1. Kaprofwetu Isaya wayilejeli akwawu aIsarela nsañwinyi?

 KAPROFWETU Isaya wamulumbulwili Yehova nindi “Nzambi wachalala.” Izu dabalumunawu nawu “chalala” muchiHeberu daya mukwila nawu “ameni.” (Isa. 65:​16, tth.) “Ameni” yatalisha mukwila nawu “chiikali mwomwenomu,” hela “dimwomwenomu.” Neyi izu dakwila nawu “ameni” anadizatishi muBayibolu kutalisha hadi Yehova hela Yesu, chinakumwekesha hatooka nawu oyu nsañu yalala. Dichi, nsañu yayilejeliyi Isaya akwawu aIsarela yadiña yalala, yakwila nawu: Yuma yejima yashimwinañayi chadimu Yehova mpinji yejima yashikijewaña. Yehova wamwekeshaña hatooka nindi chumichi chalala kuhitila mukushikija yikaninu yindi yejima yakanañayi.

2. Muloñadi wutwatela kukuhwelela netu yuma yatukanayi Yehova yakumbidi yakashikijewa, nawa malwihwinyi itukuhanjekahu?

² Komana ninetu twatela kukuhwelela netu yuma yatukanayi Yehova yakumbidi yakashikijewa? Chimwahitili yaaka kwakwihi na 800 kufuma hampinji yadiñaku Isaya, kapostolu Pawulu walumbulwili muloña waweni wutwatela kukuhwelela netu yikaninu yaNzambi mpinji yejima yashikijewaña. Pawulu washimwini nindi: “Nzambi hanateli kutwambaku.” (Heb. 6:18) Neyi kaseloki kamenji chikanateli kubula kwidisha menji amawahi hampinji yoyimu nimenji amuñwa, munjila yoyimu, Yehova, Nsulu yachalala hanateli kuhosha makudiku. Dichikuletesha tukuhweleli chikupu  yuma yejima yahoshañayi Yehova, kushilahu niyuma yejima yatukanayi yakatwililayi kumbidi. Muchinu chibaaba tukuhanjeka hanawa malwihu: Chumanyi chatukanayi Yehova nindi wakatwilila kumbidi? Nawa yumanyi yahoshayi Yehova yatukwashaña kukuhwelela netu mwamweni wakashikija ichi chikaninu chindi?

3. (a) Chikaninwinyi chakeñawu nankashi ambuña aNzambi? (Chimwekeshu 21:​3, 4) (b) Amakwawu ahoshaña nawudi neyi tuhanjeka nawu hanichi chikaninu?

³ Chikaninu chitukuhanjekahu achikeña nankashi kudi ambuña aNzambi mukaayi kejima. (Tañenu Chimwekeshu 21:​3, 4.) Yehova watushiika mpinji yakela “[kufwa] hikwakekalaku cheñiku, hikwakekala cheñi kudishona, kudila hela kuyeñaku.” Hampinji yitunakushimwina antu, etu amavulu twazatishaña iyi nsañu yamuBayibolu yakukundeja yahosha hachakekala chihandilu muParadisa. Antu amakwawu ahoshaña nawudi neyi tuhanjeka nawu hanichi chikaninu? Hadaha anateli kuhosha nawu, “Iyi nsañu yayiwahi ilaña nakuhweleli wanyi nami yakashikijewa.”

4. (a) Chumanyi chelukiliyi Yehova nawa chamweneñahu dehi nindi chakamwekana? (b) Kubombela hachikaninu chakaniniyi, chumanyi chikwawu cheliliyi Yehova?

⁴ Hela chochu, chamwoneneniyi kapostolu Yowanu kusoneka ichi chikaninu chahosha hachakekala chihandilu muParadisa, Yehova welukili nindi etu adiku makonu twakalejañaku antu iyi yuma yitwachiñejaña hampinji yitunakushimwina nsañu yaWanta. Yehova cheñi wamweneñahu dehi nindi antu amavulu chakayikalila kukuhwelela munichi chikaninu chahosha ‘hayuma yayiha.’ (Isa. 42:9; 60:2; 2 Kor. 4:​3, 4) Hanu dinu tunateli kuyikwasha ñahi akwetu, kushilahu ninetu aweni, kukuhwelela netu yuma yayiwahi yashimunawu haChimwekeshu 21:​3, 4 yakashikijewa? Yehova hakuminini hohu dakukana ichi chikaninu chakukundejaku, ilaña washimwini niyuma yaleteshaña tukuhweleli munichi chikaninu. Yumanyi yashimwiniyi?

