1, 2. (a) Kuwunda kwamuchidinyi kutwadiluñishaña? (b) Chumanyi chinateli kutukañesha kwikala mukuwunda kwakweni makonu? (Talenu mwevulu wakutachikilahu.)

WEJIMA wetu twakeñaña kushakama mukuwunda, chakadi kwakama. Twatiyaña kuwaha muloña Yehova watwinka “kuwunda kwaNzambi,” kuwunda kwamukachi kwatukiñaña kuyitoñojoka yatama niyakuhila. (Fwi. 4:6, 7) Chineli twadihana kudi Yehova, twekalaña “mukuwunda naNzambi,” nikwikala nawubwambu wawuwahi nayena.—Rom. 5:1

² Hela chochu, mpinji yakaletayi Nzambi kuwunda kwakweni kanda yishiki. Ayinu mpinji yakala yamumafuku akukumina munenzali yikonkojola, nawa antu amavulu anakutiyañana wanyi. (2 Tim. 3:1-4) Etu akwaKristu, twatela kuzuña njita yakuspiritu naSatana nintañishilu yindi yakutwamba yatandishañayi. (2 Kor. 10:4, 5) Ilaña sweje-e antaña jetu abula kwitiya diwu anateli kuluwañesha kuwunda kwetu. Amakwawu anateli kusekesha yuma yitwakuhwelela, kututwambila nawu twasandaña yisaka  hela kutukaanisha kumukalakela Nzambi. Twatela kwila ñahi nekañesha damuchisaka? Tunateli kushinda ñahi kukala kwaletaña chisaka?

3, 4. (a) Ntañishilu yaYesu yaletaña kukalanyi? (b) Mpinjinyi yekala yakala kulondela Yesu?

³ Yesu welukili nindi ntañishilu yindi yikaambula antu nawa ejima akumulonda atela kwikala ahamuka hakwila nawu ashiindi ikañesha dikumonawu. Idi ikañesha dakojejaña antu muchisaka kubula kwikala mukuwunda. Yesu wahosheli nindi: “Bayi mutoñojoka nenu nenjili nakuleta kuwunda hamasekiku; nenjili nakuleta mpoku yakabali bayi kuwundaku. Muloña nenjili nakuleta chaambu hadi mwana weyala natata yindi, mwana wamumbanda namama yindi nawa mumbanda wesumbu namuku windi wamumbanda. Chalala, ayilumbu jamuntu akekala antu amwitala dindi yomweni.”—Mat. 10:34-36.

⁴ Yesu chahosheliyi nindi, “Bayi mutoñojoka nenu nenjili nakuleta kuwundaku,” watalishili mukwila nindi antiyilili indi amakwawu atela kutoñojoka hakukala kwekala mukumulondela. Nsañu yindi yinateli kwaambula antu. Hela chochu, nkeñelu yaYesu yadiña yakushimwina nsañu yachalala chaNzambi kudi antu, bayi neyi kumanisha wuntañaku. (Yow. 18:37) Ilaña, muntu chinateli kumukalila kukakela kuntañishilu yaKristu neyi ibwambu dindi hela ntaña yindi nakaani chalala.

5. Atumbanji twaYesu amonaña kukalanyi?

⁵ Yesu wahosheli cheñi nindi atumbanji twindi atela kuumika ikañesha damuchisaka. (Mat. 10:38) Atumbanji twindi atela kuumika ikañesha dawantaña jawu hakwila amwekeshi nawu amulondelaña Kristu. Hela chochu, akweti yuma yayivulu kubadika yinajimbeshiwu.—Tañenu Maku 10:29, 30.

6. Twatela kwanuka netudi neyi antaña anakutukañesha kudifukula kudi Yehova?

⁶ Hela chakwila antaña jetu anakutukañesha kudifukula kudi Yehova twatela kutwalekahu kuyikeña, ilaña twanukeña netu twatela kusambila kukeña Nzambi niKristu. (Mat. 10:37) Twatela kwiluka cheñi netu Satana nateli kuzatisha kukeña kutwakeña chisaka chetu kulonda tufumpi kashinshi ketu. Tuhanjekenu hakukala kumu nichitunateli kukumanisha munjila yayiwahi.

