Kaposhi Kakutalila kaJanuary 1, 1918, katachikili namazu akwila nawu: “What will the year 1918 bring forth?” (Yumanyi yikumwekana muchaaka cha 1918.) Njita Yeneni yatwalekelihu muEurope, ilaña hakutachika kwanichi chaaka yuma yamwekeneña neyi yikuyiwahila aTudizi aBayibolu kushilahu niantu ejima mukaayi.

HaJanuary 8, 1918, Kajiña mpata Woodrow Wilson, mumazu indi alejeleñayi aU.S. Congress, wahosheli yikuma 14 yatoñojokeleñayi nindi yalema hela “yayiwahi nawa yikuleta kuwunda.” Welili nindi matuña akwati wubwambu, akeheshiku yitwa yanjita nikutuña nshimbi “yakukwatankana kwamatuña,” kwadi kukwasha “matuña amaneni nianyanya.” “Yikuma yindi 14” ayizatishili hakutuña mutayi waLeague of Nations nihakufwachika chitiyañenu chateneneñawu nawu Treaty of Versailles, chitiyañenu chakumanisha nachu Njita Yeneni.

Hela chakwila muchaaka chamanini mwadiña kukala, * aTudizi aBayibolu amwekeneña neyi akushakama mukuwunda, kwesekeja nakubulakana kwahachaaka kwawaWatch Tower Bible and Tract Society.

Haniku kubulakana kwadiñaku haJanuary 5, 1918, amayala amavulu aya mpuhu ahañiliwu haBeteli akeñeleña nawu kuloñesha kwikali mumakasa awu. Richard H. Barber nkoñi wendaña, walombeli hakutachika kuhanjeka. Hanyima yakushimuna chileji chanyidimu yazatiliwu yaaka yahitilihu, atachikili kutonda añimenu. Manakwetu Barber watondeli Joseph Rutherford niamanakwetu amakwawu 6. Nsompeshi wadiña kukabadi kawakwakudimbulula watondeli amayala 7, kushilahu niahañiliwu haBeteli. Akwakudimbulula ayishindili. Chineli antu amavulu atondeli Manakwetu Rutherford niamanakwetu 6 ashinshika, dichi akulumpi ayilishili kwikala anlomboli.

Amanakwetu amavulu adiña haniku kubulakana ahosheli nawu “kwadiña kupompa kwakuwahi hadi kapompa kwejima.” Ilaña hiyatwalekelihu kwikala namuzañaluku.

Atudizi aBayibolu adiña nakuhana mukanda waThe Finished Mystery hadi tukweji twatuvulu. Antu akeñeleña kudiza etejeli chalala chamuBayibolu chadiña muniwu mukanda.

Manakwetu E. F. nkoñi wendaña wakuCanada wahosheli hadi adisumbula etiyili hanyima yakutaña mukanda waThe Finished Mystery hadi nyilungu yitanu. Wahosheli nindi: “Ejima wawu ayedi akola chikupu kuspiritu nawa anakupaminaku.”

Iyala wumu watambwili mukanda nawa wamulejeliku ibwambu dindi nsañu yatañiliyi. Nsañu yadiñamu “yamushikili hamuchima.” Wahosheli nindi: “Chinendeleña Hetala damuChisatu, kudi chuma chanholokeleli hachifwiji, natoñojokeli nami hitafwali, ilaña wadiña mukanda ‘waThe Finished Mystery.’ Nawusendeli kwitala nawa nawutañili wejima. . . . Dihinelukili nami komana ntañishi diyi . . . wanatilili mukanda hanjanina muloña wakuhila . . . Muloña wanichi chuma cheliliyi, nakuhweleli chikupu nami nakwashi antu  amavulu kwikala nakuchiñeja kubadika yuma yejima yeliliyi muchihandilu chindi. . . . Tunakumushimeka Nzambi muloña wakuhila kwaniwu ntañishi.”

Yilwilu yaniwu ntañishi yadiña yatama. HaFebruary 12, 1918, akwanshimbi amuCanada alekesheli iwu mukanda nawu mwadiña nsañu yaletesheleña antu kudikaña nanfulumendi nikubula kudiñija munjita. Hashimbwili wanyi akwanshimbi amuUnited States niwena elili mwomumu. Añimenu amunfulumendi atachikili kukeñakeña kwadiña Beteli nitusanji twamuNew York, Pennsylvania nimuCalifornia, kulonda akeñi hakuyinkela nyiloña antu alombweleña mukuloñesha. HaMarch 14, 1918, akwaNshimbi amu U.S. Department alekesheli mukanda waThe Finished Mystery nawu nsañu yadiñamu yakañesheleña antu kuzuña njita nawa wafumpileña nshimbi yaEspionage Act.

HaMay 7, 1918, akwanshimbi ashimwini nawu ayikasi aGiovanni DeCecca, George Fisher, Alexander Macmillan, Robert Martin, Frederick Robison, Joseph Rutherford, William Van Amburgh, niClayton Woodworth. Ayinkeli muloña wakwila yuma yakaanishawu, kudikaña, kuletesha antu kudikaña, kubula kwovwahila, kukaana kuzata nyidimu yakukwasha mashidika nikwiñila wushidika muUnited States.” Muloña wawu atachikili kuwusompa haJune 3, 1918, ilaña adiña nakujinoka nawu hekwawu akuyiwana namuloña. Muloñadi?