5. Yumanyi yatuleteshaña tukuhweleleña muchikaninu chaNzambi chahosha haParadisa, nawa kudihi kutwayiwanaña?

⁵ Mumavasi analondelihu twawanañamu yuma yaleteshaña tukuhweleleña muchikaninu chaYehova chahosha haParadisa. Twatañañamu netu: “Owu washakamini hetanda wahosheli nindi: ‘Talaña! Inakubalumuna yuma yejima yiikali yayiha.’ Cheñi wahosheli nindi: ‘Sonekaku, muloña awa mazu atelela kuyikuhwelela nawa alala.’ Nawa wanlejeli nindi: ‘Anashikijewi dehi! Yami Alefwa nawa Omega, yami kutachika nawa yami insa.’”—Chim. 21:​5, 6a.

6. Muloñadi nsañu yasonekawu haChimwekeshu 21:​5, 6 chiyatukwashilaña kukuhwelela chikupu muchikaninu chaNzambi?

⁶ Muloñadi iyi nsañu yamuBayibolu chiyatukwashilaña kukuhwelela chikupu muchikaninu chaNzambi? “Munawa mavasi, chidi hohu neyi Yehova nakufwachika chipapilu chikutukwasha kukuhwelela chikupu netu mwamweni wakashikija chikaninu chindi.” Ichi chikaninu chaNzambi achisoneka haChimwekeshu 21:​3, 4. Ilaña muvasi 5 ni 6, chidi hohu neyi Yehova wafwachikamu, nakutukwasha kukuhwelela netu yuma yejima yakanayi mwamweni yakashikijewa. Ichi dinu tushinshikenu hamazu azatishayi Yehova atukwashaña kukuhwelela netu wakashikija mwakanayi.

7. Vasi 5 yatachika namazu akwila nawudi, nawa awa mazu alemenadi?

⁷ Vasi 5 yatachika nanawa mazu akwila nawu: “Owu washakamini hetanda wahosheli nindi.” (Chim. 21:5a) Awa mazu ekala hakachi kanyikuku yamazu yisatu mumukanda waChimwekeshu amwekeshaña Yehova nakuhosha yomweni muchimwenu. Dichi ichi chikaninu hiyachikana kudi kañelu wañovu indi kwiji kudi Yesu asañwiliwuku, ilaña kudi Yehova yomweni! Iwu wunsahu wunakumwekesha hatooka nawu awa mazu analondelihu alala. Tunahoshelidi mwenimu? Muloña Yehova ‘watwambaña wanyi.’ (Tit. 1:2)  Mazu itwatañaña haChimwekeshu 21:​5, 6 mwamweni akashikijewa.

8. Yehova wahosha nindidi hakwila akonkomweni nindi chuma chakanayi mwamweni chakashikijewa? (Isaya 46:10)

⁸ Ichi dinu tuhanjekenu hezu dakwila nawu “Talaña!” (Chim. 21:5) Izu dachiGiriki dabalumunawu nawu “talaña!” adizatisha kakavulu mumukanda waChimwekeshu. Mukanda wumu wahosha nawu aka kahayamisha akizatisha “kulonda kamukokoleña ntañi kusha muchima hansañu yinakutañayi.” Kuhiñahu Nzambi wahosheli nindidi? Wahosheli nindi: “Inakubalumuna yuma yejima yiikali yayiha.” Mwamweni, Yehova nakuhosha hayuma yakabalumunayi kumbidi, ilaña muloña wakwila nakuhweleli chikupu nindi wakashikija ichi chikaninu, nakuhosha neyi kwiji watachika dehi kubalumuna iyi yuma.—Tañenu Isaya 46:10.

9. (a) Mukuku wamazu wakwila nawu “[kubalumuna] yuma yejima yiikali yayiha” watalisha kuyumanyi yiyedi yakelayi Yehova? (b) Chumanyi chakamwekena “iwulu” ‘niiseki’ jidiku makonu?

