1. Kukeña kwamuchidinyi kwabadika, nawa muloñadi chikwabadikila? (Talenu mwevulu wakutachikilahu.)

KUKEÑA kwashindamena hayishina (a·gaʹpe) hichawaana chatwinkayi Yehova. Diyi Ntachiki yakukeña. (1 Yow. 4:7) Iku kukeña dikwabadika hakukeña kwejima. Hela chakwila kwabombelamu kudikunda namuntu, ilaña kwakeñekaña kuyilila antu yuma yayiwahi yinakukeñawu. Mukanda wumu wahosha nawu kukeña kwa a·gaʹpe “anateli kukwilukila kuyilwilu.” Neyi tumwekesha hela atumwekeshela kukeña kwakadi kudimbana, twatiyaña kuwaha chikupu.

2, 3. Yehova namwekeshi ñahi kukeña kwadi kudimbana?

² Yehova wamwekesheli nindi wakeña antu nihampinji yadiñayi kanda yaleñi Adama naEva. Waleñeli iseki nindi antu ashakameñahu haya nyaaka. Antu ateleleli kushakama mudini iluña nakudiluñisha wumi chikupu. Yehova waleñeli iseki nindi etu tudiluñisheña bayi yenaku. Wamwekesheli cheñi kukeña kwakadi kudimbana kuhitila mukuyinka anyanindi ahamaseki muchima wakufwila kushakama haya nyaaka muParadisa yayiloñesheleliyi.

³ Chelili aAdama naEva adikañi, Yehova wahosheli mazu amwekesheli kukeña kwakadi kudimbana. Wayiloñesheleli  ifutu danyiloña anyana kanawa antu ayedi adikañili, welukili nindi amakwawu akatiya kuwaha nakukeña Kwayimwekesheleliyi. (Kutach. 3:15; 1 Yow. 4:10) Kufuma tuhu hampinji yelili Yehova yakani Chamwinu, Wamweni neyi iwu mulambu wawulambula dehi. Cheñi, chimwahitili yaaka 4,000, Yehova wadibondeli hakuhana Mwanindi wumu hohu akeñayi mukaayi. (Yow. 3:16) Twatiyaña kuwaha Yehova chamwekesheliyi kukeña kwakadi kudimbana.

4. Chumanyi chinakumwekesha nawu antu abula kuwanina anateli kumwekesha kukeña kwakadi kudimbana?

⁴ Twamwekeshaña kukeña kwakadi kudimbana muloña Nzambi watuleñeli neyi chochekalayi. Nshidi yitwaswana yakojejaña chitukalili kumwekesha kukeña, ilaña tunateli kukumwekesha. Abeli wamwekesheli nindi wamukeñeli Nzambi chakadi kutwamba chalambwiliyi chuma chabadika chadiñayi nachu. (Kutach. 4:3, 4) Nowa wamwekesheli kukeña kwakadi kudimbana kuhitila mukuyishimwina antu nsañu yaNzambi hayaaka yayivulu hela chakwila kwosi wetejeli. (2 Pet. 2:5) Abarahama wamukeñeli Nzambi chikupu kubadika yomweni hampinji yamulejeliwu nawu yalambuli mwanindi Isaka. (Yak. 2:21) Kufwana awa amayala ashinshika, twatela kumwekesha kukeña hela chakwila tunakumona kukala.

5. Munjilanyi mutunateli kumwekeshela kukeña kwalala?

⁵ Bayibolu yalumbulula nawu kukeña kwalala akumwekeshaña, bayi “namazu hela hakanwaku, ilaña munyidimu nimuchalala.” (1 Yow. 3:18) Komana chumichi chinayi mukwila nawu hitwatela kumwekesha kukeña munhosheluku? Inehi mwani! (1 Tes. 4:18) Ilaña, chinayi mukwila nawu kukeña hikwatela kukumina hohu hakanwaku, sweje-e neyi kunakukeñeka wukwashu. Chakutalilahu, neyi mukwenu mukwaKristu wudana yuma yakumujimba, mwatela kumukwasha chatela mukumini dakuhosha hohu hakanwa. (Yak. 2:15, 16) Munjila yoyimu, kukeña kutwamukeña Yehova niakwetu antu kwatusañumunaña kumulomba Nzambi netu ‘yatemeshi akwakukalakala mumudimu wakumuna’ nawa ninetu yatukwashi tukalakali mudimu wakushimwina.—Mat. 9:38.

