1-2. (a) Muloñadi kapostolu Pawulu chahosheleliyi nindi kukeña dichilwilu “chabadika”? (b) Malwihwinyi itukuhanjekahu?

 HAMPINJI yahosheleñayi kapostolu Pawulu hachikuhwelelu, kuchiñeja nikukeña, wakunkulwili nindi “chabadika haniyi [yilwilu] hikukeña.” (1 Kor. 13:13) Chumanyi chaletesheli Pawulu ahoshi mwenimu? Kumbidi, hitwakakeñekaña cheñi kukuhwelela muyikaninu yaNzambi yahosha hakaayi kindi kakaha hela kuchiñeja netu iyi yikaninu yakashikijewaku, muloña yakekala yashikijewa dehi. Ilaña twakatwalekahu kumukeña Yehova niakwetu antu. Kafwampi, twakaswejelañaku kuyikeña haya nyaaka.

² Chineli mpinji yejima twakakeñekaña kudimwekeshela kukeña, tukuhanjeka hanawa malwihu asatu. Lwatachi, muloñadi chitwatela kudikeñela wumu namukwawu? Lwamuchiyedi, twadimwekeshelaña ñahi kukeña wumu namukwawu? Lwamuchisatu, tunateli kutwalekahu ñahi kudikeña wumu namukwawu chikupu?

3. Yumanyi yaleteshaña tudimwekesheleña kukeña wumu namukwawu?

³ Muloñadi chichalemena etu kudikeña wumu namukwawu? Neyi tuyimwekeshelaña amanakwetu kukeña, tukumwekesha netu tudi akaKristu alala. Yesu wayilejeli apostolu indi nindi: “Neyi mukeñañana, dihu hakuyilukilawu kudi antu ejima nawu mudi atumbanji twami.” (Yow. 13:35) Kubombelahu, neyi tudimwekeshelaña kukeña wumu namukwawu twekalaña anuñañana. Pawulu wateneni kukeña nindi “dikwanuñañeshaña chikupu.”  (Kol. 3:14) Hela chochu, kudi chuma chikwawu chalema chaleteshaña tudikeñeña wumu namukwawu. Kapostolu Yowanu wayisonekeleli akwawu akakwitiya nindi: “Muntu wejima wamukeña Nzambi watela kukeña nimanakwindi nawa.” (1 Yow. 4:21) Neyi tudimwekeshelaña kukeña wumu namukwawu, tukumwekeshaña netu twamukeña Nzambi.

4-5. Shimunenu chakutalilahu chinakumwekesha nawu kukeña kutwamukeña Nzambi kwendelaña hamu nakukeña kutwadimwekeshelaña wumu namukwawu.

⁴ Kukeña kutwamukeña Nzambi kwendelaña ñahi hamu nakukeña kutwayimwekeshelaña amanakwetu niahela? Chakutalilahu, talenu kunuñañana kwekala hakachi kamuchima wetu nayiidi yikwawu yekala kumujimba wetu. Neyi ndotolu atupima hachikasa kulonda eluki neyi muchima wetu wunakweta nañovu hela nehi, wukwiluka neyi muchima wetu wudi chiwahi hela nehi. Tunateli kuzatisha ñahi ichi chishina kutalisha hansañu yakukeña?

⁵ Neyi chochinateli kwilukayi ndotolu neyi chakwila muchima wetu wudi chiwahi hela nehi kuhitila mukuwupima, ninetu tunateli kwiluka chidi kukeña kutwamukeña Nzambi neyi twiluka ntahi chidi kukeña kutwayimwekeshelaña amanakwetu. Neyi tumona netu kukeña kutwayikeña amanakwetu kunatachiki kukeha, chinakumwekesha nawu nikukeña kutwamukeña Nzambi kunatachiki kukeha. Ilaña neyi tuyimwekeshelaña akwetu akakwitiya kukeña mpinji yejima, hichuma chinakumwekesha nawu twamukeña chikupu Nzambi.

6. Muloñadi wutwatela kwakamina neyi tumona netu kukeña kutwayikeña amanakwetu niahela kunatachiki kukeha? (1 Yow. 4:​7-9, 11)

⁶ Twatela kwakama neyi tumona netu kukeña kutwayikeña amanakwetu niahela kunatachiki kukeha. Muloñadi? Muloña chumichi chikutuletesha tujimbeshi wubwambu wetu naYehova. Kapostolu Yowanu washimuna hatooka ichi chikuma hakutwanukisha nindi: “Muntu wabula kukeña manakwindi amonañayi namesu, hakutwesha kukeña Nzambi abula kumonayiku.” (1 Yow. 4:20) Chumanyi chitunakudizilaku? Yehova wukututiya kuwaha chiña hohu neyi “[Tudikeña] wumu namukwawu.”—Tañenu 1 Yowanu 4:​7-9, 11.

