1-2. Muloñadi chitunateli kutoñojokela netu Yehova hanakwakula kulomba kwetuku?

 “ZAÑALELAKU chikupu mudi Yehova, nawa wakakwinka yuma yafwilaña muchima weyi.” (Mas. 37:4) Ichi chikaninu chachiwahi nankashi! Komana twatela kukuhwelela Yehova kutwinka yuma yejima yitunakulomba hohenohu? Muloñadi chitwatela kudihwila ilu lwihu? Talenu iyi yakutalilahu. Muhela mujiki nakulomba kulonda akayi kuShikola Yawakakushimwina aWanta. Ilaña munahiti dehi yaaka yayivulu, anamutambiki wanyi. Manakwetu wakansi nakulomba nindi amuuki chikatu cheneni kulonda akalakaleña nankashi nyidimu yamuchipompelu. Ilaña chikatu chindi chinatwalekihu. Anvwali akaKristu anakulomba nawu mwanawu akatwalekihu kwikala muchalala. Ilaña mwanawu nafuukulihu kuleka kumukalakela Yehova.

² Hadaha ninenu mwamulombahu dehi Yehova chuma ilaña kanda ayakuli. Chikufumamu, hadaha mukukunkulula nenu Yehova wakulaña kulomba kwawantu amakwawu ilaña kwenu nehi. Indi kwiji munateli kutoñojoka nenu hadi chuma chatama chimwakoñeli. Muhela Janice b niyena dichatiyileñayi. Yena ninfumwindi alombeleña nawu akayi nakukalakela haBeteli. Wahosheli nindi: “Nakuhweleleli nami keña atutambiki kuBeteli.” Ilaña mwahitili yaaka, awa adisumbula ayitambikili wanyi. Muhela Janice wahosheli nindi: “Naneñeli nawa naluwankeni. Natoñojokeleña nami hadaha kudi chuma chinelili chamuneñesheli Yehova. Nalombelelihu chikupu nami nakayi kuBeteli. Muloñadi chabulililiyi kwakula kulomba kwami?”

3. Yumanyi yitukuhanjekahu muchinu chibaaba?

 ³ Mpinji jikwawu, tunateli kujinoka neyi chakwila Yehova watiyaña kulomba kwetu hela nehi. Dichatiyileñawu niambuña aNzambi amakwawu ashinshika akunyima. (Yoba 30:20; Mas. 22:2; Hab. 1:2) Chumanyi chinateli kuyikwasha kukuhwelela chikupu nenu Yehova wakakula kulomba kwenu? (Mas. 65:2) Hakwila twakuli ilu lwihu, tukusambila kwakula awa malwihu analondelihu: (1) Twatela kukuhwelela netu Yehova wakeladi? (2) Yehova wakeñaña nindi twileñadi? (3) Muloñadi mpinji jikwawu chitwatela kuhimpilaku kulomba kwetu?

4. Kwesekeja naYeremiya 29:​12, Yehova washiika kwiladi?

⁴ Yehova watushiika nindi wukutiyaña kulomba kwetu. (Tañenu Yeremiya 29:12.) Nzambi yetu wakeña akakudifukula indi ashinshika, dichi hakadiwula kulomba kwawuku. (Mas. 10:17; 37:28) Hela chochu, ichi hichinayi mukwila nawu wukutwinkaña yuma yejima yitunalombiku. Hadaha yuma yikwawu yitwalombaña kwila atwakula yinu mpinji nehi, sampu kaayi kakaha kanashiki.

5. Chumanyi chamonañayi Yehova neyi nakutiyilila kukulomba kwetu? Lumbululenu.

⁵ Yehova wamonaña neyi chakwila yuma yitunakulomba yinesekani nankeñelu yindi. (Isa. 55:​8, 9) Yuma yakeñañayi kwila munabombeli kwinzesha iseki nawantu anuñañana akekala muchiyuulu chindi. Ilaña Satana wahoshaña nindi antu anateli kwikala chachiwahi neyi anakudiyuula aweni. (Kutach. 3:​1-5) Hakwila amwekeshi nindi yuma yahosheliyi Diyabolu yakutwamba, Yehova nayiteji antu kudiyuula aweni. Hela chochu, chiyuulu chawantu dichinakojeji kukala kwejima kutunakumona makonu. (Mukwa. 8:9) Tuneluki netu Yehova wukufumishahu wanyi iku kukala kwejima kutunakumona chayinu mpinji. Neyi welili mwenimu, amakwawu adi kukunkulula nawu chiyuulu chawantu chinakuzatika, dikwila nawu chinakumanisha kukala kunakumonawu antu.

