CHIBAABA CHAKUDIZA 45
Yehova Chatukwashañayi Kuzata Mudimu Wetu waKushimwina
“Akeluka chikupu nawu kaprofwetu wadiña mukachi kawu.”—EZEK. 2:5.
KAMINA 67 “Shimwinaku Mazu”
NSAÑU YIDI MUCHIBAABA a
1. Twatela kukuhwelela kumona chumanyi, nawa twatela kukuhwelela netudi?
TWATELA kukuhwelela netu tukumonaña ikañesha hampinji yitunakuzata mudimu wetu wakushimwina. Idi ikañesha dinateli kuswejelaku kumbidi. (Dan. 11:44; 2 Tim. 3:12; Chim. 16:21) Ilaña twatela kukuhwelela netu Yehova wukutukwashaña. Tunahoshelidi mwenimu? Yehova natwalekihu kukwasha ambuñindi kuzata nyidimu yayinkañayi, hela chakwila yakola chamuchidinyi. Chakutalilahu, tuhanjekenu hayuma yamwekeni muchihandilu chakaprofwetu Ezekeli, washimwinineña kudi aYudeya ankoli adiña muBabiloni.
2. Yehova washimwini nindi antu adiña mwiluña mwashimwinineñayi Ezekeli adiña ñahi, nawa yumanyi yitukuhanjeka muchinu chibaaba? (Ezekeli 2:3-6)
2 Antu adiña mwiluña mwashimwinineñayi Ezekeli adiña nayilwilu yamuchidinyi? Yehova wayiteneni nindi hiyantu “akola nyichima” nawa “adikaña.” Adiña afwana neyi nyiña nawa neyi tunjimbu. Dichaletesheli Yehova atwalekihu kumuleja Ezekeli nindi: “Bayi wutiya womaku”! (Tañenu Ezekeli 2:3-6.) Ezekeli watwesheli kuzata mudimu windi wakushimwina muloña (1) amutemesheli kudi Yehova, (2) amwinkeleña ñovu kudi spiritu yaNzambi, nawa (3) mazu aNzambi akolesheli chikuhwelelu chindi. Iyi yuma yisatu yamukwashili ñahi Ezekeli? Nawa yatukwashaña ñahi makonu?
EZEKELI AMUTEMESHELI KUDI YEHOVA
3. Mazwinyi atela amukolesheli Ezekeli, nawa Yehova wamwekesheli ñahi nindi wukumukwashaña?
3 Yehova wamulejeli Ezekeli nindi: “Innakukutemesha.” (Ezek. 2:3, 4) Awa mazu atela amukolesheli Ezekeli. Muloñadi? Chakadi nikujina, wanukili nindi Yehova wazatishili mazu wowamu hampinji yayitondeliyi aMosi naIsaya kwikala atuprofwetu twindi. (Kwid. 3:10; Isa. 6:8) Ezekeli welukili cheñi Yehova chakwashiliyi awa atuprofwetu ayedi kuumika kukala kwamweneñawu. Dichi Yehova chamulejeliyi Ezekeli kayedi nindi: “Innakukutemesha,” iwu kaprofwetu wakuhweleleli chikupu nindi Yehova wukumukwashaña. Kubombelahu, mumukanda waEzekeli, twawanañamu awa mazu afuntisha-funtishawu kakavulu nawu: “Izu daYehova denjili kudi ami.” (Ezek. 3:16) Nawa wasonekeli nakufuntisha-funtishahu nindi “Izu daYehova denjili cheñi kudi ami.” (Ezek. 6:1) Mwamweni, Ezekeli welukili chikupu nindi anamutemeshi kudi Yehova. Kubombelahu, chineli wadiña mwana kakapristu, hadaha amulejeleña kudi tata yindi hadi Yehova chayikanineñayi atuprofwetu twindi kunyima nindi wukuyikwashaña. Yehova wamulejeli Isaka, Yakoba niYeremiya nindi: “Ami nidi naneyi.”—Kutach. 26:24; 28:15; Yere. 1:8.