7-8. Njilanyi jimu mutunateli kudimwekeshela kukeña wumu namukwawu?

⁷ Mwizu daNzambi kakavulu twawanañamu lushimbi lwakwila nawu “[mudikeñeña] wumu namukwawu.” (Yow. 15:​12, 17; Rom. 13:8; 1 Tes. 4:9; 1 Pet. 1:22; 1 Yow. 4:11) Hela chochu, kukeña hichilwilu chamumuchima, hela wuntu wamukachi, nawa kwosi muntu wunateli kumona mumuchima wetuku. Hanu dinu, tunateli kumwekesha ñahi hatooka netu twadikeña wumu namukwawu? Tunateli kwila mwenimu kuhitila mumazu etu niyuma yitwelaña.

⁸ Kudi njila jajivulu mutunateli kuyimwekeshela amanakwetu niahela netu twayikeña. Njila jimu dijeniji: “Hoshenuña mwalala muntu namukwawu.” (Zek. 8:16) “Shakamenuña mukuwunda wumu namukwawu.” (Maku 9:50) Tachikilenuñahu “[Kumwekesha] kalemesha kudi wumu namukwawu.” (Rom. 12:10) “Ditambwilenuña wumu namukwawu.” (Rom. 15:7) “[Danakenenuña] wumu namukwawu.” (Kol. 3:13) “Disendelenuñaku yiteli wumu namukwawu.” (Ñal. 6:2) “Twalekenuhu kudikundeja wumu namukwawu.” (1 Tes. 4:18) “Dituñenuña wumu namukwawu.” (1 Tes. 5:11) “[Dilombelenuñaku] wumu namukwawu.”—Yak. 5:16.

9. Muloñadi chitukuhoshela netu kukundeja akwetu hinjila yimu yalema yakumwekeshelamu netu twayikeña? (Talenu cheñi mwevulu.)

⁹ Tuhanjekenu hanjila yimu yinashimuniwu muparagilafu yinafumihu mutunateli kudimwekeshela kukeña wumu namukwawu. Tukuhanjeka hakukonkomwena kwaPawulu nindi:  “Twalekenuhu kudikundeja wumu namukwawu.” Tukuhosheladi netu kukundeja akwetu hinjila yimu yalema mutwamwekeshelaña netu twayikeña? Kwesekeja namukanda wumu wahosha hansañu yamuBayibolu, izu dazatishili Pawulu dakwila nawu “kukundeja” datalisha “mukwimana kwakwihi namuntu nakumukolesha hampinji yinakuhitayi mukweseka kweneni.” Dichi, neyi tukundeja mukwetu mukakwitiya wunakuhita mukukala, dikwila nawu tunakumukwasha kwimana nakutwalekahu kwenda munjila yaya kuwumi. Mpinji yejima yitukukundeja manakwetu hela muhela wunakuhita mukukala, tukumwekesha netu twamukeña chikupu.—2 Kor. 7:​6, 7, 13.

10. Kunuñañananyi kwekala hakachi kakutiyila antu wushona nakuyikundeja?

¹⁰ Kutiyila wushona nikukundeja jendelaña hamu chikupu. Tunahoshelidi mwenimu? Neyi muntu natiyili mukwawu wushona wunakukabakana, wafwilaña kumukundeja nikwilahu chuma kulonda amukwashi. Dichi twasambilaña kutiya wushona, kuhiñahu dinu hitukumukundeja muntu. Pawulu walumbulula nindi wushona wayitiyilañayi Yehova antu, wamuleteshaña ayikundejeña. Pawulu wamulumbulula Yehova nindi “Tata wasweja luwi nawa Nzambi wakukundeja kwejima.” (2 Kor. 1:3) Haniyi vasi, Pawulu wazatisha mazu akwila nawu “wasweja luwi” hakulumbulula wushona wutwatiyilaña akwetu. Dichi, “Nzambi amutena nawu Tata, hela Nsulu wasweja luwi, muloña wayimwekeshelaña antu wushona chikupu.” Nawa iwu wushona diwamuleteshaña “[atukundejeña] mukweseka kwejima kutwamonaña.” (2 Kor. 1:4) Neyi chochawundishaña menji amawahi anakusefuka mukaseloki nyichima yawantu anatiyi mpwila, Yehova niyena wawundishaña nikukundeja antu anakumona kukala. Tunateli kuyitiyila ñahi antu wushona nikuyikundeja neyi chelañayi Yehova? Njila yimu yitunateli kwilila mwenimu, hikwikala nayilwilu yikutukwasha kutiyila antu wushona nikuyikundeja. Yilwilwinyi yeniyi?

