YOSEFU WAKUARAMATEYA welukili wanyi chahamukiliyi kuya nakudimona nanguvulu wawaRoma. Pontusi Pilatu wadiña wakalisha chikupu. Dichi, hakwila nawu Yesu amujiiki mwijamu dadiwahi, kudi muntu wayili nakulomba mujimba windi kudi Pilatu. Yuma yatoñojokeleñayi Yosefu nindi neyi yaya nakudimona nindi yamwekeni wanyi. Pilatu chamulejeliwu kudi mukulumpi wamashidika nawu Yesu nafwi, wamwinkeli Yosefu mujimba. Dichi, hela chakwila Yosefu wachidiñi waneña, wayili swayi-swayi kwamujihililiwu Yesu.—Maku 15:42-45

• Iwu Yosefu wakuAramateya wadiñanyi?

• Wuntañanyi wadiña hakachi kindi naYesu?

• Muloñadi chimwatela kudiza nsañu yindi?

Nsañu Yayiwahi yonenawu yaMaku yamutena Yosefu nawu wadiña “chilolu wamuChota.” Chota chinakutenawu hanu hiSanihedirini, chadiña chota chanyiloña cheneni chawaYudeya. (Maku 15:1, 43) Dichi, Yosefu wadiña hakachi kawakulumpi, nawa wabulakeneña hamu nanguvulu wawaRoma. Chakadi nikujina, Yosefu niyena wadiña waheta.—Mat. 27:57.

Chota chaSanihedirini chejima chamuheleli Yesu. Antu amunichi chota akeñeleña nawu amujahi. Hela chochu, Yosefu amutena nawu “iyala wamuwahi nawa waloña.” (Luka 23:50) Kwambukaku nawakwawu amuchota chaSanihedirini, yena wadiña washinshika, wadiña nayilwilu yayiwahi nawa wovwahilileña nshimbi jaNzambi. Wadiña cheñi “nakutalila Wanta waNzambi,” dichaletesheli yekali kambanji kaYesu. (Maku 15:43; Mat. 27:57) Chakadi nikujina, wakeñeli nankashi nsañu yaYesu muloña wakeñeli chalala niwuñanji.

Yowanu 19:38 yahosha nawu Yosefu “wadiña kambanji kaYesu ilaña wadiswekeleña hamuloña wawoma watiyileñayi aYudeya.” Yumanyi yatiyileñayi Yosefu woma? Welukili aYudeya chamuheleliwu Yesu nichiyahañileñawu antu ejima amukuhweleleli musinagogi. (Yow. 7:45-49; 9:22) Kuhaña muntu musinagogi kwatalishili mukumukaana muntu, kumutondolwela, nikumuhela kudi akwawu aYudeya. Dichi, Yosefu watiyili woma kuhosha hatooka nindi wamukuhweleleli Yesu. Muloña wachinineña nindi akumuhaña mudimu nawa akumutambula chifulu.

Bayi neyi Yosefu diyi hohu watiyileña womaku. Yowanu 12:42 yahosha nawu, “antu amavulu kushilahu nianyuuli amukuhweleleli [Yesu], ilaña hamuloña wawaFwarisi hiyamwitejeli hamesu awantuku, achinineña nawu akenda kayihaña musinagogi.” Muntu mukwawu wadiña mukukala kwamuchidiwu wadiña Nikodemu, niyena wadiña wamuchota chaSanihedirini.—Yow. 3:1-10; 7:50-52.

Hela chakwila Yosefu wadiña kambanji, ilaña wedikili wanyi hatooka nakudishimuna. Waluwañesheli, muloña Yesu wahosheli nindi: “Muntu wejima wañitejaña kumesu awantu, ninami nawa nakamwiteja kumesu aTata yami wekala mwiwulu. Ilaña muntu wejima wankaanaña kumesu awantu, ninami nawa nakamukaana kumesu aTata yami wekala mwiwulu.” (Mat. 10:32, 33) Yosefu wamukaanini wanyi Yesu, ilaña wahamukili wanyi kumwiteja hamesu awantu. Indochu enu?

Yosefu welili chiwahi muloña Bayibolu yahosha nawu wetejeli wanyi mpuña yamukwatililiwu Yesu kudi chota chaSanihedirini.  (Luka 23:51) Hadaha, Yosefu wadiñaku wanyi hampinji yamukwatiliwu Yesu neyi chahoshañawu amakwawu. Hela chochu, Yosefu watela watiyili kutama chasompeliwu munjila yaheña, ilaña kwosi chuma chadi kwilayi.