7. Antu akweti enikwawu abula kwitiya atela kwiladi?

⁷ Bayibolu yasoñamishaña nawu akusumbula “akumonaña yihuñu mumujimba wawu.” (1 Kor. 7:28) Neyi mwinikwenu hiChinsahu wanyi, mukumonaña kukala nawa mukwakamaña nankashi muwulu wenu. Hela chochu, mwatela kumona yuma neyi chayimonañayi Yehova. Himwatela kwaambuka hela kudiseña muloña mwinikwenu nakaani kumulondela Kristuku. (1 Kor. 7:12-16) Hela chakwila iyala wabula kwikala Chinsahu watela wanyi kulombola yuma yakuspiritu, ilaña watela kulemeshewa muloña diyi mutu wachisaka. Munjila yoyimu, iyala mukwaKristu wasumbula mumbanda wabula kwitiya watela kumumwekeshela ñodindi kukeña nawa watela kumwakamena.—Efwe. 5:22, 23, 28, 29.

8. Malwihwinyi imwatela kudihula neyi mwinikwenu nakuyikañesha kudifukula?

⁸ Mukwila ñahi neyi mwinikwenu nakuyikañesha kudifukula? Chakutalilahu, muhela wumu amwinkeli mafuku amu mumulungu akuya mumudimu wamwinha kudi nfumwindi. Neyi munakumona kukala kwamuchidiwu, dihulenu nenu: ‘Mwalala nakunkaanisha kudifukula kudi Nzambi yami? Neyi nakunkaanisha wanyi, kwila nila chananlejiyi nehi?’ Kwovwaha  kukuyikwasha kutondolwelela yikonkojokala yabula kutelela.—Fwi. 4:5.

9. AkwaKristu anateli kudizisha ñahi anyanawu kulemesha nvwali wabula kwitiya?

⁹ Chakala kudizisha anyana neyi mwinikwenu hetiyaku. Chakutalilahu, mwatela kuyidizisha anyanenu kwovwahila nshimbi yamuBayibolu yakwila nawu: “Lemeshaku tata yeyi nimama yeyi.” (Efwe. 6:1-3) Indi neyi mwinikwenu walondelaña wanyi chikupu nshimbi jamuBayibolu? Tachikilenuhu kumulemesha mwinikwenu. Monenuña yilwilu yindi yayiwahi nawa muhamekenuña mwinikwenu. Bayi muhosha yuma yatama hadi mwinikwenu hamesu awanyanaku. Ilaña, yilumbulwilenu nenu muntu wejima watela kutonda kumukalakela Yehova hela nehi. Yilwilu yayiwahi yawanyana yinateli kuletesha nvwali wabula kwitiya kwiteja chalala.

10. Anvwali akwaKristu anateli kudizisha ñahi anyana Bayibolu muchisaka chaambuka mukudifukula?

¹⁰ Mpinji yikwawu, mwinikwenu wabula kwitiya nateli kuhosha nindi anyana akwanakanaña yidika hela akudizaña ntañishilu yakutwamba. Amayala amakwawu anateli kukaanisha añodijawu akwaKristu kudizisha anyana Bayibolu. Hela chochu, mumbanda mukwaKristu watela kuzata nañovu kulonda yadizishi anyana Bayibolu. (Yilw. 16:1; 2 Tim. 3:14, 15) Chakutalilahu, iyala wabula kwikala Chinsahu nateli kumukaanisha ñodindi kudizisha anyana Bayibolu hela kuya nawu kukupompa kwawakwaKristu. Hela chakwila wukulondela munafuukuli iyala, mumbanda watela kumwekesha chikuhwelelu chindi hamesu awanyana neyi iyala hosi, watela kuyileja yilwilu yayiwahi nikuyidizisha hadi Yehova. (Yilw. 4:19, 20)  Hadaha anyana kumbidi akafuukulahu kutalisha hakudifukula.—Kuhit. 30:19, 20. *

11. Yumanyi yinateli kuleta kukala nawantaña abula kwikala aYinsahu?

¹¹ Chitwatachikili kudiza, hadaha hitwayilejelihu antaña jetu netu twadizaña nawaYinsahu jaYehovaku. Chikuhwelelu chetu chatachikili kusweja kutoha, dichi twamweni netu twatela kuyilejaku yuma yitwakuhwelela. (Maku 8:38) Neyi yuma yakuspiritu yimunakwila yinakuleta kukala nawantaña jenu abula kwikala aYinsahu, talenu njila jimwatela kukañesha kukala iku saña mwashinshikila.