11. Kwesekeja naAKolosi 3:12 ni 1 Petulu 3:​8, yilwilwinyi yikwawu yitwatela kwikala nayu hakwila tutwalekihu kwikala nakukeña kwatuleteshaña tuyikundejeña akwetu?

¹¹ Chumanyi chinateli kutukwasha kutwalekahu kudimwekeshela kukeña kulonda “[tutwalekihu] kudikundeja wumu namukwawu” mafuku ejima? Twatela kwikala nayilwilu yidi neyi kudakamena, kukeña anakwetu nikuditiyila luwi. (Tañenu AKolosi 3:12; 1 Petulu 3:8.) Iyi yilwilu yinateli kutukwasha ñahi? Neyi tuyimwekeshelaña amanakwetu wushona nikuyakamena chakufuma hamuchima, tukufwilaña kuyikundeja hampinji yinakukabakanawu. Neyi chahosheliyi Yesu, “yuma yidi mumuchima diyahoshañayi muntu. Muntu wamuwahi wahoshaña yayiwahi.” (Mat. 12:​34, 35) Neyi tuyikundeja amanakwetu niahela hampinji yinakumonawu kukala, hinjila yimu yalema mutwamwekeshelaña netu twayikeña.

12. (a) Muloñadi chitwatela kwikalila asoñama? (b) Lwihwinyi lutukuhanjekahu?

¹² Wejima wetu twafwilaña “[kutwalekahu] kudikeña wumu namukwawu.” (1 Yow. 4:7) Hela chochu, twatela kwanukaña netu Yesu watusoñamishili nindi “kukeña kwawantu amavulu [kukukehaña].” (Mat. 24:12) Yesu watalishili wanyi mukwila nindi chumichi chikuyimwekenaña atumbanji twindi amavulu. Hela chochu, twatela kwikala asoñama kulonda abuli kutuluwañesha kudi antu amukaayi abulaña kumwekesha kukeña. Muloña wachumichi, tuhanjekenu hanilu lwihu lwalema: Chumanyi chinateli kutukwasha kwiluka neyi twayikeña amanakwetu chikupu?

13. Chumanyi chinateli kutukwasha kwiluka neyi twayikeña amanakwetu chikupu?

¹³ Njila yimu mutunateli kwilukila chidi kukeña kwetu, hikushinshika hachitwelaña nakukala  kutwamonaña muchihandilu. (2 Kor. 8:8) Kukala kumu kunateli kumwekana akushimwini kudi kapostolu Petulu nindi: “Kubombela hayuma yejimiyi, dikeñenu chikupu wumu namukwawu, muloña kukeña kwabutaña hanshidi jajivulu.” (1 Pet. 4:8) Dichi, chuma chitwelaña neyi amanakwetu analuwañeshi hela anatuneñeshi, chinateli kutukwasha kwiluka neyi twayikeña chikupu hela nehi.

14. Kwesekeja na 1 Petulu 4:​8, kukeña kwamuchidinyi kutwatela kwikala naku? Shimunenu chakutalilahu.

¹⁴ Tutoñojokenu chikupu hamazu ahosheliyi Petulu. Mazu akutachikilahu muvasi 8 anakumwekesha kukeña kutwatela kwikala naku, dikwila nawu, twatela ‘kudikeña chikupu.’ Izu dazatishili Petulu dakwila nawu “chikupu” muchiGiriki daya mukwila nawu “kutandumuka.” Mazu akukumishaku muniyi vasi anakumwekesha chuma chachiwahi chafumaña mukudikeña chikupu. Kwabutaña hanshidi jawamanakwetu. Tunateli kufwikija chumichi muniyi njila: Tunakwati kukeña namakasa etu ejima ayedi, neyi kwiji tunakwati ihina davuñuluka, nawa tunakukutandumuna namakasa ayedi sampu “[kunabuti] hanshidi jajivulu.” Kubuta hiizu dinakwimenaku kwanakena. Neyi ihina chidinateli kubuta hamajilu, kukeña nikwena kunateli kubuta hakuzeyazeya niyiluwa yawamanakwetu.

