1-2. (a) Kudifwananyi kudi hakachi kakukala kutwahitañamu nakwahitileñamu aYudeya afuntili kuYerusalema? (b) Shimunenu kukala kwahitileñamu aYudeya. (Talenu chikasha chinakwila nawu “ Mumafuku Adiñaku Hagayi, Zekariya niEzera.”)

 KOMANA mpinji jikwawu mwakamenaña hayuma yikamwekana kumbidi? Hadaha mudimu wunamani nawa munakwakamena chimwatela kuhemba chisaka chenu. Hadaha munakameni chimwatela kukiña chisaka chenu muloña wayuma yinakumwekana hansañu jamapolitiki, makabisha, indi kwiji ikañesha kutalisha hamudimu wakushimwina. Kudihu kukala kumunakuhitamu haniku kukala kutunateni? Neyi kudi hohu, nsañu yitukuhanjekahu yinakuhosha hadi Yehova chakwashiliyi aIsarela akunyima hampinji yamweneñawu kukala kwokumu, yikuyikwasha.

² Chakeñekeleña aYudeya ashakamini muBabiloni chihandilu chawu chejima kwikala nachikuhwelelu chikupu hakwila ashiyi chihandilu chawu chachiwahi nakuya mwituña dabulili kwilukishawu amavulu hakachi kawu. Chashikiliwu, atachikili kukabakana muloña wakukala kwayuma muchihandilu, nsañu jamapolitiki kushilahu niikañesha. Dichi amakwawu chayikalilileña kusha muchima hakutuñulula tembeli yaYehova. Muloña wachumichi, kwakwihi na 520 B.C.E., Yehova watemesheli atuprofwetu indi ayedi, aHagayi naZekariya, kulonda asañumuni antu kwikala cheñi namuchima wakuzata mudimu windi. (Hag. 1:1; Zek. 1:1) Neyi chitukumona, mazu akukolesha ahosheliwu awa atuprofwetu akwashili chikupu antu. Hela chochu, chimwahitili yaaka kwakwihi na 50, ana aYudeya afuntili atachikili cheñi kuzeya. Ezera, mukakukopolola Nshimbi welukisha chikupu, wafumini kuBabiloni nakwinza  kuYerusalema nakukolesha antu jaNzambi kulonda asambileña kulemesha kudifukula kwalala.—Ezera 7:​1, 6.

3. Malwihwinyi itukuhanjekahu? (Yishimu 22:19)

³ Neyi chiwakwashileña wuprofwetu waHagayi niwaZekariya antu jaNzambi kunyima kutwalekahu kumukuhwelela Yehova mumpinji yamweneñawu ikañesha, ninetu wunateli kutukwasha kukuhwelela chikupu muwukwashu waYehova hela chakwila tunakumona kukala muchihandilu. (Tañenu Yishimu 22:19.) Chitukuhanjekaña hamazu aNzambi ashimwiniwu kudi Hagayi niZekariya nichitukushinshikaña hayuma yeliliyi Ezera, tukwakula awa malwihu: Kukala kwamweniwu ana aYudeya afuntili kwayizeyesheli ñahi? Muloñadi chitwatela kushila muchima hakwila nkeñelu yaNzambi mumpinji jakala? Nawa tunateli kumukuhwelela ñahi Yehova chikupu mumpinji yitunakumona kukala?

4-5. Yumanyi yatela yaletesheli iyena dawaYudeya dakutuñulula tembeli kushikena kumana?

⁴ AYudeya afuntili chashikiliwu muYerusalema, adiña nanyidimu yayivulu yateleleli kuzatawu. Ashikeneni kutuñulula kameña kaYehova nikwaala chikuku chatembeli. (Ezera 3:​1-3, 10) Ilaña amweneña kukala kwakuvulu nankashi chakwila iyena dawu dashikeneni kumana. Kubombela hamudimu wakutuñulula tembeli, adiña namudimu wakudituñila matala awu, kudima maha nikukeñela yisaka yawu yakuda. (Ezera 2:​68, 70) Kubombelahu, amweni ikañesha dafuminineña kudi ayilumbu jawu, akasili kafuta kakukañesha mudimu wakutuñulula tembeli.—Ezera 4:​1-5.