12. Chumanyi chikuletesha antaña abula kwitiya kutukañesha, hanu tunateli kuyimwekeshela ñahi wushona?

¹² Yitiyilenuña wushona antaña abula kwitiya. Tunateli kutiya kuwaha nachalala chamuBayibolu chitunadizi, ilaña antaña jetu anateli kumona nawu anatudimbi hela nawu tuneñili mukwitiya kwakutwamba. Anateli kumona nawu tunaleki kuyikeña muloña hitunakwanakana nawu hamu mafuku akunookaku. Anateli nikwakama chakekala chihandilu chetu kumbidi. Twatela kumwekesha wushona kuhitila mukumona yuma neyi chinakuyimonawu nikuyitiyilila kulonda twiluki yuma yinakwakamenawu. (Yish. 20:5) Kapostolu Pawulu wazatili nañovu kutiyilila “antu ejima” kulonda yayishimwini nsañu yayiwahi, nawa ninetu twatela kwila mwomumu.—1 Kor. 9:19-23.

13. Tunateli kuhosha ñahi nawantaña jetu abula kwitiya?

¹³ Hoshenu munjila yayiwahi. Bayibolu yahosha nawu: “Mazu enu mpinji yejima ekaleña amawahi.” (Kol. 4:6) Twatela kumulomba Yehova spiritu yajila kulonda yitukwashi kumwekesha nyikaabu yayu neyi tunakuhosha nawantaña jetu. Bayi tuditadikishaña hansañu jejima jakutwamba jetiyawuku. Neyi atuneñesha nayuma yinahoshiwu hela yineliwu, twatela kwila neyi cheliliwu apostolu. Pawulu wasonekeli nindi: “Neyi atutuka, etu twayikiswilaña; neyi atukabisha, etu twomikaña nakudiwunjika; neyi atutwambila, etu twayakulaña munjila yakudizoza.”—1 Kor. 4:12, 13.

14. Yumanyi yafumaña mukutwalekahu kwikala nayilwilu yayiwahi?

¹⁴ Twalekenuhu kwikala nayilwilu yayiwahi. Hela chakwila nhoshelu yayiwahi yinateli kutukwasha kumanisha kukala nawantaña anakutukañesha, yilwilu yetu yayiwahi yinateli kutukwasha chikupu. (Tañenu 1 Petulu 3:1, 2, 16.) Ilenuña yuma yayiwahi kulonda antaña jenu amoneña nawu aYinsahu jaYehova ekala namuzañulu muwulu, akamenaña anyanawu nawa ekala nayilwilu yayiwahi. Hela chakwila antaña jetu akaanaña chalala, tunateli kwikala namuzañalu wafumaña mukumutiyisha Yehova kuwaha neyi twikala ashinshika.

15. Tunateli kwiluka ñahi chadimu yuma yinateli kuleta yikonkojola?

¹⁵ Ilukilenu chadimu yuma yikamwekana. Ilukenu yuma yikuletesha yikonkojola, nawa monenu chimunateli kwila. (Yish. 12:16, 23) Muhela wakuAustralia wahosheli nindi: “Akawuku awamayala asekesheleña chalala. Henohu kanda tuyi nakuyihempula, ami nanfumwami twalombeleña kudi Yehova kulonda yatukwashi tubuli kuyaakula munjila yatama. Twaloñesheleña nsañu yitwatela kuhanjeka nawu kulonda neyi tunayi tuhanjekeña nawu munjila yayiwahi. Twayihempwileña mukapinji kantesha kuchina netu twakenda kuhanjeka hansañu yikuletesha tuditadikesheña hakwitiya.”