4. Mazwinyi akukundeja atela amukolesheli Ezekeli?
4 AIsarela amavulu elileña ñahi hayishimwinineñawu kudi Ezekeli? Yehova wahosheli nindi: “Amwitala daIsarela akukaana kukutiyilila, muloña anakukeña kuntiyilila wanyi.” (Ezek. 3:7) Antu chamukaanineñawu Ezekeli, dikwila nawu amukaanineña Yehova. Awa mazu amukwashili Ezekeli kwiluka nindi antu chakaanineñawu kumutiyilila hichatalishili mukwila nawu nakañanyi kuzata mudimu windi wawuprofwetuku. Yehova wamukolesheli cheñi Ezekeli nindi neyi mazu awunsompeshi ashimwinineñayi ashikijewa, antu “akeluka . . . nawu kaprofwetu wadiña mukachi kawu.” (Ezek. 2:5; 33:33) Chakadi nikujina, awa mazu amwinkeli Ezekeli ñovu yakeñekeleña hakwila azati mudimu windi wakushimwina.
YEHOVA WATUTEMESHAÑA MAKONU
Antu anateli kukaana kututiyilila nawa anateli kutukañesha neyi cheliliwu naEzekeli, ilaña tweluka netu Yehova wudi nanetu (Talenu maparagilafu 5-6)
5. Kwesekeja naIsaya 44:8, hinyi watwinkaña ñovu?
5 Ninetu twekalaña nañovu neyi twiluka netu atutemeshaña kudi Yehova. Watulemesha kuhitila mukututena nindi “ayinsahu” jindi. (Isa. 43:10) Kwenoku kukooleka kutukweti! Neyi chamulejeliwu Ezekeli kudi Yehova nindi: “Bayi wutiya womaku,” Yehova watulejaña ninetu nindi: “Bayi mufwa mutentuku.” Muloñadi chitwatela kubulila kutiya woma antu atudimbululaña? Neyi chichadiña naEzekeli, ninetu atutemeshaña kudi Yehova nawa watukwashaña.—Tañenu Isaya 44:8.
6. (a) Yehova watushiika nindi wukutukwashaña ñahi? (b) Chumanyi chatukundejaña nikutukolesha?
6 Yehova watuleja nindi wukutukwashaña. Chakutalilahu, henohu Yehova kanda ahoshi nindi: “Yenu ayinsahu jami,” wahosheli nindi: “Chiwakahitaña mumenji, nakekala naneyi, nawa chiwakahitaña mutuloña, hiwakajiminaku. Nawa chiwakahitaña mukesi, hiwakahaku, hela muzuzu hiwakakubabaku.” (Isa. 43:2) Hampinji yitwayaña nakushimwina, mpinji jikwawu twamonaña ikañesha didi neyi dibaji nikweseka kudi neyi kesi. Hela chochu, nawukwashu waYehova twatwalekañahu kushimwina. (Isa. 41:13) Neyi chichadiña mumafuku aEzekeli, antu amavulu makonu akaanaña nsañu yitwashimwinaña. Tweluka netu neyi akaana kututiyilila, hichinatalishi mukwila nawu tunakañanyi kwikala aYinsahu jaNzambiku. Twakundejewaña nikukoleshewa muloña tweluka netu Yehova watiyaña kuwaha neyi tutwalekahu kushimwina nsañu yindi nakashinshi. Kapostolu Pawulu wahosheli nindi: “Muntu-himuntu wakatambwila wufwetu windi kwesekeja namudimu windi.” (1 Kor. 3:8; 4:1, 2) Muhela wumu wunazati wupayiniya hadi yaaka yayivulu wahosheli nindi: “Natiyaña kuwaha hakwiluka nami Yehova watukiswilaña chitwazataña kwesekeja nahanakumini ñovu jetu.”
EZEKELI AMWINKELEÑA ÑOVU KUDI SPIRITU YANZAMBI
Ezekeli namoni chimwenu chekalu daYehova didi mwiwulu, chinamukwashi kukuhwelela chikupu nindi Yehova wukumukwashaña kuzata mudimu windi wakushimwina (Talenu paragilafu 7)
7. Mpinji yejima yatoñojokeleñayi Ezekeli hachimwenu chamweniyi, chatela chamukwashileña kwila ñahi? (Talenu mwevulu wudi hakava.)
7 Ezekeli wamweni ñovu yikweti spiritu yaNzambi. Muchimwenu, wamweni spiritu yajila chiyazatikileña hayileñaleña yakuspiritu yañovu nihatufumbu tweneni twekalu dadiña mwiwulu. (Ezek. 1:20, 21) Ezekeli welili ñahi? Wasonekeli yuma yamwekeni. “Chinachimweni, nadibukili chamesu heseki.” Ezekeli chatiyiliyi woma, wadinatili heseki. (Ezek. 1:28) Nkumininaku, mpinji yejima Ezekeli yatoñojokeleñayi hachina chimwenu chakuhayamisha, chamukwashileña kukuhwelela chikupu nindi nawukwashu waspiritu yaNzambi wukutwesha kuzata mudimu wakushimwina wamwinkeliwu.