6. Muloñadi wutwatela kukuhwelela chikupu netu mpinji yejima Yehova wukwilaña yuma yayiwahi nawa yoloka?

⁶ Yehova nateli kwakula kulomba kwokumu munjila yaambukaku. Chakutalilahu, hampinji yakatiliyi nankashi Mwanta Hezekiya, wamulembeleli Yehova kulonda amukwashi akoli. Yehova waakwili kulomba kwindi kuhitila mukumuuka. (2 Anya. 20:​1-6) Kwambukaku, hampinji kapostolu Pawulu yamulembeleliyi Yehova nindi amufumishi “mwiña mumujimba,” hadaha chikatu chakumujimba, Yehova hafumishilihu akuna kukalaku. (2 Kor. 12:​7-9) Talenu cheñi chuma chayimwekeneni aYakoba naPetulu. Wejima wawu ayedi akeñeleña kuyijaha kudi Mwanta Herodi. Chipompelu chamulombeleliku Petulu nawa hadaha niYakoba. Hela chochu, Yakoba amujahili, ilaña Petulu amupulwishili muchihayamisha. (Yilw. 12:​1-11) Hadaha tunateli kudihula netu, ‘Muloñadi Yehova chamupulwishililiyi Petulu ilaña Yakoba nehi?’ Bayibolu yahoshahu wanyi haniyi nsañu. c Chuma chitwatela kwanukaña chidi chakwila nawu Yehova mpinji yejima ‘hakoñaña yuma yaheñaku.’ (Kuhit. 32:4) Nawa tweluka netu aPetulu naYakoba wejima wawu ayedi ayitiyileña kuwaha kudi Yehova. (Chim. 21:14) Mpinji jikwawu, tunateli kumona kukala kutwabulili nikukuhwelela. Ilaña chineli twakuhwelela netu mpinji yejima Yehova wukwakula kulomba munjila yayiwahi nawa yoloka, hitwajinokaña njila yakwilañamu kulomba kwetuku.—Yoba 33:13.

7. Chumanyi chitwatela kutondolwela, nawa muloñadi?

⁷ Twazataña nañovu kulonda tubuleña kwesekeja kukala kutukweti nakukwetiwu akwetu. Chakutalilahu, tunateli kumulomba Yehova netu atukwashi nakukala kumu kutukweti,  ilaña kutwakula nehi. Mukuhita kwampinji, tutiya nawu muntu mukwawu walombeli hachuma chochimu, nawa chinamwekani neyi Yehova wamwakwili. Dichuma chamumwekeneni nimuhela Anna. Walombeli nindi chikatu chakansa chadiña nanfumwindi Matthew chimani. Hayina mpinji, ahela ayedi akaKristu akula dehi niwena adiña nakansa. Muhela Anna wamulombeleliku chikupu nfumwindi ninana ahela ayedi. Ana ahela ayedi akoleli, ilaña nfumwindi wafwili. Hakusambila, muhela Anna wadihwileña neyi chakwila Yehova diyi wayikwashili ana ahela ayedi kukola hela nehi. Nawa neyi diyi wayikwashili, muloñadi chabulililiyi kwakula kulomba kwaniwu muhela kwakwila nindi nfumwindi akoli? Hela chochu, tuneluki wanyi chaletesheli ana ahela ayedi akoli. Ilaña tweluka hohu netu Yehova wakafumishahu makabi ejima itunakumona haya nyaaka, nawa wafwilaña kusañula amabwambu jindi afwa dehi.—Yoba 14:15.

8. (a) Kwesekeja naIsaya 43:​2, Yehova watukwashaña ñahi? (b) Kulomba kunateli kutukwasha ñahi neyi tunakuhita mukukala kweneni? (Talenu vidiyo yinakwila nawu Kulomba Chikwatukwashaña Kuumika.)

⁸ Yehova wukutukwashaña mpinji yejima. Chineli hiTata yetu wukweti kukeña, Yehova watiyaña kutama neyi amona tunakukabakana. (Isa. 63:9) Hela chochu, hatukiñaña kukweseka kwejima kutwamonaña kutunateli kwesekeja natuloña hela nyizuzuku. (Tañenu Isaya 43:2.) Ilaña watushiika nindi wukutukwashaña ‘kuhita’ muyumiyi. Nawa haketeja kukala kwejima kutwamonaña kutuzeyeshaku. Yehova watwinkaña cheñi spiritu yindi yajila yañovu kulonda yitukwasheña kuumika. (Luka 11:13; Fwili. 4:13) Chikufumamu, tunateli kukuhwelela netu mpinji yejima wukutwinkaña yuma yikutukwashaña kuumika nikutwalekahu kwikala ashinshika kudi yena. d

9. Kwesekeja naYakoba 1:​6, 7, muloñadi wutwatela kukuhwelela netu Yehova wukutukwasha?

⁹ Yehova wakeñaña nindi tumukuhweleleña. (Heb. 11:6) Mpinji jikwawu kukala kutunakumona kunateli kumwekana neyi kunatubadiki muñovu. Hadaha tunateli kutachika kujinoka neyi chakwila Yehova wukutukwasha. Ilaña Bayibolu yatulejaña nawu nañovu jaNzambi “[tunateli] kukiluka mpwembu.” (Mas. 18:29) Dichi chatela tujinokeña, twatela kulomba nakukuhwelela chikupu netu Yehova wakakula kulomba kwetu.—Tañenu Yakoba 1:​6, 7.

