Tata yaJohn amupapatishili nakwikala Chinsahu chaYehova mumusumba wanyanya muGujarati, India mu 1950. John nianakwindi nawahela 5 nimama yawu adiña aKatolika nawa adiña nakusekesha yuma yakuhweleleliwu atata yawu.

Ifuku dimu, tata yindi wamutumini John nindi yatwali envelopu kudi ibwambu dindi wakuchipompelu. Hadodina ifuku nantetemena, John wadikatishili kumunu nachifwoyu. Hela chochu, wovwahilili tata yindi, wadikasili kumunu wadikatishiliyi nawa wayili hamaseki nakutwala envelopu.

Chashikili John kwamutuminiwu, wawaninihu ñoda ona watwalilileñayi envelopu, niyena wadiña Chinsahu chaYehova. Chelili nindi yatambuli, wamweni munu waJohn wadikatishiliyi nawa wamukwashili. Wanoneli tuyitumbu, wamukoseli hachilonda nayitumbu nawa wamukasilihu. Kuhiñahu wamwinkeli kaapu yatii nawa wamulumbulwilili nsañu yamuBayibolu munjila yayiwahi.

Haniyi mpinji, John watachikili kuleka kuhela aYinsahu, dichi wamwihwili kulonda yamuleji chaambu chidi hayuma yakuhwelela tata yindi nayuma yakuhwelelayi yena. Wehwili neyi Yesu hiNzambi nawa neyi akwaKristu atela kulomba kudi Mariya. Chineli wadizili idimi dahosheleñayi John daGujarati, iwu Chinsahu wamwakwili kufuma muBayibolu nawa wamwinkeli kamukanda ‘kaThis Good News of the Kingdom.’

Chimwahitili mpinji, John chatañiliyi kamukanda, wamweni nindi dihu hanatachikiyi kutiya chalala chamuBayibolu. Wayili nakumwihula kapristu kindi malwihu wowamu. Kapristu wazuwili nawa wamwasili Bayibolu, nakuhosha nindi: “Wudi Satana! Nleji hasonekawu muBayibolu nawu Yesu hiNzambiku. Nleji hasonekawu nawu bayi wudifukula kudi Mariyaku. Nleji endeshaña!” John wahayamini chakwiliyi kapristu nawa wamulejeli nindi: “Hinamba kadatila cheñi muchechi yaKatolikaku.” Mwalala hadatililimuku.

John watachikili kudiza nawaYinsahu, watachikili kuhakwilaku kudifukula kwalala nawa watachikili kumukalakela Yehova. Mukuhita kwampinji, amanakwindi niahela atachikili kudiza. John niyinu mpinji wuchidi nachibata kumunu windi kwadikatishiliyi yaaka 60 yinahitihu. Wanukaña luwi lwamumwekesheleliwu kudi mukwaKristu wumu lwamukwashili kutachika kudifukula kwalala.—2 Kor. 6:4, 6