6, 7. (a) Kukeña “kwakadi wunfwikiji” kwatalisha mudihi? (b) Shimunenu yakutalilihu yakukeña kwawunfwikiji?

⁶ Kapostolu Yowanu wasonekeli nindi twatela kumwekesha kukeña “munyidimu nimuchalala.” Dichi, kukeña kwetu kwatela kwikala “kwakadi wunfwikiji.” (Rom. 12:9; 2 Kor. 6:6) Chumichi chinayi mukwila nawu hitwatela kumwekesha kukeña kwalala henohu mumuchima mudi jacheñi, neyi kwiji tunavwali ikishiku. Tunateli kudihula netu, ‘Komana kwekala kukeña kwawunfwikiji?’ Kwekala wanyi. Iku hikukwikala kukeñaku ilaña kukwikala kwamukunkulwayi.

⁷ Tushinshikenu yakutalilahu yakukeña kwakutwamba. Mwitempa daEdeni, Satana watwambili neyi kwiji nakukeña kumukwasha Eva, ilaña yilwilu yindi yadiña yakudikeña yomweni nawa yawunfwikiji. (Kutach. 3:4, 5) Mumafuku aDavidi, Ahitofweli wamwekesheli nindi wubwambu windi namwanta wadiña wamakudi. Ahitofweli wekalili nfukeji chelili yamoni nindi akumutiya kuwaha. (2 Sam. 15:31) Munjila yoyimu nimakonu, akwakusekesha niantu amakwawu aletaña chaambu muchipompelu azatishaña “nhoshelu yawu yakudimbeka nimumazu awu amwovu akulambisha” kulonda amwekani neyi akweti kukeña, ilaña akeñaña kuditiyisha aweni kuwaha.—Rom. 16:17, 18.

8. Lwihwinyi lutwatela kudihula etu aweni?

⁸ Kukeña kwawunfwikiji kwatiyishaña nsonyi muloña kwamwekeshaña wanyi yilwilu  yaNzambi yakukeña kwakudihana. Wunfwikiji wamuchidiwu wadimbaña antu, bayi Yehovaku. Yesu wahosheli nindi antu adi neyi anfwikiji akayibabesha “nankashi.” (Mat. 24:51) Dichi, ambuña aYehova akeñaña wanyi kumwekesha kukeña kwawunfwikiji. Hela chochu, twatela kudihula netu, ‘Komana namwekeshaña kukeña kwalala, bayi kwakutwamba nawa kwakuditiyisha kuwahaku?’ Tuhanjekenu hanjila 9 yakumwekeshelamu kukeña “kwakadi wunfwikiji.”

9. Kukeña kwalala kukutukojeja kwiladi?

⁹ Zatenuña chakadi antu kwiluka. Twatela kuyimwekeshela amanakwetu kukeña chakudikeñela ‘mukujinda,’ hela chakadi antu amakwawu kwiluka. (Tañenu Matewu 6:1-4.) Ananiya niSafwira akañenyi kwila mwenimu. Chatela ahani nyilambu chakadi antu kwiluka, wena ashimwini hatooka nawu akuhana nawa mwafumini yuma yatama muwunfwikiji wawu. (Yilw. 5:1-10) Kwambukaku, kukeña kwalala kwatusañumunaña kuyikalakela amanakwetu namuzañalu chakadi antu amakwawu kwiluka. Chakutalilahu, amanakwetu akwashaña Izanvu Dalombolaña kuloñesha yakuda yakuspiritu elaña mwenimu chakadi kudisamba hela kushimuna kajindilu kayuma yinakuzatawu.

10. Tunateli kutachikilahu ñahi kulemesha antu amakwawu?

¹⁰ Tachikilenuhu kulemesha antu amakwawu. (Tañenu Aroma 12:10.) Yesu walemesheleña antu amakwawu kuhitila mukuzata nyidimu yamukunkulwayi. (Yow. 13:3-5, 12-15) Twatela kuzata nañovu kulonda twikali adizoza hakwila nawu tumwekeshi kalemesha kudi amakwawu. Niapostolu elukili wanyi chaletesheli Yesu yalemesheña antu sampu nimpinji yatambwililiwu spiritu yajila. (Yow. 13:7) Twatela kulemesha antu amakwawu kuhitila mukubula kudimona neyi twalema kubadika amakwawu muloña washikola, maheta hela nyidimu yitukweti mumudimu waYehova. (Rom. 12:3) Nawa hitwatela kutiyila ichima antu anakulemeshawuku, ilaña twatela kuzañalala nawu hela chakwila tunamoni netu ninetu atela kutulemesha hela netu twazatiliku owu mudimu.