8-9. (a) Lushimbi lwaYehova lwamwinkeli Ezekeli chumanyi? (b) Yehova wamukolesheli ñahi cheñi Ezekeli kushimwina mwiluña mwadiña antu achinchika?
8 Yehova wamulejeli Ezekeli nindi: “Eyi mwana kamuntu, nyamukaku kulonda nihoshi neyi.” Ilu lushimbi kushikuhu nispiritu yaNzambi yamukwashili kunyamuka heseki. Ezekeli wasonekeli nindi: “Spiritu yenjili mudi ami nawa yankwashili kunyamuka.” (Ezek. 2:1, 2) Mukuhita kwampinji nawa mumudimu windi wakushimwina wejima, Ezekeli amulombweleña kudi “chikasa” chaNzambi, dikwila nawu, spiritu yajila yaNzambi. (Ezek. 3:22; 8:1; 33:22; 37:1; 40:1) Spiritu yajila yamwinkeli Ezekeli ñovu yakuzata mudimu watambwililiyi, mudimu wakushimwina antu “achinchika nawa adikaña” adiña mwiluña mwashimwinineñayi. (Ezek. 3:7) Yehova wamulejeli Ezekeli nindi: “Nakoleshi kumesu eyi neyi chakola kumesu awu nawa nakoleshi ihama deyi neyi chakola mahama awu. Nakoleshi ihama deyi neyi dayimani, nadikoleshi nankashi kubadika ilola dakola. Bayi wuyitiya woma hela kuchiina chamwekanañawu kumesuku.” (Ezek. 3:8, 9) Munjila yikwawu, Yehova wamulejeleña Ezekeli nindi: ‘Bayi witeja antu achinchika akuzeyeshiku. Nukukukolesha.’
9 Nkumininaku, spiritu yaNzambi yamutwalili Ezekeli mwiluña mwashimwinineñayi. Ezekeli wasonekeli nindi: “Ñovu yaYehova yinakuzatika chikupu mudi ami.” Mwahitili mulungu wumu hakwila iwu kaprofwetu atiyishishi iyi nsañu yayileña nakushimwinayi nikuyikuhwelela. (Ezek. 3:14, 15) Kuhiñahu Yehova wamutwalili kuchana chachinekineki “kweñilili spiritu mudi [yena].” (Ezek. 3:23, 24) Haniyi mpinji, Ezekeli wadiloñesheli kutachika mudimu windi wakushimwina.
SPIRITU YANZAMBI YATWINKAÑA ÑOVU MAKONU
Yumanyi yatukwashaña kuzata mudimu wetu wakushimwina makonu neyi chichadiña kudi Ezekeli? (Talenu paragilafu 10)
10. Wukwashinyi wakeñekaña hakwila tuzati chiwahi mudimu wetu wakushimwina, nawa muloñadi?
10 Wukwashinyi wakeñekaña hakwila tuzati chiwahi mudimu wetu wakushimwina? Hakwila twakuli ilu lwihu, toñojokenu hachamumwekeneni Ezekeli. Henohu kanda atachi mudimu windi wakushimwina, spiritu yaNzambi yamwinkeli ñovu yakeñeleñayi. Nimakonu, neyi chichadiña kudi Ezekeli, tunateli hohu kuzata chiwahi mudimu wetu wakushimwina nawukwashu waspiritu yaNzambi. Muloñadi? Muloña Satana wazuñaña njita nanetu kulonda akañeshi mudimu wetu wakushimwina. (Chim. 12:17) Kwesekeja nachamonañawu antu, atumonaña neyi hitukutwesha kumushinda Satanaku. Ilaña kuhitila mumudimu wetu wakushimwina, tunakumushinda! (Chim. 12:9-11) Twamushindaña ñahi? Neyi tuya nakushimwina, twamwekeshaña netu twamutiyaña Satana woma wanyi. Mpinji yejima yitwashimwinaña, twamushindaña Satana. Dichi, tukukunkulula netudi chineli twatweshaña kuzata mudimu wetu wakushimwina hela chakwila atukañeshaña? Tukukunkulula netu spiritu yajila diyi yatwinkaña ñovu nawa Yehova watutiyaña kuwaha.—Mat. 5:10-12; 1 Pet. 4:14.