⁹ Tuhanjekenu hamukuku wamazu wunalondelihu wekala haChimwekeshu 21:5 wakwila nawu: “[Kubalumuna] yuma yejima yiikali yayiha.” Munaka kapetulu kamuBayibolu, iwu mukuku wamazu watalisha kuyuma yiyedi yelañayi Yehova—kusinsishahu nikuwahisha. Chatachi, chumanyi chakasinsishayi Yehova? HaChimwekeshu 21:​1, twatañañahu nawu: “Iwulu dadikulu niiseki dadikulu jinahiti dehi.” “Iwulu dadikulu” demenañaku nfulumendi jayuulañawu kudi Satana niandemoni jindi. (Mat. 4:​8, 9; 1 Yow. 5:19) Neyi chadizatishawu muBayibolu, izu dakwila nawu “iseki” demenañaku antu ashakamaña hamaseki. (1 Kushi. 16:31; Isa. 1:2) Dichi, “Iseki dadikulu” demenañaku antu atama adiku makonu. Yehova hakakumina hohu dakutuñulula hela kuwahisha “iwulu” ‘niiseki’ jidiku makonuku; ilaña wakajijilumuna jejima nakusinsishahu jacheñi. Iwulu niiseki jidiku makonu wakajisinsisha “[newulu] dadiha niiseki dadiha”—dikwila nawu, nfulumendi yayiha niantu aloña.

10. Yumanyi yakabalumunayi Yehova kwikala yayiha?

¹⁰ HaChimwekeshu 21:​5, twatañañahu cheñi mazu ahosheliyi Yehova kutalisha hayuma yakabalumunayi kwikala yayiha. Ilukenu nenu Yehova wahosheli wanyi nindi, “Inakutuña yuma yejima yiikali yayiha.” Ilaña, wahosheli nindi: “Inakubalumuna yuma yejima yiikali yayiha.” Yehova wakabalumuna iseki niantu kwikala neyi yuma yayiha kuhitila mukuyilisha kwikala awanina. Neyi chashimwineñahu dehi Isaya, iseki dejima akadibalumuna nakwikala dalubanji neyi chadiña itempa daEdeni. Ninetu akatubalumuna nakwikala amaha, hela kutuwahisha hamuntu-hamuntu. Akakubalakata, amputamesu nianjika matu akayuuka, nawa antu afwa dehi akayisañula.—Isa. 25:8; 35:​1-7.

11. Lushimbinyi lwamwinkeliwu Yowanu kudi Yehova, nawa wamulejeli nindi chumanyi chaletesheli?

¹¹ Chumanyi chikwawu chashimunayi Nzambi chinateli kutukwasha kumukuhwelela? Yehova wamulejeli Yowanu nindi: “Sonekaku, muloña awa mazu atelela kuyikuhwelela nawa alala.” (Chim. 21:5) Yehova wahanini hohu wanyi lushimbi lwakwila nawu “sonekaku.” Ilaña washimwini nichuma chaletesheli. Wahosheli nindi: “Muloña awa mazu atelela kuyikuhwelela nawa alala”—dikwila nawu, mazu aNzambi ashindamenewa nawa oloka. Twasakililaña chovwahililiyi Yowanu lushimbi lwakwila nawu “sonekaku.” Chafumamu, twatañaña hachikaninu chaNzambi chahosha haParadisa nikutoñojoka chikupu hayuma yayiwahi yitwakadiluñisha kumbidi.

12. Muloñadi chitukuhoshela netu Yehova nateleli kuhosha awa mazu nindi: “Anashikijewi dehi!”

¹² Nzambi wahosheli cheñi nindidi? Nindi: “Anashikijewi dehi!” (Chim. 21:6) Aha Yehova nakuhosha neyi kwiji yuma yejima yakanayi kutalisha  haParadisa yinashikijewi dehi. Nawa nateleli kuhosha mwenimu muloña kwosi chuma hela chimu chinateli kumukañesha kushikija nkeñelu yindiku. Yehova watuleja chuma chikwawu chalema chatukwashaña kukuhwelela netu chikaninu chindi chakashikijewa. Chumanyi chenochu?