⁵ Ana afuntili kufuma muwunkoli niwena atachikili kukabakana muloña wakukala kwayuma muchihandilu ninsañu jamapolitiki. Haniyi mpinji, mpata yawu atachikili kuyiyuula kudi Wanta wawaPeresi. Hanyima yakufwa kwamwanta wawaPeresi, Kirusi, mu 530 B.C.E., Cambyses, mwanta wamusinsili wayili namashidika indi kulonda amwimiki mushindu Ejipitu. Hayileñawu kuEjipitu, amashidika indi atela ayitambwileña aIsarela yakuda, menji nihakukaama, nakuyibombelahu kukala kukwawu. Mwanta Dariyusi I wamusinsili Cambyses chatachikiliyi kuyuula, kwachidiña kukala kwakuvulu, chidi neyi antu kudikaña nimajita muWanta wawaPeresi. Chakadi nikujina, ana amavulu afuntili kufuma muwunkoli akameneneña chatela kwakamenawu yisaka yawu. Muloña waniku kukala kwejima kwamweniwu, aYudeya amakwawu atoñojokeli nawu iyi hiyadiña mpinji yayiwahi yakutuñulwilamu tembeli yaYehovaku.—Hag. 1:2.

6. Kwesekeja naZekariya 4:​6, 7, kukalanyi kukwawu kwamweniwu aYudeya, nawa Zekariya wayilejeli nindidi?

⁶ Tañenu Zekariya 4:​6, 7. Kubombela hakukala kwamuchihandilu kwamweneñawu nimajita, aYudeya adiña cheñi nakuyikabisha. Mu 522 B.C.E., ayilumbu jawu akanjikijili nfulumendi yawaPeresi kulonda yilekeshi aYudeya kutuñulula tembeli yaYehova. Ilaña Zekariya wayilejeli aYudeya nindi Yehova wukuzatisha spiritu Yindi yañovu kufumishahu kukala kudi kwejima kukuyikañesha. Mu 520 B.C.E., Mwanta Dariyusi wayitejeli aYudeya kutwalekahu kutuñulula tembeli nawa wayinkeli mali nianguvulu akuyikwashaku kuzata iwu mudimu.—Ezera 6:​1, 6-10.

7. Yumanyi yayiwahi yafuminimu chelili aYudeya afuntili atachiki kusambila kusha muchima hakwila nkeñelu yaNzambi?

 ⁷ Yehova wayikanini antu jindi kuhitila mudi Hagayi niZekariya nindi wukuyikwashaña neyi atwamijaku mudimu wakutuñulula tembeli. (Hag. 1:​8, 13, 14; Zek. 1:​3, 16) Chayikolesheliwu kudi atuprofwetu, ana aYudeya afuntili atachikili cheñi mudimu wakutuñulula tembeli mu 520 B.C.E. nawa amanishili iwu mudimu kwakwihi nayaaka yitanu. Chineli aYudeya atwamijiliku kwila nkeñelu yaNzambi hela chakwila amweneña kukala, Yehova wayikwashileña kumujimba nikuspiritu. Chafuminimu, adifukwileña kudi Yehova namuzañalu.—Ezera 6:​14-16, 22.

8. Mazu ekala haHagayi 2:4 atukwashaña ñahi kusha muchima hakwila nkeñelu yaNzambi? (Talenu cheñi tumazu twaheshina.)

⁸ Chineli lukadi lwasweja lunakuswina kwakwihi, chalema nankashi kudi etu kwanukaña netu twatela kwovwahila lushimbi lwahosha hamudimu wakushimwina. (Maku 13:10) Hela chochu, hadaha chinateli kutukalila kusha muchima hamudimu wakushimwina neyi tunakumona kukala kwamali indi kwiji anakukañesha mudimu wetu wakushimwina. Chumanyi chinateli kutukwasha kutwamijaku mudimu waWanta? Neyi tutwalekañahu kukuhwelela chikupu netu “Yehova wamazaza” b wudi kukabadi ketu. Wukutukwasha neyi tutwalekahu kutwamijaku mudimu waWanta chatela tutwamijiku yuma yitunakukeña. Dichi kwosi chuma chitwatela kutiya womaku.—Tañenu Hagayi 2:4.