11. Muloñadi chitwatelela kuhameka akwetu chakufuma hamuchima?

¹¹ Hamekenu amanakwenu chakufuma hamuchima. Mwatela kuhamekaña antu amakwawu mpinji yejima muloña yumiyi yinateli “kutuña akwenu.” (Efwe. 4:29) Hela chochu, twatela kuyihameka chakufuma hamuchima. Neyi nehi, tukuyitiyishaña hohu antu kuwaha hela tukukañanya kuyifumba. (Yish. 29:5) Kumuhameka muntu iku kumbandi tunakuhosha chatama hadi yena hiwunfwikiji. Kapostolu Pawulu dicheliliyi wanyi nawa wamwekesheli kukeña kwalala munjila yahamekeleñayi amakwawu. Chakutalilahu, wayihamekeli akwaKristu amuKorinda hayuma yayiwahi yelileñawu. (1 Kor. 11:2) Ilaña neyi analuwañeshi wayihamekeleña wanyi, wayilejeleña mumesu awunda nawa chatiyakana.—1 Kor. 11:20-22.

12. Tunateli kumwekesha ñahi kukeña kwalala neyi tunakumwekesha chisambu?

¹² Ikalenu nachisambu. Yehova watulejaña nindi tumwekesheña chisambu kudi amanakwetu niahela. (Tañenu 1 Yowanu 3:17.) Ilaña, twatela kwila mwenimu chakufuma hamuchima, chakadi lwisu. Tunateli kudihula etu aweni netu: ‘Komana namwekeshaña hohu chisambu kudi amabwambu jami, antu aya mpuhu hela antu akankwasha kumbidi? Indi kwiji natoñojokaña njila mwakumwekeshela amanakwetu nawahela chisambu inabula kwiluka hela abula yuma yakunyika?’ (Luka 14:12-14) Tukwila  ñahi neyi mukwetu mukwaKristu wudi mukukala muloña wakubula kufuukula chiwahi hela natusakilili wanyi hachisambu chitwamumwekeshela? Muyuma yamuchidiwu, twatela kuzatisha kufumba kwakwila nawu: “Ikalenu nachisambu kudi wumu namukwawu chakadi kutooba.” (1 Pet. 4:9) Neyi mulondela iku kufumba, mukwikala namuzañalu wafumaña mukuhana chakufuma hamuchima.—Yilw. 20:35

13. (a) Mpinjinyi yekala yakala kukwasha antu azeya? (b) Yumanyi yitwatela kwila kulonda tukwashi azeya?

¹³ Koleshenu azeya. Tunateli kumwekesha kukeña kwalala neyi tulondela kufumba kwamuBayibolu kwakwila nawu, “koleshenu azeya nawa ikalenu mukuwunda nawantu ejima.” (1 Tes. 5:14) Hela chakwila antu azeya ekalaña akola muchikuhwelelu mukuhita kwampinji, amakwawu akolaña swayi wanyi, akeñekaña kutwalekahu kuyikolesha. Tunateli kuyikolesha neyi tuyitañila Nsona yayiwahi, kuya nawu nakushimwina hela kwikala nampinji yakuyitiyilila. Kubombelahu, chatela tushikeneña dakutoñojoka netu manakwetu hela muhela “wakola” hela netu “wazeya,” twatela kwiluka netu wejima wetu kudi hitwakolela nihitwazeyela. Nikapostolu Pawulu welukili kuzezeya kwindi. (2 Kor. 12:9, 10) Dichi, wejima wetu twahetelañamu neyi atukolesha kudi akwetu akwaKristu.