10. Lumbululenu chitunateli kwila kwesekeja namutunalombi.

¹⁰ Yehova wakeñaña nindi twileña yuma kwesekeja nachitunalombi. Chakutalilahu, manakwetu nateli kulomba kudi Yehova nindi amukwashi amwiteji kumudimu kwazatañayi kulonda akayi kukupompa kweluña. Yehova nateli kwakula ñahi iku kulomba? Yehova nateli kumukwasha iwu manakwetu kwikala wahamuka kulonda atweshi kuhanjeka namukulumpi windi wamudimu. Hela chochu, manakwetu watela kuya kudi mukulumpi wamudimu nakumulomba. Hadaha nateli kumulomba kapampa kakavulu. Indi kwiji nateli kudihimpa namukwawu mwazatilañawu mafuku akuzata. Nawa neyi chinatwesheki, nateli kulombaku mafuku nakumuleja mukulumpi windi wamudimu nindi akamuketulimu mali.

11. Muloñadi wutwatelela kulomba nakufuntila-funtilahu hayuma yinakutwakamisha?

¹¹ Yehova wakeñaña nindi tulombeña nakufuntisha-funtishahu hayuma yinakutwakamisha. (1 Tes. 5:17) Yesu watalishili mukwila nindi yuma yikwawu yitwalombaña hiyanateli kuyakula hohenohuku. (Luka 11:9) Dichi bayi muzeyaku! Lombenuña mpinji yejima nakufuntisha-funtishahu. (Luka 18:​1-7) Neyi tutwalekahu kulomba chuma chitunakukeña, twamwekeshaña kudi Yehova netu chuma chitunakukeña chalema. Twamwekeshaña cheñi netu twakuhwelela chikupu muñovu yikwetiyi yakutukwasha.

12. (a) Lwihwinyi lutwatela kudihula kutalisha hayuma yitwalombaña, nawa muloñadi? (b) Tunateli kulomba ñahi munjila yikumwekesha nawu twamulemesha Yehova? (Talenu chikasha chinakwila nawu “ Komana Yuma Yinalombaña Yamwekeshaña Nawu Namulemesha Yehova?”)

¹² Neyi anatwakuli wanyi kwesekeja nachuma chitwalomba, tunateli kudihula awa malwihu asatu. Lwihu lwatachi, ‘Komana chuma chinnakulomba chinateleli?’ Kakavulu, twatoñojokaña netu tweluka yuma yatutelela. Hadaha yuma yitwalombaña mukuhita kwampinji hiyinateli kutukwashaku. Neyi tunakulomba hakukala kutukweti, kunateli kwikala njila yayiwahi yitunateli kumanishilamu oku kukala kubadika njila yitunakulomba. Nawa yuma yikwawu yitwalombaña hiyinateli kwesekana nankeñelu yaYehovaku. (1 Yow. 5:14) Chakutalilahu, talenu chuma chamwekeni kudi anvwali ashimunawu hakusambila. Amulombeli Yehova nawu ayikwashili mwanawu atwalekihu kwikala muchalala. Kulomba kwamuchidiwu kunateli kumwekana neyi kudi hohu chiwahi. Ilaña Yehova kwila atukanjikija nindi tumukalakeleña nehi. Wakeñaña wejima wetu, kushilahu nianyanetu, kutondahu etu aweni kudifukula kudi yena. (Kuhit. 10:​12, 13; 30:​19, 20) Dichi anvwali atela kumulomba Yehova ayikwashi kumushika mwanawu hamuchima kulonda ekali namuchima wakumukeña Yehova nikwikala ibwambu Dindi.—Yish. 22:6; Efwe. 6:4.