9-10. Chuma chayimwekeneni adisumbula amu chayikwashili ñahi kukuhwelela nawu mazu aYesu ekala haMatewu 6:33 alala?

⁹ Talenu chuma chayimwekeneni aOleg nawaIrina, c apayiniya adisumbula. Chabuukililiwu muchipompelu chamwiluña dacheñi kwayiliwu nakukwashana, nyidimu yayimanini muloña wayuma yaswejeli kutama mwituña dawu. Hela chakwila hiyawaninihu mudimu walumbwa hadi chaaka chamukumaku, mpinji yejima amweneña nawu Yehova nakuyikwasha chikupu nawa mpinji jikwawu ayikwashileña kudi amanakwetu niahela. Chumanyi chayikwashili kuumika kukala kwamweneñawu? Manakwetu Oleg waneñeli hakusambila, wahosheli nindi, “Kushimwina mpinji yejima dikwatukwashili kusha muchima hachuma chalema nankashi muchihandilu chetu.” Hampinji yena niñodindi yadiña nakukeñakeñawu mudimu, atwalekelihu kudikita chikupu mumudimu wakushimwina.

¹⁰ Ifuku dimu hanyima yakushimwina, ayilejeli kudi ntuñinawu nindi ibwambu dawu wumu adikundiliwu  nindi wenda makilomita 160 (mamayilu 100) nakuyiletela yola yiyedi mwadiña yuma yakudikwashamu nachu. Manakwetu Oleg wahosheli nindi: “Hanidi ifuku, twamweni cheñi chatwakamenañawu nankashi kudi Yehova nichipompelu. Tunakuhweleli chikupu netu Yehova havulamenaña ambuñindiku, hela chakwila anakutoñojoka nawu kukala kunakumonawu kwakamana wanyi.”—Mat. 6:33.

11. Chumanyi chitwatela kukuhwelela neyi tusha muchima hakwila nkeñelu yaNzambi?

¹¹ Yehova wakeñaña nindi tusheña muchima hamudimu wakuhandisha mawumi awantu wakwilisha atumbanji. Neyi chashimunawu  muparagilafu 7, Hagayi wayikonkomweneni antu jaYehova kutachika chachiha kuzata mudimu wajila, neyi kwiji adiña nakwaala cheñi chikuku chatembeli. Yehova wayikanini ‘kuyitemeshela nkisu’ neyi ela chumichi. (Hag. 2:​18, 19) Ninetu twatela kukuhwelela netu Yehova wukutukiswila neyi tuzata nañovu kutwamijaku mudimu watwinkayi kuzata.

12. Muloñadi Ezera niakwawu ankoli chakeñekeleleñawu kwikala nachikuhwelelu chakola?

¹² Mu 468 B.C.E., Ezera wendeleli hamu nezanvu damuchiyedi dawaYudeya hakufuma muBabiloni nakuya kuYerusalema. Hakwila endi ilu lwendu nakushika kwayileñawu, Ezera niantu ayileñayi nawu akeñekeleña kwikala nachikuhwelelu chakola. Asendeli wuru nisiliva yayivulu yayinkeliyi Mwanta yakuzatisha hakutuñulula tembeli. Dichi yumiyi yadi kuletesha ayilukuki kudi atupondu munjila. (Ezera 7:​12-16; 8:31) Kubombelahu, ashikeneni kwanuka nawu muYerusalema nimwena anateli kuyilukuka. Iwu musumba mwashakamineña hohu antu antesha, nawa mpwembu jawu niyiisu jakeñekeleña kujiwahisha. Yumanyi yitunateli kudizila kudi Ezera kutalisha hakumukuhwelela chikupu Yehova?