14. Twatela kwiladi hakwila nawu twikali mukuwunda nawamanakwetu?

¹⁴ Letenu kuwunda. Twatela kuzata nañovu kulonda twikali mukuwunda nawamanakwetu, hela chakwila tunamoni netu anatwili chatama. (Tañenu Aroma 12:17, 18.) Kulomba kwanakena kunateli kuwundisha muchima, nawa kwatela kufuma hamuchima. Chakutalilahu, chatela muhoshi nenu, “Ñanakeniku neluka wanyi nami wukuhila,” ilaña mwatela kwiteja nenu munaluwañeshi neyi muhosha nenu, “Ñanakeniku hakukuhilisha namazu inahosha.” Sweje-e adisumbula atela kwikala mukuwunda. Eyala namumbanda atela wanyi kutwamba hadi antu neyi adikeña, henohu kwankawawu adihililaña, kudihosha mazu akasuwuntu hela kuzuña.

15. Tunateli kumwekesha ñahi netu tunakwanakena chakufuma hamuchima?

¹⁵ Anakenenuña chakufuma hamuchima. Twamwekeshaña netu tunamwanakeni muntu neyi tujimbala yuma yatama yinatwiliyi nikubula kumushila ndulu. Tunateli kwanakena chakufuma hamuchima antu anabuli kwiluka nawu anatuvulumuni neyi ‘tuditiyilila wumu namukwawu mukukeña, nikwikala mukuwunda wumu namukwawu nawa nikufwila chikupu kuhemba kunuñañana.’ (Efwe. 4:2, 3) Hakwila nawu twanakeneña chakufuma hamuchima, twatela kuhimpa chitwatoñojokaña kulonda tubuleña ‘kuhemba nkunyi.’ (1 Kor. 13:4, 5) Neyi tuhemba ndulu ninkunyi, wubwambu wetu namanakwetu hela muhela wukumana, nawa ninaYehova wukumana. (Mat. 6:14, 15) Tunateli cheñi kumwekesha netu tunanakeni chikupu  neyi tulombelaku antu anatuvulumuni.—Luka 6:27, 28.

16. Twatela kumona ñahi kukooleka kutukweti mumudimu waYehova?

¹⁶ Ilenuña yuma yakutiyisha antu amakwawu kuwaha. Neyi atwinka kukooleka mumudimu waYehova, tunateli kukwizatisha iku kukooleka kulonda tumwekeshi kukeña kwalala kuhitila mukubula ‘kufwila yuma yakuditiyisha kuwaha etu aweni, chiña yuma yakutiyisha akwetu kuwaha.’ (1 Kor. 10:24) Chakutalilahu, hakupompa kwañiinza nikweluña, atulama eñilañahu dehi mwiluña dakushakama henohu amakwawu kanda eñili. Chatela amoneña mudimu wawu neyi wukuyikwasha kuwana yitwamu yayiwahi yakushakama aweni niyisaka yawu, awa amanakwetu atondaña yitwamu yabula kushikila yidi hakadiluña kanakuzatilawu. Neyi ela mwenimu, dikwila nawu anakumwekesha kukeña kwakadi wunfwikiji. Munateli kuyimbujola ñahi?

17. Kukeña kwalala kwasañumunaña muntu kwiladi neyi nakoñi nshidi yahamesu bwi-i?

¹⁷ Shimunenu nshidi nawa lekenu kuyila mukuswamojoka. AkwaKristu amakwawu elahu dehi nshidi yahamesu bwi-i afwilaña kusweka nshidi jawu nawu abuli kusawuka hela kuneñesha amakwawu. (Yish. 28:13) Ilaña, yitoñojoka yamudichiwu yatama, yakisañanaña muntu wunavulumuni niantu amakwawu. Yinateli kukañesha spiritu yaNzambi kukwasha chipompelu nawa chikwikala mukuwunda wanyi. (Efwe. 4:30) Kukeña kwalala kukusañumuna akwaKristu akoñahu dehi nshidi yamaneni kushimuna kudi aeluda kulonda ayikwashi.—Yak. 5:14, 15

18. Kukeña kwalala kwalemenadi?

¹⁸ Kukeña dichilwilu chabadika hayilwilu yejima. (1 Kor. 13:13) Dichilwilu chatwilukilañawu antu nawu tudi atumbanji twaYesu nawa akwakumwimbujola Yehova, Ntachiki yakukeña. (Efwe. 5:1, 2) Pawulu wasonekeli nindi: “Neyi . . . nikweti wanyi kukeña, dikwila nawu nidi wamukunkulwayi.” (1 Kor. 13:2) Tutwalekenuhu kumwekesha kukeña, bayi ‘mumazu’ hohuku ilaña ‘nimunyidimu nimuchalala.’