11. Spiritu yaNzambi yinateli kutukwasha ñahi, nawa tunateli kwila ñahi hakwila tutwalekihu kuyitambwila?
11 Yumanyi yikwawu yitukudizilaku hakwiluka netu Yehova wakolesheli kumesu aEzekeli niihama dindi muchifwikija? Spiritu yaNzambi yinateli kutukwasha kushinda kukala kwejima kutunateli kumona mumudimu wakushimwina. (2 Kor. 4:7-9) Hanu dinu, chumanyi chitwatela kwila hakwila tutambwileña spiritu yaNzambi? Twatela kutwalekahu kulomba spiritu yajila, nakukuhwelela chikupu netu Yehova wukutiya kulomba kwetu. Yesu wayilejeli atumbanji twindi nindi: “Lombenuña, . . . keñakeñenuña, . . . dondomwenenuña.” Nkumininaku, Yehova “[wakayinka] antu amulombaña spiritu yajila.”—Luka 11:9, 13; Yilw. 1:14; 2:4.
MAZU ANZAMBI AKOLESHELI CHIKUHWELELU CHAEZEKELI
12. Kwesekeja naEzekeli 2:9–3:3, iwu muvuñilu wafumini kudihi, nawa mwadiña nsañwinyi?
12 Bayi neyi Ezekeli amukolesheli hohu kudi spiritu yaNzambiku, ilaña nimazu aNzambi akolesheli chikuhwelelu chindi. Muchimwenu, Ezekeli wamweni chikasa chinakwati muvuñilu. (Tañenu Ezekeli 2:9–3:3.) Iwu muvuñilu wafumini kudihi? Mwadiña nsañwinyi? Wakolesheli ñahi chikuhwelelu chaEzekeli? Tutalenu ntahi. Iwu muvuñilu wafumini kwitanda daNzambi. Hadaha, Yehova wazatishili kañelu wumu hadi añelu awana amweniyi Ezekeli hakusambila kumwinka iwu muvuñilu. (Ezek. 1:8; 10:7, 20) Muniwu muvuñilu mwadiña mazu aNzambi, nsañu yawunsompeshi wasweja yayileñayi Ezekeli nakuleja ankoli adikañili. (Ezek. 2:7) Iyi nsañu ayisonekeli mutubadi twejima tuyedi twamuvuñilu.
13. Yehova wamulejeli Ezekeli kwiladi namuvuñilu, nawa chumanyi chaletesheli wutowali?
13 Yehova walejeli kaprofwetu kindi nindi adii muvuñilu nawa ‘wumwikutishi.’ Ezekeli wovwahilili nakuda muvuñilu wejima. Ichi chimwenu chatalishili mudihi? Ezekeli wateleleli kutiyisha chikupu nsañu yayileña nakushimwinayi. Wateleleli kuyikuhwelela kulonda yimusañumuni kushimwina. Kuhiñahu kwamwekeni chuma chakuhayamisha. Ezekeli wenjili nakwiluka nindi ona muvuñilu “watoweli neyi wuchi.” (Ezek. 3:3) Muloñadi? Muloña Ezekeli, wamweneña kumwimenaku Yehova neyi hichuma chatowala hela chachiwahi. (Mas. 19:8-11) Watiyili kuwaha hakwiluka nindi Yehova namwiteji kwikala kaprofwetu kindi.
14. Yumanyi yamukwashili Ezekeli kwiteja mudimu wamwinkeliwu?
14 Nkumininaku, Yehova wamulejeli Ezekeli nindi: “Shakuku muchima nawa tiyililaku mazu ami ejima innakukuleja.” (Ezek. 3:10) Kuhitila mukumuleja awa mazu, Yehova wamulejeli Ezekeli kwanukaña awa mazu asonekeliwu mumuvuñilu nikutoñojokañahu chikupu. Kwila mwenimu kwakolesheli chikuhwelelu chaEzekeli. Kwamukwashili cheñi kwiluka nsañu yalema yayileña nakulejayi antu. (Ezek. 3:11) Namazu aNzambi adiña mumuchima windi nikunyivumbu yindi, Ezekeli wetejeli mudimu wamwinkeliwu nawa wawuzatili.—Esekejenu Isamu 19:14.