Hampinji yafwiliyi Yesu, Yosefu walekeli kutiya woma nawa wakwashili atumbanji twaYesu. Chuma cheliliyi achimwekesha mumazu ekala haMaku 15:43 hahosha nawu: “Wamwekesheli wulobu nakuya kudi Pilatu nakulomba mujimba waYesu.”

Chinamwekani neyi Yosefu wadiñaku hampinji yafwiliyi Yesu. Mwamweni, welukileñahu dehi nindi Yesu nafwi henohu Pilatu kanda yeluki. Dichi, chelili Yosefu yalombi mujimba waYesu, nguvulu “wajinokeli neyi chakwila Yesu nafwi dehi.” (Maku 15:44) Neyi Yosefu wamweni Yesu chaabileñayi hamutondu wakuyandishila, komana yuma yamweniyi diyi yamuletesheli yadisololi nindi niyena wadiña kambanji? Hekwawu. Hayoyina mpinji, Yosefu welilihu chuma chimu. Walekeli kudisweka.

Nshimbi jawaYudeya jadiña jakwila nawu muntu neyi anamujahi atela kumujiika henohu itena kanda dihumi. (Kuhit. 21:22, 23) Ilaña aRoma wena alekeleña mujimba wambanji anakudikiwu kutokela hamutondu hela kumujiika kumajamu kwajiikañawu antu ejima. Yosefu yena hakeñeleña kumwila Yesu muniyi njilaku. Yosefu wadiña nejamu dakukelubula  mwilola kwakwihi nakwamujahililiwu Yesu. Chineli idi ijamu adiña kanda ajiikeñamu dehi muntu, chamwekesheli nawu Yosefu dihafuminiyi tuhu kuAramateya * nakuya kuYerusalema nawa waloñesheli idi iluña nindi dakujiikilamu chisaka chindi. (Luka 23:53; Yow. 19:41) Yosefu chamujiikiliyi Yesu mwijamu dindi dateleliwu kumujiikamu, wamwekesheli chisambu nawa washikijili wuprofwetu wahosha hadi Mesiya nawu akamujiika “namukwakuheta.”—Isa. 53:5, 8, 9.

Ansoneki ejima awana aNsañu Yayiwahi asonekeli nawu chelili mujimba waYesu anawufumishi dehi hamutondu, Yosefu wawuvuñili mwihina dadiwahi nakuwukamika mwijamu dindi. (Mat. 27:59-61; Maku 15:46, 47; Luka 23:53, 55; Yow. 19:38-40) Muntu mukwawu ashimunawu wamukwashili Yosefu wadiña Nikodemu, waleteli yuma yevumba dadiwahi. Chineli awantu ayedi adiña aheta, chinamwekani neyi hiyasendeli mujimba aweniku. Hadaha azatishili añamba kuwusenda nakuwujiika. Hela chakwila azatishili añamba, mudimu wazatiliwu awantu ayedi wadiña walema. Muntu wejima wakwatileña chibimbi wekalileña wamajilu mafuku 7 hakwila nawu yamwekeshi nindi wakwata chuma chamajilu. (Kuch. 19:11; Hag. 2:13) Chuma chamuchidiwu chaadi kuyiletesha kubula kwanakana chidika chaPaseka. Yosefu adi kumuhela kudi akwawu muloña wakumujiika Yesu. Ilaña haniyi mpinji, wadihanini kumujiika Yesu munjila yayiwahi nikudimwekesha nindi wadiña kambanji kaKristu hela chakwila akumuhela kudi akwawu.

Hanyima yakwila Yesu anamujiiki dehi, hosi hamutenawu cheñi Yosefu wakuAramateya muBayibolu nawa chumichi chaletesha antu kutoñojoka nawu: Chumanyi chamumwekeneni? Chikuma chidi chakwila nawu, tuneluki wanyi. Hela chochu, kwesekeja nansañu yitunahanjekihu, watela wadimwekesheli hatooka nindi himukwaKristu. Nawa, Hanyima yakumona yuma yejimiyi, watachikili kuhamuka nawa chikuhwelelu chindi chatoheli chatela chikehi. Welili chiwahi.

Iyi nsañu yinateli kutuletesha kudihula netu: Kudihu chuma chidi chejima chitwalemesha chidi neyi chifulu chitukweti, mudimu, maheta, kukeña chisaka, niwuswa wetu wutukweti kubadika kulemesha wubwambu wetu naYehova?