13. Yumanyi yamukwashili Ezera kumukuhwelela chikupu Yehova? (Talenu cheñi tumazu twaheshina.)

¹³ Ezera wamweni Yehova chakwashileñayi antu jindi mumpinji yakweseka. Henohu kunashali yaaka yantesha, mu 484 B.C.E., Ezera hadaha wadiña nakushakama muBabiloni hampinji Mwanta Ahasuwerusi yahaniniyi lushimbi lwakujilumuna aYudeya ejima mwahita Wanta wawaPeresi wejima. (Esita 3:​7, 13-15) Wumi waEzera wadiña muwubanji! Muloña waniku kuyichiinisha, aYudeya “mukabeta kejima” ashakamineña chakadi kuda nawa adilileña nakumulomba Yehova nawu ayikwashi. (Esita 4:3) Fwikijenu chatiyili Ezera niaYudeya helili yuma yiyibalumukili ana akasili kafuta kakujilumuna aYudeya! (Esita 9:​1, 2) Yuma yahitilimu Ezera muyina mpinji yakala yatela yamukwashili kwikala wadiloñesha nakweseka kwadi kumwekana kumbidi. Nawa chinamwekani hatooka nawu yumiyi yamukwashili kukuhwelela muñovu jaYehova jakukiña antu Jindi. d

14. Chumanyi chenjili nakwilukayi muhela wumu hamwakameneniwu kudi Yehova hampinji yadiñayi mukukala?

¹⁴ Neyi Yehova nakutwakamena mumpinji yitunakumona kukala, twamukuhwelelaña chikupu. Talenu chuma chamumwekeneni muhela Anastasia, washakamaña kuEastern Europe. Walekeli mudimu wazatileñayi kulonda abuli kudiñija munsañu jamatuña nachiyuulu. Wahosheli nindi: “Aka dikadiña katachi muchihandilu chami kushakama chakadi mali.” Wabombelelihu nindi: “Namushilili Yehova kukala kwami kwejima nawa namweni chankwashiliyi chikupu. Hela chakwila mudimu wumana cheñi, hinakakamaku. Neyi Tata yami wamwiwulu nakuñakamena lelu, dikwila nawu wakañakamena nikumadiki.”

15. Chumanyi chamukwashili Ezera kutwalekahu kumukuhwelela Yehova? (Ezera 7:​27, 28)

¹⁵ Ezera wamweni chamukwashileñawu kudi Yehova muchihandilu chindi. Chakadi nikujina,  kwanuka mpinji yamukwashiliwu kudi Yehova kwamukwashili Ezera kumukuhwelela chikupu. Talenu awa mazu akwila nawu “chikasa chaYehova Nzambi yami chadiña hadi ami.” (Tañenu Ezera 7:​27, 28) Ezera wazatishili nyikuku yanawa mazu yadifwana mapampa 6 mumukanda atenawu nejina dindi.—Ezera 7:​6, 9; 8:​18, 22, 31.

16. Mpinjinyi yitunateli kumona chiwahi Nzambi chinakutukwashayi muchihandilu chetu? (Talenu cheñi mwevulu.)

¹⁶ Yehova nateli kutukwasha neyi tunakuhita mukukala. Chakutalilahu, neyi tulomba kudi mukulumpi wetu wamudimu kulonda atwiteji kuya kukupompa kweluña hela tulomba netu atuhimpiku mudimu wukutushilañaku mpinji yakuyaña kukupompa kwetu kwejima, tunateli kumona Yehova chinakutukwashayi muchihandilu chetu. Munateli kufuma yuma yayiwahi yitwabula nikukuhwelela. Chikufumamu, tukusweja kumukuhwelela Yehova.

17. Ezera wamwekesheli ñahi kudizoza hampinji yamweneñayi kukala? (Talenu mwevulu wudi hakava.)

¹⁷ Ezera walombeli kudi Yehova kulonda amukwashi. Mpinji yejima yaswejeleñayi kwakama muloña wanyidimu yazatileñayi, Ezera walombeleña kudi Yehova. (Ezera 8:​21-23; 9:​3-5) Chilwilu chamwekesheliyi Ezera chaletesheli antu adiñayi nawu kumukwasha nikwimbujola chikuhwelelu chindi. (Ezera 10:​1-4) Neyi tutachika kusweja kwakama hayuma yakumujimba hela hachakukiña chisaka chetu, twatela kumulejamu Yehova mukulomba.