15. Neyi twayikeña chikupu amanakwetu niahela, chumanyi chitukwila? (AKolosi 3:13)

 ¹⁵ Twatela kuyikeña chikupu akwetu akakwitiya nakuyanakena yiluwa yawu, hela chakwila mpinji jikwawu chumichi chinateli kutukalila. (Tañenu AKolosi 3:13.) Neyi tuyanakenaña akwetu, twamwekeshaña netu twayikeña chikupu nawa netu tunakukeña kumuzañalesha Yehova. Chumanyi chikwawu chinateli kutukwasha kwanakena akwetu nikubula kushikena kuhila nayuma yinatukoñiwu?

16-17. Chumanyi chikwawu chikutukwasha kudiwula yiluwa yanyanya yawakwetu? Shimunenu chakutalilahu. (Talenu cheñi mwevulu.)

¹⁶ Shenuña muchima hayuma yayiwahi yelañawu amanakwenu niahela, bayi hayuma yatamaku. Talenu ichi chakutalilahu. Fwikijenu munapompi hamu nawamanakwenu niahela nakudiila hamu. Munakudiluñishila hamu nawa hanyima yaniku kubulakana mukwata nimwevulu wumudihu wejima wenu. Kuhiñahu, mukwatilahu nyevulu yikwawu yiyedi, hadaha mwevulu watachi wukuwaha wanyi. Ichi dinu munekali dehi nanyevulu yisatu. Ilaña hamwevulu wumu, mumona nenu manakwenu wumu natumbi chimwemweta wanyi. Mukwila ñahi nanowu mwevulu? Mukuwujima, muloña mudi nanyevulu yikwawu yiyedi munatumbiwu antu ejima chimwemweta, kushilahu ninowu manakwenu.

¹⁷ Twesekejenu nyevulu yitwahembaña nayuma yitwanukaña. Kakavulu twanukaña mpinji jajiwahi jitwadiluñishili nawamanakwetu niahela. Ilaña twili netu mpinji yimu haniji mpinji, manakwetu hela muhela wahosheli hela kwila  chuma chatuneñesheli. Chumanyi chitwatela kwila nanochu chuma chitunakwanuka? Tunateli kujima chumichi muyitoñojoka yetu neyi chitunateli kujima mwevulu wumu hakachi kanoyu nyevulu yitunakwati. (Yish. 19:11; Efwe. 4:32) Tunateli kujima muyitoñojoka yetu chiluwa chanyanya chakoñeliyi mukwetu mukakwitiya, muloña tudi nayuma yayiwahi yayivulu yitwatela kwanuka yitwadiluñishili nanowu manakwetu hela muhela. Iyi diyuma yitwatela kwanukaña nikulemesha.

18. Yikumanyi yamaneni yahosha hakukeña yitunahanjekihu muchinu chibaaba?

¹⁸ Muloñadi wutwatela kutwalekelahu kudikeña chikupu wumu namukwawu? Neyi chitunahanjekihu dehi, neyi tuyimwekeshelaña amanakwetu niahela kukeña, tunakumwekesha netu twamukeña Yehova. Twayimwekeshelaña ñahi akwetu akakwitiya kukeña? Njila yimu yitwayimwekeshelañamu kukeña hikuyikundeja. “[Tukutwalekañahu] kudikundeja wumu namukwawu” neyi tuyitiyilaña akwetu wushona. Tunateli kutwalekahu ñahi kudikeña chikupu wumu namukwawu? Neyi tuzataña hakumina ñovu jetu kwanakena akwetu yiluwa yawu.

19. Muloñadi chichalemena makonu kudimwekeshela kukeña chikupu wumu namukwawu?

¹⁹ Muloñadi chichalemena makonu kudimwekeshela kukeña chikupu wumu namukwawu? Talenu chuma chacheni chikuletesha chashimwiniyi Petulu, nindi: “Kukuma kwayuma yejima kunaswini dehi kwakwihi. Dichi, . . . dikeñenu chikupu wumu namukwawu.” (1 Pet. 4:​7, 8) Kukuma kwakanu kaayi katama chikunakuswina kwakwihi, kukalanyi kutwatela kukuhwelela kumona? Yesu wahosheleñahu dehi kutalisha hadi akakumulondela nindi: “Akayihela kudi nyuza yejima kukoola ijina dami.” (Mat. 24:9) Hakwila tutweshi kwimika mushindu iku kuhelañana, twatela kutwalekahu kwikala anuñañana. Neyi tuyimwekeshelaña amanakwetu niahela kukeña, Satana hakatwesha kutwambulaku, muloña kukeña ‘dikwatunuñañeshaña chikupu.’—Kol. 3:14; Fwili. 2:​1, 2.