumishiliwu aYudeya muwunkoli. Yehova wadimwekesheli nindi wadiña Ntañishi yawu Wabadika, nawa chineli wadiña nakuyilombola, antu jindi atwesheli kufuntisha kudifukula kwalala. Makonu twakooleka hakwikala naNtañishi yetu Wabadika, Yehova.

9. Njilanyi mwatulombwelañayi Yehova makonu?

⁹ Munawa mavasi, Isaya wahosha nindi tudi neyi atudizi anakudizishawu kudi Yehova munjila jiyedi. Chatachi, Isaya wahosheli nindi: “Mwakamumona Ntañishi yenu Wabadika namesu enu.” Munichi chakutalilahu, ntañishi anamufwikiji nemani kumbidi yawatudizi indi. Makonu tudi nakukooleka kwakutudizisha kudi yena. Yehova watudizishaña ñahi? Watudizishaña kuhitila mukuloñesha kwindi. Twasakililaña chikupu hawunlomboli wawuwahi wutwatambwilaña mukuloñesha kwaYehova! Nshimbi jitwatambwilaña hakupompa kwetu kwachipompelu, hakupompa kwamaneni, munyikanda yetu, mumabroadcast, kushilahu  ninjila jikwawu jajivulu, jatukwashaña kuumika namuzañalu hampinji yitudi mukukala.

10. Munjilanyi mutwatiyilaña “izu kunyima [yetu]”?

¹⁰ Isaya wasonekeli njila yikwawu yamuchiyedi mwatulombwelañayi Yehova nindi: “Matu enu akatiya izu kunyima.” Ahanu kaprofwetu nakumulumbulula Yehova neyi ntañishi wasoñama wunakulondela munyima yawatudizi indi nakuyinyikila munjila yatela kuyawu nawa nakuyilombola. Makonu twatiyaña izu daNzambi kunyima yetu. Munjilanyi? Mazu aNzambi onenewa ayisonekeli muBayibolu kunyima nankashi henohu etu kanda twikaliku. Dichi neyi tutaña Bayibolu chidi hohu neyi tunakutiya izu daNzambi dinakufumina kunyima yetu.—Isa. 51:4.

11. Hakwila tuumikeña namuzañalu, njilanyi jitwatela kuzatisha, nawa muloñadi?

¹¹ Chumanyi chitwatela kwila hakwila wunlomboli waYehova wutwatambwilaña kuhitila mukuloñesha kwindi niMwizu dindi wutukwashi? Anukenu nenu Isaya washimwini yuma yiyedi. Chatachi, “iyi diyi njila.” Chamuchiyedi, “endenu mwenimu.” (Isa. 30:21) Hitwatela kukumina hohu dakwiluka ‘njilaku.’ Twatela cheñi ‘nikwendamu.’ Kuhitila Mwizu daYehova neyi chadilumbululawu kudi kuloñesha kwindi, twadizaña chakeñañayi Yehova nindi twileña. Twadizaña cheñi chakuzatisha yuma yitunakudiza. Hakwila tutwalekihu kumukalakela Yehova mumudimu wetu namuzañalu, twatela kuzatisha iji njila jejima jiyedi. Dihu dinu hakatukiswilayi Yehova.

12. Kwesekeja naIsaya 30:23-26, Yehova wakiswilili ñahi antu jindi?

¹² Tañenu Isaya 30:23-26. Iwu wuprofwetu washikijeweli ñahi hadi aYudeya afuntili kwituña daIsarela hanyima yakuyifumisha muwunkoli muBabiloni? Ayikiswilili nankashi kumujimba nikuspiritu. Yehova wayikiswilili antu jindi kuhitila mukuyinka yakuda yakumujimba yayikwashileña. Chasweja kulema, Yehova wayinkeli yakuda yakuspiritu yayivulu hafuntishileñawu kudifukula kwalala chovu-chovu. Nkisu jakuspiritu jadiluñishiliwu antu jaNzambi hayina mpinji, jabadikili yuma yejima yadiluñishiliwu kunyima. Neyi chinamwekeshiwu muvasi 26, Yehova wayitoñekeleli chejeji chasweja, dikwila nawu wayikwashili kutiyishisha Izu dindi. (Isa. 60:2) Nkisu jaYehova jakwashili ambuñindi kutwalekahu kumukalakela namuzañalu ninakuhamuka ‘muloña nyichima yawu yazañaleli.’—Isa. 65:14.

13. Wuprofwetu wahosha hakufuntisha kudifukula kwalala wunakushikijewa ñahi makonu?

 ¹³ Komana wuprofwetu wahosha hakufuntisha kudifukula kwalala wunatukundami ninetu makonu? Eña! Munjilanyi? Kufuma mu 1919 C.E., antu amavulu anafumi muwuduñu waBabiloni Muneni, wanta wakaayi wakudifukula kwakutwamba. Anakuyitwala mwiluña dadiwahi dabadika Ituña daChikaninu dawaIsarela. Anakuyitwala muparadisa yakuspiritu. (Isa. 51:3; 66:8) Iyi paradisa yakuspiritu hichumanyi?