13. Muloñadi Yehova chahosheleliyi nindi : “Yami Alefwa nawa Omega”?

¹³ Neyi chitwashimuna hakusambila, Yehova wahosheli yomweni naYowanu kapampa kasatu muchimwenu. (Chim. 1:8; 21:​5, 6; 22:13) Hanaka kapampa kejima kasatu, Yehova wahosheli mazu wowamu nindi: “Yami Alefwa nawa Omega.” Nsona yaalefwa diyi nsona yakutachikilaku mundonda yamazu achiGiriki, nawa nsona yaomega diyi nsona yakukumishaku muniyi ndonda. Kuhitila mukuzatisha mazu akwila nawu “Alefwa nawa Omega,” Yehova nakumwekesha nindi neyi atachika chuma, wachizataña sampu nachimanishi.

14. (a) Shimunenu chuma chamwekeni chikuletesha tuhoshi netu, chidi hohu neyi Yehova wahosheli nindi “Alefwa” nichikuletesha tuhoshi netu, chidi hohu neyi Yehova wakahosha nindi “Omega.” (b) Mazu ekala haKutachika 2:​1-3 atukwashaña kukuhwelela netudi?

¹⁴ Chelili Yehova naleñi dehi aAdama naEva, wamwekesheli chuma chafuukwiliyi hakusambila kutalisha hadi antu niiseki. Bayibolu yahosha nawu: “Nzambi wayikiswilili, nawa Nzambi wayilejeli nindi: ‘Semununenuña kulonda muvuli, mwinzeshi iseki nawa mudiidimeña.’” (Kutach. 1:28) Hayina mpinji, chidi hohu neyi Yehova wahosheli nindi, “Alefwa.” Washimwini hatooka nkeñelu yindi: Mpinji yakenza hakela anyana kaAdama naEva awanina nawa ovwahila, akenzeshi iseki nikudibalumuna kwikala paradisa. Hayina mpinji yakumbidi, chidi hohu neyi Yehova wakahosha nindi, “Omega.” Hanyima yakumanisha kuleña “mawulu niiseki niyuma yejima yekalamu,” Yehova wahosheli chuma chamwekesheli hatooka nawu mwamweni wakashikija chikaninu chindi. Achishimuna  haKutachika 2:​1-3. (Tañenu.) Yehova watondeli ifuku damu 7 kwikala dajila. Chumichi chinakumwekeshadi? Chinakumwekesha nawu nkeñelu yaYehova kutalisha hadi antu niiseki yakashikijewa yejima hakumana kwefuku damu 7.

15. Chumanyi chadi kuletesha chimwekani neyi Satana nakañeshi nkeñelu yaNzambi kutalisha hadi antu?

¹⁵ Hanyima yakwila aAdama naEva anadikañi dehi, ekalili akanshidi nawa asambwishili anyanawu nshidi nikufwa. (Rom. 5:12) Chafuminimu, hadaha chamwekeni neyi Satana wakañesheli nkeñelu yaNzambi yakwinzesha iseki nawantu awanina nawa ovwahila. Chamwekeni neyi Satana welili chuma chadi kuletesha Yehova akakañanyi kuhosha nindi “Omega.” Hadaha Satana watoñojokeli nindi Yehova hadi kutwesha kuhemba chikaninu chindiku. Hekwawu watoñojokeli nindi Nzambi wukuyijaha aAdama naEva nakuleña adisumbula acheñi kulonda ashikijilimu nkeñelu Yindi kutalisha hadi antu. Ilaña neyi Nzambi welili chumichi, Diyabolu wadi kumutena nindi hisakutwamba. Muloñadi? Muloña, neyi chashimunawu haKutachika 1:​28, Yehova wayilejeli aAdama naEva nindi anyanawu akenzesha iseki.

16. Muloñadi Satana chadi kutoñojokelayi nindi wukutwesha kumwinkamu Yehova muloña wakukañanya kushikija chikaninu chindi?

¹⁶ Chumanyi chikwawu chatela chatoñojokeliyi Satana nindi dichadi kufuukulayi Nzambi? Hadaha Satana watoñojokeli nindi Yehova wukuyiteja aAdama naEva kuvwala anyana abula kuwanina akabula kushikilamu kwikala awanina. (Mukwa. 7:20; Rom. 3:23) Neyi yuma yamwekeni muniyi njila, chakadi nikujina, Diyabolu wadi kumwinkamu Yehova muloña nindi nakañanyi kushikija chikaninu chindi. Muloñadi? Muloña chumichi chadi kumukañesha Yehova kushikija nkeñelu yindi, yakwinzesha Paradisa yakekala hamaseki nawanyana kaAdama naEva awanina nawa ovwahila.