MAZU ANZAMBI AKOLESHAÑA CHIKUHWELELU CHETU MAKONU
15. Hakwila tutwalekihu kushimwina, yumanyi yitwatela ‘kushaku muchima’?
15 Hakwila tutwalekihu mumudimu wetu wakushimwina, ninetu twatela kutwalekahu kwiteja mazu aNzambi kukolesha chikuhwelelu chetu. Twatela ‘kusha muchima’ kuyuma yejima yatulejañayi Yehova. Yehova wahoshaña nanetu makonu kuhitila Mwizu dindi dasonekewa, Bayibolu. Tunateli kwiteja ñahi Izu daNzambi kutwalekahu kuhimpa yitoñojoka yetu, chitwatiyaña niyuma yatusañumunaña?
16. Twatela kwiladi Nezu daNzambi, nawa tunateli kuditiyishisha ñahi?
16 Neyi chochitwekalaña nañovu neyi tuda yakuda nawa yizatika chiwahi mumujimba, munjila yoyimu chikuhwelelu chetu chakolelañaku neyi tudizaña Izu daNzambi nikutoñojokahu chikupu. Ichi dichikuma chitwadizilaña kunsañu yamuvuñilu. Kutalisha Hezu daNzambi, Yehova wakeñaña nindi ‘ditwikutishi,’ dikwila nawu, kuditiyishisha. Tunateli kwila mwenimu kuhitila mukulomba, kutaña nikutoñojokahu chikupu. Chatachi, twalombaña kulonda tuloñeshi muchima wetu witeji yuma yinakutulejayi Nzambi. Kuhiñahu, twatañaña nsañu yamuBayibolu. Nkumininaku, twahudikilaña nakutoñojokahu, dikwila nawu kutoñojoka chikupu hansañu yitunatañi. Yumanyi yikufumamu? Neyi tutoñojokañahu chikupu, muchima wetu wachifwikija wukutiyishisha Izu daNzambi.
17. Kutoñojoka chikupu hansañu yitunatañi muBayibolu kwalemenadi?
17 Kutaña Bayibolu nikutoñojokahu chikupu kwalemenadi? Kwila mwenimu kwatwinkaña ñovu yakeñekaña hakwila tushimwini nsañu yaWanta makonu nikushimuna nsañu yakala yawunsompeshi yitukushimwina katataka kumbidi. Cheñi, neyi tutoñojokaña hayilwilu yayiwahi yaYehova, wubwambu wetu nayena wukukolelañaku chikupu. Chikufumamu, tukudiluñishaña yuma yatowala chikupu, hela yasweja kuwaha, dikwila nawu kuwunda kwamuyitoñojoka nikuzañalala nayuma yitukweti.—Mas. 119:103.
YUMA YATUKWASHAÑA KUTWALEKAHU KUSHIMWINA
18. Antu amwiluña mutwashimwinaña akeluka nawudi, nawa muloñadi?
18 Hiyatonena kulonda tuprofweteña kudi antu neyi chelileñayi Ezekeliku. Hela chochu, tunakufwila kutwalekahu kushimwina nsañu yonenawu yatwinkayi Yehova Mwizu dindi dasonekewa, sampu mudimu wakushimwina wunamani kwesekeja nachakeñañayi. Neyi mpinji yawunsompeshi yinashiki, antu amwiluña mutwashimwinaña akahosha wanyi nawu hitwayisoñamishili hela nawu Nzambi wayidiwiliku. (Ezek. 3:19; 18:23) Ilaña, akeluka nawu nsañu yitwashimwinineña yafumini kudi Nzambi.
19. Yumanyi yikutwinkaña ñovu yakutwalekahu kuzata mudimu wetu wakushimwina?
19 Yumanyi yikutwinkaña ñovu yakutwalekahu kuzata mudimu wetu wakushimwina? Yoyuma yisatu yamwinkeleña Ezekeli ñovu. Twatwalekañahu kushimwina muloña tweluka netu atutemeshaña kudi Yehova, spiritu yajila yaNzambi yatwinkaña ñovu nawa Izu daNzambi dakoleshaña chikuhwelelu chetu. Nawukwashu waYehova, tukutwalekahu kuzata mudimu wetu wakushimwina nakuumika “kushika nikunsa.”—Mat. 24:13.
KAMINA 65 Twalekenuñahu!
a Muchinu chibaaba, tukuhanjeka yuma yisatu yamukwashili kaprofwetu Ezekeli kuzata mudimu windi wakushimwina. Chitukuhanjekaña hachamukwashiliyi Yehova kaprofwetu kindi, tukukuhwelela chikupu netu Yehova wukutukwasha kuzata mudimu wetu wakushimwina.