14. Paradisa yakuspiritu hichumanyi, nawa anyi ashakamañamu makonu? (Talenu Mwatalisha Idi Izu.)

¹⁴ Kufuma tuhu mu 1919 C.E., awayishewa anakudiluñisha kushakama muparadisa yakuspiritu. b Mukuhita kwampinji, antu akweti kuchiñeja kwakushakama hamaseki, dikwila nawu “anyikoku amakwawu,” niwena atachikili kushakama munidi ituña dakuspiritu nawa Yehova nakuyikiswila chikupu.—Yow. 10:16; Isa. 25:6; 65:13.

15. Paradisa yakuspiritu yekala kudihi?

¹⁵ Ituña dakuspiritu, hela paradisa, yekala kudihi makonu? Akakudifukula aYehova ekala mukaayi kejima. Paradisa yakuspiritu mwashakamañawu niyena yekala mukaayi kejima. Dichi, hichikweti muloña nakutwashakamaña mukaayi makonuku, tunateli kwikala muparadisa yakuspiritu chakala hohu tunakudikita nakukwasha kudifukula kwalala.

16. Tunateli kutwalekahu ñahi kumona kuwaha kwekala muparadisa yakuspiritu?

¹⁶ Hakwila tutwalekihu kwikala muparadisa yakuspiritu, twatela cheñi kutwalekahu kusakilila hakwikala muchipompelu chawakaKristu chamukaayi kejima. Tunateli kwila ñahi mwenimu? Kuhitila mukushinshika hayilwilu yayiwahi yawantu ekalamu, bayi hayiluwa yawuku. (Yow. 17:20, 21) Chumichi chalemenadi? Toñojokenu hachumichi. Twatiyaña kuwaha kumona nyitondu yashiyashana mwisaña, hela mwitempa. Munjila yoyimu, muparadisa yakuspiritu yekala muchipompelu makonu, mwekala antu ashiyashana esekejawu nanyitondu. (Isa. 44:4; 61:3) Twatela kutwalekahu  kutala hakuwaha ‘kwevunda,’ bayi hakutama ‘kwamutondu-himutondu’ wudi kwakwihi nanetuku. Bayi twiteja yiluwa yetu hela yawakwetu adi muchipompelu yitukañeshi kumona kuwaha kwakunuñañana kudi muchipompelu chawakaKristu chamukaayi kejimaku.

17. Chumanyi chitwatela kwila hamuntu-hamuntu kulonda tuleti kunuñañana muchipompelu?

¹⁷ Chumanyi chitwatela kwila hamuntu-hamuntu kulonda tuleti kunuñañana muchipompelu? Kuhitila mukuleta kuwunda. (Mat. 5:9; Rom. 12:18) Mpinji yejima yitwazataña nañovu hakwila tuleti kuwunda nawakwetu muchipompelu, twawahishaña paradisa yakuspiritu. Tweluka netu Yehova wakoka muntu-himuntu wudi muparadisa yakuspiritu kwinza mukudifukula kwalala. (Yow. 6:44) Fwikijenu muzañalu wukutiyayi Yehova hakumona tunakuzata nañovu kulonda tuleti kuwunda nikunuñañana hakachi kawantu amonañayi nindi alema, dikwila nawu ambuñindi!—Isa. 26:3; Hag. 2:7.

18. Yumanyi yitwatela kutoñojokañahu kakavulu, nawa muloñadi?

¹⁸ Tunateli kudiluñisha ñahi chikupu nkisu jitwatambwilaña hamu neyi ambuña aNzambi? Hikutoñojoka chikupu hayuma yitwadizaña Mwizu daNzambi nimunyikanda yetu yashindamena haBayibolu. Kudiza muniyi njila nikutoñojokahu, kukutukwasha kwikala nayilwilu yawakaKristu yikutuletesha ‘kukeña anakwetu’ “[nikudikeña] chikupu wumu namukwawu” muchipompelu. (Rom. 12:10) Twakoleshaña wubwambu wetu naYehova neyi tutoñojokaña hayuma yayiwahi yinakutwililayi chayinu mpinji. Nawa neyi tutoñojokaña hayuma yayiwahi yikatwililayi Yehova kumbidi, chikutukwasha kutwalekahu kumukalakela haya nyaaka. Yuma yejimiyi yikutukwasha kumukalakela Yehova namuzañalu chayinu mpinji.

19. (a) Kwesekeja naIsaya 30:18, chumanyi chitwatela kukuhwelela? (b) Yumanyi yikutukwasha kuumika namuzañalu?

¹⁹ Yehova “wakemana” nakutwamwina hampinji yakakisañanañayi kanu kaayi katama. (Isa. 30:18) Tuneluki chikupu netu Yehova, “Nzambi wawuñanji,” haketeja kaayi kaSatana kutwalekahu hampinji yayilehiku. (Isa. 25:9) Twamutalilaña Yehova nakudiwunjika kulonda odu ifuku dawamwinu dakashiki. Chayinu mpinji, tunakufwila kutwalekahu kulemesha chawaana chakulomba, kudiza Izu daNzambi nikuzatisha yuma yitunakudiza, kushilahu nikutoñojoka hankisu jitukweti nijitwakatambwila kumbidi. Chitukwilaña mwenimu, Yehova wukutukwashaña kuumika namuzañalu hampinji yitunakudifukula kudi yena.