17. Yehova wamanishili ñahi kukala kwakudikaña kwaSatana niantu akusambila, nawa chumanyi chakafumamu? (Talenu cheñi mwevulu.)

¹⁷ Yehova wamanishili kukala kwakudikaña kwaSatana nikwawantu akusambila munjila yamuhayamishili nankashi Satana. (Mas. 92:5) Chatela adimwekeshi nindi hisakutwamba, Yehova wamwekesheli nindi wahoshaña mwalala kuhitila mukuyiteja aAdama naEva kuvwala anyana. Nawa chatela amwekeshi nindi nakañanyi, Yehova wamwekesheli hatooka nindi kwosi chuma chinateli kumukañesha kushikija nkeñelu yindi. Wahembeli chikaninu chindi kuhitila mukuhana ‘mwana’ wakamwina anyana kaAdama naEva ovwahila. (Kutach. 3:15; 22:18) Satana watela  wahayamini nankashi nantanjikilu yaYehova yefutu danyiloña! Muloñadi? Muloña hintanjikilu yashindamena hakukeña kwakufuma hamuchima. (Mat. 20:28; Yow. 3:16) Satana hekala nanichi chilwiluku, muloña wadikeña yomweni. Dichi, chumanyi chakamwekana muloña wantanjikilu yefutu danyiloña? Hakumana kwaChiyuulu chaKristu chaYaaka 1,000, anyana kaAdama naEva awanina nawa ovwahila akashakama muParadisa hamaseki, neyi chochafuukwiliyi Yehova hakusambila. Hayina mpinji, chidi hohu neyi Yehova wakahosha nindi, “Omega.”

18. Yumanyi yisatu yatulejayi Nzambi yatukwashaña kukuhwelela netu wakashikija mwakanayi? (Talenu cheñi chikasha chinakwila nawu “ Yuma Yisatu Yikutuletesha Tukuhweleli muChikaninu chaYehova.”)

¹⁸ Kwesekeja nachitunahanjeki, yumanyi yitwatela kulejaku antu kulonda akuhweleli nawu chikaninu chaNzambi chahosha haParadisa mwamweni chakashikijewa? Chatachi, Yehova yomweni diyi wakana. Mukanda waChimwekeshu wahosha nawu: “Owu washakamini hetanda wahosheli nindi: ‘Talaña! Inakubalumuna yuma yejima yiikali yayiha.’” Wukweti maana, ñovu nimuchima wakufwila kushikija chikaninu chindi. Chamuchiyedi, Yehova wamonaña kushikijewa kwanichi chikaninu chindi neyi kwiji chinashikijewi dehi. Dichaletesha ahoshi nindi: “Awa mazu atelela kuyikuhwelela nawa alala. . . . Anashikijewi dehi!” Chamuchisatu, neyi Yehova atachika chuma, wachizataña sampu nachimanishi, neyi chinamwekeshiwu namazu akwila nawu: “Yami Alefwa nawa Omega.” Yehova wakamwekesha hatooka nindi Satana hisakutwamba nawa nakañanyi.

19. Neyi antu anakujinoka hakushikijewa kwachikaninu chaNzambi chahosha haParadisa, chumanyi chimwatela kwila?

¹⁹ Anukenu nenu mpinji yejima yimwalejañaku antu yuma yahoshayi Nzambi yatukwashaña kukuhwelela netu yikaninu yindi mwamweni yakashikijewa, chayikwashaña ninenu kukuhwelela chikupu muyikaninu yaYehova. Dichi mpinji yimwakataña chikaninu chakukundeja chahosha haParadisa yinakwinza neyi chalumbululawu haChimwekeshu 21:4 nawa muntu ahosha nindi, “Iyi nsañu yayiwahi ilaña nakuhweleli wanyi nami yakashikijewa,” mwakela ñahi? Kwila mutaña nikumulumbulwila chahosha vasi 5 ni 6 nehi? Mulejenu yuma yamwekeshaña hatooka nawu chidi hohu neyi Yehova wafwachika dehi nindi wakashikija chikaninu chindi.—Isa. 65:16.