13. Kwesekeja naAHeberu 4:​16, mpinjinyi yinateli kutukwashayi Yehova? Lumbululenu.

¹³ Lwihu lwamuchiyedi lunateli kwikala nawu, ‘Komana ayinu diyi mpinji yatela kwakwilamu Yehova kulomba kwami?’ Hadaha tukukeña netu atwakuli hohenohu chuma chitunalombi. Ilaña, twatela kwanuka netu Yehova weluka mpinji yayiwahi yatela kutukwashayi. (Tañenu AHeberu 4:16.) Neyi tubula kutambwila hohenohu chuma chitunalombi, hadaha tukutoñojoka netu Yehova ‘Nakaani.’ Hekwawu ñakwilu yindi yidi  hohu nawu ‘Hembelelaku.’ Chakutalilahu, anukenu ona manakwetu wakansi walombeli nindi amuuki chikatu chadiñayi nachu. Neyi Yehova wamuukili ona manakwetu muchihayamisha, Satana wadi kumutaadikisha Nzambi nindi ona manakwetu watwalekelihu kumukalakela Yehova muloña wamuukili. (Yoba 1:​9-11; 2:4) Kubombelahu, Yehova watoñola dehi mpinji yakufumishahu yikatu yejima. (Isa. 33:24; Chim. 21:​3, 4) Nawa sampu oyu mpinji yinashiki, chayinu mpinji hitwatela kukuhwelela netu anateli kutuuka muchihayamishaku. Dichi ona manakwetu wateleleli kumulomba Yehova kulonda amwinki ñovu nikuwunda kwamuyitoñojoka kwadi kumukwasha kuumika kukala kwadiñayi naku nakutwalekahu kumukalakela Nzambi nakashinshi.—Mas. 29:11.

14. Chumanyi chitunakudizila kuchuma chamumwekeneni muhela Janice?

¹⁴ Anukenu chuma chamwekeni kudi muhela Janice, walombeleña nindi akayi nakukalakela haBeteli. Mwahitili yaaka yitanu hakwila eluki chakwiliyi Yehova kulomba kwindi. Wahosheli nindi: “Yehova wazatishili ayina mpinji kundizisha nikunkwasha kwikala mukaKristu wapama. Nakeñekeleña kumukuhwelela chikupu. Nakeñekeleña kuwahishaku njila yakudizilamu Bayibolu nkawami. Nawa nakeñekeleña kwiluka nami natela kwikala namuzañalu kudi kwejima kwinnakumukalakelela Yehova.” Nkumininaku, muhela Janice nanfumwindi ayitemesheli mumudimu wakwenda. Chanukiliyi chuma chamwekeni, muhela Janice wahosheli nindi: “Yehova waakwili kulomba kwami, hela chakwila munjila yinabulili kukuhwelela. Hahitili mpinji yayilehi hakwila niiluki nami Yehova wañakwili munjila yayiwahi, ilaña namusakililaña hakumona chammwekesheleliyi kukeña niluwi.”

15. Muloñadi mpinji jikwawu chitwatela kutondolwela kusweja kutena mukulomba yuma yitunakukeña? (Talenu cheñi nyevulu.)

¹⁵ Lwihu lwamuchisatu lunateli kwikala nawu, ‘Komana inakulomba chuma chaambukaku  tahindi?’ Hela chakwila chalema kushimuna chuma chitunakukeña mukulomba, ilaña chikuwaha neyi mpinji jikwawu tubulaña kusweja kutena mukulomba yuma yitunakukeña kulonda twiluki chuma chinakukeñayi Yehova nindi twili. Talenu chakutalilahu chaniwu muhela mujiki walombaña nindi akayi kuShikola Yawakakushimwina aWanta. Wakeñaña nindi akayi kuniyi shikola kulonda akayi nakuzatila kudi kukaankila. Dichi hampinji yinatwalekihu kulomba nindi amutambiki kuniyi shikola, nateli cheñi kumulomba Yehova kulonda amukwashi kuwana njila jikwawu munateli kuzatilayi nankashi mumudimu windi wakushimwina. (Yilw. 16:​9, 10) Kuhiñahu nateli kuzata kwesekeja nachinalombiyi kuhitila mukumwihula nkoñi wañinza neyi kudihu chipompelu chidi mukamwihi mudi kukaankila kwawapayiniya. Hela nateli kusonekela kasanji kamutayi nakwihula neyi kudihu iluña kudi kukaankila kwawakakushimwina aWanta. e

16. Tunateli kukuhwelela chikupu netudi?

¹⁶ Neyi chitunadizi, tunateli kukuhwelela chikupu netu Yehova wukwakula kulomba kwetu munjila yayiwahi nawa yoloka. (Mas. 4:3; Isa. 30:18) Mpinji jikwawu nateli kutwakula wanyi kwesekeja nachitwakuhwelela. Ilaña Yehova hakadiwula kulomba kwetuku. Watukeña nankashi. Nawa hakatuumba chisayikilaku. (Mas. 9:10) Dichi twalekenuhu “[kumukuhwelela] mpinji yejima” nakuhuñununa nyichima yenu kudi yena mukulomba.—Mas. 62:8.