Nsompeshi wamuUnited States washimwini nindi adiña nakufumpa Nshimbi yaEspionage Act, “yazatishileñawu hakwinka antu abulileña kwovwahila nshimbi nyiloña.” HaMay 16, 1918, izanvu dawakwanshimbi dakaanini kuhimpa nshimbi yadi kukiña antu asonekeleña “nsañu yalala, yadiña nankeñelu yayiwahi nawa yinateli kuhimpa yitoñojoka yawantu.” Mukanda waThe Finished Mystery niwena awuhanjekelihu. Wunsahu wawakwanshimbi amu U.S. Congress washimwini kutalisha haniwu mukanda nawu: “Mukanda wunasweji nankashi kufumpa nshimbi himukanda ‘waThe Finished Mystery’ . . . Iwu mukanda wunakuleñela amashidika kubula kwovwahila . . . kuyileñela antu kukaana kwiñila wushidika.”

HaJune 20, 1918, akwakukeñakeña antu afumpaña nshimbi mwituña ayiwanini amanakwetu 8 nanyiloña. Ifuku dalondelelihu, nsompeshi wakunkulwili muloña nindi ayikasi. Wahosheli nindi: “Iyi nsañu yamunsakililu yinakutandishawu awa amayala nikutiyakesha . . . yinasweji kutama chikupu kubadika chaambu chinakuleta Mashidika awaGerman. . . . Atela kuyibabesha chikupu.” Chimwahitili nyilungu yiyedi, awa amanakwetu 8 ayitwalili muFederal Penitentiary kuAtlanta, Georgia, nakuyikasa yaaka 10 nakushika ku 20.

Haniyi mpinji aTudizi aBayibolu ayikabishili chikupu. Atupokola atenañawu nawu Federal Bureau of Investigation (FBI) ayili nakukeñakeña nyidimu yazatileñawu nawa aleteli yipapilu yayivulu yawaniniwu yadiña nawunsahu. Iwu wunsahu wamwekesheli nawu amanakwetu akeñeleña kutwalekahu kushimwina.

 Mumukanda wawu wasonekeleliwu aFBI, mukulumpi wakupost office yaOrlando, muFlorida, wasonekeli nindi: “[Atudizi aBayibolu] anakushimwina kwitala nikwitala mutawuni nawa anakushimwinaña nankashi wufuku. . . . Chinakumwekana neyi aTudizi aBayibolu anakukeña kutwalekahu kushimwina hela chakwila anakuyikabisha.”

Mukulumpi wamashidika hamu naDipatimenti yaNjita ayisonekeleli aFBI wunsahu hamudimu wazatileñayi Frederick W. Franz, wenjili nakwikala membala Mwizanvu Dalombolaña. Mukulumpi wamashidika wasonekeli nindi: “F. W. Franz . . . wadiña nakulandisha nyikanda yayivulu ‘yaFinished Mystery’.”

Manakwetu Charles Fekel, wenjili nakwikala membala Mwizanvu Dalombolaña, niyena amukabishili chikupu. Akwanshimbi amukasili muloña wakuhana mukanda waThe Finished Mystery nawa hampinji yadiñayi mukaleya nyikanda yasonekeleñayi niyamutemesheleleñawu yejima ayilukileña. Amukasilili kuBaltimore, muMaryland kakweji kamu nawa amuteneneña nawu “Chilumbu wakuAustria.” Hampinji yashimwinineñayi atupokola mukaleya, wanukili mazu aPawulu ekala ha 1 Akorinda 9:16, ahosha nawu: “Oyihuñu yinakamona neyi nibula kushimwina nsañu yayiwahi!” *

Kubombela hakushimwina neyena, aTudizi aBayibolu adiña nakusoneka nyikanda nawu ayifumishi amanakwetu adiña mukaleya muAtlanta. Anna K. Gardner, wahosheli nindi: “Mpinji yejima kudi yuma yitwadiña nakwila. Hampinji yadiñawu amanakwetu mukaleya, twadiña namudimu wakufwachikisha antu. Twayileña kwitala nikwitala. Twafwachikishili antu amavulu chikupu. Twayilejeleña antu netu awa adiña akwaKristu alala nawa ayikasili chakadi muloña.”

Haniyi mpinji yakala, twapompeli kupompa kwamaneni mukulondashana kwakolesheleña amanakwetu kuspiritu. Kaposhi Kakutalila kashimwini nawu: “Apompeli kupompa kwamaneni kubadika ha 40 . . . munichi chaaka. . . . Yileji yamwekesheleña nawu antu avulili nankashi haniku kupompa. Hakusambila apompeleña hohu kasatu muchaaka, ilaña haniyi mpinji apompeleña kakweji nikakweji muchaaka.”

Antu adiña nampwila etejeleña nsañu yayiwahi. Hakupompa kumu kwadiña kuCleveland, muOhio, antu 1,200 apompeli nawa antu 42 apapatisheweli kushilahu nikansi weyala “wamweni kulema kwakumukalakela Nzambi kubadika antu amukaayi abulileña kumona kulema kwansañu yayishimwinineñawu.”

Chamanineña chaaka cha 1918, aTudizi aBayibolu amweni kukala kwabulili kukuhwelelawu. Yikulwa yikwawu yamuBrooklyn ayilandishili nawa kasanji keneni akitwalili kuPittsburgh, muPennsylvania. Aloñesheli nawu kukekala kubulakana kukwawu kwahachaaka haJanuary 4, 1919, iku antu alombweleña achidi mukaleya. Yumanyi yikumwekana?

Amanakwetu atwalekelihu kuzata mudimu wawu. Akuhweleleli chikupu nawu mukufuma yuma yayiwahi, dichi atondeli nsona yachaaka cha 1919 yahosheleña nawu: “Hikwakekala chitwa, chakachilawu nawu akukatishi nachu, chakakolaku.” (Isaya 54:17) Adiloñesheli hayuma yejima yikufumamu yadi kukolesha chikuhwelelu chawu nawa yadi kuyikolesha kukalakala mudimu wawu wadiña hambidi.