18. Yumanyi yinateli kutukwasha kumukuhwelela chikupu Yehova?

¹⁸ Neyi tudizoza nakumulomba Yehova netu atukwashi nikwiteja wukwashu wafumaña kudi amanakwetu, tukumukuhwelela chikupu Nzambi. Muhela Erika, wukweti anyana asatu, watwalekelihu kumukuhwelela Yehova hampinji yafwishiliyi antu akeñayi. Mumafuku antesha hohu, wafwishili mwanindi wachidiña kanda avwaliki ninfumwindi akeñayi. Chanukiliyi, wahosheli nindi: “Wukushikena kwiluka wanyi Yehova chinateli kukukwashayi. Nateli kukukwasha munjila jakuhayamisha. Nenzi nakwiluka nami kulomba kwami kwakuvulu akwakulaña kuhitila mumazu niyilwilu yamwekeshaña amabwambu jami. Neyi niyilejamu amabwambu jami kukala kwinnakuhitamu, ashikenaña dakunkwasha.”

19-20. Chumanyi chitunakudizila kudi aYudeya akañenyi kufunta kuYerusalema?

¹⁹ Tunateli cheñi kudizilaku chuma chalema kudi aYudeya akañenyi kufunta kuYerusalema. Amakwawu atwesheli kuya wanyi muloña wawushinakaji, yikatu yamaneni, indi kwiji kukala kwamuchisaka. Hela chochu, akwashili ana afuntileña kuhitila mukuhanaku mukudikeñela yuma  yakuzatisha kumudimu wakutuñulula tembeli. (Ezera 1:​5, 6) Chinamwekani neyi chimwahitili yaaka 19 kufuma hashikili izanvu dawantu afuntili kuYerusalema, ana ashalili muBabiloni atwalekelihu kutemesha yawaana kuYerusalema chakufuma hamuchima.—Zek. 6:10.

²⁰ Hela chakwila tunakutiya neyi hitunakuzata mumudimu waNzambi kwesekeja nachitwatela kuzataku, twatela kukuhwelela netu Yehova wasakililaña chitwazataña kwesekeja nahanakumini ñovu jetu kulonda tumutiyisheña kuwaha. Tuneluki ñahi? Mumafuku aZekariya, Yehova walejeli kaprofwetu kindi kutuña chibañula kuzatisha wuru nisiliva yatemesheliwu kudi ankoli adiña muBabiloni. (Zek. 6:11) Ichi “chibañula cheneni” chekalili “chanukishu” chayanukishileña hayawaana yahanineñawu chakufuma hamuchima. (Zek. 6:​14, tth.) Twatela kukuhwelela chikupu netu Yehova wakavulamena wanyi chitwazataña nañovu kumukalakela hampinji yitunakumona kukala.—Heb. 6:10.

21. Chumanyi chakatukwasha kuumika kukala kutwakamona kumbidi?

²¹ Chakadi nikujina, tukutwalekahu kumona kukala munanu mafuku akukuminina, nawa hadaha kumbidi yuma yikutaminañaku. (2 Tim. 3:​1, 13) Hela chochu, bayi tuswejaña kwakamaku. Anukenuña mazu alejeliyi Yehova antu jindi mumafuku aHagayi nindi: “Ami nidi nanenu . . . Bayi mutiya womaku.” (Hag. 2:​4, 5) Ninetu twatela kukuhwelela netu Yehova wukwikalaña nanetu chakala hohu tuzataña hakumina ñovu jetu kwila nkeñelu yindi. Neyi tuzatishaña yuma yitunadizili kuwuprofwetu waHagayi niwaZekariya kushilahu niyuma yeliliyi Ezera, tukutwalekañahu kumukuhwelela chikupu Yehova hela chakwila twakamona kukala kwamuchidinyi kumbidi.