16. Munateli kutondolwela ñahi kudinka nyiloña yakuneñesha antaña jenu?

 ¹⁶ Hela chochu, mukutwesha wanyi kutondolwela kukala kwejima kwafumaña kudi antaña jenu abula kwitiya. Kukala kwamuchidiwu kunateli kuyiletesha kudinka nyiloña, muloña mwayikeña nankashi antaña jenu nawa mwafwilaña kuyitiyisha kuwaha. Neyi dichi mwatiyaña, ilukeñu nenu mwatela kwikala ashinshika nikumukeña nankashi Yehova kubadika chimwakeña antaña jenu. Neyi mukwila mwenimu, antaña jenu akumona nawu kuzatisha kufumba kwamuBayibolu kwalema nankashi muloña munateli kufuma wumi hela kufwa. Hela chochu, ilukenu nenu himwatela kukanjikija muntu kwiteja chalalaku. Ilaña, yikwashenu amoni kulondela nshimbi jaYehova chikunayikwashi. Nzambi yetu wukweti kukeña wukuyikwasha kutondahu kumukalakela neyi chochatukwashiliyi etu.

17, 18. Chumanyi chinateli kuyikwasha kuumika neyi ntaña yenu naleki kumukalakela Yehova?

¹⁷ Neyi muntu wamuchisaka anamuhañi muchipompelu hela nadaambuli nachipompelu, chakataña nankashi kumuchima neyi mpoku yakabali. Munateli kuumika ñahi kukala kwamuchidiwu?

¹⁸ Twalekenuhu kwila yuma yakuspiritu. Koleshenu chikuhwelelu chenu kuhitila mukutaña Bayibolu mpinji yejima, kuloñesha nikuya kukupompa kwawakwaKristu, kuya mumudimu wakushimwina nikulomba kulonda muumiki. (Yuda 20, 21) Hanu dinu mukwila ñahi neyi mumona nenu munakwila yuma yejimiyi, ilaña munakutoñojoka hohu hakukala kumunakumona? Bayi muzeyaku. Kwila yuma yakuspiritu, kukuyikwasha kutondolwela yitoñojoka yatama nichimunakutiya. Toñojokenu chuma chamumwekeneni nsoneki yeSamu 73. Wadiña nakutoñojoka mwaluwa nawa waneñeli, ilaña walekeli yitoñojoka yeniyi cheñililiyi mwitala daNzambi dakudifukwila. (Mas. 73:16, 17) Kudifukula kudi Yehova nakashinshi, kukuyikwasha ninenu kuhimpa yitoñojoka yenu.

19. Munateli kumwekesha ñahi nenu mwalemesha ntanjikilu yaYehova yakubabeshelamu?

¹⁹ Lemeshenu kufumba kwaYehova. Ntanjikilu yindi munateli kufuma yuma yayiwahi yinateli kukwasha antu ejima, kushilahu nimuntu wunavulumuni hela chakwila chinateli kukata kumuchima. (Tañenu Aheberu 12:11.) Chakutalilahu, Yehova watukaanisha “kudibomba” nawantu abulaña kubalumuka mumuchima. (1 Kor. 5:11-13) Hela chakwila chikutukata kumuchima, twatela kuleka kuhanjeka namuntu wamuchisaka ahañawu muchipompelu hafoni, kuditemeshela mameseji, maemelu ninjila jikwawu jakuhanjekelamu.

20. Chumanyi chitwatela kuchiñeja?

²⁰ Twalekenuhu kuchiñeja. Kukeña “kwachiñejaña yuma yejima” nawa kwachiñejaña nawu antu ejima amushiya Yehova akafunta cheñi kudi yena. (1 Kor. 13:7) Neyi mumona nenu muntu wamuchisaka hakubalumuka mumuchima, munateli kulomba nenu Nsona yimukwashi kulonda yeteji mazu aYehova akwila nawu: “Funtaku kudami.”—Isa. 44:22.

21. Mwatela kwiladi neyi chisaka chenu chinayiheli muloña wakwikala kambanji kaYesu?

²¹ Yesu wahosheli nindi twatela kumukeña kubadika chitwakeña antu. Hela chochu, wakuhweleleli nindi atumbanji twindi atela kwikala ahamuka hakwila nawu atwalekihu kwikala ashinshika hela chakwila anakumona ikañesha. Neyi kwikala kambanji kaYesu kunaleti “mpoku yakabali” muchisaka chenu, mushindamenenu Yehova kulonda yayikwashi kushinda kukala kwamuchidiwu. (Isa. 41:10, 13) Ilukenu nenu Yehova niYesu atiyaña kuwaha chimunakuumika nawa akayikiswila muloña wakashinshi kenu.